သတင်းနှင့် လှုပ်ရှားမှုများ

          စားသုံးသူရေးရာဦးစီးဌာန၊ ဟင်္သာတမြို့နယ်တာဝန်ခံမှ ( ၇ - ၁ - ၂၀၂၅ )ရက်နေ့၊ နံနက် (၁၀:၃၀)မိနစ်တွင် သက်ဆိုင်ရာဌာနဆိုင်ရာများနှင့် ပူးပေါင်း၍ ဟင်္သာတမြို့ပေါ်ရှိ ဘိလပ်မြေ ရောင်းချနေသောဆိုင်များအား ပစ္စည်းပြတ်လပ်မှုနှင့် ဈေးနှုန်းအတက်၊ အကျ ရှိ/ မရှိ အခြေအနေများအား ကွင်းဆင်းစစ်ဆေးခဲ့ပါသည်။

           စစ်ဆေးတွေ့ရှိချက်များအရ ဟင်္သာတမြို့ရှိ ဘိလပ်မြေရောင်းချနေသောဆိုင်များတွင် ယခင်ကဲ့သို့ရောင်းချရန် ဘိလပ်မြေထုတ်လုပ်သည့် စက်ရုံများမှ ပစ္စည်းမှာယူရာတွင် သယ်ယူပို့ဆောင်ရေး ကြန့်ကြာမှုများကြောင့် ပစ္စည်းရောက်ရှိမှုနောက်ကျခြင်း၊ လိုသလောက်မှာယူရရှိမှုမရှိဘဲခွဲတမ်းနှင့် သာရရှိခြင်းကြောင့် ဆိုင်များတွင် ပစ္စည်းများစွာ လက်ကျန်မရှိဘဲ အိတ်(၅၀)မှ အိတ်(၂၀၀)ကြားသာ လက်ကျန်ရှိကြောင်း၊ မိမိတို့ရောင်းချနေသည့် ဆိုင်များမှ ဝယ်ယူသုံးစွဲနေကြ သည့် ပြည်သူများအား ပစ္စည်းပြတ်လပ်မှုများ မဖြစ်စေရန်အတွက် မျှတစွာရောင်းချပေးခြင်း၊ မြို့ပေါ် ရှိ ဘိလပ်မြေ အရောင်းဆိုင်များတွင် ပစ္စည်းပြတ်တောက်သွားခြင်း မရှိကြောင်းနှင့် ဘိလပ်မြေဈေးမှာလည်း အနည်းငယ်မြင့်တက်လာကြောင်း၊ ထိုသို့မြင့်တက်သွားရခြင်းမှာလည်းစက်ရုံဈေးအနည်းငယ်မြင့်တက်လာခြင်း၊ ဝယ်လိုအားမြင့်လာခြင်းနှင့် ပစ္စည်းဝင်ရောက်မှု ရက်အနည်းငယ်နောက်ကျခြင်းတို့ကြောင့် ဈေးတက်ရခြင်းဖြစ်ကြောင်း ဟင်္သာတမြို့ပေါ်ရှိ ဘိလပ်မြေရောင်းချနေသော ဆိုင် (၃) ဆိုင်အား ဈေးကွက်စောင့်ကြည့် စစ်ဆေးခဲ့ခြင်းဖြင့် သိရှိရပါသည်။

DOCA(ဧရာဝတီ)

          ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင် မော်ကျွန်းမြို့နယ် တာဝန်ခံ ဦးမင်းဇော်လတ်သည် (၁၀.၁.၂၀၂၅ရက်နေ့ နေ့လယ်(၁၃:၃၀)နာရီအချိန်တွင် ပြန်ကြားရေးနှင့်ပြည်သူ့ဆက်ဆံရေး ဦးစီးဌာနတို့နှင့်ပူးပေါင်းကာ စားသုံးသူပြည်သူများအား မော်ကျွန်းမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လူထုအခြေပြုဗဟိုဌာန၊ Community Centre ခန်းမတွင် စားသုံးသူအသိပညာပေး  Talk  Show  ပြုလုပ်ခဲ့ပါသည်။

           ထိုသို့ပြောဆွေးနွေးရာတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်ဦးစီးမှူးမှ  စားသုံးသူအသိပညာပေး Talk Show ပြုလုပ်ရခြင်း၏ ရည်ရွယ်ချက်အားရှင်းလင်းပြောကြားပြီး၊ စားသုံးသူရေးရာဦးစီးဌာန မြို့နယ်တာဝန်ခံမှ ဌာန၏မျှော်မှန်းချက်၊ ရည်မှန်းချက်များအား ရှင်းလင်းပြောကြားခဲ့ပြီး၊ စီးပွားရေးနှင့်ကူးသန်း ရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေးဥပဒေ ၂၀၁၉ ပါပြဌာန်းချက်များမှ အခန်း(၉)ပါ စားသုံးသူ၏အခွင့်အရေးနှင့် တာဝန်များ၊ ဥပဒေအခန်း(၁၀)ပါ စီးပွားရေးလုပ်ငန်းရှင်၏တာဝန်များနှင့် ဥပဒေအခန်း(၂၃)ပါ တားမြစ်ချက်များ၊ ဥပဒေအခန်း(၂၄)ပါ ပြစ်မှုပြစ်ဒဏ်များ၊  ဥပဒေအခန်း(၁၈)ပါ ကုန်အညွှန်း အမှတ်အသားဖော်ပြခြင်းနှင့်စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ-၄၁ ပုဒ်မခွဲ(ခ)နှင့် (ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြစ်စေ၊ မြန်မာဘာသာနှင့် အခြားဘာသာတစ်ခု(သို့) တစ်ခုထက်ပို၍တွဲလျှက်ဖြစ်စေ၊ ရေးသားဖော်ပြရမည်ဖြစ်ပြီး၊ ကုန်စည်အမျိုးအစား အလိုက်သတ်မှတ်ထားသည့် ဥပဒေများနှင့်အညီ လိုက်နာဆောင်ရွက်ကြရန် ဥပဒေတားမြစ်ချက်များအား လိုက်နာဆောင်ရွက် မှုမရှိပါက ပြစ်မှုပြစ်ဒဏ်များအတိုင်း ဆောင်ရွက်သွားမည်ဖြစ်ကြောင်း၊ စီးပွားရေးလုပ်ငန်းရှင်များအနေဖြင့် စားသုံးသူ ကာကွယ်ရေး ဥပဒေပါအချက်အလက်များသိရှိလိုပါက မြို့နယ်စားသုံးသူရေးရာ တာဝန်ခံရုံးတွင်လည်းကောင်း၊ စားသုံးသူရေးရာဦးစီးဌာနရုံးချုပ်၏ www.doca. gov.mm web site တွင် ဝင်ရောက်လေ့လာနိုင်ပါကြောင်း၊ စားသုံးသူများနစ်နာမှုရှိလာပါက စားသုံးသူသတင်းပြန်ကြားရေးနှင့် တိုင်ကြားမှု လက်ခံဆောင်ရွက်ရေးစင်တာ CICC သို့ လူကိုယ်တိုင်ဖြစ်စေ၊ တယ်လီဖုန်းဖြင့်ဖြစ်စေ တိုင်ကြားနိုင်ကြောင်း အသိပညာပေးဆွေးနွေးခဲ့ကြောင်းသိရှိရပါသည်။

DOCA(ဧရာဝတီ)

           စားသုံးသူရေးရာဦးစီးဌာန၊ ဧရာဝတီတိုင်းဒေသကြီး ၊ မအူပင်ခရိုင်ဦးစီးမှူးရုံးမှ တာဝန်ရှိသူများသည် (၈-၁-၂၀၂၅)ရက်နေ့၊ နံနက်(၀၉:၀၀)နာရီအချိန်တွင် စက်မှုလုပ်ငန်းများ၌ အသုံးပြုနိုင်ရေး ရောင်းချပေးသော စက်မှုလုပ်ငန်းသုံးစားအုန်းဆီများကို မြို့နယ်အသီးသီးသို့ စနစ်တကျထုတ်ယူနိုင်ရေးနှင့် သတ်မှတ်ဈေးနှုန်းအတိုင်း ငွေချေဝယ်ယူနိုင်ရန်အတွက် လစဉ် စိစစ်ဆောင်ရွက်လျက်ရှိပြီး မိမိတို့၏လုပ်ငန်းများ၌ အမှန်တကယ်အသုံးပြုမှုရှိ/ မရှိကို မြေပြင်ကွင်းဆင်းစစ်ဆေးခဲ့ကြောင်း သိရသည်။

              မအူပင်ခရိုင်အနေဖြင့် စက်မှုလုပ်ငန်းသုံးများအတွက် ခွဲဝေရရှိသည့် လုပ်ငန်းရှင် ၃၈၉ဦး စားအုံးဆီ ပေပါ ၉၄ ပေအ် တန်အားဖြင့် ၁၆.၈၈ ကို မြို့နယ်အလိုက် စနစ်တကျ ခွဲဝေထုတ်ယူစေပြီး၊ ရရှိသော စက်မှုလုပ်ငန်း ရှင်များထံ ဆက်သွယ်၍ သတ်မှတ်ဈေးအတိုင်း စနစ်တကျ ငွေရပြေစာဖြင့်ငွေချေပြီး ထုတ်ယူနိုင်ရန် လစဉ်စိစစ်ကြပ်မတ် ဆောင်ရွက်ပေးလျက်ရှိသည်။

           ကွင်းဆင်းဆောင်ရွက်မှုအနေဖြင့် ပန်းတနော်မြို့နယ်တာဝန်ရှိသူ ဦးအောင်ကျော်သက်မှ ကွင်းဆင်း ရာ ဇန်နဝါရီလအတွက် ရရှိသော ပန်းတနော်မြို့နယ် စားသောက်ကုန် ဝန်ဆောင်မှုလုပ်ငန်းများ ဖြစ်သော အနော်ရထာလမ်း၊ အရှေ့ပိုင်းရပ်ကွက်ရှိ နောင်ရိုး စားသောက်ကုန် လုပ်ငန်း၊ ဘုရင့်နောင်လမ်း၊ အရှေ့ပိုင်ရပ်ကွက်ရှိ ရတနာပုံ စားသောက်ကုန်လုပ်ငန်း၊ ကမ်းနားလမ်းရှိ ဗီးနပ် စာသောက်ကုန်လုပ်ငန်း၊ ဒေါ်ခိုင်ဇာလင်း ပေါင်မုန့်လုပ်ငန်းများသို့ စက်မှုလုပ်ငန်းသုံးများအတွက် ရရှိသော စားအုန်းဆီများကို အမှန်တကယ်အသုံးပြုခြင်း ရှိ/မရှိကို စစ်ဆေးခြင်း၊ စားသုံးသူများဘေး အန္တရာယ်ကင်း ရှင်းစေရန်အတွက် ထုတ်လုပ်သည့်ကုန်စည်များကို အရည်အသွေးကောင်းမွန်ပြည့်ဝပြီး သန့်ရှင်းလတ်ဆတ် သောကုန်ကြမ်း များဖြင့် သန့်ရှင်းသပ်ရပ်စွာ သုံးစွဲထုတ်လုပ်ကြရန်နှင့် ဝန်ဆောင်မှုပြုနိုင်ရန် လိုအပ် ကြောင်း၊ အစားအစာများ ထိတွေ့ကိုင်တွယ်မှု ပြုလုပ်သူလူပုဂ္ဂိုလ်များမှာလည်း တကိုယ်ရေသန့်ရှင်း ကျန်းမာရန်လိုအပ်ကြောင်း၊ လုပ်ငန်းရှင်များအနေဖြင့် စီးပွားရေးကျင့်ဝတ်စည်းကမ်းများနှင့်အညီ ဆောင်ရွက်ကြရန်လိုအပ်ကြောင်း မှာကြားဆွေးနွေးခဲ့ပြီး လုပ်ငန်းရှင်(၄)ဦး၏ လုပ်ငန်းခွင်များတွင် ထုတ်လုပ်မှုအဆင့်ဆင့်တို့အား ကြီးကြပ်စစ်ဆေး ဆောင်ရွက်ခဲ့ကြောင်းသိရှိရပါသည်။

DOCA(ဧရာဝတီ)

         (၁၁.၁.၂၀၂၅) ရက်နေ့ နံနက်(၁၀:၀၀) နာရီက ဓနုဖြူမြို့ပေါ် ရပ်ကွက်(၃)တွင် အိမ်ဆောက်ပစ္စည်း အမျိုးမျိုးရောင်းချသော  ဦးဟန်မြင့်+ဒေါ်အမာစိန်၊ အဏ္ဏဝါ၊ စူပါအောင် ဘိလပ်မြေအရောင်း ဆိုင် ၃ ဆိုင်သို့သွားရောက်၍ စားသုံးသူရေးရာဦးစီးဌာန၊ စည်ပင်သာယာရေးအဖွဲ့တို့ ပူးပေါင်း၍ ဓနုဖြူမြို့နယ် အတွင်းရောင်းချနေသော ဘိလပ်မြေဈေးနှုန်း ဈေးကွက်အခြေအနေ၊ ဘိလပ်မြေဝယ်ယူရောင်းချမှု ပြတ်လပ်မှုရှိ/ မရှိကို ကွင်းဆင်းစစ်ဆေးခဲ့ကြကြောင်းသိရသည်။

           ကွင်းဆင်းစစ်ဆေးရာတွင် ဓနုဖြူမြို့နယ်ဦးစီးမှူး ဦးဝင်းမင်းစိုးက ဓနုဖြူမြို့နယ် ဈေးကွက်အတွင်း  ဘိလပ်မြေရောင်းချနေသောလုပ်ငန်းရှင်နှင့် တွေ့ဆုံ၍ ရောင်းဝယ်ဖြန့်ဖြူမှု အခြေအနေများကိုမေးမြန်းခဲ့ပြီး၊  ဘိလပ်မြေအရောင်းဆိုင်များတွင် ဘိလပ်မြေလက်ကျန်များရှိပြီး ဆင်မင်း၊ AlPACHE  နှင့် ALPHA သုံးမျိုးရောင်းချခြင်းကို တွေ့ရှိရပြီး AlPACHE ယခင်ရောင်းဈေး ၁၇၀၀၀ကျပ်၊ ယခုဈေး ၂၃၅၀၀ကျပ်ဖြစ်ပြီး ငွေကျပ် (၆၅၀၀)မြှင့်တက်လာကြောင်း၊ ဆင်မင်း ယခင်ဈေး ၁၆၀၀၀ကျပ်၊ ယခုဈေး ၁၉၅၀၀ကျပ်ဖြစ်ပြီး ငွေကျပ်(၃၅၀၀)မြင့်တက်ကြောင်း၊   Alpha ယခင်ဈေး ၁၇၀၀၀ကျပ်၊ ယခုဈေး ၂၃၅၀၀ကျပ်ဖြစ်ပြီး ငွေကျပ် (၆၅၀၀)မြှင့်တက်နေကြောင်း စစ်ဆေးတွေ့ရှိရပြီး ယခုလို ဈေးမြင့်တက်ရခြင်းမှာ ရန်ကုန်မှ မှာယူရောင်းချနေရပြီး ပစ္စည်းမှာယူရရှိမှု လိုသလောက်ရရှိမှုမရှိပဲ စော်ဘွားကြီးကုန်း ပစ္စည်းအရောင်းဆိုင်များမှ ယခင်မှာယူခြင်းထက် လက်ကားဈေးမြင့်တက်လာခြင်းကြောင့် ဈေးမြင့်တက်ခြင်းဖြစ်ကြောင်း သိရှိရပါသည်။

DOCA(ဧရာဝတီ)

            ခနောင်ကျေးရွာ အခြေခံမူလတန်းကျောင်းတွင်  ၂၀၂၅ခုနှစ် ဇန်နဝါရီလ (၁၀)ရက် နေ့ နံနက် (၁၀:၀၀)နာရီအချိန်တွင် ကျောင်းသား/ ကျောင်းသူ (၇၅)ဦးအား စားသုံးသူကာကွယ်ရေး အသိပညာပေးဟောပြောကျင်းပခဲ့ကြောင်းသိရသည်။

           အဆိုပါဟောပြောပွဲတွင် စားသုံသူရေးရာဦးစီးဌာနမှ ကျိုက်လတ်မြို့နယ်တာဝန်ခံ  ဦးမိုးမင်းသန်းသည် စားသုံးသူကာကွယ်ရေး၏အဓိပ္ပာယ် မျှော်မှန်းချက်၊ ရည်မှန်းချက်အား ပြောကြားခြင်း၊ ကျောင်းသား/ ကျောင်းသူများအား စားသုံးသူကာကွယ်ရေး ဥပဒေပါ အခန်း(၉) ပုဒ်မ(၁၉) ပါ အကြောင်းအရာများအရ စားသုံးသူများလိုက်နာရမည့် အကြောင်းအရာများအား ရှင်းလင်းပြောကြားခြင်း၊ ကုန်အညွန်းအမှတ်အသားဆိုင်ရာနှင့် အစားအသောက်များအား ရွေးချယ်စားသောက်ရမည့် သိကောင်းစရာများအား ပြောကြားခြင်းနှင့် ကုန်စည်/ ဝန်ဆောင်မှု များ ဝယ်ယူသုံးစွဲရာတွင် နစ်နာမှုများရှိပါက “၁၅၃၅” သို့ ခေါ်ဆို၍ တိုင်ကြားနိုင်ကြောင်း အသိပြောကြားခဲ့သည်ဟု သိရှိရပါသည်။

DOCA(ဧရာဝတီ)