သတင်းနှင့် လှုပ်ရှားမှုများ

             မွန်ပြည်နယ်၊ မုဒုံမြို့နယ်တွင် (၇၈)နှစ်မြောက် ပြည်ထောင်စုနေ့ကို ကြိုဆိုဂုဏ်ပြုသောအားဖြင့် ကျေးရွာစာကြည့်တိုက်အသစ်ဖွင့်ပွဲ အခမ်းအနားကို ၇.၂.၂၀၂၅ ရက်နေ့ နံနက်(၀၈း၀၀) နာရီအချိန်တွင် အဆိုပါစာကြည့်တိုက်ရှေ့၌ ကျင်းပခဲ့သည်။

            ပထမဦးစွာ မုဒုံမြို့နယ်၊ ဘဲရမ်းကျေးရွာ ပညာပျိုးခင်း စာကြည့်တိုက် အဆောက်အအုံအသစ်ကို မွန်ပြည်နယ်ဝန်ကြီးချုပ် ဦးအောင်ကြည်သိန်း၊ ပြည်နယ်တရားလွှတ်တော် တရားသူကြီးချုပ် ဦးညီညီစိုး၊ လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီးကျော်စွာမြင့်၊ လူမှုရေးရာဝန်ကြီး ဦးစောကြည်နိုင်၊ သယံဇာတရေးရာဝန်ကြီး ဒေါက်တာအောင်မြတ်ကျော်စိန် တို့မှ ဖဲကြိုးဖြတ်ဖွင့်လှစ်ပေးခဲ့ကြသည်။ ထို့နောက် ပညာပျိုးခင်းစာကြည့်တိုက်၏ ကမ္ဗည်းမော်ကွန်းအား ပြည်နယ်ဝန်ကြီးချုပ်နှင့် ပြည်နယ်အစိုးရအဖွဲ့ဝင် ဝန်ကြီးများက အမွှေးနံ့သာရည်ဖြင့် ပက်ဖျန်းခဲ့ကြပြီး စာကြည့်တိုက်အတွင်း လှည့်လည်ကြည့်ရှုခဲ့ကြောင်း သိရှိရပါသည်။

DOCA(မွန်)

              ပန်းတနော်မြို့နယ်၊ မြို့မ စျေးကြီး အတွင်း/ အပြင် လူသုံးကုန်၊ စားသောက်ကုန်နှင့် ဆေးမျိုးစုံ ရောင်းချနေသော ဆိုင်များသို့ ကွင်းဆင်း၍ လက်ရှိရောင်းချနေသော ဆပ်ပြာခဲ များ၊ စားသုံးဆီ များ Bella Plus Plaster နှင့် အခြားအမှတ် တံဆိပ်ပါ Plaster များတွင် ဆေးဝါးမှတ်ပုံတင် ရှိ/မရှိ၊ ကုန်အညွှန်း အမှတ်အသား ပြည့်စုံမှု ရှိ/မရှိတို့ကို (၃.၂.၂၀၂၅)ရက်နေ့ နံနက်ပိုင်းက ကွင်းဆင်းစစ်ဆေး ဆောင်ရွက်ကြောင်း သိရသည်။

           ကွင်းဆင်းစစ်ဆေးရာ စားသုံးသူရေးရာဦးစီးဌာနမှ ဦးအောင်ကျော်သက် မြို့နယ်တာဝန်ခံနှင့်    အစားအသောက်နှင့် ဆေးဝါးကွပ်ကဲရေးဦးစီးဌာနမှ တာဝန်ရှိသူတို့ ဆေးဆိုင်(၂)ဆိုင်နှင့် အလှကုန်ဆိုင် (၄)ဆိုင်၊ လူသုံးကုန်ဆိုင် (၃)ဆိုင်မှ ရောင်းချနေသော ကုန်စည်များတွင် ကုန်အညွှန်းအမှတ်အသား ဖော်ပြပါဝင်ခြင်းရှိ/မရှိ၊ ဆေးဝါးဆိုင်ရာ ထောက်ခံချက်အမှတ်ပါဝင်ခြင်း ရှိ/မရှိ၊ သက်တမ်းလွန် အလှကုန်များ ရှိ/မရှိတို့ကို စစ်ဆေးခဲ့ကြသည်။

             ဆက်လက်၍ စားသုံးသူမိဘပြည်သူများဘေးအန္တရာယ်ကင်းရှင်းစေရန်အတွက် ဈေးကွက်အတွင်း ရောင်းချနေ သော ကုန်စည်များပေါ်တွင် ကုန်စည်အမျိုး အစားကိုလိုက်၍ ကုန်အညွှန်းအမှတ်အသားများ ပြည့်စုံမှန် ကန်စွာဖော်ပြရန် တရားမဝင်ကုန်စည်များအား တင်သွင်းရောင်းချခြင်းမပြုရန်၊ စီးပွားရေး လုပ်ငန်းရှင်များ အနေဖြင့်ထုတ်ပြန်ထားသောညွှန်ကြားချက်များအတိုင်း လိုက်နာ ဆောင်ရွက် ရန်၊  ကုန်စည်နှင့်စပ်လျဉ်း၍ အာမခံချက်ပေးရာတွင် စားသုံးသူများ စိတ်ကျေနပ်မှုရှိစေရေး နှင့်သတ်မှတ် အရည်အသွေးပြည့်မီသော ကုန်စည်များကိုသာရောင်းချရန်နှင့် စားသုံးသူကာကွယ်ရေးဥပဒေပါ စီးပွားရေး လုပ်ငန်းရှင်၏တာဝန်များအား လိုက်နာဆောင်ရွက်ရန်တို့အား အသိပညာပေးဆွေးနွေးခဲ့ပြီးနောက် ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ကြကြောင်းသတင်းရရှိပါသည်။

DOCA (ဧရာဝတီ)

          စားသုံးသူရေးရာဦးစီးဌာန၊ရှမ်းပြည်နယ်ဦးစီးမှူးရုံးမှစစ်ဆေးရေးအရာရှိ ဒေါ်တင်တင်အေး ဦးဆောင်သော ဝန်ထမ်းများသည် ဖေဖော်ဝါရီလ (၃)ရက်နေ့၊ နံနက်(၁၁:၃၀) အချိန်တွင် တောင်ကြီးမြို့နယ် ၊အခြေခံပညာအထက်တန်း ကျောင်း(ပလီလင်း) ကျောင်းမုန့်ဈေးတန်းများ အား သွားရောက်စစ်ဆေးခဲ့ပါသည်။

          အဆိုပါဆိုင်ပိုင်ရှင်များအား ကုန်အညွှန်းအမှတ်အသား ပြည့်စုံစွာဖော်ပြထားခြင်း ၊ စားသုံးသူ ဘေးအန္တရာယ် ဖြစ်စေနိုင်သော မုန့်များရောင်းချခြင်းရှိ/မရှိတို့အား စစ်ဆေးခဲ့ပြီး သတ်မှတ်ထားသော စံချိန်စံနှုန်းနှင့် ကိုက်ညီ၍ သက်ဆိုင်ရာဌာနများမှ ခွင့်ပြုထားသော အစားအသောက်များကိုသာ တင်သွင်းရောင်းချစေရန် အသိပညာပေးခြင်းတို့ကို ဆောင်ရွက်ခဲ့ပါသည်။

                 DOCA(ရှမ်း)

          ရှမ်းပြည်နယ် (အရှေ့ပိုင်း)၊ ကျိုင်းတုံမြို့၊ စားသုံးသူရေးရာဦးစီးဌာန၊ ဒုတိယပြည်နယ် ဦးစီးမှူးရုံးမှ ဝန်ထမ်းများသည် ၂၀၂၅ခုနှစ်၊ ဖေဖော်ဝါရီလ (၃)ရက်နေ့၊ နေ့လည် (၁၆:၀၀)နာရီ အချိန် တွင် ကျိုင်းတုံပညာရေးဒီကရီကောလိပ်၊ ပညာ့ဗိမာန်ခန်းမ၌ စားသုံးသူကာကွယ်ရေးအသိပညာပေး ဟောပြောပွဲကို ကျင်းပပြု လုပ်ခဲ့ပါသည်။ အဆိုပါ ဟောပြောပွဲသို့ တက်ရောက်သည့် ဆရာ၊ ဆရာမ (၁၈၀)ဦးအား လက်ကမ်းစာစောင်များ ဖြန့်ဝေပေးအပ်ကာ ဟောပြောပွဲအား ကျင်းပပြုလုပ်ခဲ့ပါသည်။

          ယင်းဟောပြောပွဲတွင် ရှမ်းပြည်နယ် (အရှေ့ပိုင်း)၊ စားသုံးသူရေးရာဦးစီးဌာန၊ ဒုတိယပြည်နယ် ဦးစီးမှူးရုံးမှ ဦးစီးမှူး ဦးအောင်လင်းဦးက စားသုံးသူကာကွယ်ရေးဆိုင်ရာလုပ်ငန်းနှင့် ပတ်သက်၍ ဆရာ၊ ဆရာမများအား အသိပညာပေး ဟောပြောခဲ့ပါသည်။ စားသုံးသူကာကွယ်ရေးနှင့် ပတ်သက်၍ စားသုံးသူကာကွယ်ရေးဥပဒေပြဌာန်းချက်ပါ စားသုံးသူ၏ အဓိပ္ပာယ်ဖွင့်ဆိုချက်များ၊ စားသုံးသူ အခွင့်အရေးနှင့်တာဝန်များ၊ စီးပွားရေး၏လုပ်ငန်းရှင်၏တာဝန်နှင့်ဝတ္တရားများ၊ ကုန်စည်တစ်ခုကို ဝယ်ယူမည်ဆိုပါက စစ်ဆေးကြည့်ရှုရမည့် သိသင့်သိထိုက်သည့်အချက်များ၊ ဘေးဥပါဒ်အန္တရာယ် ဖြစ်စေနိုင်သည့် အစားအစာများနှင့် စားသုံးရန် သင့်/မသင့် သိရှိသင့်သည့် ကုန်အညွှန်းအမှတ် အသား ပါအချက်များအား ရှင်းလင်းပြောကြားပြီး ထောက်ခံချက်ရှိသော အစားအစာနှင့် ထောက်ခံချက်မရှိ သော အစားအစာများကို ပုံများနှင့်တကွ ပြသခဲ့ပါသည်။

          ယင်းနောက် သိကောင်းစရာများဖြစ်သော ဆိုးဆေး၊ ကြာရှည်ခံဖော်မလင်ဆေးနှင့် ဟင်းချိုမှုန့် ၏ ကျန်းမာရေးဆိုင်ရာအန္တရာယ်ရှိမှုများကို ရှင်းလင်းပြောကြားခဲ့ပြီး စားသုံးသူကာကွယ်ရေး အသိပညာပေးဟောပြောပွဲကို  (၁၇:၀၀)နာရီအချိန် တွင် ရုတ်သိမ်းခဲ့ပါသည်။

                 DOCA(ရှမ်း)

စားသုံးသူရေးရာဦးစီးဌာန၊ ကလောခရိုင်ဦးစီးမှူးရုံး(အောင်ပန်း)မှ စစ်ဆေးရေးအရာရှိနှင့် ဝန်ထမ်းများသည်(၃. ၂. ၂၀၂၅)ရက်နေ့၊ နံနက်(၁၀း၀၀)နာရီအချိန်တွင် ကလောမြို့ပေါ်ရှိ ကုန်စုံဆိုင် များအား အလှကုန်ပစ္စည်းအမျိုးမျိုးကို အထူးပြု၍ ဈေးကွက်စောင့်ကြည့်စစ်ဆေးခြင်း ဆောင်ရွက် ခဲ့ပါသည်။

ထိုသို့စစ်ဆေးရာတွင် ဈေးကွက်အတွင်းအစားအသောက်နှင့် ဆေးဝါးကွပ်ကဲရေးဦးစီးဌာနမှ စားသုံးရန်/သုံးစွဲရန်မသင့်တားမြစ်ထားသောကုန်စည်များ၊သက်တမ်းလွန်ကုန်စည်များ ၊ကုန်အညွှန်း အမှတ်အသားပြည့်စုံစွာဖော်ပြခြင်းမရှိသောကုန်စည်များနှင့်တရားမဝင်တင်သွင်းလာသောကုန်စည် များရောင်းချမှုမရှိစေရေးနှင့်ဒေသတွင်းထုတ် ကုန်စည်လုပ်ငန်းရှင်များအား စားသုံးသူရေးရာဦးစီး ဌာနနှင့်ချိတ်ဆက်ပေးပါရန် အသိပညာပေးဆွေးနွေးခဲ့ကြောင်းသိရှိရပါသည်။

DOCA(ရှမ်း)