သတင်းနှင့် လှုပ်ရှားမှုများ

          စားသုံးသူကာကွယ်ရေးဥပဒေပုဒ်မ ၁၊ ပုဒ်မခွဲ(ခ) အရ ၊ အခန်း(၁၈)ပါ ကုန်အညွှန်းအမှတ် အသားဆိုင်ရာ ပြဋ္ဌာန်းချက်များသည် ဥပဒေပြဋ္ဌာန်းပြီး တစ်နှစ်ပြည့်မြောက်ပြီးသည့် နေ့ရက် ဖြစ်သော ၂၀၂၀ ခုနှစ်၊ မတ်လ ၁၆ ရက်နေ့တွင် အာဏာတည်ပြီး ဖြစ်ပါသည်။ စားသုံးသူ ကာကွယ်ရေးဥပဒေ ပုဒ်မ ၄၃ အရ စီးပွားရေးလုပ်ငန်းရှင်သည် ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ ကုန်စည်များတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြား ဘာသာတစ်ခု သို့မဟုတ် တစ်ခုထက်ပို၍ တွဲလျှက်ဖြစ်စေ ဖော်ပြရာ၌ သတ်မှတ်ချက်များနှင့်အညီ အခက်အခဲမရှိလိုက်နာဆောင်ရွက်နိုင်ရန် ကုန်စည်အမျိုးအစားအလိုက်အုပ်စု(၈)ခုခွဲ၍ အသေးစိတ် ညွှန်ကြားချက်များကို  မြန်မာနိုင်ငံစားသုံးသူကာကွယ်ရေးကော်မရှင်မှ ၂၀၁၉ ခုနှစ်၊ ဒီဇင်ဘာလ   ၃ ရက်နေ့တွင် ညွှန်ကြားချက်အမှတ် ၂/၂၀၁၉ ကို ထုတ်ပြန်ပေးခဲ့ပြီးလည်း ဖြစ်ပါသည်။

          စားသုံးသူကာကွယ်ရေးဥပဒေပါ စားသုံးသူအခွင့်အရေးများ အပြည့်အဝ ရရှိစေရန်၊ စားသုံးသူများ ဘေးအန္တရာယ်ကင်းရှင်းရေး၊ ကျန်းမာရေး၊ စိတ်ကျေနပ်မှုရရှိစေရေး အတွက် အာမခံချက်ပေးနိုင်သော အရည်အသွေးမြင့်မားသည့် ကုန်စည် သို့မဟုတ် ဝန်ဆောင်မှုများကို ဖော်ဆောင် ဖြည့်ဆည်းပေးနိုင်စေရန်၊ စီးပွားရေးလုပ်ငန်းရှင်များ အနေဖြင့် ဥပဒေနှင့်အညီ ဆောင်ရွက်စေရန်၊ စားသုံသူတို့ကို ဘေးအန္တရာယ်ကင်းရှင်းမှုမရှိသော ကုန်စည် သို့မဟုတ် ဝန်ဆောင်မှုများ သုံးစွဲခြင်းကြောင့် ဖြစ်ပေါ်လာသော နစ်နာဆုံးရှုံးမှုများ ကာကွယ်ပေးရန်၊ ဘေးအန္တရာယ်ဖြစ်စေသော ကုန်စည် သို့မဟုတ် ဝန်ဆောင်မှုများနှင့်စပ်လျဉ်း၍ အမြန်ဆုံးအရေးယူ ဆောင်ရွက်မှုများလုပ်ဆောင်ရန် ရည်ရွယ်၍ မန္တလေးတိုင်းဒေသကြီးအတွင်းတွင် ဘဏ္ဍာရေးနှစ် အလိုက် စားသုံးသူရေးရာကော်မတီဥက္ကဋ္ဌထံတင်ပြ၍ ခွင်ပြုချက်ရယူပြီး ဦးစားပေး ကုန်စည်များ သတ်မှတ်လျက် သက်ဆိုင်ရာဌာနများနှင့်ပူးပေါင်းကာ ဈေးကွက်ရောက်ပြီး ကုန်စည်များကို စောင့်ကြည့်စစ်ဆေးလျက်ရှိရာ ၂၀၂၄-၂၀၂၅ ဘဏ္ဍာရေးနှစ်၊ ဧပြီလတွင် အသင့်သောက်အချိုရည် အမျိုးမျိုး၊ မေလနှင့် ဇွန်လတွင် အရန်သင့်နှင့်အသင့်စားမုန့်အမျိုးမျိုး၊ ဇူလိုင်လ နှင့် ဩဂုတ်လတွင် အဟာရဖြည့်စွက်စာအမျိုးမျိုး၊ စက်တင်ဘာလ တွင် ကလေးအသုံးအဆောင် ပစ္စည်းအမျိုးမျိုး၊ အောက်တိုဘာလတွင် ဟင်းလျာများတွင် အရောင်၊ အနံ့အရသာ အတွက် အသုံးပြုသောပစ္စည်း အမျိုးမျိုး၊ နိုဝင်ဘာလတွင် စားသုံးဆီအမျိုးမျိုး၊ ဒီဇင်ဘာလတွင် အိမ်သုံးလျှပ်စစ်ပစ္စည်းအမျိုးမျိုး၊ ဇန်နဝါရီလ တွင် အလှကုန်ပစ္စည်းအမျိုးမျိုးနှင့် လက်ရှိကာလဖြစ်သော ဖေဖော်ဝါရီလ တွင် သက်ဆိုင်ရာဌာနများမှ စားသုံးရန်မသင့်ထုတ်ပြန်ထားသော ကုန်ပစ္စည်းများအား ဥပဒေများနှင့် အညီ ဖြစ်စေရေး ဈေးကွက်စောင့်ကြည့်စစ်ဆေးလျက်ရှိပါတယ်။

          မန္တလေးတိုင်းဒေသကြီးအတွင်းရှိ လုပ်ငန်းများနှင့်ကုန်စည်အမျိုးအစားအားလုံး ရာခိုင်နှုန်းပြည့် ကုန်အညွှန်းအမှတ်အသား ဖော်ပြနိုင်စေရန်အတွက် အစီအစဉ်အသစ်တစ်ရပ် တိုးမြှင့်ဆောင်ရွက် သည့်အနေဖြင့် ကုန်အညွှန်းအမှတ်အသား စစ်ဆေးဆောင်ရွက်မှုများနှင့် စပ်လျဉ်း၍ ယခင်က ဈေးကွက်ရောက်ပြီး ကုန်စည်များကို စစ်ဆေးဆောင်ရွက်သည့်စနစ် (Post Market Surveillance) ဖြင့် အဓိကထား စစ်ဆေးခဲ့ပြီး ယခုအခါ ပြည်တွင်း၌ ကုန်စည်ထုတ်လုပ်သည့် လုပ်ငန်းများ၊ ပြည်ပမှ ကုန်စည်တင်သွင်းဖြန့်ဖြူးသည့်လုပ်ငန်းများအား ဈေးကွက်မရောက်မီ စစ်ဆေးသည့်စနစ် (Pre-Market Surveillance) ဖြင့် စစ်ဆေးဆောင်ရွက်ခြင်းအား ကုန်စည် ထုတ်လုပ်သည့်လုပ်ငန်း များ၊ စက်ရုံများ၊ ကုမ္ပဏီများ၊ ပြည်ပမှ ကုန်စည်တင်သွင်းဖြန့်ဖြူးသည့် လုပ်ငန်းစာရင်းများပြုစု၍ လအလိုက် အကောင်အထည်ဖော် ဆောင်ရွက်မည့် လျာထားချက်များသတ်မှတ်ကာ လုပ်ငန်း စီမံချက်ရေးဆွဲ၍ စားသုံးသူရေးရာကော်မတီဥက္ကဋ္ဌထံတင်ပြခွင့်ပြုချက်ရယူပြီး စစ်ဆေးဆောင်ရွက် ခြင်းများအား ၂၀၂၄ ခုနှစ်၊ ဖေဖော်ဝါရီလမှ စတင်၍ သက်ဆိုင်ရာ မိတ်ဖက်ဌာနများဖြစ်သည့် အထွေထွေအုပ်ချုပ်ရေးဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ စည်ပင်သာယာရေး ကော်မတီ၊သယံဇာတနှင့်သဘာဝပတ်ဝန်းကျင်းထိန်းသိမ်းရေးဦးစီးဌာနတို့နှင့်ပူးပေါင်း၍ ဆောင်ရွက်လျက် ရှိရာ ၂၀၂၅ခုနှစ်၊ ဖေဖော်ဝါရီလ ၁၄ ရက်နေ့ကလည်း မန္တလေးမြို့ပေါ် ချမ်းမြသာစည်မြို့နယ်ရှိ အသင့်စားမုန့်အမျိုးမျိုးထုတ်လုပ်သည့်စက်ရုံများအား ဈေးကွက်မရောက်မီစစ်ဆေးခြင်း(Pre Market Survillance)ဆောင်ရွက်ခဲ့ကြောင်းနှင့် ဆက်လက်၍လည်း စဉ်ဆက်မပြတ် ဆောင်ရွက်သွားမည် ဖြစ်ကြောင်း တင်ပြလိုက်ရပါတယ်။

DOCA(မန္တလေး)

မန္တလေးတိုင်း‌ဒေသကြီး၊မိတ္ထီလာခရိုင်၊စားသုံးသူရေးရာဦးစီးဌာန၊ခရိုင်ဦးစီးမှူး၏လမ်းညွှန်မှုဖြင့်သာစည်မြို့နယ်၊ ကုက္ကိုလ်ပေါက်ကျေးရွာတွင်  စားသုံးသူများဘေးအန္တရာယ်ကင်းရှင်းစေရေး အတွက် ၂၀၂၅ခုနှစ် ၊ ဖေဖော်ဝါရီလ (၁၁) ရက်နေ့ နံနက်(၁၀၀၀)နာရီချိန်တွင် စားသုံးသူကာကွယ်ရေးအသိ ပညာပေးဟောပြောဆွေးနွေးခဲ့ပါသည်။

          ဟောပြောပွဲတွင် စားသုံးသူရေးရာဦးစီးဌာနမန္တလေးတိုင်းဒေသကြီး၊ မိတ္ထီလာခရိုင်၊ သာစည်မြို့နယ် တာဝန်ခံဒေါ်ဖြူဖြူထွန်းမှ စားသုံးသူရေးရာဦးစီးဌာနတွင် လက်ရှိဆောင်ရွက်နေသော စားသုံးသူ ကာကွယ်ရေးအသိပညာပေးဟောပြောပွဲလုပ်ငန်းများ ဆောင်ရွက်ခြင်းနှင့်စားသုံးသူများ ဘေးအန္တရာယ် ကင်းရှင်းရေး၊ ထုတ်ကုန်လုံခြုံ စိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးခြင်း လုပ်ငန်းများနှင့် နစ်နာဆုံးရှုံးမှုများအတွက် ညှိနှိုင်းဖြေရှင်းမှုများလုပ်ဆောင်ရွက်လျှက်ရှိကြောင်း ၂၀၁၉ စားသုံးသူကာကွယ်ရေး ဥပဒေအရ စားသုံးသူအခွင့်အရေးများ၊ လိုက်နာရမည့််တာဝန််များအကြောင်း၊ စားသုံးသူအခွင့််အရေး နစ်နာဆုံးရှုံးမှုများအတွက် ဖြေရှင်းပေးမှုမျာအား အကျယ်တဝင့်ဆွေးနွေး ခဲ့ပါသည်။ လုပ်ငန်းရှင်များ အနေဖြင့်လည်း အခြားကုန်စည်ကို ဝယ်ယူသုံးစွဲရာတွင်  မိမိတို့ကိုယ်တိုင် စားသုံးသူများဖြစ်သည့်အတွက် စာသုံးသူအခွင့်အရေးနစ်နာဆုံးရှုံးမှုများရှိခဲ့လာပါက တိုင်းဒေသကြီး/ ပြည်နယ်နှင့် ခရိုင်ရုံးများတွင် ဖွင့်လှစ်ထားသော စားသုံးသူသတင်းပြန်ကြားရေးနှင့် တိုင်ကြားမှုလက်ခံ ဆောင် ရွက်ရေးစင်တာ (CICC) ရုံးများတွင် တိုင်ကြားနိုင်ပါကြောင်း၊  DOCA Myanmar Application နှင့်စားသုံးသူရေးရာဦးစီးဌာန၏ Website www.doca.gov.mm တွင် ဝင်ရောက်လေ့လာ တိုင်ကြားနိုင်ကြောင်း ၊ Consumer Cell Center နံပါတ် (၁၅၃၅) သို့လည်း ရုံးချိန်အတွင်း ဆက်သွယ် မေးမြန်းဆောင်ရွက်နိုင်ပါကြောင်းကို ဆွေးနွေးပြောကြားခဲ့ပြီး ဟောပြောပွဲတွင် ကျေးရွာနေပြည်သူ စုစုပေါင်း ( ၄၇ ) ဦးတက်ရောက်ခဲ့ပါသည်။ လက်ကမ်းစာစောင် များလည်းဖြန့်ဝေခဲ့ပြီး ဟောပြော ပွဲကိုနံနက်(၁၁၀၀)အချိန်တွင် ရုတ်သိမ်းခဲ့ကြောင်း သိရှိရသည်။

DOCA(မန္တလေး)

    စားသုံးသူရေးရာဦးစီးဌာန ၊ မြင်းခြံခရိုင်ဦးစီးမှူးရုံးတွင် မြင်းခြံခရိုင်ဦးစီးမှူး ၊ ဦးသန်းစိုး (လ/ထ ညွှန်ကြားရေးမှူး)နှင့် ဝန်ထမ်းများသည် မြင်းခြံခရိုင် မီးသတ်ဦးစီးဌာန၊ မြင်းခြံခရိုင်မီးသတ်ဦးစီးမှူး၊ ဦးအောင်သက်လှိုင်(လ/ထညွှန်းကြားရေးမှူး)နှင့် မီးသတ်ဝန်ထမ်းများ ပူးပေါင်း၍ (၁၄.၂.၂၀၂၅) ရက်နေ့ နံနက် (၁၀:၀၀)နာရီ အချိန်တွင် မီးဘေးလုံခြုံရေး ကြိုတင်ဇာတ်တိုက်လေ့ကျင့်ခြင်း ဆောင်ရွက်ခဲ့ရာ  ဦးစွာပထမ မြင်းခြံခရိုင်မီးသတ်ဦးစီးမှူး၊ ဦးအောင်သက်လှိုင် က မကြာမီ ပူးပြင်းခြောက်သွေ့သော ရာသီသို့ ရောက်ရှိလာတော့မည်ဖြစ်သဖြင့် ဌာနပိုင် အဆောက်အဦးများ မီးဘေးလုံခြုံမှုရှိစေရန် အဆောက်အဦးဝန်းကျင်များ၌ မီးတားလမ်းများဆောင်ရွက်ထားရှိရန်၊ မီးဘေးနှင့် အရေးပေါ်ကြုံတွေ့ လာပါက ဌာနရှိ ဝန်ထမ်းများအနေဖြင့် မီးငြိမ်းသတ်မှုများကို စနစ် တကျအရေးကြီး (ပထမ၊ဒုတိယနှင့် တတိယ) ဦးစားပေး ဆောင်ရွက်ရမည့်ကိစ္စရပ်များအား နည်းလမ်းမှန်ကန်စွာ အချိန်မီ သယ်ယူ ရွှေ့ ပြောင်း၍ မီးငြိမ်းသတ်နိုင်ရေးနှင့် မီးသတ်ဆေးဗူးများအား ကျွမ်းကျင်စွာ အသုံးပြုနိုင်ရေး၊ မီးသတ် ဆေးဗူးများတွင် ဆေးရည်များ ရှိမရှိ နှင့် ကောင်းစွာအသုံးပြုနိုင်ခြင်း ရှိ/မရှိ စစ်ဆေးဆောင်ရွက် သွားရန်နှင့် မီးလောင်မှုများ ဖြစ်ပွားပါက အချိန်မီ လျင်မြန်စွာမီးငြိမ်းသတ် နိုင်ရေးအတွက် လိုအပ်သည့် မီးသတ်ဆေးဘူးများ ၊ မီးချိပ်၊ မီးကတ်များ၊ ရေပုံးနှင့်သဲ စသည့်ပစ္စည်းများအား အရန်သင့် ထားရှိနိုင်စေရေး အသိပညာပေးဆွေးနွေးခဲ့ပါသည်။

ထိုနောက် အရေးပေါ်မီးဘေးအန္တရာယ်များနှင့်တွေ့ကြုံလာပါက ထိရောက်စွာ မီးငြိမ်းသတ် နိုင်ရန်အတွက်   မီးသတ်ဆေးဘူး အသုံးပြုပုံကို လက်တွေ့စနစ်တကျသင်ကြားပြသခြင်း၊ မီးဘေး လုံခြုံရေးအတွက် မီးငြိမ်းသတ်မှု လက်တွေ့သရုပ်ပြသမှုနှင့် ဇာတ်တိုက်လေ့ကျင့်ခြင်းများ ဆောင် ရွက်ခဲ့ကြောင်းနှင့် ဌာနပိုင်ရုံးနှင့်အဆောက်အဦးများရှိ ရေစင်များနှင့်ရေပြည့်တင်းနိုင်သော ရေကန် များတွင် အစဉ်အမြဲ ရေများဖြည့်ဆည်းထားရှိစေနိုင်ရေးများ ဆောင်ရွက်ခဲ့ကြောင်းသိရသည်။

DOCA(မန္တလေး)

    မြင်းခြံခရိုင်စားသုံးသူရေးရာဦးစီးဌာနမှ ဝန်ထမ်းများသည် ဈေးကွက်အတွင်း ဘိလပ်မြေများ ပစ္စည်းပြတ်လပ်မှုရှိ/မရှိနှင့် ဈေးနှုန်းကြီးမြင့်မှုရှိ/မရှိအခြေအနေများနှင့်ပတ်သက်၍ ၁၃-၂-၂၀၂၅ နေ့ နံနက်(၀၉:၃၀)နာရီအချိန်တွင် မြင်းခြံမြို့အတွင်းရှိ ဘိလပ်မြေအရောင်းဆိုင်များသို့ ကွင်းဆင်းစစ်ဆေးမှုများ ပြုလုပ်ခဲ့ပါသည်။

             ဘိလပ်မြေအရောင်းဆိုင်များသို့ ကွင်းဆင်းစစ်ဆေးရာတွင် ဈေးကွက်အတွင်း ဘိလပ်မြေ များ ပစ္စည်းပြတ်လပ်မှုမရှိကြောင်း၊  ဈေးကွက်ဝယ်လိုအား အမှာရှိသလောက် ရောင်းချပေးနိုင် ကြောင်း သိရှိရပြီး “မိဘမေတ္တာ”ဘိလပ်မြေအရောင်းဆိုင်နှင့် “စွဲမြဲ”ဘိလပ်မြေအရောင်းဆိုင်များ တွင် ရောင်းချလျက်ရှိသောဘိလပ်မြေများ၏ ဈေးနှုန်းများအနေဖြင့်  ကြံ့နှစ်ကောင်ဘိလပ်မြေ (၅၀)kgတစ်အိတ်လျှင် (၂၄၀၀၀)ကျပ်၊ အပါချီဘိလပ်မြေ (၅၀)kgတစ်အိတ်လျှင် (၂၃၀၀၀)ကျပ်နှုန်း ဖြင့် ရောင်းချလျက်ရှိကြောင်း သိရှိရသည်။ အပါချီဘိလပ်မြေကို ပျဉ်ညောင်မြို့မှ သယ်ယူရောင်းချ ရပြီး ဘိလပ်မြေတစ်အိတ်လျှင် ယခင်လထက် (၁၀၀၀)ကျပ်ခန့် ဈေးနှုန်းမြင့်တက်ခဲ့ကြောင်း၊ သယ်ယူရာတွင် မိတ္ထီလာ-ကျောက်ပန်းတောင်း-ညောင်ဦးလမ်းကြောင်းမှ သယ်ယူရပြီး သယ်ယူ သည့်ခရီးစဉ်တွင် တစ်ပတ်ခန့်ကြာမြင့်သောကြောင့် သယ်ယူမှုကုန်ကျစရိတ်ပိုမိုကုန်ကျသဖြင့် ဈေးနှုန်းမြင့်တက်ရခြင်းဖြစ်ကြောင်း “မိဘမေတ္တာ”ဘိလပ်မြေအရောင်းဆိုင်ပိုင်ရှင် ဦးရင်မောင်၏ ပြောကြားချက်အရ သိရှိရသည်။

DOCA(မန္တလေး)

          ၂၀၂၅ ခုနှစ်၊ ဖေဖော်ဝါရီလ ၁၇ ရက်နေ့၊ နေ့လယ်(၁၃း၀၀)နာရီအချိန်တွင် တနင်္သာရီတိုင်းဒေသကြီး အစိုးရအဖွဲ့၊ သုံးထပ်ဆောင်အစည်းအဝေးခန်းမ၌ တနင်္သာရီတိုင်းဒေသကြီးဓာတ်သတ္တု ‌(‌ရွှေ) ရောင်း ဝယ်ခြင်းဝန်ဆောင်မှုလုပ်ငန်းကနဦးစိစစ်‌ရေးအဖွဲ့၏ (၂/၂၀၂၅) ကြိမ်မြောက်လုပ်ငန်း ညှိနှိုင်းအစည်း အဝေးအားကျင်းပခဲ့ရာ အဖွဲ့ဝင်တနင်္သာရီတိုင်းဒေသကြီးစားသုံးသူရေးရာဦးစီးဌာန၊ တိုင်းဦးစီးမှူးမှ တက်ရောက်ခဲ့ပါသည်။

          အစည်းအဝေးတွင် တိုင်းဒေသကြီးအစိုးရအဖွဲ့သယံဇာတဝန်ကြီးမှ အဖွင့်အမှာစကားပြော ကြားကာ တိုင်းဒေသကြီးအမှတ်(၂)သတ္တုတွင်းဦးစီးဌာနမှ တိုင်းဦးစီးမှူးမှ ဓာတ်သတ္တု(ရွှေ) ရောင်း ဝယ်ခြင်းလုပ်ငန်းများ၏ မှတ်ပုံတင်လျှောက်ထား‌ဆောင်ရွက်မှု အခြေအနေများအား ရှင်းလင်းဆွေးနွေးခဲ့ပြီး တက်ရောက်လာသော အဖွဲ့ဝင်များမှ အသီးသီးဆွေးနွေးခဲ့ကာ အစည်းအ‌ဝေးအား နေ့လယ်(၁၄း၀၀) နာရီအချိန်တွင် ပြီးမြောက်ခဲ့ကြောင်း သိရှိရပါသည်။

DOCA (တနင်္သာရီ)