သတင်းနှင့် လှုပ်ရှားမှုများ

             စားသုံးသူသူရေးရာဦးစီးဌာန၊ ကျောက်ဆည်ခရိုင်ဦးစီးမှူးမှ စစ်ဆေးရေးအရှိများသည် ၂၀၂၅ ခုနှစ်၊ မတ်လ(၄)ရက်နေ့တွင် ကျောက်ဆည်ခရိုင်အတွင်းရှိ ကျောက်ဆည်၊ စဉ့်ကိုင်၊ မြစ်သားမြို့နယ်များရှိ CP ကြက်ကင်၊ ကြက်ကြော်ဆိုင်များသို့ သွားရောက်၍ကွင်းဆင်းစစ်ဆေးခဲ့ပါသည်။ ထိုသို့ ကွင်းဆင်းစစ်ဆေးရာတွင် CP ကြက်အူချောင်း၊ ဝက်အူချောင်းများပေါ်တွင် ကုန်ပစ္စည်းအမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ ထားသိုသိမ်းဆည်းမှုအညွှန်း၊ ဓါတ်မတည့်ကြောင်း ဖော်ပြချက်များ ပါဝင်မှုရှိ/ မရှိစစ်ဆေးခဲ့ရာ အချို့ ကြက်အူချောင်း၊ ဝက်အူချောင်းများ ထုတ်ပိုးသည့် ကုန်ပစ္စည်းများမှာပြည့်စုံစွာပါရှိသော်လည်း အချို့မှာပြည့်စုံစွာပါရှိခြင်းမရှိသည့်အတွက် ဆိုင်ရှင်အား အမှတ်တံဆိပ်များပေါ်၌ စားသုံးသူကာကွယ်ရေးဥပဒေပါ ကုန်အညွှန်းအမှတ်အသားများ ပြည့်စုံစွာပါရှိစေရေးအတွက် အသေးစိတ်ရှင်းလင်းပြောကြားခဲ့ကြောင်း သတင်းရရှိပါသည်။

DOCA(မန္တလေး)

          စားသုံးသူရေးရာဦးစီးဌာန၊ မန္တလေးတိုင်းဒေသကြီးဦးစီးမှူးရုံး၊ အစည်းအဝေးခန်းမ၌ ၂၀၂၅ ခုနှစ်၊ မတ်လ (၄) ရက်နေ့၊ နေ့လည် (၁၄:၀၀) နာရီအချိန်တွင် တိုင်းဒေသကြီးဦးစီးမှူးနှင့် အရာထမ်း များ/အမှုထမ်းများနှင့် ချမ်းအေးသာစံမြို့နယ်၊ မီးသတ်ဦးစီးဌာနမှ မီးသတ်ဦးစီးမှူးနှင့် မီးသတ် တပ်ဖွဲ့ဝင်များအတူ မီးဘေးကြိုတင်ကာကွယ်ရေး အသိပညာပေးဟောပြောခြင်းနှင့် လက်တွေ့ သရုပ်ပြလေ့ကျင့်မှု ဆောင်ရွက်ခဲ့ပါသည်။

          အဆိုပါ အခမ်းအနားတွင် တိုင်းဒေသကြီးဦးစီးမှူးမှ ယခု မီးဘေးအန္တရာယ်ကြိုတင်ကာကွယ်ရေး အတွက် လာရောက်ဆွေးနွေးခြင်းနှင့် သရုပ်ပြပေးသည့်မီးသတ်ဦးစီးဌာနကို ကျေးဇူးတင်ရှိပါကြောင်း နှင့် မိမိတို့ဝန်ထမ်းများအနေနှင့်လည်း မီးဘေးကြိုတင်ကာကွယ်ရေးဆွေးနွေးချက်များနှင့် မီးသတ် ဆေးဘူးများ နည်းစနစ်မှန်ကန်စွာ အသုံးပြုနည်းကို ယခုလက်တွေ့သရုပ်ပြသမှုတွင် စနစ်တကျ လေ့လာထားရှိရန် အရေးကြုံပါက မိမိပတ်ဝန်းကျင်အတွင်း အသုံးပြုတတ်စေရန်အတွက်နှင့် မီးသတ် ဆေးဘူးများ ထားသိုနည်းစနစ်များကိုလည်း လေ့လာထားရန်လိုအပ်ကြောင်း အဖွင့်အမှာစကား ပြောကြားခဲ့ပြီး ချမ်းအေးသာစံမြို့နယ် မီးသတ်ဦးစီးဌာနမှ မီးသတ်ဦးစီးမှူးမှ မီးဘေးကြိုတင် ကာကွယ်ရေးနှင့် အသိပါပေးဆွေးနွေးရာတွင် မီးဘေးကြိုတင်ဆွေးနွေးချက်နှင့် ဆောင်ရန်ရှောင်ရန် အချက်များ၊ အကြံပြုဆွေးနွေးချက်များ၊ အသိပညာပေးခြင်းနှင့် ဖြစ်တတ်သည့်သဘောနှင့် အခြေ အနေများကို Power Point ဖြင့်‌ဆွေးနွေးခြင်း၊ လက်ကမ်းစာစောင်များ ဖြန့်ဝေခြင်းများ ဆောင်ရွက်ပြီး မီးသတ်ဦးစီးမဌာနမှ ရုံးဝန်းတွင်ထားရှိသည့် မီးသတ်ဆေးဘူးများကို စစ်ဆေးခြင်း၊ ဝန်ထမ်းအိမ်ရာများတွင်ထားရှိသည့် မီးသတ်ဆေးဘူးများ၊ မီးချိတ်၊ မီးကဒ်များ ကြိုတင်ကာကွယ်ရေး အတွက် အဆောက်အဦနှင့် ရေသိုလှောင်ထားရှိသည့်ကန်များ စစ်ဆေးခြင်း၊ မီးဘေးကြိုတင် ကာကွယ်ရေးအတွက် ဝန်ထမ်းများအား မီးငြိမ်းသတ်မှု နည်းစနစ်များကို လက်တွေ့သရုပ်ပြ ဇာတ်တိုက်လေ့ကျင့်မှုများ၊ မီးသတ်ဆေးဘူး အသုံးပြုပုံလက်တွေ့ဆောင်ရွက်ခြင်းများကို ဝန်ထမ်းများနှင့်အတူ လေ့ကျင့်ဆောင်ရွက်ပြီး (၁၆:၀၀)နာရီအချိန်တွင် မီးဘေးအန္တရာယ်ကြိုတင် ကာကွယ်ရေးအသိပညာပေးဟောပြောပွဲနှင့် လက်တွေ့သရုပ်ပြလေ့ကျင့်မှုများ ဆောင်ရွက် ပြီးစီးခဲ့ကြောင်း သိရှိရပါသည်။

DOCA(မန္တလေး)

              စားသုံးသူရေးရာဦးစီးဌာနအနေဖြင့်  စားသုံးသူကာကွယ်ရေးဥပဒေပါအကြောင်းအရာများ၊  Online ဝန်ဆောင်မှုလုပ်ငန်းဆိုင်ရာများအား စီးပွားရေးလုပ်ငန်းရှင်များအပါအဝင် စားသုံးသူပြည်သူ တစ်ရပ်လုံး သိရှိစေနိုင်ရေးအတွက် နည်းလမ်းပေါင်းစုံဖြင့် အသိပညာပေးလျက်ရှိရာ(၂၇. ၂. ၂၀၂၅) ရက်နေ့၊ နေ့လည်(၁၃:၀၀)နာရီအချိန်တွင် ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနရုံးရှိ  လူထုအခြေပြုဗဟိုဌာန (Community Center) ခန်းမ၌စားသုံးသူရေးရာဦးစီးဌာန၊ မြင်းခြံခရိုင် ဦးစီးမှူးရုံးရှိ ဦးစိုးမိုးထွန်း(ဦးစီးမှူး)သည် မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ စားသုံးသူကာအကွယ်ပေးရေးဥပဒေပါ ကုန်အညွှန်းအမှတ်အသားဖော်ပြခြင်းနှင့် ပတ်သက်၍ အသိပညာပေး Talk Show အစီအစဉ်အား ပြုလုပ်ခဲ့ပါသည်။

အဆိုပါအသိပညာပေးဆွေးနွေးပွဲ(Talk Show)တွင် ဦးစိုးမိုးထွန်း(ဦးစီးမှူး)က စားသုံးသူကာ ကွယ်ရေးဥပဒေအခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်ပတ်သက်၍ ဆွေးနွေးရာ တွင် ကုန်အညွှန်းအမှတ်အသားဆိုသည်မှာ ကုန်စည် သို့မဟုတ် ကုန်စည်ထုပ်ပိုးမှုအပြင်အဆင် ပေါ်တွင် စာဖြင့်ရေးသား၍ဖြစ်စေ၊ ပုံနှိပ်၍ဖြစ်စေ၊ ရုပ်ပုံဖြင့်ဖြစ်စေ၊ အခြားနည်းတစ်ရပ်ရပ်ဖြင့်ဖြစ်စေ ဖော်ပြထားသည့်ကုန်စည်နှင့် သက်ဆိုင်သည့်အချက်အလက် သို့မဟုတ် အမှတ်အသားကိုဆိုလိုတာ ဖြစ်ပါကြောင်း၊ စီးပွားရေးလုပ်ငန်းရှင်သည် ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ ကုန်စည် အမျိုးအစားအလိုက် သတ်မှတ်ချက်များနှင့်အညီဖော်ပြရမည့်အချက်များ၊ မြန်မာဘာသာ ဖြင့် မဖြစ်မနေထည့်သွင်းဖော်ပြရမည့်အချက်များနှင့်ပြစ်မှု၊ ပြစ်ဒဏ်များအား ရှင်းလင်းဆွေးနွေး ခဲ့ကြောင်း သိရှိရသည်။

DOCA(မန္တလေး)

          ၂၀၂၅ ခုနှစ်၊ မတ်လ (၆)ရက်နေ့၊ နံနက် (၁၀:၃၀) နာရီအချိန်တွင် စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ စစ်ဆေးရေးမှူး ဦးအောင်လင်းဦး (ဦးစီးမှူး) ဦးဆောင်၍ မြို့နယ် စည်ပင်သာယာရေးဌာနနှင့်ပူးပေါင်း၍ ကျိုင်းတုံမြို့၊ ရပ်ကွက် (၃)၊ မြို့သစ် ရပ်ကွက်အတွင်းရှိ “ရွှေကျန်းမာ” အမှတ်တံဆိပ် ဝက်ခေါက်၊ အမဲခေါက် ထုတ်လုပ်ရောင်းချသည့် လုပ်ငန်းအား ထုတ်ကုန်များလုံခြုံစိတ်ချမှုရှိစေရေးနှင့် ကုန်အညွှန်းအမှတ်အသား ပြည့်စုံစွာဖော်ပြပါရှိရေးတို့နှင့် ပတ်သက်၍ ဈေးကွက်စောင့်ကြည့်စစ်ဆေးခဲ့ပါသည်။

          ထိုသို့ ဈေးကွက်စောင့်ကြည့်စစ်ဆေးခြင်းဆောင်ရွက်ရာတွင် “ရွှေကျန်းမာ” အမှတ်တံဆိပ် ဝက်ခေါက်၊ အမဲခေါက် ထုတ်လုပ်ရောင်းချသည့်လုပ်ငန်းအနေဖြင့် သက်ဆိုင်ရာဌာန၏ ထောက်ခံချက် များနှင့် ကုန်အညွှန်းအမှတ်အသားပြည့်စုံစွာ ဖော်ပြထားသည်ကို တွေ့ရှိရပါသည်။

          ဆက်လက်၍ စစ်ဆေးရေးမှူးနှင့် ဌာနဆိုင်ရာတာဝန်ရှိသူများသည် စားသုံးသူကာကွယ်ရေး ဥပဒေအခန်း (၁၀)ပါ “စီးပွားရေးလုပ်ငန်းရှင်၏တာဝန်များ”ကို သိရှိလိုက်နာဆောင်ရွက်စေရန် အသိပညာပေး ဆွေးနွေးခြင်းလုပ်ငန်း ဆောင်ရွက်ခဲ့ပါသည်။

DOCA(ရှမ်း)

          ၂၀၂၅ ခုနှစ်၊ မတ်လ ၉ ရက်နေ့၊ ၉း၀၀ နာရီ အချိန်တွင် ထားဝယ်မြို့၊ အိမ်ရှေ့ပြင်ရပ်ကွက်၊ ရေးလမ်းရှိ ရတနာဦးယာဥ်ရပ်နားစခန်းသို့ မြန်မာနိုင်ငံဆီကုန်သည်နှင့်ဆီလုပ်ငန်းရှင်များအသင်း၏ စီစဥ်မှုဖြင့် Kaung Hlyan New Asia Co,Ltd မှ တင်ပို့ရောင်းချသည့် စားအုန်းဆီ ၁ ပေပါလျှင် ၁၁၀ ပိဿာပါ စားအုန်းဆီ (၈၈)ပေပါကို ယာဥ်မောင်းဦးအောင်မျိုးဟိန်း ၊ယာဉ်အမှတ် 7J-2781/ ISUZU မော်တော်ယာဥ်နှင့် အလားတူ ၉း၃၀ နာရီအချိန်တွင် အိမ်ရှေ့ပြင်ရပ်ကွက်၊ ရေးလမ်းရှိ ဟိုင်းဝေး ကားဂိတ် ယာဥ်ရပ်နားစခန်းသို့ Myanmar Oil Alliance Co,Ltd မှ စားအုန်းဆီ ၁ ပေပါလျှင် ၁၁၀ ပိဿာပါ စားအုန်းဆီ (၉၀)ပေပါကို ယာဥ်မောင်း ဦးမျိုးမင်းကျော်၊ ယာဉ်အမှတ် 7K-6531/ HINO မော်တော်ယာဥ်တို့ဖြင့်တင်ဆောင်၍ အသီးသီးရောက်ရှိလာရာ စားသုံးသူရေးရာဦးစီးဌာန၊တိုင်းဒေသ ကြီးဦးစီးမှူး ဦးစိုးဦးနှင့်တာဝန်ရှိသူများက သွားရောက်စစ်ဆေးခဲ့ကြောင်း၊ အဆိုပါ စားအုန်းဆီ စုစုပေါင်း (၁၇၈) ပေပါအား ကုမ္ပဏီ၏လက်ကားအ​ရောင်းကိုယ်စားလှယ်မှတစ်ဆင့် ထားဝယ်မြို့၊ အနောက်ရပ်၊ ဦးကျော်ရင်လမ်းရှိ ဦးစန်းအောင်၏ အောင်ပွဲရုံ ကုန်စုံဆိုင် အပါအဝင် လက်လီဆိုင် ၁၅ ဆိုင်မှတစ်ဆင့် သတ်မှတ်ရည်ညွှန်းစျေးအတိုင်း စားသုံးသူများအား ရောင်းချပေးသွားမည်ဖြစ် ကြောင်း သိရှိရပါသည်။

DOCA(တနင်္သာရီ)