သတင်းနှင့် လှုပ်ရှားမှုများ

        ဧရာဝတီတိုင်းဒေသကြီး၊ ဖျာပုံခရိုင်၊ ဒေးဒရဲမြို့နယ် မြေပြင်လူဦးရေစာရင်း ကောက်ယူရေး ကြီးကြပ်မှုကော်မတီမှ မြို့နယ်အတွင်းရှိ လူဦးရေစာရင်း မှန်ကန်စေရေး၊ မြေပြင်ကွင်းဆင်း စာရင်းစိစစ်မှုများအား တစ်မြို့နယ်လုံးအတိုင်းအတာဖြင့်  ဆောက်ရွက်လျက်ရှိရာ စက်တင်ဘာ လ ၈ ရက်နေ့၊ နံနက်ပိုင်းက အမှတ် (၂) ရပ်ကွက်၌ မြေပြင်ကွင်းဆင်းဆောင်ရွက် လျက်ရှိသည့်လုပ်ငန်းများအား တာဝန်ရှိသူများကြည့်ရှုအားပေးခဲ့ကြောင်းသိရသည်။
       အဆိုပါမြေပြင်လူဦးရေစာရင်းကွင်းဆင်းဆောင်ရွက်လျက်ရှိသည့်လုပ်ငန်းများအား မြို့နယ် စီမံခန့်ခွဲရေးနှင့် အုပ်ချုပ်ရေး ကော်မတီဥက္ကဋ္ဌ ဦးမြသိန်းမောင်နှင့်တာဝန်ရှိသူများကအိမ်ထောင်စု အမှတ်စဉ်နှင့် မိသားစုအမှတ်စဥ်များကို နေရပ်လိပ်စာအတိုင်း၊ နေထိုင်ခြင်း ရှိ/မရှိ၊ စာရင်းပြုစုခြင်း၊ သေဆုံးစာရင်းများ အတည်ပြုခြင်း၊ စာရင်းရှိသော်လည်း မြေပြင်တွင် နေထိုင်မှုမရှိသူများနှင့် စာရင်းမရှိ နေထိုင်သူများ စာရင်းပြုခြင်း၊ မည်သည့်လက်မှတ်မျှ ကိုင်ဆောင်ခြင်း မရှိသူများ၊ အိမ်ထောင်စုစာရင်း မရှိသူများအား စိစစ်၍ အိမ်ထောင်စုစာရင်းနှင့် ကိုင်ဆောင်လက်မှတ်တစ်ခုခု ရရှိစေရေးတို့ကို ကွင်းဆင်းဆောင်ရွက်ပေးလျက်ရှိသည့် လုပ်ငန်း များအား ကြည့်ရှုအားပေးခဲ့ပြီး လိုအပ်ချက်များကို ဖြည့်စွက်ဆောင်ရွက်ပေးခဲ့ကြောင်း သိရသည်။

(Doca ဧရာဝတီ)

    ဧရာဝတီတိုင်းဒေသကြီး၊ ဖျာပုံခရိုင်၊ ဒေးဒရဲမြို့နယ်အတွင်း  မြေပြင်လူဦးရေစာရင်း တိုက်ဆိုင်စစ်ဆေးခြင်းလုပ်ငန်းများကို ရပ်ကွက်၊ ကျေးရွာအုပ်စုများတွင်ဆောင်ရွက်လျက်ရှိရာ စက်တင်ဘာလ(၅)ရက်နေ့၊နံနက်ပိုင်းက ဧရာဝတီတိုင်းဒေသကြီးအစိုးရအဖွဲ့၊သယံဇာတရေးရာ ဝန်ကြီး ဦးအုန်းမြင့် နှင့် တာဝန်ရှိသူများက အုန်းပင်ကျေးရွာအတွင်း မြေပြင်လူဦးရေစာရင်း တိုက်ဆိုင် စစ်ဆေးခြင်း လုပ်ငန်းများအားကွင်းဆင်းကြည့်ရှုစစ်ဆေးခဲ့ကြောင်းသိရသည်။
          ဧရာဝတီတိုင်းဒေသကြီး သယံဇာတရေးရာဝန်ကြီး ဦးအုန်းမြင့်နှင့် တာဝန်ရှိသူများသည် ဖျာပုံခရိုင်မြေပြင်ကွင်းဆင်းကောက်ယူရေးကြီးကြပ်မှုကော်မတီဥက္ကဋ္ဌ၊ဖျာပုံခရိုင်  စီမံခန့်ခွဲရေးနှင့် အုပ်ချုပ်ရေးကော်မတီဥက္ကဋ္ဌဦးဇော်လွင်ဦးနှင့်အဖွဲ့ဝင်များနှင့်အတူ   အုန်းပင်ကျေးရွာအုပ်ချုပ်ရေးမှူးရုံးတွင်လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန  e-ID  Server အတွင်းရှိ အသက်(၁၈) နှစ်နှင့်အထက် လူဦးရေစာရင်းကို ရပ်ကွက်၊ ကျေးရွာအုပ်စုအလိုက် မြေပြင်တွင် တိုက်ဆိုင်စစ်ဆေးခြင်းလုပ်ငန်းများအားကြည့်ရှုစစ်ဆေးရာ နေအိမ်များအရောက် ပုံစံ(၆၆/၆)ရှိ အသက် (၁၈) နှစ်နှင့် အထက် လူဦးရေစာရင်း၊ အိမ်ထောင်စုအမှတ်စဉ်နှင့် မိသားစုအမှတ်စဉ် များကို နေရပ်လိပ်စာအတိုင်း နေထိုင်ခြင်းရှိ/ မရှိ စာရင်းပြုစုခြင်း၊ သေဆုံးခြင်း စာရင်းများ အတည်ပြုခြင်း၊စာရင်းရှိသော်လည်း မြေပြင်တွင် နေထိုင်မှုမရှိသူများနှင့် စာရင်းမရှိနေထိုင်သူများ စာရင်းပြုစုခြင်း လုပ်ငန်းများဆောင်ရွက်နေမှုကို ကြည့်ရှုစစ်ဆေးခဲ့ပြီး လိုအပ်သည်များကို လမ်းညွှန်မှာကြားခဲ့ကြောင်း သိရသည်။

(Doca ဧရာဝတီ)

    စစ်ကိုင်းတိုင်းဒေသကြီးအတွင်း စားအုန်းဆီဖြန့်ဖြူးရောင်းချမှုလုပ်ငန်းများကို ထိရောက် အောင်မြင်စွာ ဆောင်ရွက်နိုင်ရေး မူဝါဒများချမှတ်နိုင်ရန်၊ လုပ်ငန်းဆောင်ရွက်ရာတွင် တွေ့ကြုံရသည့် အခက်အခဲများအား ညှိနှိုင်းပေါင်းစပ်ဆောင်ရွက်နိုင်ရန်နှင့် ရှေ့ဆက်ဆောင်ရွက်ရမည့် လုပ်ငန်းများအပေါ် လိုအပ်သည့်အစီအမံများ ချမှတ်ဆောင်ရွက်နိုင်ရန် ရည်ရွယ်၍  ၂၄-၉-၂၀၂၅ ရက်နေ့ (၁၅း၀၀)နာရီအချိန်တွင် စစ်ကိုင်းတိုင်းဒေသကြီး၊ ဝန်ကြီးချုပ်၏ လမ်းညွှန်ချက်များနှင့် စားသုံးဆီဖြန့်ဖြူးရောင်း ချမှုကြီးကြပ်ရေး ကော်မတီ ဥက္ကဌ၊ စီးပွားရေးရာဝန်ကြီးမှ ညွှန်ကြားချက်အား  စားအုန်း ဆီဖြန့်ဖြူးရောင်းချမှုကြီးကြပ်ရေးအဖွဲ့ဝင် (ဌာနပေါင်းစုံ)မှ အရာထမ်း၊ အမှုထမ်း(၂၆)ဦး နှင့် ဝန်ထမ်းများအား တိုင်းဒေသကြီးဦးစီးမှူးရုံး၊ အစည်းအဝေးခန်းမ၌ တွေ့ဆုံဆွေးနွေးခဲ့ပါသည်။

         တိုင်းဒေသကြီးဦးစီးမှူးက ဆွေးနွေးရာတွင် စစ်ကိုင်းတိုင်းဒေသကြီးအစိုးရအဖွဲ့ မှတာဝန် ပေးအပ်ထားသည့် ဈေးကားကြီးကြပ်ရေးအဖွဲ့များက သတ်မှတ်ထာသည့် အရေအတွက်အတိုင်း မှန်ကန်စွာရောင်းချရန်၊ ဈေးနှုန်းမှန်မှန်ကန်ကန် ရောင်းချနိုင်ရေး ဆောင်ရွက်ရန်၊  ဈေးနှုန်းမြှင့်တင် ရောင်းချခြင်းမရှိဘဲ သတ်မှတ်ပေးထားသည့် ဒေသရည်ညွှန်း ဈေးနှုန်းအတိုင်းရောင်းချရန်၊ အလေးထား ဆောင်ရွက်စေလိုကြောင်း၊ မုံရွာမြို့ပေါ်ရှိ (၃၁)ရပ်ကွက်မှ ပြည်သူများလက်ဝယ်ထံသို့ အမှန် တကယ်ရောက်ရှိစေရေး ဆောင်ရွက်ရန် လိုအပ်ပါကြောင်း၊ ဈေးကားကြီးကြပ်သည့်အဖွဲ့ဝင်များက နေ့စဉ် ရောင်းချသည့် ရပ်ကွက်၊ လမ်း၊ အိမ်ထောင်စုအရေအတွက် တိတိကျကျဖော်ပြပေးရန်၊ စားအုန်းဆီများဖြန့်ဖြူး ရောင်းချမှုများအား ကြီးကြပ်ရာတွင် အခက်အခဲများရှိပါက လုံခြုံရေးအဖွဲ့အား အကူအညီ တောင်းခံနိုင်ပါကြောင်း၊ မုံရွာမြို့ပေါ်တွင် ရောင်းချလျက်ရှိသော စားသုံးဆီ လက်လီ၊ လက်ကား ဆိုင်များကိုကြီးကြပ်စစ်ဆေးရာတွင်လည်း  မှန်(၆)မှန်ဖြင့် စစ်ဆေးရန်နှင့် ရပ်ကွက်အလိုက် စားသုံးဆီအရောင်းဆိုင်များကို စာအုပ်စနစ်ဖြင့် ရောင်းချနိုင်ရေး ဆောင်ရွက်ပေးမည် ဖြစ်ကြောင်းနှင့် တက်ရောက်လာသူများက ဆွေးနွေးလိုသည်များရှိပါက ဆွေးနွေးပေးစေလိုကြောင်း ပြောကြားခဲ့ပါသည်။

      ဆက်လက်၍ တက်ရောက်လာသည့် ဌာနဆိုင်ရာဝန်ထမ်းများမှလည်း သတ်မှတ်ရည်ညွှန်းဈေးနှုန်းများဖြင့် ရောင်းချမှု ရှိစေရေး၊ သတ်မှတ်ထားသည့် အရေအတွက် အတိုင်း တိကျမှန်ကန်စွာ ရောင်းချစေရေး၊ ကြီးကြပ်ဆောင်ရွက်သွားမည်ဖြစ်ပါကြောင်း ပြန်လည်ဆွေးနွေးကြပြီး အစည်းအဝေးကို (၁၆:၀၀) နာရီအချိန်တွင် ရုတ်သိမ်းခဲ့ကြောင်း သတင်းရရှိပါသည်။

DOCA(စစ်ကိုင်း)

       စားသုံးသူရေးရာဦးစီးဌာန၊ စစ်ကိုင်းခရိုင်၊ ခရိုင်ဦးစီးမှူးနှင့် ဝန်ထမ်း(၂)ဦးတို့သည် စက်တင်ဘာလ ၂၂ ရက်နေ့ နေ့လယ် (၁၅း၀၀)အချိန်တွင် စစ်ကိုင်းမြို့၊ ပါရမီရပ်ကွက်ရှိ “စိန်ကြည်”  ခေါက်ဆွဲစက်ရုံလုပ်သား စုစုပေါင်း (၄၅)ဦးအား စားသုံးသူကာကွယ်ရေးအသိပညာပေး ဟောပြော ပွဲများ ပြုလုပ်ခဲ့ပါသည်။

     အဆိုပါဟောပြောပွဲတွင် စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူး ဒေါ်ခင်မြတ်မူက စားသုံးသူရေးရာဦးစီးဌာန ဖြစ်ပေါ်လာပုံအကြောင်း ပြောကြားပြီး   စားသုံးသူကာကွယ်ရေး ဥပဒေကို  ၂၀၁၉ခုနှစ်၊ မတ်လ(၁၅)ရက် နေ့က ပြဌာန်းခဲ့ပြီး၊ အခန်း(၂၅)ခန်းနှင့် ပုဒ်မ ၈၄ ခု ပါဝင်ပါကြောင်း၊ စားသုံးသူကာကွယ်ရေးနည်းဥပဒေကို ၂၀၂၂ခုနှစ်၊ ဇန်နဝါရီလ(၁၈)ရက်နေ့က ပြဌာန်းခဲ့ ပြီးဖြစ်ပါကြောင်း၊ စားသုံးသူကာကွယ်ရေးဥပဒေအခန်း(၉) ပုဒ်မ(၁၉)နှင့်ပုဒ်မ (၂၀) တွင် ပြဌာန်း ထားသည့် စားသုံးသူအခွင့်အရေး(၈)ချက်နှင့် စားသုံးသူ၏တာဝန်များကို ရှင်းလင်း ပြောကြားခြင်း၊ စားသုံးသူကာကွယ်ရေးဥပဒေ အခန်း(၁၈) ပုဒ်မ(၄၁)တွင် စီးပွားရေးလုပ်ငန်းရှင်သည် ကုန်အညွှန်း အမှတ်အသားဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ သိသာထင်ရှားစွာ ဖော်ပြမည့် အချက်(၈) ကို အသေးစိတ်ရှင်းလင်း ပြောကြားခြင်း၊ ပုဒ်မ ၄၁၊ ပုဒ်မခွဲ(ခ)နှင့် ပုဒ်မခွဲ(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့် ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ရေးသား ဖော်ပြရမည် ဖြစ်ကြောင်း၊ပုဒ်မ(၄၃)ပါပြဌာန်းချက်နှင့်ကိုက်ညီမှုမရှိသည့် ကုန်စည်ကို ထုတ်လုပ် ခြင်း၊ ကုန်သွယ်ခြင်း သို့မဟုတ် ရောင်းချခြင်းမပြုရန် ပုဒ်မ(၆၇)နှင့် ပုဒ်မ(၆၈)ပါ တားမြစ်ချက် တစ်ရပ်ရပ်ကို ဖောက်ဖျက်ကျူးလွန်ကြောင်း ပြစ်မှုထင်ရှား စီရင်ခြင်းခံရလျှင် ထိုသူကို နှစ်နှစ် ထက်မပိုသော ထောင်ဒဏ်ဖြစ်စေ၊ ကျပ်သိန်း ၂၀၀ထက် မပိုသော ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်နိုင်ပါကြောင်း၊ စားသုံးသူကာကွယ်ရေးဥပဒေသည် စားသုံးသူများကို ကာကွယ်ပေးခြင်းနှင့် လုပ်ငန်းရှင်များကို ထိန်းကြောင်းပေးသည့်ဥပဒေတစ်ခု ဖြစ်ပါကြောင်း၊ ပြည်သူတိုင်းသည် စားသုံးသူများဖြစ်ပြီး စားသုံးသူတိုင်းမှာ စားသုံးသူအခွင့်အရေးများရှိကြောင်း၊ စားသုံးသူအခွင့်ရေး နစ်နာဆုံးရှုံးမှုများ ဖြစ်ပေါ်ပါက  မိမိတို့ဌာနသို့ လူကိုယ်တိုင် ဖြစ်စေ၊ ဖုန်းဖြင့် ဖြစ်စေ၊ Website လိပ်စာမှာ www.doca.gov.mm တို့ဖြင့် ဖြစ်စေ၊  Call Center နံပါတ် 1535 တို့ဖြင့် ဖြစ်‌စေ၊ တိုင်ကြားနိုင်ပါကြောင်း ရှင်းလင်းပြောကြားပြီး ပန်းဖလက်များ ဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

        (၂၀.၉.၂၀၂၅)ရက်နေ့တွင် စားသုံးသူရေးရာဦးစီးဌာန မအူပင်ခရိုင်ဦးစီးမှူးနှင့် ဝန်ထမ်းများသည်  ပန်းတနော်မြို့နယ်ရှိ စားအုန်းဆီလက်လီလက္ကားကိုယ်စားလှယ်များအား ဆီရောင်းချရာတွင် သတ်မှတ်စည်းကမ်းများနှင့်အညီရောင်းချနိုင်ရေးကို ပန်းတနော်မြို့နယ် တာဝန်ခံရုံးတွင် အသိပေး ပြောကြားဆွေးနွေးခဲ့ကြောင်း သိရသည်။

         ပြောကြားဆွေးနွေးရာတွင် မအူပင်ခရိုင်ဦးစီးမှူး ဦး‌ဇော်မင်းက ပန်းတနော် စားအုန်းဆီ လက္ကားလက်လီဖြန့်ဖြူးသည့် ကိုယ်စားလှယ်များအား နေ့စည် ရောင်းချပေးသည့် ဆီရောင်းချမှုစာရင်းများ မှန်ကန်မှုရှိစေရေး၊ ဖြန့်ဖြူးသည့်စားအုန်းဆီများအား စားသုံးသူများထံသို့ မှန်ကန်ပြည့်ဝစွာ ရောက်ရှိစေရေး၊ ဆီအုန်းဆီထုတ်ယူခွင့် ဆီစာအုပ်များဖြင့်ဖြန်ဖြူးရောင်းချရာတွင် အဆင်ပြေချောမွေ့စွာရောင်းချစေရေး၊ သတ်မှတ်ထားသည့်ဒေသစျေးနှုန်းများဖြင့် ရောင်းချမှုရှိစေရေး၊ ရရှိသောစားအုန်းဆီခွဲတမ်းများအား သိုလှောင် ထားမှုမရှိဘဲ အပြည့်အဝရောင်းချစေရေး၊ အချိန်အတွယ် မှန်ကန်မှုရှိစေရေးတို့ ကိုအသိပညာ ပေးပြောကြားခဲ့ပြီး သတ်မှတ်စည်ကမ်းများကို လိုက်နာဆောင်ရွက်ခြင်းမရှိပါက အရေးကြီးကုန်စည် ဝန်ဆောင်မှု ဥပဒေအရ အရေးယူဆောင်ရွက်သွားမည်ဖြစ်ကြောင်း အသိပေးပြောကြားခဲ့ပြီး ဆီရောင်းချသူ လက်ကား/ လက်လီ လုပ်ငန်းရှင် ၂၅ဦးတက်ရောက်ခဲ့ကြောင်း သိရှိရပါသည်။

DOCA(ဧရာဝတီ)