သတင်းနှင့် လှုပ်ရှားမှုများ

         စားသုံးသူရေးရာဦးစီးဌာန၊ ဇလွန်မြို့နယ်တာဝန်ခံနှင့် ဝန်ထမ်းများသည် မိတ်ဘက်ဌာနဆိုင်ရာများနှင့် ပူးပေါင်း၍ (၁၉.၉.၂၀၂၅)ရက်နေ့၊ နံနက်(၀၈:၃၀) နာရီအချိန်တွင် ဇလွန်မြို့ ဗိုလ်ချုပ်လမ်း၊ ညောင်ပင်ဈေးရပ်ကွက်ရှိ ကုန်မျိုးစုံဆိုင်များတွင်ရောင်းချသော အမှတ်တံဆိပ်ပါ ဗူးသွပ်ဆီများအား ထုတ်ကုန် လုံခြုံစိတ်ချရမှုရှိစေရေး ဈေးကွက်စောင့်ကြည့်စစ်ဆေးခြင်းကို ဆောင်ရွက်ခဲ့ပါသည်။

          ထိုသို့ကွင်းဆင်းစစ်ဆေးခဲ့ရာတွင် မြို့နယ်တာဝန်ခံ ဦးသန့်ဇင်ဦးက  စားသုံးသူမိဘပြည်သူများ ဘေးအန္တရာယ်ကင်းရှင်းစေရန်အတွက် ဈေးကွက်အတွင်းရောင်းချနေသော ဗူးသွပ်ဆီများတွင် FDA ထောက်ခံချက်ပါရှိသည့်အပြင် ကုန်အညွှန်းအမှတ်အသားပြည့်စုံစွာ ဖော်ပြထားကြောင်း စိစစ်တွေ့ရှိခဲ့ပြီး၊   မြန်မာနိုင်ငံ စားသုံးသူကာကွယ်ရေးကော်မရှင်မှ ထုတ်ပြန်ကြော်ငြာထားသော ညွှန်ကြားချက် အမှတ်(၂/၂၀၁၉)နှင့်အညီ မြန်မာဘာသာဖြင့်ပြည်စုံစွာဖော်ပြထားသောကုန်စည်များကိုသာရောင်းချရန်နှင့် စီးပွားရေးလုပ်ငန်းရှင်များအနေဖြင့် ထုတ်ပြန်ထားသော ညွှန်ကြားချက်များအတိုင်း လိုက်နာဆောင်ရွက်ရန်၊  ကုန်စည်နှင့်စပ်လျဉ်း၍ အာမခံချက်ပေးရာတွင် စားသုံးသူများ စိတ်ကျေနပ်မှုရှိစေရေးနှင့် သတ်မှတ်အရည်အသွေး ပြည့်မီသောကုန်စည်များကိုသာ ရောင်းချရန်၊ စားသုံးသူကာကွယ်ရေး ဥပဒေပါ စီးပွားရေးလုပ်ငန်းရှင်၏ တာဝန်များအကြောင်း၊ တားမြစ်ချက်များနှင့် စသည်တို့ကို အသိပညာပေး ပြောကြားခဲ့ပြီး၊ ကုန်မျိုးစုံဆိုင်(၅)ဆိုင်အား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။

DOCA (ဧရာဝတီ)

      ရှမ်းပြည်နယ်အတွင်း ‌ ဒေသတစ်ခုမှ‌  ဒေသတစ်ခုသို့  စပါး၊ ဆန် နှင့် ဆန်ထွက် ပစ္စည်းများသယ်ဆောင်ခြင်း နှင့် စပ်လျဉ်းသည့် လုပ်ငန်းဆောင်ရွက်ချက်ဆိုင်ရာ  စံလုပ်ထုံးလုပ်နည်း (SOP)(မူကြမ်း)ရှင်းလင်းဆွေးနွေးခြင်းအခမ်းအနားကို စက်တင်ဘာလ၂၉ ရက်၊ နံနက်(၁၀:၀၀) နာရီ အချိန်စားသုံးသူ‌ရေးရာဦးစီးဌာန၊ ပြည်နယ်ဦးစီးမှူးရုံး၊ အစည်းအဝေးခန်းမတွင် ကျင်းပပြုလုပ်ခဲ့ပါ သည်။

        အခမ်းအနားသို့ ပြည်နယ်ဆန်၊စပါးလုပ်ငန်းကြီးကြပ်ရေးအဖွဲ့ ဥက္ကဌ၊ ရှမ်းပြည်နယ်အစိုးရ အဖွဲ့၊ ပြည်နယ်စီးပွားရေးရာဝန်ကြီးဦးခွန်သိန်းမောင်နှင့် ပြည်နယ်ဆန်စပါးလုပ်ငန်းကြီးကြပ်ရေးအ ဖွဲ့ဝင်များဖြစ်သော အထူးစုံးစမ်းစစ်ဆေးရေးဦးစီးဌာန၊ ပြည်နယ်စီမံကိန်းရေးဆွဲရေးဦးစီးဌာန၊ စက်မှု ကြီးကြပ်ရေးနှင့် စစ်ဆေးရေးဦးစီးဌာန၊ စားသုံးသူရေးရာဦးစီးဌာန၊ အထူးဖိတ်ကြားထားသည့် ရှမ်း ပြည်နယ်ဥပဒေချုပ်ရုံးပြည်နယ်ဥပဒေအရာရှိနှင့် မြန်မာနိုင်ငံ ဆန်စပါးကုန်သည်များအသင်း( ရှမ်း- တောင် အသင်းခွဲ)၊ရှမ်းပြည်နယ်(တောင်ပိုင်း)ဆန်စက်လုပ်ငန်းရှင်များအသင်း၊ ရှမ်းပြည်နယ်အဝေး ပြေးကုန်စည်ပို့ဆောင်ရေး ဝန်ဆောင်မှုလုပ်ငန်းရှင်များအသင်း ၊ ကုန်စည်ပို့ဆောင်ရေးဂိတ်များ၊ ဆန်စပါးလုပ်ငန်းလုပ်ကိုင်နေကြသော လုပ်ငန်းရှင်များစုစုပေါင်း(၄၄)ဦးက inperson ဖြင့်တက် ရောက်ခဲ့ကြပြီး ပအိုဝ်း/ဓနုကိုယ်ပိုင်အုပ်ချုပ်ခွင့်ရဒေသဆန်စပါးလုပ်ငန်းကြီးကြပ်ရေးအဖွဲ့၊ လားရှိုး/ ကျိုင်းတုံ/ကလော/လွိုင်လင်/တာချီလိတ် ခရိုင်ဆန်စပါးလုပ်ငန်းကြီးကြပ်ရေးအဖွဲ့များမှ အွန်လိုင်း ဖြင့် တက်ရောက်ခဲ့ကြပါသည်။

          အခမ်းအနားတွင် ပြည်နယ်ဆန်၊စပါးလုပ်ငန်းကြီးကြပ်ရေးအဖွဲ့ ဥက္ကဌ၊ ရှမ်းပြည်နယ်အစိုးရ အဖွဲ့၊ ပြည်နယ်စီးပွားရေးရာဝန်ကြီးဦးခွန်သိန်းမောင် ကအဖွင့်အမှာစကား ပြောကြားပြီး အတွင်းရေး မှူး၊ စားသုံးသူရေးရာဦးစီးဌာန၊ ပြည်နယ်ဦးစီးမှူးဦးရွှေဖြူက (SOP)မူကြမ်းအား power point များဖြင့် အသေးစိတ်ရှင်းလင်းဆွေးနွေးခဲ့ပြီး တက်ရောက်လာသော အဖွဲ့ဝင်များ အသင်းအဖွဲ့များ၊ လုပ်ငန်းရှင်များမှ (SOP)မူကြမ်းနှင့်ပတ်သက်၍ အကြံပြုချက်များ၊ ပြင်ဆင်လိုသည့်အချက်များကို အကြံပြုဝိုင်းဝန်းဆွေး‌နွေးခဲ့ကြပါသည်။

          အကြံပြုဆွေးနွေးချက်များအပေါ် ဆန်စပါးလုပ်ငန်းကြီးကြပ်ရေးအဖွဲ့ ဥက္ကဌနှင့် အဖွဲ့ဝင် ဌာန ဆိုင်ရာများက ပြန်လည်ရှင်းလင်းဆွေးနွေးပေးခဲ့ပြီး အခမ်းအနားကို ၁၂:၄၅တွင် ရုတ်သိမ်းခဲ့ပါသည်။

DOCA(ရှမ်း)

       ၁၉-၉-၂၀၂၅ရက်နေ့၊ နေ့လယ်(၁၃:၀၀)နာရီအချိန်တွင် တောင်ကြီးခရိုင်ဦးစီးမှူးရုံးမှ လက်ထောက်ညွှန်ကြားရေးမှူး၊ ဦးခွန်ကျော်ဌေး ဦးဆောင်သောဝန်ထမ်းများသည် အထွေထွေအုပ်ချုပ်ရေးဦးစီးဌာန၊ အထူးစုံစမ်းစစ်ဆေးရေးဦးစီးဌာန၊ စည်ပင်သာယာရေးဦးစီးဌာန ပူးပေါင်းအဖွဲ့ဖြင့် တောင်ကြီးမြို့ပေါ်ရှိ ရည်ညွှန်းဈေးဖြင့်ရောင်းချလျက်ရှိသော စားအုန်းဆီအရောင်းဆိုင် (၄)ဆိုင်တို့အား ရှောင်တခင်ကွင်းဆင်းစစ်ဆေး ဆောင်ရွက်ခဲ့ပါသည်။

   ထိုသို့ကွင်းဆင်းစစ်ဆေးဆောင်ရွက်ရာတွင် တောင်ကြီးမြို့နယ်အတွင်းရှိ စားအုန်းဆီဖြန့်ဖြူး ရောင်းချမှုနှင့်ပတ်သက်၍ သတ်မှတ်ရည်ညွှန်းဈေးအတိုင်း ရောင်းချမှုရှိ/မရှိ၊ ပြည်သူများထံသို့ အမှန်တကယ် ရောင်းချမှုရှိ/မရှိ၊ စာရင်းဇယားများထားရှိမှုရှိ/မရှိ၊ ဗွီနိုင်းများချိတ်ဆွဲထားခြင်းရှိ/မရှိ စိစစ်ခဲ့ပြီး ထို့သို့ရောင်းချရာတွင်လည်း အလေးချိန်မှန်မှန်ကန်ကန် ရောင်းချပေးရန်နှင့် သတ်မှတ်ထားသော အမြတ်ရာခိုင်နှုန်းထက်ကျော်လွန်၍ ရောင်းချမှုမရှိစေရေး စသည်တို့ကို အသိပညာပေး ဆောင်ရွက်ခဲ့ကြောင်း သိရှိရပါသည်။

DOCA(ရှမ်း)

       ၂၀၂၅ ခုနှစ်၊ စက်တင်ဘာလ (၄)ရက်နေ့၊ နံနက် (၁၀:၀၀)နာရီအချိန်တွင် စားသုံးသူရေးရာ ဦးစီးဌာန၊ ရှမ်းပြည်နယ်ဦးစီးမှူးရုံး၊ တောင်ကြီးမြို့မှ ဒုတိယဦးစီးမှူး ဒေါ်တင်တင်အေးသည် ပြန်ကြားရေးနှင့် ပြည်သူ့ဆက်ဆံရေးဦးစီးဌာနနှင့် ပူးပေါင်း၍ တောင်ကြီးမြို့ ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ လူထုအခြေပြုဗဟိုဌာန၊ Community Centre ခန်းမ၌ စားသုံးသူ ကာကွယ်ရေးဆိုင်ရာ အသိပညာပေး Talk Show ကျင်းပပြုလုပ်ခဲ့ပါသည်။

          အဆိုပါ ဆွေးနွေးပွဲ၌ ပထမဦးစွာ ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်သန်းသန်းညွှန့်က Talk Show ပြုလုပ်ရခြင်း၏ ရည်ရွယ်ချက်ကို ရှင်းလင်းဆွေးနွေးပြီး စားသုံးသူရေးရာဦးစီးဌာနမှ ဒုတိယဦးစီးမှူး ဒေါ်တင်တင်အေးက ထုတ်ကုန်လုံခြုံစိတ်ချရမှုဆိုင်ရာ သိကောင်းစရာများအကြောင်းအား ပြည်သူများသိရှိစေရန် ဆွေးနွေးခဲ့ကြပါသည်။

DOCA(ရှမ်း)

     ၂၀၂၅ ခုနှစ်၊ စက်တင်ဘာလ ၂၁ ရက်နေ့၊ နံနက် (၉) နာရီအချိန်တွင် တောင်ကြီးမြို့နယ်၊ အေးသာယာမြို့၊ စက်မှုဇုန်၊ အမှတ်(၁၂)ရပ်ကွက်ရှိ Grain & Edible Oil Co., Ltd (GEOS) ၏ ပြောင်းအခြောက်ခံစက်ရုံနှင့် ပြောင်းမျိုးစေ့ထုတ်လုပ်သည့်စက်ရုံဖွင့်ပွဲအခမ်းအနားသို့ ပြည်နယ်ဦးစီးမှူး ဦးရွှေဖြူနှင့် ဝန်ထမ်းများမှ တက်ရောက်ခဲ့ပါသည်။

          အဆိုပါအခမ်းအနားတွင် စက်ရုံအဆောက်အဦအား တာဝန်ရှိသူများမှ ဖဲကြိုးဖြတ်ဖွင့်လှစ်၍ သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန ပြည်ထောင်စုဝန်ကြီး ဦးလှမိုးမှ အဖွင့်အမှာစကား ပြောကြားရာတွင် ကျွန်တော်တို့နိုင်ငံသည် စိုက်ပျိုးရေးနိုင်ငံဖြစ်သည့်အတွက် ယခုလို ပြောင်းအခြောက်ခံစက်ရုံကို တည်ဆောက်နိုင်ပြီဖြစ်၍ နိုင်ငံရဲ့ထွက်ကုန်တွေကို ကုန်ကြမ်းအစား ကုန်ချောများအဖြစ် အဆင့်မြှင့်တင်ထုတ်လုပ်နိုင်ပြီး ဝင်ငွေများများရမှာဖြစ်ကြောင်း၊ ဒါမှ မိမိတို့ သွားချင်တဲ့ ဖွံ့ဖြိုးတိုးတက်မှုကို ရရှိမှာဖြစ်ကြောင်း ပြောကြားခဲ့ပါသည်။ ထို့နောက် ရှမ်းပြည်နယ်အစိုးရ အဖွဲ့ ပြည်နယ်ဝန်ကြီးချုပ် ဦးအောင်အောင်မှ ရှမ်းပြည်နယ်သည် စိုက်ပျိုးရေးနှင့်ပတ်သက်သည့် အရင်းအမြစ်များစွာရှိသည့်အတွက် ဒေသခံပြည်သူများအနေဖြင့် ပြောင်းကို မြန်မာနိုင်ငံတွင် အများဆုံးစိုက်ပျိုးသည့် ပြည်နယ်ဖြစ်သလို နှစ်စဉ်နှစ်တိုင်း ဒေသခံပြည်သူတွေအတွက် ဝင်ငွေ အများကြီးရရှိနေတဲ့ စိုက်ပျိုးရေးသီးနှံတစ်ခုဖြစ်ကြောင်း၊ ပြည်နယ်အတွက်ကော နိုင်ငံအတွက်ကော ဖွံ့ဖြိုးတိုးတက်စေရန် များစွာအထောက်အကူဖြစ်စေတဲ့ စိုက်ပျိုးရေးလုပ်ငန်းသည် အစိတ်အပိုင်း တစ်ခုဖြစ်ကြောင်း၊ ရှမ်းပြည်နယ်ဒေသဖွံ့ဖြိုးရေးအတွက် များစွာအထောက်အကူဖြစ်စေကြောင်း ဂုဏ်ပြုစကားပြောကြားခဲ့ကြောင်း သိရှိရပါသည်။ မြန်မာ့ဩဘာလုပ်ငန်းစုနှင့် ဧရာဝတီမျိုးစေ့ကုမ္ပဏီ CEO ဦးသတိုးဟိန်း မှ  မြန်မာ့ဩဘာလုပ်ငန်းစု၏ ပြောင်းအခြောက်ခံစက်ရုံနှင့် သိုလှောင်ရုံများ၊ တောင်သူများနှင့် အကျိုးတူ ကန်ထရိုက်လယ်ယာစနစ်ဖြင့် ပြောင်းစိုက်ပျိုးခြင်း၊ ပြောင်းမျိုးစေ့ ထုတ်လုပ်ခြင်းလုပ်ငန်းများနှင့် ပတ်သက်၍ ရှင်းလင်းဆွေးနွေးခြင်းခဲ့ကြောင်း သိရှိရပါသည်။

          ဆက်လက်၍ အခမ်းအနားတွင် Grain & Edible Oils Co., Ltd မှ တာဝန်ရှိသူမှ စက်ရုံစီမံကိန်းနှင့်စပ်လျဉ်း၍ အမေရိကန်ဒေါ်လာ (၅)သန်းကျော်တန်ဖိုးရှိ အဓိကရင်းနှီးမြှုပ်နှံမှု တစ်ခုဖြစ်ကြောင်း၊ စက်ရုံသည် ပြောင်းအစိုတန်ချိန် (၈၀၀)၊ အခြောက်ခံပြီးသော ပြောင်းတန်ချိန် (၂၀၀၀၀)အထိ သိုလှောင်နိုင်ကြောင်း၊ ပြောင်းအခြောက်ခံစက်ရုံသည် တစ်လုံး (၁)နာရီလျှင် (၁၅)တန်နှုန်းဖြင့် အပူပေးရန်အတွက် သဘာဝပစ္စည်းများကို လောင်စာအဖြစ် အသုံးပြုခြင်း၊ ပြောင်းလုပ်ငန်းသာမက ဆီထွက်သီးနှံများအတွက်လည်း အခွင့်အလမ်းပိုမိုရရှိစေမှာဖြစ်ကြောင်း လုပ်ငန်းစီမံကိန်းနှင့်ပတ်သက်၍ ရှင်းလင်းတင်ပြခဲ့ကြောင်း သိရှိရပါတယ်။

       ထို့နောက် တက်ရောက်လာသော ဌာနဆိုင်ရာအကြီးအကဲများမှ စုပေါင်းမှတ်တမ်းတင် ဓါတ်ပုံရိုက်ကူး၍ သမဝါယမနှင့် ကျေးလက်ဖွံ့ဖြိုးရေး ဝန်ကြီးဌာန ပြည်ထောင်စုဝန်ကြီး ဦးလှမိုးနှင့် ရှမ်းပြည်နယ်ဝန်ကြီးချုပ် ဦးအောင်အောင်တို့မှ စက်ရုံဝန်းအတွင်း လှည့်လှည်ကြည့်ရှု၍ အခမ်းအနားအား နံနက်(၁၀:၃၀)နာရီအချိန်တွင် ပြီးမြောက်ခဲ့ကြောင်း သတင်းရရှိပါသည်။

DOCA(ရှမ်း)