သတင်းနှင့် လှုပ်ရှားမှုများ

       မကွေးတိုင်းဒေသကြီး၊ သရက်ခရိုင်၊ ကံမမြို့နယ်တာဝန်ခံသည် (၂၂-၉-၂၀၂၅)ရက်နေ့၊ နံနက် (၀၈း၀၀)နာရီအချိန်တွင် မြို့မစည်ပင်ဈေးရှိ ကုန်စုံဆိုင်(၃)ဆိုင်သို့ မြို့နယ်စီမံခန့်ခွဲရေးနှင့် အုပ်ချုပ် ရေးကော်မတီ၊ စည်ပင်သာယာရေးအဖွဲ့၊ ကျန်းမာရေးဦးစီးဌာန၊ ရပ်ကျေးအုပ်ချုပ်ရေးမှူးတို့နှင့်အတူ ပူးပေါင်း၍ စားသုံးသူများဘေးကင်းလုံခြုံ စိတ်ချရမှုရှိစေရေး ဈေးကွက်စောင့်ကြည့်စစ်ဆေးခဲ့ကြောင်း သိရှိရပါသည်။

          ထိုသို့ စစ်ဆေးရာတွင် ကံမမြို့နယ် တာဝန်ခံဒေါ်နွဲ့ယဥ်ဝင်းသည် ဈေးအတွင်းရှိ ရောင်းချ လျက်ရှိသော ကုန်စုံဆိုင်များတွင် စည်သွပ်အစားအစာ အမျိုးမျိုးတွင် စားသုံးသူကာကွယ်ရေးဥပဒေ ၂၀၁၉ အခန်း(၁၈) ပုဒ်မ(၄၁)အရ ကုန်စည်များတွင် ကုန်အညွှန်း အမှတ်အသားပြည့်စုံစွာ ဖော်ပြ ထားသည့် ကုန်စည်များသာရောင်းချရန်နှင့် မြန်မာနိုင်ငံစားသုံးသူကာကွယ်ရေးကော်မရှင်မှ ထုတ် ပြန်ထားသည့် ညွှန်ကြားချက်အမှတ် (၂/၂၀၁၉)နှင့်အညီ ပြည့်စုံစွာဖော်ပြရန်နှင့် မြန်မာ ဘာသာဖြင့် ဖော်ပြရမည့် အချက်များအား မဖြစ်မနေထည့်သွင်း ဖော်ပြခြင်းရှိ/မရှိနှင့် ကိုက်ညီမှု ရှိ/မရှိ ဈေးကွက်စောင့်ကြည့်စစ်ဆေးခဲ့ရာ SUn BRAnD ငါးသေတ္တာ (၄၂၅)ဂရမ်တွင် အဆိုပါ ညွှန်ကြား ချက်များနှင့် ကိုက်ညီမှုရှိကြောင်း စစ်ဆေးတွေ့ရှိခဲ့ရပြီး အခြားရောင်းချသည့် ကုန်စည်များ သည်လည်း ညွှန်ကြားချက်နှင့် ကိုက်ညီမှုရှိသည့် ကုန်စည်များသာ ရောင်းချရန် အသိပညာပေး ဆွေးနွေးပြောကြားခဲ့ကြောင်း သိရှိရပါသည်။

DOCA(မကွေး)

      စားသုံးသူရေးရာဦးစီးဌာန၊ မကွေးတိုင်းဒေသကြီး၊ မကွေးခရိုင် တာဝန်ခံနှင့်ဝန်ထမ်းသည် (၂၄.၉.၂၀၂၅)ရက်နေ့၊ နံနက်(၀၇:၃၀)နာရီအချိန်တွင် အစားအသောက်နှင့်ဆေးဝါးကွပ်ကဲရေးဦးစီး ဌာန၊ စည်ပင်သာယာရေးအဖွဲ့နှင့် မြန်မာနိုင်ငံရဲတပ်ဖွဲ့တို့ဖြင့်ပူးပေါင်း၍ မကွေးမြို့၊ ဆည်မြောင်းဈေး တွင်ရောင်းချလျက်ရှိသော ကုန်ပစ္စည်းများအား နမူနာဝယ်ယူ၍ Mobile Lab Van ဖြင့် ရှောင်တခင် စစ်ဆေးဆောင်ရွက်ခဲ့ကြောင်း သိရသည်။

     ထိုသို့ နမူနာဝယ်ယူစစ်ဆေးခဲ့သော ပဲပြား(S)၊ အမဲသွေး၊ ဝက်အူချောင်း၊ မုန့်ဟင်းခါးဖက်၊ ဂျုံကြာဇံခြောက်၊ ဆန်ကြာဇံခြောက်၊ ဘူးချဉ်၊ ပဲသွေးတို့၌ အစားအစာများတွင်သုံးစွဲရန်မသင့်သော ချွတ်ဆေးများ၊ တာရှည်ခံဆေးများ သုံးစွဲထားခြင်း ရှိ/ မရှိ  Mobile Lab Van ဖြင့်  အစားအသောက်နှင့် ဆေးဝါးကွပ်ကဲရေးဦးစီးဌာနမှ အဆိုပါစျေးအတွင်း ချက်ချင်းစစ်ဆေးခဲ့ရာ ပဲသွေးတွင် ခွင့်မပြု တာရှည်ခံဆေးများ သုံးစွဲထားကြောင်း တွေ့ရှိခဲ့ပါ၍ အဖွဲ့ဝင်များရှေ့မှောက်တွင်  ပဲသွေးအား ချက်ချင်းဖျက်ဆီးခဲ့ပြီး Mobile Lab Van ဖြင့် စစ်ဆေးနိုင်ခြင်းမရှိသည့် ငပိနှင့် အရောင်တင်မှုန့်တို့အား အစားအသောက်နှင့် ဆေးဝါးကွပ်ကဲရေးဦးစီးဌာန၊ ရုံးချုပ်(နေပြည်တော်)သို့ ပေးပို့ဆောင်ရွက်လျက်ရှိပြီး စားသုံးရန်မသင့်ကြောင်း စစ်ဆေး တွေ့ရှိပါက ထုတ်လုပ်သူလုပ်ငန်းရှင် များအား ဥပဒေအညီ အရေးယူဆောင်ရွက်သွားမည်ဖြစ်ကြောင်း သိရှိရပါသည်။

DOCA(မကွေး)

     ၂၀၂၅ခုနှစ်၊ စက်တင်ဘာလ (၂၃)ရက်နေ့၊ နံနက်(၁၀:၀၀)အချိန်တွင် မကွေးတိုင်းဒေသကြီး၊ စားသုံးသူရေးရာဦးစီးဌာနရုံး၊ အစည်းအဝေးခန်းမ၌ (၁/၂၀၂၅)ကြိမ်မြောက် အလုပ်ရုံဆွေးနွေးပွဲအား  "စားသုံးသူစွမ်းဆောင်ရည်မြင့်မားရေး ကဏ္ဍစုံဖြင့်ဆောင်ရွက်ပေး" ခေါင်းစဉ်ဖြင့် ကျင်းပပြုလုပ်ခဲ့ပြီး ဖိတ်ကြားထားသည့် စီးပွားရေးလုပ်ငန်းရှင်များ စုစုပေါင်း(၆၀)ဦး တက်ရောက်ခဲ့ကြပြီး လက်ကမ်း စာစောင်ဝေငှခြင်းများ ဆောင်ရွက်ခဲ့ကြောင်း သိရသည်။

     အဆိုပါဆွေးနွေးပွဲတွင် တိုင်းဒေသကြီးစားသုံးသူရေးရာကော်မတီအဖွဲ့ ဥက္ကဌ စီးပွားရေးရာ ဝန်ကြီးမှ အဖွင့်အမှာစကားပြောကြားခဲ့ပြီး တိုင်းဒေသကြီးဦးစီးမှူးမှ ကုန်အညွှန်းအမှတ်အသားပြည့်စုံမှ စိတ်ချယုံကြည်သုံးစွဲကြ ဟူသော ခေါင်းစဉ်ဖြင့် စားသုံးသူကာကွယ်ရေးဥပဒေပါ ကုန်အညွှန်း အမှတ်အသားဖော်ပြခြင်းနှင့် စပ်လျဉ်း၍ရှင်းလင်းဆွေးနွေးခြင်း၊ ဒေါ်စုစုထွန်း လက်ထောက်ညွှန် ကြားရေးမှူးမှ စားသုံးသူကာကွယ်ရေးဥပဒေပါ စားသုံးသူများရရှိမည့် အခွင့်အရေးနှင့် တာဝန် များ၊ CICCတိုင်ကြားနိုင်သည့်နည်းလမ်းများအား ရှင်းလင်းဆွေးနွေးခြင်းနှင့် တက်ရောက်လာသူ များအား အုပ်စု အဖွဲ့(၃)စုဖွဲ့၍ စားပွဲဝိုင်း(၃)ခုဖြင့် အုပ်စု အလိုက်ခေါင်းစဉ်အသီးသီးဖြင့် ဝိုင်းဝန်းဆွေးနွေးခြင်းများ ဆောင်ရွက်ခဲ့ရာ စားသုံးသူမိဘ ပြည်သူများအနေဖြင့် မိမိတို့ရရှိမည့် အခွင့်အရေးများအပေါ် နစ်နာဆုံးရှုံးမှုများရှိပါက Consumer Call Center Hot Line No.1535 သို့ ဆက်သွယ်၍ တိုင်ကြားမှုများ ပြုလုပ်နိုင်ရန်၊ CICC တိုင်ကြားမှုများနှင့် စပ်လျဉ်း၍ စားသုံးသူအမှန်တစ်ကယ် နစ်နာဆုံးရှုံးမှုရှိပါက လုပ်ငန်းရှင်ဘက်မှ တာဝန်ယူမှု၊ တာဝန်ခံမှု အပြည့်ဖြင့် ဆောင်ရွက်ပေးရန်၊ စားသုံးသူမိဘပြည်သူများ ဘက်မှလည်း မိမိတို့ရရှိမည့် အခွင့် အရေးများကို သိရှိသကဲ့သို့ လိုက်နာရမည့် တာဝန်များကိုလည်း သိရှိလိုက်နာရန်၊ မကွေးတိုင်း ဒေသကြီးအတွင်း ထုတ်လုပ်သည့်ကုန်စည် များအားလုံး ဥပဒေပြဌာန်းချက်ပါ သတ်မှတ်ချက်များ နှင့်အညီ ကုန်အညွှန်းအမှတ်အသားများ ပြည့်စုံမှန်ကန်စွာဖော်ပြခြင်းကို လုပ်ငန်းရှင်တစ်ဦး ချင်းစီမှ လိုက်နာဆောင်ရွက်ရန်၊ ကုန်စည်များ ထုတ်လုပ်ရာတွင် မိမိထုတ်ကုန်နှင့်ပတ်သက်၍ ဘေးအန္တရာယ်ကင်းရှင်းစေရေး၊ အရည်အသွေး ကောင်းမွန်မှန်ကန်စေရေး၊ တာဝန်ယူမှု/ တာဝန် ခံမှုရှိစေရေးနှင့် အာမခံချက်ပေးနိုင်ရေးတို့ကို အလေးထားဆောင်ရွက်သွားရန်၊ ကုန်အညွှန်း အမှတ်အသား ပြည့်စုံစွာ ဖော်ပြထားခြင်းမရှိသည့် ကုန်စည်များအား ဈေးကွက်အတွင်း တင်သွင်း ခွင့်မပြုရန်နှင့် ဝယ်ယူသုံးစွဲလျက်ရှိသည့် စားသုံးသူ များအနေဖြင့်လည်း ဝယ်ယူသုံးစွဲခြင်းမပြုရန် ဟူသော အချက်များအား ဖော်ထုတ်နိုင်ခဲ့ပြီး အလုပ်ရုံဆွေးနွေးပွဲအား (၁၃:၀၀)နာရီအချိန်တွင် ရုတ်သိမ်းနိုင်ခဲ့ကြောင်း သတင်းရရှိပါသည်။

DOCA(မကွေး)

     မကွေးတိုင်းဒေသကြီးသို့ စားအုန်းဆီဖြန့်ဖြူးသည့် ကုမ္ပဏီများနှင့် ခရိုင်/ မြို့နယ်အလိုက် ဆီလက်ကား/ လက်လီကုန်သည်များကို စားအုန်းဆီဖြန့်ဖြူးရောင်းချခြင်း လုပ်ငန်းများအား စနစ်တကျ ဆောင်ရွက်စေရေး၊ ဖြန့်ဖြူးရောင်းချရာတွင် ညွှန်ကြားချက်များ လိုက်နာဆောင်ရွက် စေရေး၊ ပျက်ကွက်ခြင်းနှင့် မသမာမှု ဆောင်ရွက်ခြင်းများ မဖြစ်ပေါ်စေရေး၊ သတ်မှတ်ရည်ညွှန်း ဈေးဖြင့် သတ်မှတ်ပမာဏအတိုင်း ဖြန့်ဖြူးရောင်းချနိုင်စေရေး ကြီးကြပ်ကွပ်ကဲရန် ရည်ရွယ်၍ မကွေးတိုင်းဒေသကြီး စားအုန်းဆီဖြန့်ဖြူးရောင်းချခြင်းကြီးကြပ်ရေးကော်မတီ (၂/၂၀၂၅)ကြိမ်မြောက်လုပ်ငန်းညှိနှိုင်းအစည်းအဝေးကို ၂၀၂၅ ခုနှစ်၊ စက်တင်ဘာလ (၁၁)ရက်နေ့ ၊နံနက် (၁၁:၃၀)နာရီအချိန်တွင် စားသုံးသူရေးရာဦးစီးဌာန၊ မကွေးတိုင်းဒေသကြီးဦးစီးမှူးရုံး အစည်းအဝေးခန်းမ၌ ဥက္ကဌ မကွေးတိုင်းဒေသကြီးအစိုးရအဖွဲ့ စီးပွားရေးရာဝန်ကြီးမှ ဦးဆောင်၍ ကော်မတီ အဖွဲ့ဝင်များနှင့် အတူ ကျင်းပဆောင်ရွက်ခဲ့ပါသည်။

          အဆိုပါ လုပ်ငန်းညှိနှိုင်းအစည်းအဝေးတွင် မကွေးတိုင်းဒေသကြီး စားအုန်းဆီဖြန့်ဖြူး ရောင်းချခြင်းကြီးကြပ်ရေးကော်မတီ ဥက္ကဌ မကွေးတိုင်းဒေသကြီးအစိုးရအဖွဲ့ စီးပွားရေးရာဝန်ကြီး က ဆီဖြန့်ဖြူးခြင်း လုပ်ငန်းစဉ်သည် ကိုယ့်အပိုင်းနှင့်ကိုယ် တာဝန်ယူမှု၊ တာဝန်ခံမှုနှင့် ဆောင်ရွက် ကြသကဲ့သို့ ထိန်းကျောင်းကြပ်မတ်သည့် အဖွဲ့မှလည်း လုပ်ထုံးလုပ်နည်းနှင့်အညီ ထိန်းကျောင်း ကြပ်မတ် ဆောင်ရွက်သွားရမည်ဖြစ်ကြောင်း၊ ကော်မတီအနေဖြင့် လုပ်ဆောင်နေသည့် လုပ်ငန်း တာဝန်များမှာ ပြည်သူများအတွက် လုပ်ဆောင်ပေးနေသည်ကို အသိပေးချပြရန် လိုအပ်ကြောင်း၊ ယခုအချိန်သည် အရေးကြီးကာလ ဖြစ်သည့်အတွက် ကော်မတီအဖွဲ့ဝင်များအနေဖြင့် ယခုထက် ပိုမို၍ ကွင်းဆင်းကြပ်မတ် စစ်ဆေးဆောင်ရွက်စေလိုကြောင်း ပြောကြားခဲ့ပါသည်။

          ဆက်လက်၍ မကွေးတိုင်းဒေသကြီး စားအုန်းဆီဖြန့်ဖြူးရောင်းချခြင်းကြီးကြပ်ရေးကော်မတီ အတွင်းရေးမှူးက မကွေးတိုင်းဒေသကြီး စားအုန်းဆီဖြန့်ဖြူးရောင်းချခြင်းကြီးကြပ်ရေးကော်မတီ၏ အောက်တွင် မကွေးတိုင်းဒေသကြီး စက်မှုလုပ်ငန်းသုံးဆီကြီးကြပ်ရေးအဖွဲ့နှင့် မြေပြင်ကွင်းဆင်း စစ်ဆေးရေးအဖွဲ့ဟူ၍ အဖွဲ့၂ ဖွဲ့ ဖွဲ့စည်းတာဝန်ပေးအပ်ထားပြီး ကွင်းဆင်းစစ်ဆေးခြင်းလုပ်ငန်းများ ဆောင်ရွက်လျက်ရှိပါကြောင်းနှင့် စားအုန်းဆီဖြန့်ဖြူးခြင်းနှင့်စပ်လျဉ်း၍ လက်ရှိ လုပ်ငန်းဆောင်ရွက်နေမှု အခြေအနေများအား ရှင်းလင်း တင်ပြပြီး အမှာစာစောင်အား ဖတ်ကြား၍ ကော်မတီ(၂/၂၀၂၅)၏ အတည်ပြုချက်ရယူကာ မကွေးတိုင်းဒေသကြီး စားအုန်းဆီဖြန့်ဖြူးရောင်းချခြင်းကြီးကြပ်ရေးကော်မတီ  (၈)ချက်အား ချမှတ်၍ (၃)ကြိမ်မြောက် လုပ်ငန်းညှိနှိုင်း အစည်းအဝေးတွင် ဆုံးဖြတ်ချက်ခဲ့ကြပြီး အစည်းအဝေးကို နေ့လယ် (၁၃၀၀)နာရီအချိန်တွင် ရုတ်သိမ်းခဲ့ကြောင်း သိရှိရပါသည်။

DOCA(မကွေး)

             စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံး ညောင်တုန်းမြို့နယ်၊ မြို့နယ်ဦးစီးမှူး ဦးအောင်လွင်နှင့် ဝန်ထမ်းများသည် (၂၃.၉.၂၀၂၅) ရက်နေ့ နံနက် (၁၁း၃၀) နာရီအချိန်တွင် ဆန်ကုန်သည်(၁၅)ဦးအား စားသုံးသူကာကွယ်ရေးအသိပညာပေး ဆွေးနွေးမှု ပြုလုပ်ခဲ့ကြပါသည်။

    အဆိုပါဆွေးနွေးအသိပညာပေးပွဲတွင် မြန်မာနိုင်ငံဆန်စက်လုပ်ငန်းရှင်များအသင်း အထွေထွေအတွင်းရေးမှူး၊ မြို့နယ်မီးသပ်ဦးစီးဌာနနှင့် ကုန်စည်ဒိုင်အသင်သားများပါဝင်ပြီး ဆွေးနွေးခဲ့ကြပါသည်။

       ဆက်လက်၍ ညောင်တုန်းမြို့နယ်ဦးစီးမှူးမှ စားသုံးသူရေးရာဦးစီးဌာန၏ လုပ်ငန်းတာဝန် သက်မှတ်ချက်များအကြောင်း၊ ဦးစီးဌာန၏ မူဝါဒများအကြောင်း၊ ဌာန၏ ရည်မှန်းချက်များ အကြောင်းနှင့် မျှော်မှန်းချက်ဖြစ်သော ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူကာကွယ်ရေး လုပ်ငန်းများဖြင့် နိုင်ငံစီးပွားဖွံ့ဖြိုးတိုးတက်စေရန် မျှော်မှန်းဆောင်ရွက်ချက်များအကြောင်း၊ ကုန်စည်၊ ဝန်ဆောင်မှုနှင့် စပ်လျဉ်း၍ စားသုံးသူများနစ်နာမှု ရှိလာပါကအရေးဆို တိုင်ကြား နိုင်သည့် Call Center 1535 သို့ ဆက်သွယ် မေးမြန်း တိုင်ကြား နိုင်ပြီဖြစ်ကြောင်း၊ စီးပွားရေး လုပ်ငန်းရှင်များအနေဖြင့် ဝန်ဆောင်မှုနှင့် စပ်လျဉ်း၍ သိရှိလို သည်များကို မည်သူမဆို Call Center 1535  မေးမြန်းနိုင်ပါကြောင်း ဆန်စက်လုပ်ငန်းရှင်များအာ အသိပညာပေးဟောပြောခဲ့ကြောင်း သိရှိရပါသည်။

DOCA(ဧရာဝတီ)