သတင်းနှင့် လှုပ်ရှားမှုများ

      စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ဝန်ထမ်းများသည် (၄.၅.၂၀၂၆)ရက်နေ့၊ နံနက်(၁၀:၀၀)နာရီ အချိန်တွင်  ပခုက္ကူမြို့၊ အမှတ်(၁၅)ရပ်ကွက်ရှိ  “ပြည့်စုံအောင်”  မြေပဲဆုံဆီ လုပ်ငန်းရှင်နှင့်တွေ့ဆုံ၍ မြေပဲဆံ၊ မြေပဲဆုံဆီ ဈေးနှုန်း/ဈေးကွက်များ၊ ကြိတ်ခွဲ ထုတ်လုပ်မှု နှင့်  ရောင်းချမှုအခြေအနေများအား မေးမြန်းခဲ့ပါသည်။

          ဆုံဆီလုပ်ငန်းရှင်မှ  မြေပဲဆုံဆီလုပ်ငန်းကို လုပ်ကိုင်သည်မှာ  (၇)နှစ်ခန့် ရှိပြီဖြစ်၍ ဇာတိမြေ ဖြစ်သော ပခုက္ကူမြို့နယ်၊ ကမ္မမြို့မှ လာရောက် နေထိုင်လုပ်ကိုင်ကြောင်း၊ ကုန်ကြမ်းမြေပဲဆံများကို မြို့ပေါ်ရှိ မြေပဲပွဲရုံများမှ ဝယ်ယူပြီး မြေပဲလုံးဆန် (ပြန့်)တစ်ပိဿာလျှင် ကျပ်(၁၂၇၀၀)ဖြင့် ဝယ်ယူရပြီး သစ်သားဆုံ(၂)လုံးတွဲဖြင့် ကြိတ်ခွဲကြောင်း၊ မီးလာသည့်အချိန်ပေါ်တွင် မူတည်၍ တစ်ရက်လျှင် (၂)ဆုံ(၃)တွဲခန့် ကြိတ်ခွဲပြီးကြောင်း၊ မိသားစုတစ်ပိုင်တစ်နိုင်လုပ်ငန်းဖြစ်၍ လုပ်သားဦးရေ (၁)ဦးတည်း သာ ငှားရမ်းကြောင်း၊ ထွက်ရှိသည့်ဆုံအရေအတွက်ပေါ်မူတည်၍ တစ်ဆုံလျှင် ကျပ်(၁၃၀၀)ပေးကြောင်း၊ ဈေးနှုန်းအနေဖြင့် ဆုံဆီတစ်ပိဿာလျှင် ကျပ်(၂၂၀၀၀) ၊ (၁၀)ပိဿာပုံးအပါ ဆိုလျှင် ကျပ်(၂၄၀၀၀)၊ ပဲဖတ် တစ်ပိဿာလျှင် ကျပ်(၇၇၀၀-၇၈၀၀)ဖြင့် အိမ်သို့ လာရောက်ဝယ်ယူကြကြောင်း၊ ဈေးကွက် အနေဖြင့် မြို့ပေါ်ရောင်းချမှုနည်းပြီး ရန်ကုန်သို့ အဓိကထားတင်ပို့ကြောင်း၊ တန်ခူးလနှင့် ကဆုန်လ များ၌ အလှူပွဲ၊ မင်္ဂလာပွဲများနှင့် ကုသိုလ်အထူးပြုလုပ် သည့်အချိန်များဖြစ်၍ ယခင်လများထက် ရောင်းအားကောင်းကြောင်း၊ အကျိုးအမြတ်အနေဖြင့် (၁၀)ပိဿာဆံ့ ပုံးဝါ တစ်ပုံးလျှင် ကျပ်(၁၀၀၀၀/ ၁၅၀၀၀)ခန့် ကျန်ရှိပြီး တစ်လရောင်းအား ပိဿာချိန် (၉၀၀-၁၀၀၀)ခန့် ရောင်းချရကြောင်း၊  လုပ်ငန်း အစတွင် အခက်အခဲများစွာရှိသော်လည်း  လက်ရှိအချိန်တွင် အမှာအော်ဒါများ ရရှိသောကြောင့် အဆင်ပြေကြောင်း ဆုံဆီလုပ်ငန်းရှင် ဦးဝင်းအောင်၏ ပြောပြချက်အရ သိရှိရပါသည်။

DOCA(မကွေး)

                   ပဲခူးတိုင်းဒေသကြီး၊ သာယာဝတီခရိုင်၊ အုတ်ဖိုမြို့နယ်တွင် စားသုံးသူရေးရာဦးစီးဌာန မြို့နယ် တာဝန်ခံရုံးမှ ဝန်ထမ်းများသည် ၂၀၂၆ခုနှစ်၊ မေလ ၅ရက်နေ့ ၊ နံနက် (၁၀ : ၀၀) နာရီတွင် ကြက်ဆူ တောလမ်းမှ ဦးသိန်းဇော်၏ အောင်ဆုပန်ဆန်စက်နှင့် ဆန်စပါးရောင်းဝယ်ရေးသို့ ကွင်းဆင်းစစ်ဆေးခဲ့ပြီး ရောင်းချမှုဈေးနှုန်း၊ အရည်အသွေးနှင့် လက်ကျန်အခြေအနေများကို ကွင်းဆင်း စီစစ်ခဲ့ပါသည်။

          အဆိုပါကွင်းဆင်းစစ်ဆေးမှုတွင် စားသုံးသူရေးရာဦးစီးဌာနနှင့်အတူ မြို့နယ်စည်ပင်သာယာရေးအဖွဲ့မှ ပူးပေါင်းပါဝင်ခဲ့ပြီး ဆန်များအရည်အသွေးနှင့် အလေးချိန်မှန်ကန်စေရန် အသိပညာပေး ညွှန်ကြားခဲ့ပြီး စားသုံးသူများ၏ အခွင့်အရေးအား မထိခိုက်စေရန် ဥပဒေသတ်မှတ်ချက်များအား လိုက်နာဆောင်ရွက်ရန် တိုက်တွန်းခဲ့ပါသည်။

DOCA(ပဲခူး)

          (၁၃.၅.၂၀၂၆)ရက်နေ့၊ နံနက်(၁၀း၀၀)နာရီအချိန်တွင် ရန်ကုန်တိုင်းဒေသကြီး၊ စားသုံးသူရေးရာဦးစီးဌာနမှ ဗိုလ်တထောင်ခရိုင်၊ ပုဇွန်တောင်မြို့နယ်တာဝန်ခံ ဒေါ်မိုးမိုးကြည်သည် ပုဇွန်တောင်မြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနတွင် စားသုံးသူပြည်သူများအား ကုန်အညွှန်းအမှတ်အသားများနှင့်ပတ်သက်၍ မြေပြင်ကွင်းဆင်းသိကောင်းစာရာများအား အသိပညာပေး Talk Show ကျင်းပပြုလုပ်ခဲ့ကြောင်း သိရသည်။

         ထိုသို့ပြုလုပ်ရာတွင် ရန်ကုန်အရှေ့ပိုင်းခရိုင်ဦးစီးမှူးရုံးမှ ဒေါ်မိုးမိုးကြည်(ဌာနခွဲစာရေး)က  ကုန်အညွှန်းအမှတ်အသားဖော်ပြခြင်းဆိုင်ရာ အကြောင်းအရာများနှင့်ပတ်သက်၍  မြေပြင်ကွင်းဆင်းစစ်‌ဆေးရာတွင် ကုန်စည်၏တံဆိပ်အမှတ်အသား၊ ကုန်စည်၏အမျိုးအမည်၊ အရွယ် အစား၊ အ‌ရေအတွက်၊ အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ထုတ်လုပ်သည့်ရက်စွဲနှင့် သက်တမ်းကုန်ဆုံးသည့်ရက်၊ ကျန်းမာရေးဘေးထွက်ဆိုးကျိုးနှင့် ဓါတ်မတည့်ကြောင်းဖော်ပြချက်၊ ကြိုတင်သတိပေးချက်များနှင့် သက်ဆိုင်ရာအစိုးရဌာများက ဖော်ပြရန် သတ်မှတ်ထားသော သတင်းအချက်အလက်များအား သိသာထင်ရှားစွာဖော်ပြရမည်ဖြစ်ကြောင်း အကျယ်တဝန်း ရှင်းလင်းဆွေးနွေးခဲ့ပါသည်။ ထို့နောက် မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ကြော်ငြာထားသော ညွှန်ကြားချက်အမှတ် (၂/၂၀၁၉) နှင့်အညီ မြန်မာဘာသာဖြင့် ပြည်စုံစွာဖော်ပြထားသော ကုန်စည်များကိုသာရောင်းချရန်၊ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာ တစ်ခု(သို့)တစ်ခုထက်ပို၍ တွဲလျက်ဖြစ်စေရေးသားဖော်ပြရမည်ဖြစ်ကြောင်း အသိပညာပေး Talk Show ကျင်းပပြုလုပ်ခဲ့ကြောင်း သိရှိရပါသည်။

DOCA(ရန်ကုန်)

       စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဦးသိန်းထွန်း(ဌာနခွဲစာရေး)နှင့် ဝန်ထမ်းများသည်  မြောက်ဥက္ကလာပမြို့နယ်အထွေထွေအုပ်ချုပ်ရေးဦးစီးဌာနနှင့် ပူးပေါင်း၍  (၁၃.၅.၂၀၂၆) ရက်နေ့၊ နံနက်(၁၀:၀၀) နာရီအချိန်တွင် မြောက်ဥက္ကလာပမြို့နယ်အတွင်းရှိ စားအုန်းဆီလက်လီ/လက်ကားရောင်းချသည့် အရောင်းဆိုင်များသို့  သွားရောက်၍ စားအုန်းဆီရောင်းချမှုအခြေအနေများကို အပတ်စဉ်ကွင်းဆင်းစစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။

           ထိုသို့ ကွင်းဆင်းစစ်ဆေးရာတွင် ဦးသိန်းထွန်း (ဌာနခွဲစာရေး)က စားအုန်းဆီလက်လီရောင်းချသူများအနေဖြင့် သတ်မှတ်ရည်ညွှန်းဈေးအပေါ် သယ်ယူပို့ဆောင်စရိတ်အပါအဝင် ဖြစ်သင့်ဖြစ်ထိုက်သည့် အမြတ်ရာခိုင်နှုန်းထက်ပိုမို၍ ရောင်းချနေမှုရှိ/ မရှိစစ်ဆေးခြင်း ဈေးကစားရန်အလို့ငှာ စားဆီများသိုလှောင်ထားခြင်းရှိ/ မရှိတို့ကို စစ်ဆေးခြင်းများဆောင်ရွက်ခဲ့ပြီး  ရောင်းဝယ်ဖောက်ကားရမည့် အခြေခံလက်ကားရည်ညွှန်းဈေးနှုန်းကို စားသုံးသူရေးရာဦးစီးဌာနမှ  အပတ်စဉ်ထုတ်ပြန်ပေးလျက်ရှိသည့်အတွက် လုပ်ငန်းရှင်များအနေဖြင့် စနစ်တကျလိုက်နာပေးစေလိုကြောင်း အသိပေးပြောကြားခဲ့ကြောင်း သိရှိရပါသည်။ စားအုန်းဆီအရောင်းဆိုင်တို့အား ဝင်ရောက်စစ်ဆေးခဲ့ရာတွင် စားအုန်းဆီ‌နှင့်ပတ်သက်ပြီး မိမိရရှိသောခွဲတမ်းများကို စားအုပ်စနစ်ဖြင့် ရပ်ကွက်နေစားသုံးသူပြည်သူများလက်ဝယ်သို့ အမှန်တကယ်ရောက်ရှိ စားသုံးနိုင်ရန်ရောင်းချပေးပါကြောင်း၊ အလေးချိန်လည်းမှန်ကန်စွာချိန်တွယ်ပေးပါကြောင်း၊ လက်ကျန်များမထားရှိကြောင်း ကွင်းဆင်းစစ်ဆေးချက်အရ သိရှိရပါသည်။

DOCA(ရန်ကုန်)

                  စားသုံးသူများ ဘေးအန္တရာယ်ကင်းရှင်းစေရေး၊ ထိခိုက်နစ်နာဆုံးရှုံးမှုများ မဖြစ်ပေါ်စေရေးတို့ အတွက် အစဉ်တစိုက်ဈေးကွက်စောင့်ကြည့်စစ်ဆေးခြင်းများကို ဆောင်ရွက်လျက်ရှိရာ မြင်းခြံခရိုင် ဦးစီးမှူးရုံးမှ ဒု-ခရိုင်ဦးစီးမှူး ဦးတင်ဇော်ထွေးနှင့်စစ်ဆေးရေးမှူးများသည် မြို့နယ်စည်ပင်သာယာရေး အဖွဲ့တို့နှင့်ပူးပေါင်း၍ (၂၇.၄.၂၀၂၆) ရက်နေ့၊ နံနက် ၁၀:၃၀ နာရီအချိန်တွင် မြို့မစည်ပင်သာယာ ဈေးအတွင်းရှိ စားသုံးဆီရောင်းချသော ကုန်စုံဆိုင်များသို့ ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ကြပါသည်။

                     စားသုံးဆီအမျိုးမျိုးမှာ နေ့စဉ်ချက်ပြုတ် စားသောက်မှုတွင် မပါမဖြစ်ထည့်သွင်းအသုံးပြုရသည့် အတွက် သတ်မှတ်စံချိန်စံညွှန်းများနှင့် ကိုက်ညီမှုမရှိသောဆီများနှင့် ပြန်လည်သန့်စင်ထားသည့်ဆီများ ဈေးကွက်အတွင်းရောင်းချပါက စားသုံးသူများကို ဘေးန္တရာယ်ဖြစ်ပွားစေခြင်း၊ ဘေးန္တရာယ်ဖြစ်စေ နိုင်သည့်ဆီများကို ရေရှည်စားသုံးမိပါက စားသုံးသူများအနေဖြင့် ကျန်းမာရေးဆိုင်ရာ ဆိုးကျိုးများ ဖြစ်ပွားစေနိုင်ပြီး ထိခိုက်နစ်နာဆုံးရှုံးမှုများ ဖြစ်ပေါ်စေနိုင်သဖြင့် ပင်ရင်းပါဝင်ပစ္စည်းကို အခြေခံသော ကုန်စည်၏ အမျိုးအမည်ကို မြန်မာဘာသာဖြင့် တိကျစွာဖော်ပြစေခြင်းကို လိုက်နာဆောင်ရွက်စေရေး၊ စီးပွားရေးကျင့်ဝတ်စည်းကမ်းများနှင့်အညီ ဆောင်ရွက်စေရေး၊ ကုန်စည်နှင့်စပ်လျဉ်း၍ပြည့်စုံမှန်ကန် သော သတင်းအချက်အလက်များကို ဖော်ပြပါရှိစေရေး၊ စားသုံးသူနစ်နာဆုံးရှုံးမှုဖြစ်ပေါ်စေသည့် ကုန်စည်နှင့်ဝန်ဆောင်မှုများကို တိုက်ရိုက်(သို့မဟုတ်)သွယ်ဝိုက်၍ ရောင်းချခြင်းများမပြုလုပ်စေရေး၊ စားသုံးသူကာကွယ်ရေးဥပဒေအခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ သတ်မှတ်ချက်များနှင့်အညီ ပြည့်စုံစွာဖော်ပြပါဝင်သော ကုန်စည်များကိုသာ ထုတ်လုပ်ဖြန့်ဖြူးရောင်းချ ကြရန် သက်ဆိုင်ရာဌာနများမှ ဖော်ပြရန်သတ်မှတ်ထားသောအချက်များ၊ ထောက်ခံချက်များ၊ ဥပဒေပါပြဌာန်းချက်၊ လုပ်ထုံးလုပ်နည်း၊ အမိန့်ညွှန်ကြားချက်များနှင့်အညီ လိုက်နာဆောင်ရွက်စေရေး တို့ကို စစ်ဆေးဆောင်ရွက်ခဲ့ရာ ကုန်အညွှန်းအမှတ်အသားပြည့်စုံစွာဖော်ပြသော  ကုန်စည်များသာ ရောင်းချလျက် ရှိကြောင်း တွေ့ရှိရပါသည်။

DOCA(မန္တလေး)