ပြည်ပကုန်သွယ်မှုသတင်းများ

          သီးနှံရာသီအသစ်မှ ထွက်ရှိသော ဆန်စပါးများ ဈေးကွက်ဝင်ရောက်မှု များပြားပြီး ဝယ်ယူမှုများ နှောင့်နှေးလျက်ရှိမှုနှင့်အတူ အိန္ဒိယ၏ ဆန်ပို့ကုန်ဈေးနှုန်းများသည် ဖေဖော်ဝါရီလ ဒုတိယရက်သတ္တပတ်၌ ဆက်လက်ကျဆင်းခဲ့ပြီး ၁၉ လအတွင်း အနိမ့်ဆုံးဈေးနှုန်းသို့ ရောက်ရှိခဲ့ သည့်နည်းတူ ဗီယက်နမ်၏ ဆန်ပို့ကုန်ဈေးနှုန်းများသည်လည်း ၂ နှစ်အတွင်း အနိမ့်ဆုံးသို့ ရောက် ရှိလာကြောင်း ရိုက်တာသတင်းဌာနက ဖော်ပြပါသည်။

          ဆန်ကွဲ ၅ ရာခိုင်နှုန်းပါဝင်သော အိန္ဒိယ ပေါင်းဆန်ဈေးနှုန်းသည် ယခင်သီတင်းပတ်၌ မက်ထရစ်တစ်တန်လျှင် ဒေါ်လာ ၄၁၈ မှ ၄၂၈ အတွင်းရှိရာမှ ဖေဖော်ဝါရီ ဒုတိယရက်သတ္တပတ် တွင် ၄၁၆ ဒေါ်လာမှ ၄၂၅ ဒေါ်လာ နှုန်းထားအတွင်းသို့ ကျဆင်းခဲ့သည်။ ဆန်ကွဲ ၅ ရာခိုင်နှုန်း ပါဝင်သော အိန္ဒိယ ဆန်ဖြူဈေးနှုန်းမှာမူ ယခုသီတင်းပတ်၌ တစ်တန်လျှင် ၃၉၅ ‌ဒေါ်လာမှ ၄၀၅ ဒေါ်လာအတွင်းနှုန်းထားဖြင့် ကမ်းလှမ်းလျက်ရှိခဲ့သည်။

          အာဖရိကဒေသမှဝယ်လက်များ၏ ဆန်ဝယ်ယူမှုမှာနှေးကွေးလျက်ရှိကြောင်း၊ ဆန်ဈေးနှုန်း များမှာ ဆက်တိုက်ကျဆင်းလျက်ရှိရာ ၎င်းတို့အနေဖြင့် ဈေးနှုန်းတည်ငြိမ်လာချိန်အထိ စောင့်ဆိုင်း နေကြခြင်းဖြစ်ကြောင်း ကောလ်ကတ္တားမြို့အခြေစိုက် ဆန်တင်ပို့သူတစ်ဦးက ပြောဆိုခဲ့သည်။ အိန္ဒိယရူပီးငွေ၏ တန်ဖိုးသည် ယခုသီတင်းပတ်၌ စံချိန်တင်ကျဆင်းလျက်ရှိရာ ပြည်ပသို့ ဆန် တင်ပို့ရာ၌ ကုန်သည်များ၏ အကျိုးအမြတ်ရရှိမှုကို ထိရောက်စွာ တိုးတက်စေလျက်ရှိသည်။

          ဗီယက်နမ်၏ ဆန်ကွဲ ၅ ရာခိုင်နှုန်းပါဝင်သော ဆန်ဖြူဈေးနှုန်းမှာ ဖေဖော်ဝါရီ ၁၃ ရက်နေ့၌ တစ်တန်လျှင် ၃၉၇ ဒေါ်လာနှုန်းဖြင့် ကမ်းလှမ်းမှုရှိခဲ့ပြီး ဗီယက်နမ်နှစ်သစ်ကူး ပိတ်ရက်များ မတိုင်မီ ယခင်ရက်သတ္တပတ်၌ ၄၀၄ ဒေါ်လာနှုန်းရှိရာမှ ကျဆင်းခဲ့ခြင်းဖြစ်ကြောင်း ဗီယက်နမ် စားသောက်ကုန်အသင်းက ဖော်ပြသည်။ အဆိုပါနှုန်းထားသည် ၂၀၂၂ ခုနှစ် စက်တင်ဘာလ နောက်ပိုင်း အနိမ့်ဆုံးပင်ဖြစ်သည်။

          ဆန်ရောင်းလိုအားမြင့်မားနေဦးမည်ဟု မျှော်မှန်းပြီး ဝယ်လက်များအနေဖြင့် စာချုပ်အသစ် များ ချုပ်ဆိုခြင်းမရှိသောကြောင့် ဈေးနှုန်းများထပ်မံကျဆင်းလာခြင်းဖြစ်သည်ဟု ကုန်သည်များ က ပြောဆိုကြသည်။ ဟိုချီမင်းမြို့ အခြေစိုက် ကုန်သည်တစ်ဦးက အိန္ဒိယ၏ ဆန်ရောင်းလိုအား မြင့်မားနေချိန်၌ မဲခေါင်မြစ်ဝကျွန်းပေါ်‌ဒေသတွင် ဗီယက်နမ်၏ ဆောင်းအကုန်နွေအကူး စပါးရိတ် သိမ်းမှု စတင်ခဲ့ခြင်းဖြစ်ကြောင်း ပြောဆိုခဲ့သည်။

          ထိုင်းနိုင်ငံ၏ ဆန်ကွဲ ၅ ရာခိုင်နှုန်းပါဝင်သော ဆန်ဖြူဈေးနှုန်းမှာမူ ယခင်သီတင်းပတ် အတိုင်း ပြောင်းလဲမှုမရှိပဲ တစ်တန်လျှင် ၄၁၅ ‌ဒေါ်လာမှ ၄၂၀ ဒေါ်လာအတွင်းနှုန်းထားဖြင့် တည်ငြိမ်နေခဲ့သည်။

          ဆန်ဝယ်လိုအားမှာ အလွန်ငြိမ်သက်မှုရှိနေခဲ့ပြီး အိန္ဒိယနှင့် ဗီယက်နမ်တို့၌ ထုတ်လုပ်မှု အားကောင်းနေခြင်းက ဈေးနှုန်းများအပေါ် ဖိအားသက်ရောက်လျက်ရှိကြောင်း ဗန်ကောက်မြို့ အခြေစိုက် ကုန်သည်တစ်ဦး ပြောကြားခဲ့သည်။ ဆန်ဈေးနှုန်းများမှာ ကျဆင်းလျက်ရှိရာ ပုံမှန်ဝယ် လက်များ အနေဖြင့် ဝယ်ယူရန် ဆုံးဖြတ်ချက်မှတ်ရာ၌ နှောင့်နှေးနေကြပြီး မဖြစ်မနေ လိုအပ်မှ သာလျှင် ဝယ်ယူခြင်းကို လုပ်ကိုင်လာကြကြောင်းဖြင့် အခြားသော ကုန်သည်တစ်ဦးကလည်း ပြောဆိုခဲ့သည်။

          ပြည်တွင်းဆန်ဈေးနှုန်းများ မြင့်တက်မှုနှင့် ကြုံတွေ့နေရသည့် ဘင်္ဂလားဒေ့ရှ်နိုင်ငံကမူ ဈေးနှုန်းများတည်ငြိမ်စေရေးနှင့် အရန်ရိက္ခာဖြည့်တင်းနိုင်ရေးအတွက် ပေါင်းဆန်တန်ချိန် ၅၀၀၀၀ ကို ဆပ်ကမ်းအရောက် တစ်တန်လျှင် ၄၃၄.၇၇ ဒေါ်လာနှုန်းဖြင့် နိုင်ငံတကာတင်ဒါခေါ်ယူလျက် ဝယ်ယူခဲ့ကြောင်း သိရှိရသည်။

Source: Business Standard, 13 Feb 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

          မလေးရှားနိုင်ငံတွင် မိုးသည်းထန်စွာရွာသွန်းမှုနှင့် ရေကြီးမှုများ ဖြစ်ပေါ်ခဲ့သဖြင့် ရိတ်သိမ်း မှုကို နှောင့်ယှက်ခြင်းကြောင့် စားအုန်းဆီထုတ်လုပ်မှုသည် ၂၀၁၆ ခုနှစ်နောက်ပိုင်း ကျဆင်းမှု အများဆုံးဖြစ်ကြောင်း စင်ကာပူအခြေစိုက် Business Times သတင်းဌာနက ဖေဖော်ဝါရီလ ၁၀ ရက်နေ့တွင် ဖော်ပြထားသည်။

          မလေးရှားနိုင်ငံ၏ နေရာဒေသများစွာများ၌ ပြီးခဲ့သည့်ဇန်နဝါရီလတွင် ရက်အတန်ကြာ မိုးသည်းထန်စွာ ရွာသွန်းခဲ့သည့်အတွက် ရေကြီးရေလျှံမှုများနှင့် မြေပြိုမှုများ ဖြစ်ပွားခဲ့ပြီးနောက် အနည်းဆုံးလူငါးဦးသေဆုံးကာ လူဦးရေ ထောင်နှင့်ချီ၍ ဘေးကင်းရာသို့ ရွှေ့ပြောင်းခဲ့ရကြောင်း၊  ဆီအုန်းစိုက်ပျိုးမှု ထိပ်တန်းဒေသများဖြစ်သည့် Sarawak နှင့် Sabah ပြည်နယ်များသည် အဆိုး ရွားဆုံး ထိခိုက်မှုတွင် ပါဝင်ခဲ့ကြောင်း မလေးရှားနိုင်ငံ၏ မိုးလေဝသအေဂျင်စီမှ ထုတ်ပြန်ချက်အရ သိရှိရသည်။

          မလေးရှား၌ စားအုန်းဆီရောင်းလိုအား ကျဆင်းလာခြင်းကြောင့် လွန်ခဲ့သည့် သီတင်းပတ် အတွင်း ကွာလာလမ်ပူဈေးကွက်တွင် စားအုန်းဆီ စံပြုဈေးနှုန်းများသည် ငါးရာခိုင်နှုန်းထက်ပိုမို၍ မြင့်တက်မှုဖြစ်ပေါ်စေခဲ့သည်။ စားအုန်းဆီဈေးနှုန်းသည် ၂၀၂၄ ခုနှစ် စက်တင်ဘာလမှ ၂၀၂၅ ခုနှစ် ဇန်နဝါရီလအထိ ပရီမီယံစားသုံးဆီ ဈေးနှုန်းအဆင့်သို့ မြင့်တက်ခဲ့ပြီးနောက် မကြာသေးမီက ပြိုင်ဘက်ပဲပုပ်ဆီထက် စျေးနှုန်းသက်သာသွားသည်အထိ ဈေးနှုန်းအပြောင်းအလဲဖြစ်ပေါ်ကာ စျေးကွက်ကို အထောက်အပံ့ပြုလျက်ရှိနေသည်။ သို့သော် ၂၀၂၅ ခုနှစ်၊ ဖေဖော်ဝါရီ ၁၀ ရက်နေ့ တွင် စားအုန်းဆီဈေးနှုန်းသည် ၁ ရာခိုင်နှုန်း ခုန်တက်ခဲ့ကြောင်း သိရသည်။

          မလေးရှားစားအုန်းဆီဘုတ်အဖွဲ့၏ ဖေဖော်ဝါရီ ၁၀ ရက်နေ့တွင် ထုတ်ပြန်သည့် အချက် အလက်များအရ ဇန်နဝါရီလ စားအုန်းဆီထုတ်လုပ်မှုသည် တန်ချိန် ၁.၂၄ သန်းဖြစ်ပြီး ဒီဇင်ဘာလ ထုတ်လုပ်မှုထက် ၁၇ ရာခိုင်နှုန်းနီးပါးကျဆင်းသွားသည်။ အဆိုပါ ထုတ်လုပ်မှုသည် ၂၀၂၃ ခုနှစ်၊ ဧပြီလနောက်ပိုင်း အနိမ့်ဆုံးဖြစ်ပြီး လွန်ခဲ့သည့်သီတင်းပတ်က Bloomberg စစ်တမ်းတွင် ဖော်ပြ သည့် ပျမ်းမျှခန့်မှန်းချက်ထက်လည်း လျော့နည်းခဲ့သည်။

          ဇန်နဝါရီလ သိုလှောင်မှု လက်ကျန်ပမာဏသည် တန်ချိန် ၁.၅၈ သန်းဖြစ်ရာ ၇.၆ ရာခိုင်နှုန်း ထိ ကျဆင်းသွားခဲ့ပြီး စစ်တမ်းတွင်ဖော်ပြသော လေ့လာသူများ၏ ခန့်မှန်းချက်အားလုံး လွဲချော် စေခဲ့သည်။ ဇန်နဝါရီလ တင်ပို့မှုမှာလည်း တန်ချိန် ၁.၁၇ သန်းဖြစ်ရာ ၁၃ ရာခိုင်နှုန်းနီးပါးလျော့ကျ ခဲ့ပြီး စစ်တမ်းခန့်မှန်းချက်ထက် အနည်းငယ် ပိုမိုခဲ့ကြောင်း ဖော်ပြထားသည်။

          မလေးရှားနိုင်ငံ၌ အရန်သိုလှောင်ထားရှိသည့် စားအုန်းဆီလက်ကျန်ပမာဏ တန်ချိန် ၁.၆ သန်းအောက် ကျဆင်းနေခြင်းက စားအုန်းဆီဈေးကွက်ကို ပိုမိုအားကောင်းလာစေသည်ဟု မွမ်ဘိုင်းအခြေစိုက် Sunvin Group သုတေသနအဖွဲ့မှ သုတေသနအကြီးအကဲ Mr. Anilkumar Bagani က ပြောကြားခဲ့ကြောင်း Business Times သတင်းဌာန၏ ဖော်ပြချက်ကို တင်ပြလိုက်ရ ပါသည်။

Source: Business Times, Singapore, 10^th Feb, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

          ဗီယက်နမ်နိုင်ငံအနေဖြင့် ၂၀၂၄ ခုနှစ်တွင် မလေးရှားနိုင်ငံသို့ တန်ဖိုး အမေရိကန်ဒေါ်လာ ၅၆.၁၆ သန်းရှိသော ရော်ဘာ ၃၈၄၄၂ တန်ကို တင်ပို့ခဲ့နိုင်ကြောင်းသိရှိရပါသည်။

          ၂၀၂၃ ခုနှစ်၌ တင်ပို့ခဲ့မှုနှင့် နှိုင်းယှဉ်ပါက တန်ဖိုးအားဖြင့်  ၅၁၅.၇ ရာခိုင်နှုန်း (၅ ဆကျော်) နှင့် ပမာဏအားဖြင့် ၄၃၃.၅ ရာခိုင်နှုန်း (၄ ဆကျော်) မြင့်တက်ခဲ့ခြင်းဖြစ်ကြောင်း ဗီယက်နမ် ပို့ကုန်သွင်းကုန်ဦးစီးဌာနက  ဖော်ပြပါသည်။ ၂၀၁၉ ခုနှစ်နောက်ပိုင်း မလေးရှားနိုင်ငံသို့ ရော်ဘာ တင်ပို့မှုတွင် ယခုတင်ပို့မှုသည် ပမာဏအများဆုံးဖြစ်ကြောင်း၊ ထိုသို့ တင်ပို့ခဲ့ခြင်းဖြင့် မလေးရှား သည် ဈေးကွက်ဝေစု ၁.၉ ရာခိုင်နှုန်းဖြင့် ဗီယက်နမ်၏ စတုတ္ထအကြီးဆုံး ရော်ဘာတင်ပို့ရာ ဈေးကွက်ဖြစ်လာကြောင်း သိရှိရပါသည်။

          ၂၀၂၄ ခုနှစ်အတွင်း ဗီယက်နမ်မှ မလေးရှားဈေးကွက်သို့ တင်ပို့ခဲ့သည့် ရော်ဘာစုစုပေါင်း အနက် သဘာဝရော်ဘာစေးသည် ၇၆.၅ ရာခိုင်နှုန်းဖြင့် အများဆုံးတင်ပို့ခဲ့ခြင်းဖြစ်ပြီး တန်ချိန် အားဖြင့် ၂၉၄၀၈ တန်နှင့် တန်ဖိုးအားဖြင့် ဒေါ်လာ ၄၂.၃ သန်းရှိကြောင်း၊ သို့သော် မလေးရှားနိုင်ငံ အနေဖြင့် ၂၀၂၃ ခုနှစ်၌ အဆိုပါ ရော်ဘာထုတ်ကုန်အမျိုးအစားကို ဗီယက်နမ်ထံမှ ဝယ်ယူတင် သွင်းမှု မရှိခဲ့ကြောင်း သိရှိရပါသည်။

          မလေးရှားနိုင်ငံသည် နှစ်စဉ်ပျမ်းမျှအားဖြင့် သဘာဝရော်ဘာတန်ချိန် ၃၄၈၀၀၀ ခန့်  ထုတ် လုပ်မှုဖြင့် ကမ္ဘာ့ရော်ဘာအဓိကထုတ်လုပ်သည့် နိုင်ငံတစ်ခုဖြစ်သော်လည်း ပြည်တွင်းဈေးကွက် လိုအပ်ချက်ကို ဖြည့်ဆည်းရန် ပြည်ပမှ ရော်ဘာတင်သွင်းမှုများ လုပ်ဆောင်လျက်ရှိကြောင်း၊ မလေးရှားသို့ ရော်ဘာပေးသွင်းသည့် နိုင်ငံများတွင် ဗီယက်နမ်သည် ဆဋ္ဌမမြောက်နေရာ၌ ရှိနေပြီး ဈေးကွက်ရရှိမှုအနေဖြင့် ၂၀၂၃ ခုနှစ်တွင် ၁ ရာခိုင်နှုန်းသာရှိရာမှ ၂၀၂၄ ခုနှစ်၌ ၂.၅ ရာခိုင်နှုန်းသို့ မြင့်တက်ခဲ့ကြောင်း၊ သို့ရာတွင် ၎င်းပမာဏသည် ဗီယက်နမ်၏ ပြည်ပတင်ပို့နိုင်မည့် အလားအလာ နှင့် နှိုင်းယှဉ်ပါက နိမ့်ကျနေသေးကြောင်း သိရှိရပါသည်။

          မလေးရှားနိုင်ငံ၏ ရော်ဘာတင်သွင်းမှုသည် လွန်ခဲ့သည့် ၅ နှစ်ကာလ တစ်လျောက် စဉ်ဆက်မပြတ် မြင့်တက်လျက်ရှိရာ ၂၀၂၀ ပြည့်နှစ်၌ တန်ချိန် ၁ သန်း တင်သွင်းခဲ့ရာမှ ၂၀၂၃ ခုနှစ် တွင် တန်ချိန် ၁.၂၂ သန်းသို့ တိုးတက်ခဲ့ကြောင်း၊ ၂၀၂၄ ခုနှစ် ပထမ ၁၁ လကာလအတွင်း ၆.၉ ရာခိုင်နှုန်း ထပ်မံတိုးတက်ခဲ့ကြောင်း၊  လက်ရှိအချိန်တွင် ဗီယက်နမ်နိုင်ငံသည် ကမ္ဘာ့တတိယ အကြီးဆုံး သဘာဝရော်ဘာထုတ်လုပ်သည့် နိုင်ငံအဖြစ်ရပ်တည်လျက်ရှိကြောင်း၊ ဗီယက်နမ် စိုက်ပျိုးရေးနှင့် ကျေးလက်ဖွံ့ဖြိုးရေးဝန်ကြီးဌာနအနေဖြင့် ၂၀၃၀ ပြည့်နှစ်တွင် ရော်ဘာစိုက် ဧရိယာ ဟက်တာ ၈၀၀၀၀၀ မှ ၈၅၀၀၀၀ အကြား တိုးချဲ့စိုက်ပျိုးနိုင်ရန် ရည်မှန်းချက်ချမှတ် ဆောင်ရွက်လျက်ရှိကြောင်း သိရှိရပါသည်။

Source: Viet Nam News, Feb 05, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

          အိန္ဒိယနိုင်ငံ၌ ပဲမျိုးစုံစားသုံးမှုမှာ တိုးတက်လျက်ရှိရာ နှစ်နိုင်ငံအကြား ပူးပေါင်းဆောင်ရွက် မှုနှင့် သဟဇာတဖြစ်သည့် ကုန်သွယ်‌ရေးမူဝါဒတို့ကို ဖော်ဆောင်ပေးခြင်းဖြင့် အိန္ဒိယအတွက် အား ထားရသော ပဲမျိုးစုံထောက်ပံ့ပေးသွင်းသူအဖြစ် ရပ်တည်နိုင်ရန် ဘရာဇီးနိုင်ငံဘက်မှ လိုလား လျက်ရှိသည်ဟု မွန်ဘိုင်းမြို့အခြေစိုက် CNBC TV18 သတင်းဌာနက ဖော်ပြပါသည်။

          ဘရာဇီးပဲမျိုးစုံလုပ်ငန်းအသင်း(IBRAFE) မှ ဒါရိုက်တာ Najla Souza က ပဲမျိုးစုံကုန်သွယ်မှု တွင် တည်ငြိမ်မှုနှင့် တိုးတက်မှု ခိုင်မာစေရေးအတွက် ဘရာဇီးနှင့် အိန္ဒိယ နှစ်နိုင်ငံအကြား ကာလ ရှည် ကုန်သွယ်မှုဆိုင်ရာ မူဝါဒများကို ချမှတ်ဆောင်ရွက်ရန် လိုအပ်ကြောင်း အလေးပေး ပြောဆိုခဲ့ သည်။

          ဘရာဇီးနိုင်ငံသည် ၂၀၂၄ ခုနှစ်အတွင်း အိန္ဒိယသို့ မတ်ပဲတန်ချိန် ၇၀၀၀၀ ခန့်တင်ပို့ခဲ့ပြီး မြန်မာနိုင်ငံ၏ နောက်တွင် ဒုတိယအများဆုံး မတ်ပဲပေးသွင်းသူ ဖြစ်လာခဲ့သည်။ ထိုကဲ့သို့ ဘရာဇီး ထံမှ မတ်ပဲများ ထပ်ဆောင်းရရှိနိုင်မှုက ဈေးကွက်ယှဉ်ပြိုင်မှုကို ကြီးမားလာစေပြီး အိန္ဒိယနိုင်ငံ အတွက် ဈေးနှုန်းသက်သာစွာဖြင့် ဝယ်ယူရရှိနိုင်သည့် အကျိုးကို ဖြစ်ထွန်းစေလျက်ရှိသည်။ သို့ရာ တွင် ကာလရှည်၌ ကုန်သွယ်ရောင်းဝယ်နိုင်ရန်အတွက် အာမခံချက်မရှိပါက ငွေကြေးဆုံးရှုံးနိုင်မှု အန္တရာယ်မြင့်မားသဖြင့် ဘရာဇီးလယ်သမားများအနေဖြင့် တိုးချဲ့စိုက်ပျိုးထုတ်လုပ်ရန် ချီတုံချတုံ ဖြစ်လျက် ရှိကြသည်။

          ဘရာဇီးအနေဖြင့် မြန်မာနိုင်ငံ၏ အိန္ဒိယသို့ မတ်ပဲအဓိကပေးသွင်းသည့်နေရာတွင် အစား ထိုးဝင်ရောက်နိုင်အောင် ကြိုးပမ်းမည် မဟုတ်သော်လည်း အိန္ဒိယ၏ ပဲမျိုးစုံလိုအပ်ချက် ကြီးထွား လာမှုကို ဖြည့်ဆည်းနိုင်ရန်သာ လုပ်ဆောင်မည်ဖြစ်ကြောင်း၊ နှစ်နိုင်ငံ ပဲမျိုးစုံကုန်သွယ်မှုကို ခိုင်မာ အားကောင်းစေရန် IBRAFE အသင်းသည် ကာရီရိုကာပဲ (Carioca bean) ခေါ် ပဲဖြူကြားတစ်မျိုး အပါအဝင် ဘရာဇီးဒေသထွက်ပဲမျိုးများကို အိန္ဒိယစားသုံးသူများအတွက် အလားအလာရှိသည့် ရွေးချယ်မှုများအဖြစ် တိုးမြှင့်တင်ပို့နိုင်ရေး တက်ကြွစွာ ကြိုးပမ်းလျက်ရှိကြောင်း၊ ဘရာဇီးနိုင်ငံ သည် ၎င်း၏ လယ်ယာထွက်ကုန် ထုတ်လုပ်မှုကို တည်တံ့ခိုင်မာစေရေးအတွက် သီးနှံမျိုးစုံ စိုက်ပျိုး ထုတ်လုပ်ခြင်းကို အလေးပေးလုပ်ဆောင်လျက်ရှိကြောင်း၊ ဘရာဇီးလယ်သမားများသည် မြေဆီ ဩဇာကောင်းမွန်မှုနှင့် ကုန်ထုတ်လုပ်နိုင်စွမ်းတို့ကို ထိန်းသိမ်းနိုင်ရန် ပဲပုပ်၊ ပြောင်းနှင့် ပဲမျိုးစုံတို့ အား  အလှည့်ကျ စိုက်ပျိုးခြင်းကို လုပ်ကိုင်လေ့ရှိကြောင်းဖြင့် Ms. Souza က ပြောကြားခဲ့သည်။

          IBRAFE အသင်းသည် ပဲမျိုးစုံကို ဘရာဇီးလယ်သမားများအတွက် တည်ငြိမ်စွာ စိုက်ပျိုး ထုတ်လုပ်နိုင်သည့်သီးနှံအဖြစ် မြှင့်တင်နိုင်ရေး လုပ်ဆောင်လျက်ရှိသကဲ့သို့ အထူးသဖြင့် အိန္ဒိယ အပါအဝင် နိုင်ငံတကာဈေးကွက်များတွင် တည်ငြိမ်စွာရပ်တည်နေနိုင်ရေးကို ဆောင်ရွက်လျက်ရှိ သည်။ နှစ်နိုင်ငံအတွက် အကျိုးဖြစ်ထွန်းစေမည့် မူဝါဒများ ချမှတ်နိုင်ရေး တွန်းအားပေးရန်အတွက် ဘရာဇီးအစိုးရနှင့် အိန္ဒိယရှိ သံတမန်များနှင့် အနီးကပ်ပူးပေါင်း‌ဆောင်ရွက်ခြင်းသည် IBRAFE ၏ မဟာဗျူဟာ၌ ပါဝင်လျက်ရှိသည်။

          မသေချာမရေရာမှုများ ရှိနေသော်လည်း အကျိုးအမြတ်ဖြစ်ထွန်းမှုနှင့် ကာလရှည် တင်ပို့ လုပ်ကိုင်နိုင်မည့် အခွင့်အလမ်းများကို မျှော်လင့်လျက် ဘရာဇီးလယ်သမားများသည် မတ်ပဲနှင့် ပဲစင်းငုံတို့ကို စမ်းသပ်စိုက်ပျိုးခြင်းအား ဆက်လက်လုပ်ကိုင်လျက်ရှိကြောင်း၊ IBRAFE အသင်း သည် အိန္ဒိယနိုင်ငံ၌ ဈေးကွက် ဖြစ်ပေါ်ပြောင်းလဲမှုနှင့်အညီ ၎င်းတို့၏ လုပ်ငန်းမဟာ‌ဗျူဟာများ ချမှတ်ဖော်ဆောင်မှုကို ဘရာဇီးနိုင်ငံရှိ တောင်သူများ၊ ကုန်သည်များ၊ ပို့ကုန်လုပ်ငန်းရှင်များနှင့် ဆက်လက်ထိတွေ့ ချိတ်ဆက်ဆောင်ရွက်လျက်ရှိကြောင်း CNBC TV18 သတင်းဌာနက ဖော်ပြ ထားသည်။

Source: CNBC TV18, 10 Feb 2025 (လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

          အာဖဂန်နစ္စတန်နိုင်ငံမှ ၂၀၂၄ ခုနှစ်တွင်အမေရိကန်ဒေါ်လာသန်း ၂၀ တန်ကြေးရှိဆေးဖက်ဝင် အပင်များအား တင်ပို့ခဲ့ကြောင်း စက်မှုနှင့် ကူးသန်းရောင်းဝယ်ရေးဝန်ကြီးဌာနမှ တာဝန်ရှိသူတစ်ဦး က သတင်းထုတ်ပြန်ခဲ့သည်။ အာရပ်စော်ဘွားများပြည်ထောင်စု၊ တရုတ်၊ အိန္ဒိယ၊ ပါကစ္စတန်၊ တူရကီ၊ အီရန်၊ ကာဂျစ္စတန်၊ ယူကရိန်း၊ အမေရိကန်၊ ကနေဒါနှင့် အခြားနိုင်ငံများအပါအဝင် အာဖဂန်နစ္စတန်၏ ကုန်သွယ်မှုမိတ်ဖက်နိုင်ငံများသို့ တင်ပို့ခဲ့သည်ဟု ဝန်ကြီးဌာန ပြော‌ရေးဆိုခွင့်ရှိသူ AkhundZanda Abidul Salam Jawad က ဖေဖော်ဝါရီ ၉ ရက်နေ့ကပြောကြားခဲ့ကြောင်း ပြည်တွင်းမီဒီယာ TOLOnews ကပြောကြားခဲ့သည်။ စုစုပေါင်း တန်ချိန် ၁၅၂၀၀ ရှိသော တင်ပို့သည့် အပင်များတွင် ပန်းခိုတောင်၊ Glycyrrhiza glabra၊ Caraway နှင့် Nigella Sativa တို့ပါဝင်သည်။ ၂၀၂၄ ခုနှစ်တွင် အာဖဂန်နစ္စတန်၏ စုစုပေါင်းကုန်သွယ်မှုပမာဏသည် အမေရိကန်ဒေါ်လာ ၁၂ ဘီလီယံကျော်ရှိခဲ့ပြီး ယခင်နှစ်ကထက် ၃၈ ရာခိုင်နှုန်းတိုးမြင့်လာကြောင်းပြသပြီး ပို့ကုန် ၄ ရာခိုင်နှုန်း ကျဆင်းသွားကြောင်းဝန်ကြီးဌာန၏ တရားဝင်အချက်အလက်များအရသိရသည်။

DOCA(ရန်ကုန်)