ပြည်ပကုန်သွယ်မှုသတင်းများ

ဇန်နဝါရီလတွင် ဗီယက်နမ်၌ စုစုပေါင်းမော်တော်ကားအစီးရေ ၁၈၈၉၃ စီး ရောင်းချခဲ့ရပြီး ၂၀၂၄ ခုနှစ် ဒီဇင်ဘာလကထက် ၄၀ ရာခိုင်နှုန်း ကျဆင်းခဲ့ကြောင်း ဗီယက်နမ်နိုင်ငံ မော်တော်ကား ထုတ်လုပ်သူများအသင်း (VAMA) ၏ ဖေဖော်ဝါရီလ ၁၃ ရက်နေ့က ထုတ်ပြန်ချက် အရ သိရပါသည်။ Toyota က အစီးရေ ၃၃၄၆ စီးဖြင့် ဇန်နဝါရီလရောင်းချရမှုတွင် အမှတ်တံဆိပ် အားလုံးကိုဦးဆောင်ခဲ့ပြီး ၎င်းတို့နောက်တွင် Ford ( အစီးရေ ၂၄၅၂ စီး)၊ Mazda ( အစီးရေ ၂၀၃၁ စီး)၊ THACO KIA (အစီးရေ ၁၈၄၆ စီး) နှင့် Honda ( အစီးရေ ၁၈၂၆ စီး) တို့ရပ်တည်နေကြောင်း သိရပါသည်။ ကျွမ်းကျင်သူများကမူ Lunar new year အားလပ်ရက်များက စားသုံးသူများ၏ ဝယ်လိုအားကိုသက်ရောက်မှုရှိသောကြောင့် ကားရောင်းချမှု ကျဆင်းခဲ့ခြင်းဖြစ်ကြောင်း ပြောကြားခဲ့ပါသည်။ သုံးစွဲသူများသည် ယခုနှစ်တွင် ထုတ်ပြန်မည့် မော်ဒယ်အသစ်များကို စောင့်ဆိုင်းလိုခြင်းကလည်း ဇန်နဝါရီလတွင် ကားရောင်းချမှုနည်းပါးရသည့် အကြောင်းအရင်းထဲ တွင် ပါဝင်နေကြောင်း သိရပါသည်။ ဇန်နဝါရီလတွင်ကားရောင်းချမှုကျဆင်းခြင်းတွင် ခရီးသည် တင်ကားရောင်းချရမှုက အစီးရေ ၁၄၂၀၁ စီးဖြင့်( ၄၂ ရာခိုင်နှုန်းကျဆင်း)၊ စီးပွားရေးလုပ်ငန်းသုံး ကားရောင်းချရမှုက အစီးရေ ၄၃၅၄ စီးဖြင့် (၃၃ ရာခိုင်နှုန်းကျဆင်း) နှင့် Specialized မော်တော် ကားရောင်းချရမှုက အစီးရေ ၃၃၈ စီးဖြင့် (၄၀ ရာခိုင်နှုန်းကျဆင်း) ခဲ့ကြောင်း သိရပါသည်။ VAMA ၏ အဆိုအရ ပြည်တွင်း၌ ထုတ်လုပ်တပ်ဆင်သည့်‌မော်တော်ကားများမှာ အစီးရေ ၉၁၂၀ စီးဖြင့် ဒီဇင်ဘာလကထက် ၂၉ ရာခိုင်နှုန်းကျဆင်းခဲ့ပြီး တင်သွင်းလာသည့်မော်တော်ကာများမှာ အစီးရေ ၉၇၇၃ စီးဖြင့် ၄၈ ရာခိုင်နှုန်း ကျဆင်းခဲ့ကြောင်း သိရပါသည်။ သို့သော် ဇန်နဝါရီလတွင် Hybrid ကားများ ရောင်းချရမှုမှာ ဒီဇင်ဘာလကထက် ၅၇ ရာခိုင်နှုန်းမြင့်တက်ခဲ့ခြင်းက သဘာဝ ပတ်ဝန်းကျင်နှင့် သင့်လျော်သည့်ကားများအတွက် ဝယ်လိုအားမြင့်တက်လာမှုကို ပြသနေ ကြောင်း သိရပါသည်။ ကျွမ်းကျင်သူများကမူ အစိုးရ၏ အစိမ်းရောင်မော်တော်ယာဉ်ဖွံ့ဖြိုး တိုးတက်ရေးအတွက် ပံ့ပိုးမှုများနှင့်အတူ ကားထုတ်လုပ်သူများ၏ လှုံ့ဆော်မှု မူဝါဒများချမှတ် လာမှုကြောင့် ဗီယက်နမ်မော်တော်ကားဈေးကွက်သည် ယခုနှစ် ဒုတိယသုံးလပတ်ကာလတွင် ပြန်လည်နာလံထူလာနိုင်ကြောင်း ခန့်မှန်းကြသည်ဟု သိရပါသည်။

DOCA(ရန်ကုန်)

          ဗီယက်နမ်သည် ၂၀၂၅ ခုနှစ် ဇန်နဝါရီလတွင် အမေရိကန်ဒေါ်လာ ၇၇၄.၃ သန်းတန်ကြေး ရှိသော ရေထွက်ကုန်များကို တင်ပို့ခဲ့ပြီး ၂၀၂၄ ခုနှစ်ဇန်နဝါရီလကထက် ၃.၃ ရာခိုင်နှုန်း မြင့်တက် ခဲ့ကြောင်း ဗီယက်နမ်နိုင်ငံပင်လယ်စာ တင်ပို့သူများနှင့် ထုတ်လုပ်သူများအသင်း (VASEP) ၏ အဆိုအရသိရပါသည်။ ပုဇွန်သည် တင်ပို့မှုကဏ္ဍကို ဦးဆောင်ခဲ့ပြီး ဝင်ငွေအမေရိကန်ဒေါ်လာ သန်း ၃၀၀ ရရှိခဲ့ကာ စုစုပေါင်းတင်ပို့မှု၏ ၃၉ ရာခိုင်နှုန်း ရှိကြောင်း သိရပါသည်။ Tra Fish တင်ပို့ မှုသည် စိန်ခေါ်မှုများနှင့် ရင်ဆိုင်ခဲ့ရပြီး အမေရိကန်ဒေါ်လာ ၁၂၃ သန်းဖြင့် ၂၀၂၄ ခုနှစ် ဇန်နဝါရီ လကထက် ၂၅ ရာခိုင်နှုန်းကျဆင်းခဲ့ကြောင်း သိရပါသည်။ ဗီယက်နမ်ငါးအသားပြားများအပေါ် ချမှတ်ထားသည့် Anti-dumping အကောက်ခွန်များကို ဖယ်ရှားပေးမည့် ဇန်နဝါရီလ ၁၇ ရက်နေ့က အမေရိကန်နှင့် လက်မှတ်ရေးထိုးခဲ့သည့် အပြန်အလှန် သဘောတူညီချက်ကြောင့် လုပ်ငန်းများသည် အမေရိကန်သို့ Tra Fish တင်ပို့မှုကြီးထွားလာရန် မျှော်လင့်လျှက်ရှိကြောင်း သိရပါသည်။ တူနာတင်ပို့မှုမှာ အမေရိကန်ဒေါ်လာ ၆၅ သန်းဖြင့် ၂၀၂၄ ခုနှစ် ဇန်နဝါရီလကထက် ၁၇.၇ ရာခိုင်နှုန်း ကျဆင်းခဲ့ကြောင်း သိရပါသည်။ သို့သော်အမေရိကန်နှင့် ဥရောပသမဂ္ဂကဲ့သို့ သော အဓိကဈေးကွက်များတွင် စားသုံးမှုတည်ငြိမ်စွာကြီးထွားမှုက ၂၀၂၅ လက်ကျန်ကာလ တစ်လျှောက် ပြန်လည်နာလံထူလာရန် မျှော်လင့်ချက်ကို ပေးစွမ်းလျှက်ရှိကြောင်း သိရပါသည်။ တူနာကဏ္ဍသည် အကောက်ခွန်မူဝါဒပြောင်းလဲမှုများ အထူးသဖြင့်အမေရိကန်ဈေးကွက်တွင် အကျိုးကျေးဇူးများ ရရှိနိုင်ကြောင်း VASEP ၏အဆိုအရသိရပါသည်။ ဈေးကွက်စွမ်းဆောင်မှုသည် လည်း ဒေသအလိုက် သိသာထင်ရှားစွာ ကွဲပြားခဲ့ကြောင်း သိရပါသည်။ ဟောင်ကောင်ပါဝင်သည့် တရုတ်သို့တင်ပို့မှုမှာ ၆၄.၉ ရာခိုင်နှုန်းမြင့်တက်ခဲ့ပြီး အမေရိကန်နှင့် ဥရောပသမဂ္ဂဈေးကွက်သို့ တင်ပို့မှုမှာ ၁၆ ရာခိုင်နှုန်းနှင့် ၁၇.၆ ရာခိုင်နှုန်း အသီသီးကျဆင်းခဲ့ကြောင်း သိရပါသည်။ အာဆီယံ ဈေးကွက်များသို့တင်ပို့မှုမှာ ၁၀.၅ ရာခိုင်နှုန်းဖြင့် တည်ငြိမ်စွာကြီးထွားမှုကို ပြသခဲ့ပြီး အရှေ့တောင်အာရှဈေးကွက်သည် ဗီယက်နမ်ရေထွက်ကုန်များတင်ပို့မှုအတွက် တောက်ပသော အနာဂတ်အလားအလာကို ပြသနေကြောင်း သိရပါသည်။ ဆက်လက်၍ ဗီယက်နမ်၏ ရေထွက်ကုန်လုပ်ငန်းနယ်ပယ်သည် ကမ္ဘာ့ဈေးကွက်တွင် စားသုံးမှုအလေ့အကျင့်ပြောင်းလဲမှုများ၊ အကောက်ခွန်မူဝါဒများနှင့် ရောင်းလိုအား-ဝယ်လိုအားမတည်ငြိမ်ခြင်းစသည့် စိန်ခေါ်မှုများနှင့် ရင်ဆိုင်ရနိုင်ကြောင်း သိရပါသည်။ VASEP က၂၀၂၅ ခုနှစ်တွင် ကဏ္ဍ၏အောင်မြင်မှုသည် တန်ဖိုးမြင့်ထုတ်ကုန်များဖွံ့ဖြိုးတိုးတက်ရေး၊ ထုတ်ကုန်အရည်အသွေးမြှင့်တင်ခြင်းနှင့် တင်ပို့ရာ ဈေးကွက်များကွဲပြားခြင်းတို့အပေါ်တွင် ကြီးမားစွာမူတည်လိမ့်မည်ဟု ပြောကြားခဲ့ပါသည်။

DOCA(ရန်ကုန်)

          ဖိလစ်ပိုင်နိုင်ငံ၌ စာနပ်ရိက္ခာထောက်ပံ့ရေးစိန်ခေါ်မှုများနှင့် ရင်ဆိုနေရချိန်တွင် မနီလာ၏ စားနပ်ရိက္ခာဖူလုံမှုကို ပံ့ပိုးပေးရန်အတွက် ဆန်နှင့်အခြားလယ်ယာထွက်ကုန်များ တိုးမြှင့် တင်ပို့ရန်အဆင်သင့်ပြင်ဆင်ထားကြောင်း ကမ္ဘောဒီးယားနိုင်ငံ၊ ဝန်ကြီးချုပ် Hun Manet နှင့် ဖိလစ်ပိုင်သမ္မတ Ferdinand Marcos တို့ (၁၁-၂-၂၀၂၅) ရက်နေ့ကတွေ့ဆုံစဉ် အာမခံခဲ့သည်။ နှစ်နိုင်ငံအကြား နားလည်မှုစာချွန်လွှာ (MoUs) လက်မှတ်ရေးထိုးပြီးနောက် Hun Manet က စိုက်ပျိုရေးကဏ္ဍတွင် ကုန်သွယ်မှုနှင့် ရင်းနှီးမြှုပ်နှံမှုများအားကောင်းလာစေရန် ကမ္ဘောဒီးယား နိုင်ငံ၏ ကတိကဝတ်ကို ထပ်မံအတည်ပြုခဲ့သည်။ ကမ္ဘောဒီးယားနိုင်ငံသည် ဖိလစ်ပိုင်နိုင်ငံသို့ ဆန်နှင့်အခြားမရှိမဖြစ်လိုအပ်သော စာနပ်ရိက္ခာထုတ်ကုန်များ ထောက်ပံ့ရန်အသင့် ရှိနေကြောင်း ဝန်ကြီးချုပ်ကအလေးပေးပြောကြားခဲ့သည်။ Ferdinand Marcos က ကမ္ဘောဒီးယားနိုင်ငံသည် ဖိလစ်ပိုင်၏ စားနပ်ရိက္ခာဖူလုံရေးကြိုးပမ်းမှုတွင် အဓိကနေရာမှ ပါဝင်နေပြီး အသစ်ချုပ်ဆို ထားသော စိုက်ပျိုးရေးနှင့်လယ်ယာစီးပွားရေး ပူးပေါင်းဆောင်ရွက်မှု နားလည်မှုစာချွန်လွှာ အတွက် ကျေးဇူးတင်ရှိကြောင်း ပြောကြားခဲ့သည်။ ဖိလစ်ပိုင်နိုင်ငံသည် ဆန်ထုတ်လုပ်သည့် နိုင်ငံဖြစ်သော်လည်း ပြည်တွင်းဝယ်လိုအားပြည့်မီရန် တင်သွင်းမှုအပေါ် ဆက်လက်မှီခို နေရဆဲဖြစ်ကြောင်း ထပ်မံပြောကြားခဲ့သည်။

DOCA(ရန်ကုန်)

          စင်္ကာပူ၏ ရေနံမဟုတ်သော ပြည်တွင်းပို့ကုန် (NODX) သည် ၂၀၂၄ ခုနှစ်ဒီဇင်ဘာလတွင် ၉ ရာခိုင်နှုန်းတိုးတက်ခဲ့ပြီး ဇန်နဝါရီလတွင်တစ်နှစ်ထက်တစ်နှစ် ၂.၁ ရာခိုင်နှုန်းကျဆင်း ခဲ့ကြောင်း အစိုးရအေဂျင်စီ Enterprice Singapore မှထုတ်ပြန်သည့်အချက်အလက်များ အရသိရသည်။

          ကျဆင်းမှုသည် အီလက်ထရောနစ် ကဏ္ဍတိုးတက်လျှက်ရှိစဥ် အီလက်ထရောနစ်မဟုတ် သော NODX ပို့ကုန်များလျှော့နည်းသွားသောကြောင့်ဖြစ်ကြောင်းသိရသည်။

          တစ်ချိန်တည်းတွင် ရေနံမဟုတ်သောကုန်ပစ္စည်းများ ပြန်လည်တင်ပို့မှုသည် ၂၀၂၅ ဇန်နဝါရီလတွင် တစ်နှစ်ထက်တစ်နှစ် ၇.၄ ရာခိုင်နှုန်းတိုးတက်လာခဲ့ပြီး ၂၀၂၄ ဒီဇင်ဘာတွင် မှတ်တမ်းတင် ထားခဲ့သော ၂၂.၁ ရာခိုင်နှုန်းတိုးချဲ့မှုထက်နှေးကွေးခဲ့သည်။ အီလက်ထရောနစ် ပစ္စည်းများ ပြန်လည် တင်ပို့မှုတိုးတက်လာသော်လည်း အီလက်ထရောနစ် မဟုတ်သော ပစ္စည်များတင်ပို့မှုကျဆင်းခဲ့သည်။

          ပို့ကုန်သွင်းကုန်နှစ်မျိုးစလုံးသည် အလုံးစုံချဲ့ထွင်ရန် အထောက်အကူပြုသောကြောင့် စင်္ကာပူ နိုင်ငံ၏ စုစုပေါင်းကုန်သွယ်မှုသည် ၂၀၂၄ ခုနှစ် ဒီဇင်ဘာလတွင် ၁၉ ရာခိုင်နှုန်း တိုးတက်ခဲ့ပြီး ၂၀၂၅ ဇန်နဝါရီလတွင် တစ်နှစ်ထက်တစ်နှစ် ၆.၇ ရာခိုင်နှုန်း မြင့်တက်လာခဲ့ကြောင်းသိရသည်။

DOCA(ရန်ကုန်)

ဗီယက်နမ်နိုင်ငံသည် ဇန်နဝါရီလတွင် ရေထွက်ကုန် အမေရိကန် ဒေါ်လာ ၇၇၄.၃ သန်းဖိုး တင်ပို့ခဲ့ပြီး တစ်နှစ်ထက်တစ်နှစ် ၃.၃ ရာခိုင်နှုန်း တိုးလာကြောင်း ဗီယက်နမ် သတင်းများက ဗုဒ္ဓဟူးနေ့တွင် ပြောကြားခဲ့ကြောင်း ဗီယက်နမ် ပင်လယ်စာ တင်ပို့ရောင်းချသူများနှင့် ထုတ်လုပ်သူများ အသင်းမှ ကိုးကား၍ သိရသည်။

ပုစွန်ကဏ္ဍကို ဆက်လက်ဦးဆောင်ခဲ့ပြီး ဝင်ငွေဒေါ်လာ သန်း ၃၀၀ ရရှိကာ ပို့ကုန်စုစုပေါင်း၏ ၃၉ ရာခိုင်နှုန်းအထိ ပါဝင်သည်။ ၀ယ်လိုအားပြတ်လပ်မှုကြောင့် စျေးနှုန်း မြင့်လာသော်လည်း ထရာငါးတင်ပို့မှုသည် ဇန်နဝါရီတွင် စိန်ခေါ်မှုများနှင့် ရင်ဆိုင်ခဲ့ရပြီး ၀င်ငွေမှာ ဒေါ်လာ ၁၂၃ သန်းမှ ၂၅ ရာခိုင်နှုန်းကျော် ကျဆင်းသွားခဲ့သည်။

ဗီယက်နမ်သည် ၂၀၂၄ ခုနှစ်တွင် ရေထွက်ပစ္စည်းတင်ပို့မှုမှ ဒေါ်လာ ၁၀ ဘီလီယံကျော် ရရှိခဲ့သည်။ အဆိုပါကဏ္ဍသည် ယခုနှစ်အတွက် ဒေါ်လာ ၁၀.၅ ဘီလီယံအထိ ရည်မှန်း ထားသည်။ ၂၀၂၅ ခုနှစ်တွင် စက်မှုလုပ်ငန်း၏အောင်မြင်မှုသည် ရေရှည်တည်တံ့ခိုင်မြဲသော တိုးတက်မှုကို သေချာစေရန်အတွက် ထုတ်ကုန်အရည်အသွေးမြှင့်တင်ရန်နှင့် ထုတ်ကုန် ဈေးကွက်များ ကွဲပြားစေမည့် ထုတ်ကုန်များထုတ်လုပ်ခြင်းအပေါ်တွင် အဓိကမူတည်မည်ဖြစ် ကြောင်း အဆိုပါအသင်းမှပြော ကြားခဲ့သည်။ 

DOCA(ရန်ကုန်)