ကမ္ဘောဒီးယားနိုင်ငံသည် ၂၀၂၅ ခုနှစ် ပထမ ၁၁ လအတွင်း နိုင်ငံတကာဈေးကွက်များသို့ ကြိတ်ခွဲပြီးဆန် ၈၀၁,၆၄၃ တန် တင်ပို့ခဲ့ပြီး ၂၀၂၄ ခုနှစ်ကာလတူကာလက ၅၇၅,၅၆၂ တန် တင်ပို့ခဲ့ခြင်းမှ ၃၉ ရာခိုင်နှုန်း မြင့်တက်လာခဲ့ကြောင်း ကမ္ဘောဒီးယားဆန်စပါးအဖွဲ့ချုပ် (CRF) ၏ ၄-၁၂-၂၀၂၅ ရက်နေ့က ထုတ်ပြန်ခဲ့သော သတင်းထုတ်ပြန်ချက်တွင်ဖော်ပြထားသည်။ ၂၀၂၅ ခုနှစ်၊ ဇန်နဝါရီလမှ နိုဝင်ဘာလအထိ ကာလအတွင်း ကမ္ဘောဒီးယားနိုင်ငံသည် ကြိတ်ခွဲပြီးဆန် တင်ပို့မှုမှ ဝင်ငွေ အမေရိကန်ဒေါ်လာ ၅၂၆.၄၇ သန်း ရရှိခဲ့ပြီး ယမန်နှစ်ကာလတူထက် ၂၇ ရာခိုင်နှုန်း မြင့်တက်လာခဲ့ကြောင်း သတင်းထုတ်ပြန်ချက်တွင် ဖော်ပြထားသည်။ ကုမ္ပဏီ ၆၅ ခုသည် နိုင်ငံအတွင်းနှင့် ဒေသပေါင်း ၇၂ ခုသို့ ကြိတ်ခွဲပြီးဆန်များ တင်ပို့ခဲ့ကြောင်း သတင်းထုတ်ပြန်ချက် တွင် ဖော်ပြထားပြီး တရုတ်နိုင်ငံသည် ဝယ်ယူမှုအများဆုံးနိုင်ငံဖြစ်သည်။ သတင်းထုတ်ပြန်ချက်အရ တင်ပို့သော ဆန်၏ ၆၅.၁၅ ရာခိုင်နှုန်းသည် ဆန်မွှေး၊ ၁၆.၀၇ ရာခိုင်နှုန်းသည် ဆန်ကွဲ၊ ၁၄.၇၉ ရာခိုင်နှုန်းသည် ဆန်ဖြူ၊ ၂.၀၇ ရာခိုင်နှုန်းသည် ပေါင်းဆန်၊ ၁.၄၆ ရာခိုင်နှုန်းသည် အော်ဂဲနစ်ဆန်နှင့် ၀.၄၆ ရာခိုင်နှုန်းသည် အခြားဆန်အမျိုးအစားများဖြစ်သည်။ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ အတွင်းရေးမှူးနှင့် ပြောရေးဆိုခွင့်ရှိသူ Penn Sovicheat က ဒေသတွင်း ဘက်စုံစီးပွားရေး မိတ်ဖက် (RCEP) သဘောတူညီချက်နှင့် ကမ္ဘောဒီးယား-တရုတ် လွတ်လပ်သော ကုန်သွယ်ရေး သဘောတူညီချက်တို့သည် ကမ္ဘောဒီးယား၏ စိုက်ပျိုးရေးပို့ကုန်များ တရုတ်နိုင်ငံနှင့် အခြား RCEP နိုင်ငံများသို့ တင်ပို့မှုအတွက် ခိုင်မာသော အုတ်မြစ်ချပေးခဲ့ကြောင်း ပြောကြားခဲ့ပါသည်။
Source: Khmer Times
DOCA(ရန်ကုန်)