ပြည်တွင်းကုန်သွယ်မှုသတင်း

    မော်လမြိုင် ဒေသထွက် ရင်ကွဲသရက်သီး ဈေးကောင်းရရှိနေသည်။ ယခု စက်တင်ဘာလ (တတိယပတ်)တွင် ရင်ကွဲသရက်သီး ဈေးနှုန်းအခြေအနေမှာ ရင်ကွဲသရက်သီး အစိမ်းအချောအကြီးတစ်လုံးလျှင်(၄၅၀)ကျပ်၊ အသေးတစ်လုံးလျှင် (၃၀၀) ကျပ် ဖြစ်သည်။ ရင်ကွဲသရက်သီးအမှည့်အကြီးတစ်လုံးလျှင်(၇၅၀)ကျပ်၊ အသေး တစ်လုံးလျှင်(၅၅၀)ကျပ်ဖြစ်သည်။ ယခင်(ဩဂုတ်လ)တွင် အစိမ်းအချောအကြီး တစ်လုံး လျှင်(၃၅၀)ကျပ်၊ အသေးတစ်လုံးလျှင် (၃၀၀)ကျပ်ဖြစ်သည်။ ရင်ကွဲသရက် သီးအမှည့် အကြီးတစ်လုံးလျှင်(၅၀၀)ကျပ်၊ အသေး တစ်လုံးလျှင် (၄၀၀)ကျပ်ဖြစ်သည်။ ထို့ကြောင့် ဈေးနှုန်းနှိုင်းယှဉ်ပါက ယခုလတွင် ၁၀၀ ကျပ် မှ ၂၅၀ ကျပ်ခန့် ဈေးနှုန်းမြင့်တက်ခဲ့သည်။

     အဆိုပါ ဈေးနှုန်းမြင့်တက်မှုမှာ ရင်ကွဲသရက်သီး အသီးထွက်နှုန်းရာသီချိန် ကုန်ဆုံးတော့မည်ဖြစ်သဖြင့် အသီးထွက်နှုန်းနည်းပါးခြင်း၊ အခြားဒေသမှ သရက်သီးဝင် ရောက်မှုမရှိခြင်းတို့ကြောင့် ဈေးကွက်အတွင်း ရောင်းချမှုလည်းနည်းပါးခြင်းကြောင့် ဒေသထွက် ရင်ကွဲသရက်မျိုးများမှာ ဈေးကောင်း ရရှိနေကြောင်းသိရှိရပါသည်။ ရင်ကွဲသီးသရက်မျိုးသည် မွန်ဒေသထွက် သရက်သီးမျိုးနွယ်(၁၂၅)မျိုးအနက် လူကြိုက် အများဆုံးနှင့်အသီးထွက် အကောင်းဆုံးဖြစ်သော သရက်မျိုးဖြစ်သည်။

DOCA(မွန်)

        ၂၀၂၄ခုနှစ်၊ စက်တင်ဘာလ ၁၆ရက်နေ့၊ နံနက်(၀၉:၀၀)နာရီအချိန်တွင် စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနမှ ကန့်ဘလူမြို့နယ်တာဝန်ခံ ဦးမျိုးဝင်းသန်းသည် ကန့်ဘလူမြို့ပေါ်ရှိ အိမ်ဆောက်ပစ္စည်းရောင်းချသည့်ဆိုင်များသို့သွားရောက်၍ အပတ်စဉ် ကွင်းဆင်းစစ်ဆေးခြင်းဆောင်ရွက်လျက်ရှိကြောင်းသိရသည်။

       ကန့်ဘလူမြို့ပေါ်ရှိ ဘိလပ်မြေရောင်းချသည့် ခွန်အားသစ် အိမ်ဆောက်ပစ္စည်းအရောင်းဆိုင်၊ မိုးကောင်ကင် အိမ်ဆောက်ပစ္စည်းအရောင်းဆိုင်နှင့် ရွှေပြည့်စုံ အိမ်ဆောက်ပစ္စည်းအရောင်းဆိုင် စသည့်ဆိုင်များ၏ ဘိလပ်မြေဝယ်ယူရရှိမှုအခြေအနေ၊ လက်ကျန်အခြေအနေနှင့် ဈေးနှုန်း၊ ဈေးကွက်အခြေအနေတို့အား ကွင်းဆင်းစိစစ်ခဲ့ရာ ဘိလပ်မြေနှင့်ဆောက်လုပ်ရေးလုပ်ငန်းသုံးပစ္စည်းများကို မန္တလေးမြို့မှဝယ်ယူရကြောင်း၊ ဈေးနှုန်းအနေဖြင့် “CROWN” အမှတ်တံဆိပ် ဘိလပ်မြေ‌တစ်အိတ်လျှင် ငွေကျပ်၂၀၀၀၀နှင့် “ကြံ့နှစ်ကောင်” အမှတ်တံဆိပ် ဘိလပ်မြေ ဈေးနှုန်းမှာ တစ်အိတ်လျှင် ငွေကျပ်၁၉၀၀၀ဖြင့်ရောင်းချကြောင်း၊ စက်တင်ဘာလ ဒုတိယပတ်ဈေးနှုန်းများနှင့်နှိုင်းယှဉ်ပါက ယခုပတ်အတွင်း ဈေးနှုန်းများတည်ငြိမ်လျက်ရှိကြောင်း လုပ်ငန်းရှင်များထံမှသိရှိရပါသည်။

DOCA(စစ်ကိုင်း)

     ပဲခူးတိုင်းဒေသကြီး၊ နတ်တလင်းခရိုင်၊ နတ်တလင်းမြို့နယ်ရှိ ပဲမျိုးစုံရောင်းဝယ်ရေးပွဲရုံများတွင် ရောင်းဝယ်နေသော မတ်ပဲဈေးနှုန်းများမှာ ယခင်ဩဂုတ်လတွင် ရောင်းဝယ်ခဲ့သော ဈေးနှုန်းများနှင့်အလားတူ ဈေးနှုန်းအမြင့်ဖြင့် ဆက်လက်ရောင်းဝယ်နေသည်ကိုတွေ့ရပါသည်။

         ယခင်ဩဂုတ်လ တတိယပတ်တွင် ရောင်းဝယ်နေသောဈေးနှုန်းမှာ မတ်ပဲပိဿာ(၂၀) ဝင်တစ်တင်းလျှင်  (၁၂၂၀၀၀ကျပ်မှ ၁၂၄၅၀၀ကျပ်) အထိဈေးပေါက်ခဲ့သည်ကိုတွေ့ရပါသည်။ ဩဂုတ်လ စတုတ္တပတ်တွင်လည်း မတ်ပဲဈေးနှုန်းမှာ ဆက်လက်မြင့်တက်လျက်ရှိပြီး ပိဿာ (၂၀)ဝင်တစ်တင်းကို (၁၂၄၅၀၀ကျပ်မှ ၁၃၀၅၀၀ကျပ်)အထိဈေးမြင့်တက်ခဲ့ပါသည်။

         ယခုစက်တင်ဘာလ၊ တတိယအပတ်တွင်လည်း မတ်ပဲဈေးနှုန်းများ ဆက်လက်မြင့်တက်နေပြီး ပိဿာ(၂၀) ဝင်တစ်တင်းလျှင်  (၁၃၀၅၀၀ကျပ်မှ ၁၃၃၀၀၀ကျပ်)အထိရှိခဲ့သော်လည်း ယခုစက်တင်ဘာလ၊ ဒုတိယအပတ်တွင်မူ ဈေးနှုန်းအနည်းငယ်ပြန်လည်ကျဆင်းခဲ့ပြီး (၁၃၀၀၀၀ကျပ်မှ ၁၂၅၀၀၀ကျပ်)ဖြင့်သာဈေးဖွင့်၍ ရောင်းဝယ်ခဲ့သည်ကိုတွေ့ရှိရပါသည်။

          တင်ပို့ရောင်းချမှုအခြေအနေဖြင့် ရန်ကုန်ဝယ်လက်သို့ အိတ်(၃၅၀)ဆံ့ကားများဖြင့် တစ်စီး၊ နှစ်စီးခန့် ရက်ခြားတင်ပို့နေရကြောင်းသိရှိရပါသည်။

DOCA(ပဲခူး)

      ပဲခူးတိုင်းဒေသကြီး၊ နတ်တလင်းခရိုင် နတ်တလင်းမြို့နယ်အတွင်းရှိ ဒေသခံတောင်သူများသည် ရေ၊ မြေ၊ ရာသီဥတုကောင်းမွန်သောကြောင့် စိုက်ပျိုးရေးလုပ်ငန်းများကို စီးပွားဖြစ် လုပ်ကိုင်ကြပြီး  ပြည်တွင်းစားသုံးဆီဖူလုံရေးအတွက် ဆီထွက်သီးနှံဖြစ်သော  မိုးမြေပဲနှင့် ဆောင်းမြေပဲကို နှစ်စဉ်စိုက်ပျိုးကြကြောင်းသိရသည်။

        နတ်တလင်းမြို့နယ်အတွင်းရှိ ကျောက်ခွက်၊ အိုးဖိုကုန်း၊ ဘန်းမွှေးကုန်း၊ ကျောက်ဆွယ်ကျေးရွာများ၌ ပင်ထောင်အတောင့်သေးမျိုးများကိုစိုက်ပျိုးကြောင်း၊ မိုးမြေပဲသီးနှံကို မေလတွင် စတင်စိုက်ပျိုး၍ ဩဂုတ်လနှင့် စက်တင်ဘာလများတွင် တူးဖော်ကြပါသည်။ စိုက်ပျိုးထုတ်လုပ်မှုကုန်ကျစရိတ်များအနေဖြင့် မြေပဲတစ်ဧကကို (မျိုး၊ သွင်းအားစု၊ အလုပ်သမားခ၊ စိုက်ပျိုးထွန်ယက်ခ) အပါအဝင် စုစုပေါင်း ငွေကျပ် (၇၅၀၀၀၀) ကုန်ကျကြောင်း၊ ယခုနှစ် မိုးမြေပဲပေါ်ချိန်တွင် တစ်ဧကအထွက်နှုန်း (၄၀)တင်းထွက်ရှိပြီး ခူးဆွတ်ချိန် စက်တင်ဘာလ ပထမပတ်တွင် မြေပဲတောင့်တစ်တင်းဈေးနှုန်းမှာ ငွေကျပ် (၃၅၀၀၀) ပေါက်ဈေးရှိသဖြင့် တစ်ဧကအကျိုးအမြတ်အနေဖြင့် ငွေကျပ်(၆၅၀၀၀၀)ခန့်ရရှိကြောင်း မြေပဲစိုက်တောင်သူတစ်ဦးထံမှသိရှိရပါသည်။

DOCA(ပဲခူး)

         ပဲခူးတိုင်းဒေသကြီး၊ သာယာဝတီခရိုင်အတွင်းရှိ မြို့နယ်များတွင် မတ်ပဲဈေးနှုန်းမှာ ဩဂုတ်လ နောက်ဆုံးပတ်တွင် ပိဿာ (၂၀) ဝင်တစ်တင်းလျှင် အနိမ့်ဆုံး (၁၂၅၀၀၀)ကျပ်မှ အမြင့်ဆုံး (၁၂၈၀၀၀)ကျပ်ထိရှိပြီး ယခုစက်တင်ဘာလ တတိယပတ်တွင် ပိဿာ၂၀ဝင်တစ်တင်းလျှင် ၁၃၃၀၀၀ကျပ်ခန့်မှ (၁၃၄၀၀၀)ကျပ်ထိရှိပါသည်။ စီးထွက်မှုအနေဖြင့် ဩဂုတ်လတစ်လလုံးတွင် ရန်ကုန်မြို့သို့ (၁၅၉၉၅၀) အိတ်ခန့်တင်ပို့နိုင်ခဲ့ပါသည်။ ယခုစက်တင်ဘာလ ဒုတိယအပတ်ထိ  တင်ပို့မှုအနေဖြင့် (၇၅၀၀၀)အိတ်ခန့်တင်ပို့နိုင်ခဲ့ကြောင်း သာယာဝတီမြို့အတွင်းရှိ ပွဲရုံပိုင်ရှင်တစ်ဦးထံမှသိရှိရပါသည်။

DOCA(ပဲခူး)