ပြည်တွင်းကုန်သွယ်မှုသတင်း

          ကျောက်ဆည်ခရိုင်အတွင်းရှိ တောင်သူဦးကြီးများသည် စားဖိုဆောင်သီးနှံဖြစ်သော ငရုတ်၊ ကြက်သွန်၊ ပဲ၊ နှမ်းသီးနှံများအပြင် စီးပွားဖြစ်ဝင်ငွေတိုးသော သံပုရာပင်များကိုလည်း စိုက်ပျိုးလာကြပါသည်။ စိုက်ပျိုးသောသံပုရာမျိုးများမှာ ဗမာသံပုရာမျိုး၊ သံပုယိုမျိုးများကို အများဆုံးစိုက်ပျိုး ကြပါသည်။ သံပုရာစိုက်ပျိုးရာတွင် မျိုးစေ့ကိုပျိုးထောင်၍ စိုက်ပျိုးကြသလို သံပုရာကိုင်းဆက် ပျိုးပင်ကိုလည်း ဝယ်ယူ၍ စိုက်ပျိုးကြပါသည်။ စိုက်ကျင်းအရွယ် ၂ပေ ပတ်လည် ကျင်းတူးပြီး မြေဆွေးရောစပ်၍ ၁၂ပေကြား တစ်ပင်ဖြင့် တစ်ဧကကိုအပင် (၃၀၀) ကျော်ဝင့်ဆံ့ကြောင်း၊ တစ်ဧက ကုန်ကျစရိတ်အနေဖြင့် ကိုင်းဆက်ပျိုးပင် တစ်ပင်လျှင် (၂၀၀၀) ကျပ်ဖြင့် ဝယ်ယူရပြီး မျိုး သွင်းအားစု လုပ်သားခအပါအဝင် စုစုပေါင်း သိန်း(၂၀)ကျပ်ခန့်ရှိကြောင်း၊ အပင်လျင်မြန်ကြီးထွားစေရန်နှင့် ပန်းပွင့်ချိန်နှင့်အသီးပေါ်ချိန်များတွင် ရေလှုံလောက်စွာသွင်းပေးရပြီး မြေဆီမြေဩဇာ ကျွေးရကြောင်း၊ သံပုရာမျိုးစေ့ကို စိုက်ပျိုးပါက(၇-၈)နှစ်ကြာကြောင်း၊ ကိုင်းဆက်ပျိုးပင်ကို စိုက်ပျိုးပါက(၂)နှစ်အကြာ တွင်အသီးများစတင်သီးကြောင်း၊ သံပုရာတစ်ပင်တွင် အသီးအထွက်နှုန်း (၁၀၀)မှ (၁၀၀၀)ခန့်ထွက်ကြောင်း၊ တစ်ဧကအထွက် သံပုရာသီး အလုံးပေါင်း (၂၀၀၀၀)လုံး ခန့်ထွက်ကြောင်း၊ ဗမာသံပုရာမျိုးနှင့် သံပုယိုမျိုးများတွင် သံပုယိုမျိုးက ပိုမိုထွက်ကြောင်း၊ ဗမာသံပုရာသီး ဈေးနှုန်းအနေဖြင့် ဗမာသံပုရာသီးအလုံး  (၁၀၀)လျှင် (၁၅၀၀၀)ကျပ် ၊ လက်လီတစ်လုံး လျှင်(၂၀၀)ကျပ်၊ သံပုယိုသီးအလုံး(၁၀၀)လျှင်  (၇၀၀၀)ကျပ် ၊ လက်လီတစ်လုံးလျှင်(၁၀၀ )ကျပ်ဖြင့် ရောင်းဝယ်လျက်ရှိကြောင်း၊ ဗမာသံပုရာသီးနှင့် သံပုယိုတွင် ဗမာသံပုရာက ဈေးကောင်းပိုမိုရရှိကြောင်း၊ ဈေးကွက်အနေဖြင့် ပွဲစားများမှ သံပုရာခြံထိ လာရောက်ဝယ်ယူကြကြောင်း၊ ပွဲစားများမှတစ်ဆင့် ရန်ကုန်မြို့၊ မန္တလေးမြို့တို့သို့ တင်ပို့ရောင်းချကြောင်း၊ သံပုရာပင်သည် တစ်နှစ်ပတ်လုံးအသီးထွက်ကြောင်း အချိန်ကာလပေါ်မူတည်ပြီးအထွက်နှုန်း၊ အနည်းအများရှိကြောင်း၊(၁)ဧက အကျိုးအမြတ်အနေဖြင့် ခန့်မှန်းသံပုရာသီး(၂၀၀၀၀)ခန့် ထွက်ရှိပြီး (၇၀)ကျပ်ခန့် ရောင်းချရပါက (၁၄)သိန်းခန့်မြတ်ကြောင်း၊ သံပုရာသီးတွင် ဗီတာမင် C ကြွယ်ဝသောကြောင့် ကိုယ်ခံအားကို  အားဖြည့်ပေးနိုင်ကြောင်း၊ အသားအရာကို ကျန်းမာလှစေဖို့ အကောင်းဆုံးအားဖြည့်ပေးကြောင်း၊ ဗီတာမင် C ကြွယ်ဝသောကြောင့် ကော်လာဂျင်ထွက်ရှိမှုကို လှုံဆောင်ပေးပြီး အရေးအကြောင်း ဖြစ်စေခြင်းကို လျော့ပါးစေကြောင်း၊ ခန္ဓာကိုယ်ကို သံဓာတ်စုပ်ယူမှု အားကောင်းစေပြီး သွေးအားနည်းရောဂါ မဖြစ်အောင် ကာကွယ်ပေးနိုင်ကြောင်း လေ့လာသိရှိရပါသည်။

DOCA(မန္တလေး)

          မြန်မာနိုင်ငံသည် စိုက်ပျိုးရေးကိုအခြေခံသော နိုင်ငံဖြစ်သည့်အတွက် တောင်သူများသည် မိသားစုအပိုဝင်ငွေရအောင် သီးထပ်သီးညှပ်များနှင့် အလွယ်တကူခူးဆွတ်၍ ဝင်ငွေရအောင် စားသုံးသီးနှံများကိုလည်း အလေးထားစိုက်ပျိုးလာကြသည်ကို တွေ့ရှိရပါသည်။ ၎င်းသီးနှံများအနက် မြုပ်သခွားသီးနှံကိုလည်းစိုက်ပျိုးလာကြပါသည်။ မြုပ်သခွားသီး(၁)ဧက စိုက်ပျိုးမှုအနေဖြင့်မျိုး၊ သွင်းအားစု၊ လုပ်သားခအပါအဝင်စုစုပေါင်း(၆၀၀၀၀၀)ကျပ်ခန့် ကုန်ကျကြောင်း၊ မြုပ်သခွားသီးနှံကို အရွယ်အစား(၃)မျိုးခွဲ၍ ဈေးထဲသို့ ဖောက်သည်ပေးရောင်းချရကြောင်း၊ မြုပ်သခွားသီးအကြီး တစ်လုံး လျှင်(၇၀၀)ကျပ်၊မြုပ်သခွားသီး အလတ်တစ်လုံး လျှင်(၅၀၀)ကျပ်၊ မြုပ်သခွားသီးအသေး တစ်လုံးလျှင်(၃၀၀)ကျပ်ဈေးနှုန်းများဖြင့်ရောင်းချကြောင်း၊ တစ်ရက်ခြားခူးဆွတ်ရကြောင်း၊ တစ်ရက်ခြားခူးဆွတ်ရသောအလုံးအရေအတွက်မှာ အကြီး၊ အလတ်၊ အသေး အလုံးပေါင်း(၅၀၀/၆၀၀)ထွက်ရှိကြောင်း၊ တစ်ဧကအကျိုးအမြတ်အနေဖြင့် (၃၀၀၀၀၀၀)ကျပ်ဝန်း ကျင်ခန့် ရရှိကြောင်း၊ တောင်သူများအနေဖြင့် စိုက်ပျိုးစရိတ်သက်သာပြီး မိသားစုအပိုဝင်ငွေကို အလွယ်တကူရရှိနိုင်သော မြုပ်သခွားသီး သီးနှံများကိုစိုက်ပျိုးသင့်ပါကြောင်း မြုပ်သခွားသီးစိုက် တောင်သူတစ်ဦးထံမှ သိရှိရပါသည်။

DOCA(မန္တလေး)

            မန္တလေးတိုင်းဒေသကြီး၊ ကျောက်ဆည်ခရိုင်သည် ဆည်ရေသောက် ဒေသတစ်ခုဖြစ်ပြီး ဆီထွက်သီးနှံနှင့်ပဲမျိုးစုံများ အောင်မြင်ဖြစ်ထွန်းလျှက်ရှိပါသည်။ ၄င်းသီးနှံ များမှာ ခရိုင်အတွင်း ရိတ်သိမ်းပြီးစီးပြီဖြစ်၍ ယခုအချိန်တွင် သီးနှံများမှာစျေးနှုန်း ကျဆင်းရာမှ အနည်းငယ် ပြန်လည်မြင့်တက်လာကြောင်း သိရှိရပါသည်။ ကုလားပဲV2 တစ်တင်းလျှင် ပေါ်ခါစအချိန်တွင် (၁၀၃၀၀၀/-)ကျပ် ရှိရာ သြဂုတ်လဆန်းတွင် (၈၂၀၀၀/-)ကျပ်သို့ ကျဆင်းသွားရာ သြဂုတ်လဒုတိယပတ်တွင် (၈၅၀၀၀/-)ကျပ် သို့လည်းကောင်း၊ ကုလားပဲ ထိုင်ဝမ် တစ်တင်းလျှင် ပေါ်ခါစအချိန်တွင် (၉၀၀၀၀/-)ကျပ် ရှိရာ သြဂုတ်လဆန်းတွင် (၇၅၀၀၀/-)ကျပ်သို့ ကျဆင်းသွားရာ သြဂုတ်လဒုတိယပတ်တွင် (၇၉၀၀၀/-)ကျပ်သို့ လည်းကောင်း၊  နှမ်းဖြူ တစ်တင်းလျှင် ပေါ်ခါစအချိန်တွင် (၁၂၆၀၀၀/-)ကျပ် ရှိရာ သြဂုတ်လဆန်းတွင် (၁၀၅၀၀၀/-)ကျပ်သို့ ကျဆင်းသွားရာ သြဂုတ်လဒုတိယပတ်တွင် (၁၁၄၀၀၀/-)ကျပ်သို့လည်းကောင်း၊ နှမ်းညို တစ်တင်းလျှင် ပေါ်ခါစအချိန်တွင်(၁၀၃၀၀၀/-) ကျပ်ရှိရာ သြဂုတ်လဆန်းတွင် (၈၂၀၀၀/-)ကျပ်သို့ ကျဆင်းသွားရာ သြဂုတ်လ ဒုတိယပတ်တွင် (၉၀၀၀၀/-)ကျပ်သို့လည်းကောင်း ၊ ပဲတီစိမ်း တစ်တင်းလျှင် ပေါ်ခါစ အချိန်တွင် (၁၂၃၀၀၀/-)ကျပ်ရှိရာ သြဂုတ်လဆန်းတွင်(၁၀၀၀၀၀/-)ကျပ်သို့ ကျဆင်းသွားရာ သြဂုတ်လ ဒုတိယပတ်တွင် (၁၀၃၀၀၀/-)ကျပ်သို့လည်းကောင်း၊ စျေးနှုန်းများ အနည်းငယ်ပြန်လည် မြင့်တက်လာကြောင်း၊ သီးနှံများမှာ ရိတ်သိမ်းပြီးဖြစ်၍ တောင်သူလက်ဝယ်၌သာ ကျန်ရှိပြီး စျေးနှုန်းများအနည်းငယ် မြင့်တက်လာသောကြောင့် တောင်သူအနည်းငယ်သာ ပွဲရုံများသို့ လာရောက်ရောင်းချပြီး အချို့မှာ တက်စျေးကိုမျှော်ပြီး တောင်သူများလက်ဝယ်၌ သိုလှောင်ထားရှိကြောင်း၊ မြို့ပေါ်ရှိ သီးနှံပွဲရုံများတွင်လည်း အရောင်းအဝယ်နည်းပါးလျက်ရှိကြောင်း သိရှိရပါသည်။

DOCA(မန္တလေး)

          ပုသိမ်ခရိုင်၊ ကန်ကြီးထောင့်မြို့နယ် မြို့မဈေးတွင် ဩဂုတ်လ တတိယပတ်တွင် ဖြစ်ပေါ်နေသော ကွမ်းသီးနှင့် ကွမ်းရွက်ဈေးနှုန်းများအနေဖြင့်  ကွမ်းသီး(ရှယ်) တစ်ပိဿာလျှင် (၂၄၀၀၀) ကျပ်ဖြင့်လည်းကောင်း၊ အလတ်စ တစ်ပိဿာလျှင် (၂၁၀၀၀) ကျပ်ဖြင့်လည်းကောင်း၊ အညံ့ တစ်ပိဿာလျှင် (၁၈၀၀၀) ကျပ်ဖြင့် လည်းကောင်း၊ ကွမ်းရွက် (ရှယ်) တစ်ပိဿာလျှင် (၈၀၀၀) ကျပ်ဖြင့်လည်းကောင်း၊ အလတ်စား တစ်ပိဿာလျှင် (၆၀၀၀) ကျပ်ဖြင့်လည်းကောင်း၊ အညံ့စား တစ်ပိဿာလျှင် (၄၀၀၀) ကျပ်ဖြင့်လည်းကောင်း ပယ်ရွက် တစ်ပိဿာလျှင် (၃၀၀၀) ကျပ်ဖြင့်လည်းကောင်း ဈေးနှုန်းအသီးသီးဖြင့် ရောင်းချလျက်ရှိကြောင်း သိရှိရပါသည်။

(DOCA)ဧရာဝတီ

            ဧရာဝတီတိုင်းဒေသကြီး၊ ပုသိမ်ခရိုင်၊ ကန်ကြီးထောင့်မြို့နယ် မြို့မဈေးအတွင်းဖြစ်ပေါ်နေသော စားဖိုဆောင်သီးနှံများ၏ ဈေးနှုန်းများမှာ ရာသီစာ ဒညှင်းသီး (၁) လုံးလျှင် ၂၀၀ ကျပ်၊ ရုံးပတေသီး (၁၀) ထောင့်ပါ တစ်စည်းလျှင် (၃၀၀) ကျပ်၊ ပဲတောင့်ရှည် (၁၀) တောင့် တစ်စည်းလျှင် (၅၀၀) ကျပ်၊ ကန်စွန်းရွက် (၁) စည်းလျှင် (၂၀၀) ကျပ်၊ တရုတ်နံနံပင် (၁) စည်းလျှင် (၅၀၀) ကျပ်၊ ချဉ်ပေါင်ရွက် (၂) စည်းလျှင် (၅၀၀) ကျပ် ဈေးနှုန်းအသီးသီးဖြင့် ရောင်းချလျက်ရှိကြောင်း သိရှိရပါသည်။

    (DOCA)ဧရာဝတီ