ပြည်တွင်းကုန်သွယ်မှုသတင်း

 ရန်ကုန်တိုင်းဒေသကြီး၊တွံတေးခရိုင်၊ကွမ်းခြံကုန်းမြို့နယ်၊စားသုံးသူရေးရာဦးစီးဌာနမှမြို့နယ်တာဝန်ခံနှင့် ဝန်ထမ်းများသည် ရန်ကုန်တောင်ပိုင်းခရိုင်ဦးစီးမှူးရုံး၏ ညွှန်ကြားချက်နှင့် အညီ အခြေခံစားသောက်ကုန်ဈေးနှုန်းများကို စာရင်းကောက်ယူ၍ အပတ်စဉ်တင်ပြလျှက်ရှိရာ  အောက်တိုဘာလ(၂၂)ရက်နေ့၊ နံနက်(၀၈:၃၀)နာရီအချိန်တွင် ကွမ်းခြံကုန်းမြို့နယ် စည်ပင်သာ ယာဈေးအတွင်းသို့ ပူးပေါင်း၍ ကွင်းဆင်းစိစစ်ခဲ့ကြောင်း သိရှိရသည်။

          ထိုသို့ ကွင်းဆင်းစာရင်းကောက်ယူခြင်းဆောင်ရွက်ရာတွင် ကွမ်းခြံကုန်းမြို့နယ် စည်ပင် သာယာရေးအဖွဲ့ ဈေးတာဝန်ခံ ကျန်းမာရေးမှူး-၃ ဦးထွန်းထွန်း၊ စားသုံးသူရေးရာဦးစီးဌာန မြို့နယ်တာဝန်ခံ ဒေါ်နွယ်နွယ်အေးနှင့် ဌာနခွဲစာရေး ဦးတင်ထွန်းဦးတို့ ပူးပေါင်း၍ မြို့မဈေး အတွင်း အခြေခံစားသောက်ကုန်များ ရောင်းချသော ဒေါ်မိုးစန္ဒာ ကုန်စုံဆိုင်၊ ဒေါ်မာမာစိုး ကုန်စုံ ဆိုင်၊ ဒေါ်ရီရီသန်း ကုန်စုံဆိုင်တို့မှ စားအုန်းဆီတစ်ပိဿာလျှင် (၇၁၀၅)ကျပ်၊ မြေပဲဆီတစ်ပိဿာ လျှင်(၂၂၀၀၀)ကျပ်၊ ကြက်သွန်နီဆိုဒ်စုံ တစ်ပိဿာလျှင်(၁၅၀၀မှ ၂၂၀၀)ကျပ်ထိ၊ ကြက်သွန်ဖြူ ရှမ်းစတစ်ပိဿာလျှင်(၈၀၀၀မှ ၁၀၀၀၀)ကျပ်ထိ၊ ငရုပ်တောင့်ရှည် တစ်ပိဿာလျှင် (၁၄၀၀၀မှ ၁၅၀၀၀)ကျပ်ထိ၊ မန်းကျည်းသီးမှည့် တစ်ပိဿာလျှင် (၁၄၀၀၀)ကျပ်၊ အိုင်အိုဒင်းဆားတစ်ထုပ် လျှင် (၈၀၀)ကျပ်၊ ကုလားပဲခြမ်းတစ်ပိဿာလျှင် (၆၅၀၀)ကျပ်၊ သကြားတစ်ပိဿာလျှင် (၅၀၀၀) ကျပ်၊ အာလူးတစ်ပိဿာလျှင် (၇၅၀၀မှ ၈၀၀၀)ကျပ်ထိ အသီးသီးအရောင်းအဝယ် ဖြစ်လျှက် ရှိကြောင်း သိရသည်။

       ယခင်တစ်ပတ်နှင့် ယခုတစ်ပတ်ဈေးနှုန်း နှိုင်းယှဉ်ရာတွင် အာလူးဈေးအနည်းငယ် မြင့်သည်မှလွဲ၍ ကျန်သော အခြေခံစားသောက်ကုန်ဈေးနှုန်းများ ပြောင်းလဲမှုမရှိကြောင်း အာလူးရောင်းအားကောင်း၍ အဝယ်လိုက်လာခြင်းကြောင့် ရန်ကုန်မှဝယ်ယူတင်သွင်းသည့် ဈေးနှုန်းမြှင့်လာခြင်းကြောင့် ဖြစ်ကြောင်း လုပ်ငန်းရှင်များ ပြောကြားချက်အရ သိရှိရပါသည်။

DOCA(ရန်ကုန်)

   ပြည်ဈေးကွက်အတွင်း ငွေနှင်းမှုန်မှိုသည် တစ်နှစ်ပတ်လုံးထွက်ရှိသည့် မှိုအမျိုးအစားဖြစ်ပြီး ပြည်မြို့ပေါ် ရပ်ကွက်အစုံနှင့် နယ်ဘက်၊ ရွာဘက်နေရာစုံတို့တွင် တစ်ပိုင်တစ်နိုင် စိုက်ပျိုးရောင်းချကြကြောင်း သိရှိရသည်။ ပြည် လက်လီဈေးများသို့ တစ်ပတ်လျှင် နေ့စဉ် (၈)ပိဿာ၊ အချိန် (၂၀)ခန့်အဝင်ရှိပြီး ဈေးကွက်အတွင်း အဝင်ရှိသလောက် အရောင်းအဝယ် ဖြစ်ကြောင်းသိရသည်။ ငွေနှင်းမှုန်မှိုကို ကန်စွန်းရွက်နှင့်ရော၍ ကြော်စားခြင်းဖြင့်လည်းကောင်း၊ ငရုတ်သီးစိမ်း၊  မျှင်ငပိနှင့် အစပ်ဟင်းချက်၍လည်းကောင်း၊ ချက်ပြုတ်စားသောက်ကြပြီး သတ်သတ်လွတ်သမားများ အတွက်လည်း အကြိုက်တွေ့စေမဲ့ဟင်းလျာတစ်မျိုးဖြစ်ပါသည်။ ဈေးနှုန်းများမှာ ငွေနှင်းမှုန်မှို (၁၀)ကျပ်သားလျှင် ယခင်နှစ်တွင် (၆၀၀ - ၈၀၀)ကျပ်နှုန်းမှ ယခုနှစ်တွင် ကျပ် (၁၀၀၀-၁၂၀၀)နှုန်းဖြင့် ရောင်းချကြောင်းသိရပါသည်။

DOCA(ပဲခူး)

  ပဲခူးတိုင်းဒေသကြီး၊ ပြည်ခရိုင်၊ ပြည်မြို့၊ မြို့သစ်ဈေးတွင် အောက်တိုဘာလ၊ ဒုတိယပတ်တွင် ဖြစ်ပေါ်ခဲ့သော သစ်သီးဝလံဈေးနှုန်းများမှာ ပန်းသီးတစ်လုံးလျှင် (၁၅၀၀)ကျပ်မှ (၂၅၀၀)ကျပ်ထိ၊ ပန်းသစ်တော် (၁)လုံးလျှင် (၃၀၀၀) ကျပ်၊ တောင်ခွေးရဲကျေးရွာမှ ထွက်ရှိသော ငှက်ပျောဖီးကြမ်း တစ်ဖီးလျှင် (၁၅၀၀)ကျပ်မှ (၂၅၀၀)ကျပ်အထိ၊ သီးမွှေး ငှက်ပျောသီး တစ်ဖီးလျှင် (၂၅၀၀)ကျပ်မှ (၅၀၀၀)ကျပ်အထိ မာလကာသီးတစ်လုံးလျှင် (၃၀၀)ကျပ်မှ (၅၀၀)ကျပ်ထိ၊ နဂါးမောက်သီး တစ်လုံးလျှင် (၁၀၀၀)ကျပ်မှ (၂၅၀၀)ကျပ်ထိ၊ လိမ္မော်သီးတစ်လုံးလျှင် (၃၅၀၀)ကျပ်၊ စပျစ်သီး အစေ့လွတ် (၁၀)ကျပ်သားလျှင် (၇၀၀၀)ကျပ်၊ ဖရဲသီးတစ်လုံးလျှင် (၅၀၀၀-၇၀၀၀)ကျပ်၊ မော်လမြိုင်ကျွဲကောသီး တစ်လုံးလျှင် (၃၀၀၀)ကျပ်ထိ အသီးသီးအရောင်းအဝယ်ဖြစ်နေကြောင်း၊ ပြည်မြို့၊ မြို့သစ်ဈေးအတွင်း ရောင်းချ နေသော အသီးဆိုင်မှ သတင်းရရှိပါသည်။

DOCA(ပဲခူး)

     ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်တွင် စားသုံးသူရေးရာဦးစီးဌာနသည် စားသုံးသူကာကွယ်ရေးလုပ်ငန်းများဆောင်ရွက်လျက်ရှိသလို စားသုံးသူများနေ့စဉ် ဝယ်ယူသုံးစွဲလျက်ရှိသည့် အခြေခံစားကုန်ဈေးနှုန်းများ အသားဈေးနှင့် ငါးဈေးနှုန်းများကို စာရင်းကောက်ယူပြုစု၍ အထက်အဆင့်ဆင့်သို့ တင်ပြဆောင်ရွက်လျက်ရှိကြောင်းသိရသည်။

       ၂၀၂၅ ခုနှစ်၊ အောက်တိုဘာလ၊ ဒုတိယပတ်တွင် ရောင်းချနေသော ငါးသလောက်(၁၀)ကျပ်သားလျှင် (၄၀၀၀)ကျပ်၊ ငါးကြင်းဖြူ (၁၀)ကျပ်သာလျှင် (၁၈၀၀)ကျပ်၊ ငါးသလဲထိုး (၁၀)ကျပ် သားလျှင် (၄၀၀၀)ကျပ်၊ ငါးစရစ် (၁၀)ကျပ်သားလျှင် (၂၀၀၀)ကျပ်၊ ငါးခူဈေးနှုန်းများမှာ (၁၀)ကျပ်သားလျှင် (၂၀၀၀)ကျပ်၊ လယ်ကြားငါးခူများမှာ (၁၀)ကျပ်သာလျှင် (၃၀၀၀-၄၀၀၀)ကျပ်၊ ပုဇွန်ဈေးနှုန်းများမှာ ပုဇွန်ကြားနှင့် ရေချိုပုဇွန်ထုပ်မှာ(၁၀)ကျပ်သားလျှင် (၄၅၀၀-၆၅၀၀)ကျပ် ပုဇွန်စိတ်ဈေးနှုန်းများမှာ (၁၀)ကျပ်သားလျှင် (၂၀၀၀)ကျပ်တို့ဖြင့် အရောင်းအဝယ်ဖြစ်လျှက် ရှိကြောင်း ငါးရောင်းချသူ တစ်ဦးထံမှ သိရသည်။

DOCA(ပဲခူး)

      မွန်ပြည်နယ်၊ ကျိုက်မရောမြို့နယ်တွင် ဒေသတွင်းနှမ်းမျိုးနှင့် စားသုံးဆီဖူလုံပိုလျှံစေရေး အတွက် မိုးနှမ်းစိုက်ခင်း (၃၅) ဧကလျာထာစိုက်ပျိုးလျက်ရှိရာ နိတုံကျေးရွာ၌ သိပ္ပံနည်းကျ တန်းဆွဲစနစ်ဖြင့် စိုက်ပျိုးထားသော နှမ်းစိုက်ခင်းများ အောင်မြင်ဖြစ်ထွန်းလျက်ရှိရာ ဒေသခံ တောင်သူများ စားသုံးဆီပိုလျှံနေကြောင်းသိရသည်။

      အဆိုပါ  နှမ်းများကို သိပ္ပံနည်းကျ တန်းဆွဲစနစ်ဖြင့် စိုက်ပျိုးကြပြီး ထယ်ရေး ကောင်းမွန်စွာ မြေပြင်ပြီး မိမိတို့လိုအပ်သော အပင်ကြား၊ အတန်းကြား ရရှိရေး နွားထွန်ဖြင့် ထွန်ကြောင်း၊ အကျယ်ပေးပြီးနို့ဆီဗူးအခွံဖြင့် ပြုလုပ်ထားသည့် နှမ်းစိုက်ကိရိယာြဖင့် စိုက်ပျိုးရကြောင်း တန်းဆွဲစနစ်ဖြင့် စိုက်ပျိုးခြင်းသည် ပေါင်းပေါက်စရိတ် သက်သာစေပြီး တစ်ဧက အပင်ဝင်ဆန့်မှု ပြည့်မီရေး နှမ်းပင်များ သားခွဲရာတွင်လည်းကောင်း ပေါင်းမြက်များ ရှင်းလင်းရာတွင်လည်းကောင်းလွယ်ကူပြီးလိုအပ်သည့်အခါရေသွင်းရာ၌ထိန်းညှိသွင်းနိုင်သဖြင့်အပင် ဖြစ်ထွန်းမှုကောင်းမွန်ပြီး အထွက်နှုန်းလည်း ကောင်းမွန်ကြောင်း နှမ်းစိုက်တောင်သူများ ထံမှသိရသည်။

     ကျိုက်မရောမြို့နယ်တွင် ဒေသတွင်းဆီထွက်သီးနှံဖူလုံရေးအတွက် မိုးနှမ်းအပြင် မိုးမြေပဲများကိုလည်း စိုက်ပျိုးကြသဖြင့် ဒေသတွင်း စားသုံးဆီဖူလုံမှုရှိကြောင်း နှမ်းမျိုးနှင့် မြေပဲမျိုးများကိုလည်း မြို့နယ်စိုက်ပျိုးရေးဦးစီးဌာနမှ ဝယ်ယူပြီး နည်းပညာများကိုလည်း စိုက်ပျိုးရေးဌာနမှ ဝန်ထမ်းများကကူညီ ပံပိုးလျက်ရှိ​ကြောင်း သိရသည်။

DOCA (မွန်)