ပြည်တွင်းကုန်သွယ်မှုသတင်း

            မြင်းခြံခရိုင်၊ နွားထိုးကြီးမြို့နယ်တွင် ပြည်တွင်းစားသုံးဆီဖူလုံစေရေးနှင့် ပိုလျှံရေးအတွက် အရေးကြီးသီးနှံတစ်မျိုးဖြစ်သည့် မိုးနေကြာများစိုက်ပျိုးထားရှိရာ အောင်မြင်ဖြစ်ထွန်းလျက်ရှိ ကြောင်းသိရှိရသည်။ အကောင်းဆုံးစိုက်ပျိုးချိန်မှာ ဩဂုတ်လ၊ စက်တင်ဘာလနှင့် အောက်တိုဘာလ တို့တွင်စတင်စိုက်ပျိုးပြီး ဇန်နဝါရီလ၊ ဖေဖော်ဝါရီလနှင့် မတ်လတို့တွင် ရိတ်သိမ်းထွက်ပေါ်ကြောင်း၊ စိုက်ပျိုးချိန်မှရိတ်သိမ်းချိန်အထိ (၄)လခန့်ကြာမြင့်ကြောင်းသိရှိရသည်။  မိုးနေကြာကိုတစ်မြို့ နယ်လုံးအနေဖြင့် လျာထားဧက (၃၀၅၅)ဧကရှိသည့်အနက်ယခုအောက်တိုဘာလတတိယပတ်အထိစိုက်ဧက (၂၉၇၀) ဧကစိုက်ပျိုးထားပြီးဖြစ်ကြောင်း၊ အောက်တိုဘာလကုန်တွင် လျာထားချက် ပြည့်မီအောင် ဆက်လက်စိုက်ပျိုးနေကြောင်း၊ မြို့နယ်ကြေးတိုင်နှင့် မြေစာရင်းဦးစီးဌာန၏ စာရင်းများအရသိရှိရသည်။ယခင်နှစ်တစ်ဧကအထွက်နှုန်းအနေဖြင့်(၂၃)တင်းခန့်ထွက်ရှိခဲ့ကြောင်း၊ ယခင်နှစ်ထွက်ပေါ်ချိန်တွင် ဆီနေကြာတစ်ပိဿာလျှင် (၆၅၀၀)ကျပ်ခန့် ပေါက်ဈေးများရှိခဲ့ကြောင်း၊ တောင်သူများအနေဖြင့် နေကြာသီးနှံကို စိုက်ပျိုးမှုထားရှိမှုမှာ ဆင်းရွှေကြာ-၂၊ရေဆင်းစပ်မျိုး-၁နေကြာမျိုးကိုအဓိကစိုက်ပျိုးကြကြောင်း၊ရာသီဥတုကောင်းပါကအထွက်နှုန်းကောင်းနိုင်ကြောင်းနေကြာစိုက်တောင်သူများထံမှသိရှိရသည်။ယခု၂၀၂၅ခုနှစ်၊ အောက်တိုဘာလတတိယပတ်တွင် ဆီနေကြာတစ်ပိဿာလျှင် (၇၀၀၀) ကျပ်ခန့်ပေါက်ဈေး များရှိကြောင်း၊ နွားထိုးကြီးမြို့နယ်တွင် နေကြာဆီကြိတ်ခွဲထုတ်လုပ်ခြင်းမရှိကြောင်း၊ ‌ဒေသတွင်းထွက်ရှိသော နေကြာများကို မန္တလေးမြို့သို့ တင်ပို့ရောင်းချကြောင်း ကုန်သည်တစ်ဦး၏ ပြောပြချက် အရသိရှိရသည်။

DOCA(မန္တလေး)

           ငှက်ပျောဖူးသည် ငှက်ပျောပင်၏ အပွင့်ဖြစ်ပြီး ငှက်ပျောသီးအဖြစ် မအောင်မြင်မီအဆင့် တွင်ရှိသော အပွင့်ဖူးအစိတ်အပိုင်းဖြစ်ကြောင်း၊ ခရမ်းရောင်ရှိပြီး မာကျောသည့်အခွံဖြင့်ဖုံး အုပ်ထားကာ အတွင်းတွင်ပျော့ပျောင်းပြီး အဝါရောင်သန်းသော အပွင့်လေးများ ခွေလျက်ရှိသော အဖူးဖြစ်သည်။ ငှက်ပျောဖူးသည် အာဟာရဓာတ်ကြွယ်ဝသော အစားအစာတစ်ခုဖြစ်ပြီး အမျှင် ဓာတ်ပါဝင်၍ အစာခြေစနစ်အတွက်ကောင်းမွန်ကြောင်း၊ ပရိုတင်းနှင့် ပိုတက်ဆီယမ်ကြွယ်ဝသဖြင့် ကြွက်သားများနှင့် အာရုံကြောများအတွက်အကျိုးပြုကြောင်း၊ ကိုယ်ခံအားကိုမြှင့်တင်ပေးသော ဗီတာမင်အေ၊စီနှင့်အီးတို့ပါဝင်၍ အရွယ်တင်နုပျိုစေကြောင်း၊ သံဓာတ်ပါဝင်ပြီး သွေးအားနည်းရော ဂါကို ကာကွယ်ပေးကြောင်းသိရှိရသည်။ ကျန်းမာရေးအကျိုးကျေးဇူးများအနေဖြင့်  သကြားဓာတ် နည်းပြီး အမျှင်ဓာတ်နည်းသဖြင့် သွေးတွင်းသကြားဓာတ်ကိုထိန်းညှိပေး၍ ဆီးချိုရောဂါကိုကာကွယ် ပေးကြောင်း၊ ပိုတက်ဆီယမ်ဓာတ်သည် သွေးပေါင်ချိန်ကိုထိန်းညှိပေးသောကြောင့် သွေးတိုး ကျစေကြောင့်၊ အူမကြီးကိုသန့်စင်စေပြီး ဝမ်းချုပ်ခြင်းကိုကာကွယ်ပေး၍ အစာခြေစနစ်ကို အထောက်အကူပြုကြောင်း၊ ကယ်လိုရီနည်းပြီး ဗိုက်ပြည့်စေသောအစားအစာဖြစ်သောကြောင့် ခန္ဓာကိုယ်အတွက် ဝိတ်ချသူများအနေဖြင့်  ကိုယ်အလေးချိန်ကျဆင်းကြောင်း၊ မဂ္ဂနီဆီယမ် ကြွယ်ဝ စွာပါဝင်သဖြင့် စိတ်ကျရောဂါကို သက်သာစေကြောင်းဖတ်ရှု့သိရှိရသည်။ လတ်ဆတ်သော ငှက်ပျောဖူးများကို ရွေးချယ်ဝယ်ယူစားသုံးသင့်ကြောင်း၊ ၂၀၂၅ခုနှစ်၊အောက်တိုဘာလ တတိယပတ် တွင် မြင်းခြံမြို့ အေးမြသီတာဈေးတွင်ရောင်းချနေသော ငှက်ပျောဖူးတစ်ဖူးလျှင် (၁၅၀၀-၂၀၀၀) ကျပ်ခန့် ပေါက်ဈေးများဖြင့် ‌ရောင်းချကြောင်း၊ ငှက်ပျေားဖူးသည် မြန်မာ့ရိုးရာအစား အစာတစ်ခုသာမကကျန်းမာရေးအတွက်လည်းအလွန်ကောင်းမွန်သော ဟင်းသီးဟင်းရွက် တစ်မျိုးဖြစ်ကြောင်း သိရှိရသည်။

DOCA(မန္တလေး)

             စီးပွားရေးနှင့်ကူးသန်းရောင်းဝယ်ရေးဝန်ကြီးဌာန လက်အောက်ရှိမြင်းခြံခရိုင်စားသုံးသူ ရေးရာဦးစီးဌာနသည် ပြည်တွင်းကုန်သွယ်မှု လုပ်ငန်းများဖွံ့ဖြိုးတိုးတက်စေရန် အတွက်ဈေးကွက် အတွင်းဘိလပ်မြေများ ပြတ်လပ်မှုရှိ/မရှိနှင့် ဈေးနှုန်းကြီးမြင့်မှုရှိ/မရှိ အခြေအနေများအား ကြပ်မတ်ဆောင်ရွက်လျက်ရှိသည်။

            မြင်းခြံမြို့နယ် အမှတ်(၉)ရပ်ကွက်၊ ဘဘလမ်းရှိ မိုးကျော်အိမ်ဆောက်ပစ္စည်း အရောင်းဆိုင်၌ ၂၀၂၅ခုနှစ်၊ အောက်တိုဘာလတတိယပတ်တွင် ရောင်းချနေသာဈေးနှုန်းများမှာ Crown ဘိလပ်မြေ (50)kg တစ်အိတ်လျှင် (၂၀၅၀၀) ကျပ်၊ ခေါင်အုပ်သွပ်thick-0.42 mm တစ်ပေလျှင် (၂၅၀၀)ကျပ်၊ ကြယ်စိမ်း သွပ်ပြားလိုင်းပါအလတ်တစ်ပေလျှင်(၁၆၀၀)ကျပ်၊ ကြယ်စိမ်းသွပ်ပြားလိုင်းပါ အထူတစ် ပေလျှင် (၂၆၀၀)ကျပ်၊ သွပ်ပြား4-Angle0.36mmတစ်ပေလျှင် (၂၈၀၀)ကျပ်၊ အိမ်ရိုက်သံ ၁ လက်မ အသေးနှင့် သွပ်ရိုက်သံတစ်ပိဿာလျှင်(၉၅၀၀)ကျပ်၊အိမ်ရိုက်သံ(၂-၄)လက်မတစ်ပိဿာလျှင်(၇၅၀၀)ကျပ်၊သံချောင်း(သုံးမှုး)ချောင်း(၉၅၀၀)ကျပ်၊သံချောင်းလုံးတစ်တန်လျှင် (၁၅၅၀၀၀၀) ကျပ်၊ Hollow သံချောင်း1.2mm ချောင်း (၂၅၀၀၀)ကျပ်၊ U/I Bean တစ်ချောင်းလျှင် (၁၉၀၀၀) ကျပ်ဖြင့်အသီးသီးရောင်းချကြောင်း၊ အိမ်ဆောက်ပစ္စည်းဈေးနှုန်းများအနေဖြင့် ယခင်စက်တင်ဘာလ တတိယပတ်ဈေးနှုန်းများအတိုင်းပြောင်းလဲခြင်းမရှိဘဲရောင်းချလျက်ရှိကြောင်း၊ဒေသတွင်းအဆာက်အဦများဆောက်လုပ်ရန် ဖြန့်ဖြူး ရောင်းချလျက်ရှိပြီး၊ ဈေးကွက်ဝင်ရောက်မှု အနေဖြင့် မန္တလေးမြို့မှ ဝယ်ယူရောင်းချကြောင်း၊ သယ်ယူစရိတ်အနေဖြင့် မန္တလေးမြို့မှမြင်းခြံမြို့အထိ ဘိလပ်မြေ တစ်အိတ် လျှင် ၂၅၀၀ ကျပ်ခန့်ရှိကြောင်း၊ ဘိလပ်မြေရောင်းချသူများအား ဈေးကွက်အတွင်း သင့်တင့်မျှတသော နှုန်းထားများအတိုင်း ရောင်းချကြကြောင်း၊ ဈေးနှုန်းကြီးမြင့်မှုမရှိစေရန်၊ ဈေးကစား ရန် ရည်ရွယ်ချက် ဖြင့် သိုလှောင်ခြင်းများ မပြုလုပ်ရန် အရောင်းဆိုင်များတွင် ဘိလပ်မြေများပြတ်လပ်မှု မရှိကြောင်း သိရှိရသည်။

DOCA(မန္တလေး)

              မြင်းခြံခရိုင်အတွင်းရှိ ကျေးရွာများဖြစ်သော တလုပ်ရွာ၊ တောပု၊ နနွင်းတော်ဘိုး၊ကံဆွယ်၊ ကံဆင့်၊လက်ဝဲနှင့် မြင်းနီကျေးရွာတို့သည် ဆောင်းကြက်သွန်နီများကို စီးပွားဖြစ်စိုက်ပျိုး ကြကြောင်း၊  ၎င်းကျေးရွာမှ ထွက်ရှိသော ဆောင်းကြက်သွန်နီများသည် အရည်အသွေးကောင်ပြီး၊ သိုလှောင်ခံ၍ ပထမတန်းစား ကြက်သွန်နီဖြစ်ပြီး ဈေးကွက်တွင် ဈေးကောင်းလည်းရရှိကြောင်း၊ဆောင်းကြက်သွန်နီများကိုဧပြီလမှစက်တင်ဘာလအထိသိုလှောင်ကြပြီး၊ သိုလှောင်ကာလ(၆)လကြာသိုလှောင်နိုင်၍ ဒီဇင်ဘာလတွင်ဆောင်းကြက်သွန်နီများ ရာသီချိန်ကုန်ဆုံးမည် ဖြစ်ကြောင်း သိရှိရသည်။

            မြင်းခြံမြို့ရှိ ပွဲရုံများတွင်  ၂၀၂၅ခုနှစ်၊ အောက်တိုဘာလတတိယပတ်၌ ရောင်းချလျှက် ရှိသော ကြက်သွန်နီကြီးစတစ်ပိဿာလျှင်(၉၀၀-၁၀၀၀)ကျပ်၊ အလတ်စတစ်ပိဿာလျှင် (၇၀၀-၈၀၀)ကျပ်ခန့် ၊အသေးစတစ်ပိဿာလျှင် (၅၀၀-၆၀၀)ကျပ် ပေါက်ဈေးများဖြင့် အရောင်းအဝယ် ဖြစ်လျက်ရှိကြောင်း၊ ယခင်လနှင့် နှိုင်းယှဉ်ပါကယခုလတွင်ဆောင်းကြက်သွန်နီ ဈေးနှုန်းများ အနည်းငယ်ကျဆင်းခဲ့ကြောင်း၊ ရာသီချိန်ကုန်ဆုံးခါနီးပြီဖြစ်သောကြောင့် အရည်အသွေးကျဆင်းပြီး ဈေးနှုန်းများကျဆင်းခြင်းဖြစ် ကြောင်းသိရှိရသည်။စိုက်ပျိုးထွက်ရှိရာကျေးရွာများမှမြို့ပေါ်ရှိပွဲရုံများသို့နေ့စဉ်ကုန်ချိန်  (၅၀၀၀၀-၇၀၀၀၀)  ပိဿာခန့် တောင်သူများကိုယ်တိုင်လာရောက် ရောင်းချကြောင်း၊ ထိုပွဲရုံများမှ တဆင့် မန္တလေး၊ ရန်ကုန်၊ နေပြည်တော်၊ မော်လမြိုင်မြို့နှင့် တောင်ကြီးမြို့များသို့တင်ပို့ကြောင်း၊ ယခု အောက်တိုဘာလ၊ တတိယပတ်တွင်ကုန်ချိန်ပေါင်း (၁၈၇၃၉၁) ပိဿာခန့်၊ တန်ချိန် (၃၀၆) တန် တင်ပို့နိုင်ခဲ့ကြောင်း ကြက်သွန်အရောင်းအဝယ် လုပ်ကိုင်သူကုန်သည်တစ်ဦး၏ ပြောပြချက် အရသိရှိရသည်။

DOCA(မန္တလေး)

      ကျောက်ပန်းတောင်းမြို့နယ်တွင် ကျေးရွာပေါင်း(၃၉၉)ရွာရှိသည့်အနက်မှ ဆည်ပေါက်၊ ညောင်ကန်၊ အင်ချောင်း၊ ရေထွက်၊ ညောင်ဖြူပင်၊ လဲဂွ စသည့်ကျေးရွာများ၌ ကင်ပွန်းချဉ်ပင်ကို အိမ်ခြံစည်းရိုးများတွင် စိုက်ပျိုးကြပြီး ဒေသဈေးကွက်သို့ရောင်းချလျက်ရှိသလို မကွေးတိုင်းဒေသကြီး၊ တောင်တွင်းကြီးမြို့နယ်နှင့်ရေနံချောင်းမြို့နယ်များဘက်မှလည်း မှာယူပြီး မြို့မစည်ပင်သာယာဈေးတွင် ရောင်းချလျက်ရှိပါသည်။ အောက်တိုဘာလ ဒုတိယပတ်တွင် ကင်ပွန်းချဉ်တစ်ဆယ်ကျပ်သားလျှင် (၂၀၀၀)ကျပ်၊ တစ်ပိဿာလျှင်(၁၇၀၀၀)ကျပ်ဖြင့် အရောင်းအဝယ်ဖြစ်ခဲ့ပြီး ယခုအောက်တိုဘာလ တတိယပတ်တွင် ကင်ပွန်းချဉ်တစ်ဆယ်ကျပ်သားလျှင်(၁၅၀၀)ကျပ်၊ တစ်ပိဿာလျှင်(၁၃၀၀၀)ကျပ် ဖြင့် အရောင်းအဝယ်ဖြစ်လျက်ရှိကြောင်း သိရသည်။

DOCA(မန္တလေး)