ပြည်တွင်းကုန်သွယ်မှုသတင်း

              စစ်ကိုင်းတိုင်းဒေသကြီး၊ မုံရွာမြို့နယ်ရှိ ကျေးရွာများတွင် ရာသီပေါ်ခြံထွက်သီးနှံများ နှစ်ရှည်သီးနှံပင်များနှင့် စားသောက်ကုန်များ အများအပြား စိုက်ပျိုးရောင်းဝယ်လျက်ရှိသည်။ စိုက်ပျိုးရရှိသော သင်္ဘောသီးများနှင့် ဂွေးချိုသီးများကို မုံရွာမြို့ပေါ်ရှိ မန်ကျဉ်းပင်ဈေးနှင့် သာစည်ဈေးတို့တွင် လာရောက်ရောင်းချကြကြောင်း သိရှိပါသည်။ သင်္ဘောသီးအစိမ်းမှာ သွေးကျဲစေသော ဓာတ်တစ်မျိုးပါရှိပြီး အမှည့်မှာ မျက်စိ အမြင်အာရုံအား ကောင်းစေပါသည်။ သင်္ဘောသီသည် သင်္ဘောသီးဖျော်ရည်၊ သင်္ဘောသီးသုပ် နှင့် အိမ်ရှင်မများ အကြိုက်ဟင်းလျာ များတွင် အများအပြားထည့်သွင်းအသုံးပြုကြသော အဖိုးတန်သစ်သီး တစ်မျိုးဖြစ်ပါသည်။

          နိုဝင်ဘာလ ပထမပတ်တွင် မန်ကျဉ်းပင်ဈေးနှင့် သာစည်ဈေးတို့တွင် သင်္ဘောသီး အစိမ်းတစ်လုံးလျှင် (၇၀၀/၁၄၀၀) ကျပ်နှင့် အမှည့်တစ်လုံးလျှင် (၃၅၀၀/၄၂၀၀) ကျပ်၊  ဂွေးချိုသီး (၁၈)လုံးပါ တစ်ထုပ်လျှင် (၁၀၀၀)ကျပ်ဖြင့် ရောင်းလျက်ရှိကြောင်း သိရှိရပါသည်။

DOCA (စစ်ကိုင်း)  

         စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင် စပါးနှင့် ဆီထွက်သီးနှံများအပြင် ဘိလပ်စေ့သီးနှံကိုလည်း စိုက်ပျိုးကြောင်း၊ ဘိလပ်စေ့ကို ယာကွက်လွတ်များ၌လည်းကောင်း၊ ယာခင်းဘေးပတ်လည်၌လည်းကောင်း၊ ကြဲပက်စနစ်နှင့် တန်းစိုက်စနစ်တို့ဖြင့် စိုက်ပျိုးကြကြောင်း၊ ကန့်ဘလူမြို့နယ် ကံကြီးကုန်းကျေးရွာ၊ တောက္ကရှပ်ကျေးရွာနှင့် အခြားသောကျေးရွာများမှ ဝင်ရောက်လျက်ရှိပြီး ဘိလပ်စေ့သည် စိုက်ပျိုးရလွယ်ကူပြီး ဈေးကောင်းရသဖြင့် စိုက်ပျိုးသူများ အဆင်ပြေလျက်ရှိကြောင်း သိရသည်။

         ၂၀၂၅ ခုနှစ်၊ နိုဝင်ဘာလ ပထမပတ်အတွင်း ဘိလပ်စေ့တစ်တင်းလျှင် (၇၀၀၀၀)ကျပ်၊ ဘိလပ်စေ့ညံ့လျှင် (၆၉၅၀၀)ကျပ်ဈေးနှုန်းဖြင့် အရောင်းအဝယ်ဖြစ်လျက်ရှိကြောင်း၊ ယခင်အောက် တိုဘာလ၏  ဈေးနှုန်းများနှင့်နှိုင်းယှဉ်ပါက ယခုလပထမပတ်အတွင်း ဘိလပ်စေ့တစ်တင်းလျှင် (၅၀၀)ကျပ်ဈေးနှုန်းပြန်လည်မြင့်တက်လာကြောင်း  သီးနှံရောင်းဝယ်ရေး လုပ်ငန်းရှင်များထံမှ သိရှိရပါသည်။

DOCA(စစ်ကိုင်း)

  တောင်ငူမြို့နယ်အတွင်းရှိ ကြက်သွန်ပွဲရုံများတွင် ကြက်သွန်နီကို အသေး၊ အလတ်၊ အကြီး သုံးမျိုး ရောင်းချလေ့ရှိရာ ယခုအပါတ်တွင် ကြက်သွန်နီ အသေး ၁၀ ပိဿာဝင် ၁ အိတ်လျှင် ၅၀၀၀ ကျပ်၊ အလတ် ၁၀ ပိဿာဝင် ၁ အိတ်လျှင် ၇၀၀၀ ကျပ်၊ အကြီး ၁၀ ပိဿာ ဝင် ၁ အိတ်လျှင် ၁၁၀၀၀ ကျပ်သာရှိသော်လည်း ကြက်သွန်မြိတ်များမှာ ဈေးကောင်းလျက်ရှိပါသည်။ ကြက်သွန်မြိတ်ကို ဟင်းချက်ရာနှင့်စားသောက်ဆိုင်များတွင် ဟင်းချိုချက်ရာတွင် အသုံးများလေ့ရှိရာ ကြက်သွန်မြိတ် ၁၀ ကျပ်သားလျှင် ၁၀၀၀ ကျပ် ၊ ၂၅ ကျပ်သားလျှင် ၂၀၀၀ ကျပ်၊ ၁ ပိဿာလျှင် ၇၅၀၀ ကျပ်ထိ ဈေးပေးရပြီး ကြက်သွန်မြိတ်များ လှိုင်လှိုင်ပေါ်ပါက ဈေးနှုန်းကျဆင်းနိုင်ကြောင်း ရောင်းချသည့် ဈေးသည်များထံမှ သတင်းရရှိပါသည်။

DOCA(ပဲခူး)

     ထားဝယ်ဒေသထွက် ကြက်ဟင်းခါသီးကို ထားဝယ်မြို့အနီးတစ်ဝိုက်ရှိ ကျေးရွာများမှ ထားဝယ်မြို့ပေါ်ဈေးများသို့ လာရောက်ရောင်းချကြပါသည်။ ဒေသခံတောင်သူများသည် ကြက်ဟင်းခါးသီးပင်ကို အပိုဝင်ငွေရရှိရန်အတွက် မိမိတို့၏ အိမ်ခြံဝင်းအတွင်း တစ်နိုင်တစ်ပိုင်စိုက်ပျိူးကြသည်။ ကြက်ဟင်းခါသီးကို ပုဇွန်ခြောက်နှင့်အတူ ကြော်စား၍ရသလို ငပိရည်တို့စရာနှင့်လည်း ပြုတ်တို့ စားပါက ထမင်းမြိန်စေသည်။ ကြက်ဟင်းခါးသီးမှာပါဝင်သော အခါးဓာတ်နှင့် အဖန်ဓာတ်တွေဟာ သွေးထဲမှာ ရှိသော Glucose သကြားဓာတ်ကိုကြစေနိုင်သည့် သတ္တိရှိပါသည်။ ကြက်ဟင်းခါးသီး ဈေးနှုန်းမှာ ကြက်ဟင်းခါးသီး အလုံးကြီးတစ်လုံးလျှင်(၂၀၀၀)ကျပ် နှင့်အလုံးသေးတစ်လုံးလျှင် (၁၅၀၀) ဈေးနှုန်းဖြင့် အရောင်းအဝယ် ဖြစ်လျက်ရှိကြောင်း သိရသည်။

DOCA(တနင်္သာရီ)

       ထားဝယ်မြို့ဈေးကွက်တွင် ကုန်စိမ်းသီးနှံတစ်မျိုးဖြစ်သော ပန်းဂေါ်ဖီမှာ အဝင်ပုံမှန်၊ အရောင်း အဝယ်ပုံမှန်ဖြင့် ဈေးကောင်းရသော သီးနှံတစ်မျိုးဖြစ်သည်၊ ပန်းဂေါ်ဖီမှာ ရှမ်းပြည်နယ်တောင်ပိုင်း အောင်ပန်းမြို့မှ အများဆုံးဝင်ရောက်ပြီး ယခုအခါ ပုပ္ပါးနယ်မှလည်း ဝင်ရောက်ကြောင်း သိရသည်။ ဝင်ရောက်လာသော ကုန်စိမ်းအများစုမှာ ထားဝယ်မြို့ရှိ ကမ်းနားစျေးများ၊စည်ပင်သာယာစျေးကြီး  များတွင် ရောင်းချကြပါသည်။ ပန်းဂေါ်ဖီ ဈေးနှုန်း အနေဖြင့် အပွင့်အကြီး/အသေးပေါ်မှုတည်၍ တစ်ပွင့်လျှင် (၁၅၀၀-၂၀၀၀-၃၀၀၀) ကျပ် ဈေးများဖြင့် လက်လီပြည်လည်ရောင်းချကြကြောင်း ဈေးကွက်မှ သိရသည်။ ပန်းဂေါ်ဖီမှာ မိသားစုနေ့စဉ် စားသုံးသော ဟင်းလျာများတွင် စားသုံးမှုအပြင် စားသောက်ဆိုင် ဟိုတယ်များကလည်း ဝယ်လိုအားများသည့်အတွက် ဈေးကောင်းရသော ကုန်စိမ်း သီးနှံတစ်မျိုး ဖြစ်သည်။

DOCA(တနင်္သာရီ)