ပြည်တွင်းကုန်သွယ်မှုသတင်း

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင် ဦးဆောင်သောအဖွဲ့သည် ပြည်တွင်းကုန်သွယ်ရေးဖွံ့ဖြိုးပြီးပိုလျှံသည်များကို ပြည်ပတင်ပို့နိုင်ရေး အထောက်အကူပြုရန်၊ ပုဂ္ဂလိကကဏ္ဍဖွံ့ဖြိုး တိုးတက်ရေး ညှိနှိုင်းပူးပေါင်းဆောင်ရွက်ရန်၊ ဈေးနှုန်း၊ဈေးကွက် သုတေသနနှင့် ကုန်စည်စီးဆင်းမှု လေ့လာသုံးသပ်ပြီး၊ သတင်းများ ထုတ်ပြန်၊ ဖြန့်ဝေခြင်းများ ဆောင်ရွက်ရန်အတွက်  ရည်ရွယ်၍ မတ်လ (၂၂)ရက်၊ နံနက်(၉:၀၀)နာရီအချိန်တွင် ပခုက္ကူမြို့၊ စက်မှုဇုန်ရှိ ဆီးခွဲစက်လုပ်ငန်းများသို့ ကွင်းဆင်းလေ့လာခဲ့ပါသည်။

          ပထမဦးစွာ ခရိုင်ဦးစီးမှူးမှ "အောင်သမာဓိ" ဆီးခွဲစက် လုပ်ငန်းရှင် ဦးအောင်ဇော်သင်းနှင့် တွေ့ဆုံမေးမြန်းရာတွင် လုပ်ငန်းရှင်မှ စက်မှုဇုန်တွင် ဆီးခွဲစက်အလုံးရေ(၁၅)လုံးခန့် လည်ပတ် ကြောင်း၊ ပခုက္ကူမြို့ရှိ ဆီးခွဲစက်များမှာ ဆီးသီးခြောက်ကိုသာ ဝယ်ယူကြောင်း၊ ဆီးသီးအစိုမှာ ပျက်ဆီးမှုများနိုင်ပြီး သိုလှောင်ရန် နေရာအခက်အခဲရှိသောကြောင့် မဝယ်ယူကြောင်း၊ ဆီးသီး အစို(၅)တင်း အခြောက်လှန်းလျှင် (၄)တင်းခန့် ကျန်ရှိနိုင်သည်ဟုခန့်မှန်းရကြောင်း၊  ပခုက္ကူမြို့ပေါ်ရှိပွဲရုံများနှင့် အနီးပတ်ဝန်းကျင် ကျေးရွာများရှိ တောင်သူထံမှဝယ်ယူကြောင်း၊ ယခင်နှစ်က ဆီးသီးအစို(၁)တင်း(၂၅၀ဝိ/-)၊ အခြောက်(၁)တင်း(၄၀၀ဝိ/-)ဖြင့် ဝယ်ယူပြီး ယခုနှစ်တွင် ဆီးသီး အစို(၁)တင်း(၃၆၀ဝိ/-၃၇၀ဝိ/-)၊ အခြောက်(၁)တင်း(၅၅၀ဝိ/-)ဖြင့်ဝယ်ယူရကြောင်း၊  ယခုအချိန်ထိ ကုန်ကြမ်းဆီးသီးအခြောက်တင်း(၂၀၀၀၀)ခန့် ဝယ်ယူထားပြီး ရာသီချိန်မကုန်သေးသောကြောင့် ဆက်လက်ဝယ်ယူရန်ရှိသေးကြောင်း၊ ယခုနှစ်တွင် ဆီးသီးအခြောက်တင်း(၃၀၀၀၀) ခန့်သာဝယ်ယူကြိတ်ခွဲနိုင်မည်ဟုခန့်မှန်းရကြောင်း၊ ယခင်နှစ်ဆိုလျှင် မီးမှန်သည့်အတွက် တင်း(၅၀၀၀၀)ခန့် ဝယ်ယူကြိတ်ခွဲကြောင်း၊ မိမိတွင်ဆီးခွဲစက်(၆)ခုံ၊ သန့်စင်စက်(၂)ခုံဖြင့် လုပ်ငန်းလည်ပတ်ကြောင်း၊ ဆီးသီးခြောက်(၁)တင်းကြိတ်ခွဲလျှင် ဆီးဆံ(၂၅)ကျပ်သားခန့်ရရှိပြီး ယခုနှစ်သည် လျှပ်စစ်မီးအားနည်းသည့်အတွက် ကြိတ်ခွဲခုံ(၄)ခုံဖြင့်သာလည်ပတ်ကြောင်း၊ ယခင်နှစ်ထက် ထက်ဝက်ခန့် ထုတ်လုပ်မှုလျော့နည်းကြောင်း၊ ယခုအချိန်ထိ ကုန်ချောဆီးဆံပိဿာ(၂၀၀၀)ခန့် ကြိတ်ခွဲပြီးကြောင်း၊ ကြိတ်ခွဲရရှိသည့် ဆီးဆံကို  တစ်ပိဿာ (၂၄၀၀၀)ကျပ်ဖြင့် မန္တလေးမြို့ တရုတ်ကုန်သည် များသို့ရောင်းချကြောင်း၊  ထိုမှတစ်ဆင့် တရုတ်နိုင်ငံသို့ တင်ပို့သည်ဟုသိရှိရပါကြောင်း၊ ယခင်နှစ်က ဆီးဆံတစ်ပိဿာကို (၂၃၀၀၀)ကျပ်ဖြင့်ရောင်းရပြီး ဆီးဆံဈေးနှုန်းမှာ ပြောင်းလဲမှု နည်းပါကြောင်း၊ ဆီးခွဲခြမ်းကို ပဲကြော်ဖိုများအတွက် လောင်စာအဖြစ် အသုံးပြုရန်လာရောက် ဝယ်ယူကြကြောင်း၊ ဆီးဖတ်နှင့် ဆီးမှုန့်များကို တိရိစ္တာန်စာအဖြစ် ရောင်းရပြီး တစ်ပိဿာကို (၅၀/၁၀၀) ကျပ်ဖြင့် အရည်အသွေးပေါ်မူတည်၍  ရောင်းချရကြောင်း သိရှိရပါသည်။

          လုပ်သားဦးရေမှာ အမျိုးသား(၈)ဦးရှိပြီး ဆီးခွဲခြမ်းများ ပြာတီးသန့်စင်နေသည့် အမျိုးသမီး များအများအပြားတွေ့ရကြောင်း၊ လုပ်အားခမှာ အမျိုးသားတစ်ဦး(၈၀၀၀)ကျပ်ပေးရပြီး၊ အမျိုးသမီးတစ်ဦး(၅၀၀၀)ကျပ်ပေးရကြောင်း၊ အလုပ်ချိန်မှာ နံနက်(၇:၀၀)နာရီမှ ညနေ(၅:၀၀)နာရီထိ လုပ်ငန်းလည်ပတ်ကြောင်း၊ ဆီးသီးရာသီချိန်မှာ (၆)လသာ ဆောင်ရွက်ရသောကြောင့် ကျန်သည့်အချိန်ကို ပဲခွဲစက်များလည်ပတ်၍ အလုပ်အကိုင်ရရှိစေရန် ဆောင်ရွက်ထားပါကြောင်း၊ လုပ်ငန်းရှင်၏အခက်အခဲမှာ လျှပ်စစ်မီးအားနည်းမှုကြောင့် ကြိတ်ခွဲထုတ်လုပ်မှုလျော့ကျပြီးအဝယ်ရှိသလောက် မတင်ပို့နိုင်ကြောင်း၊ စက်သုံးဆီဈေးနှုန်းမြင့်မားမှုကြောင့် စက်သုံးဆီဖြင့် မလည်ပတ်နိုင်ဘဲ လျှပ်စစ်မီးကိုသာ နေ့စဉ်မျှော်၍ လုပ်ငန်းဆောင်ရွက်ရပါကြောင်း လုပ်ငန်းရှင်၏ ပြောကြားချက်အရ လေ့လာသိရှိရပါသည်။

DOCA(မကွေး)

               စစ်ကိုင်းတိုင်းဒေသကြီး၊ ယင်းမာပင်ခရိုင်၊ ဆားလင်းကြီးမြို့နယ်အတွင်းရှိ ကျေးရွာများ တွင် သင်ဖြူးဖျာများ ရက်လုပ်ခြင်းလုပ်ငန်းကို မိသားစု တနိုင်တစ်ပိုင်လုပ်ငန်းအဖြစ် လုပ်ကိုင်လျက်ရှိသည်။

             ကျေးရွာများမှထွက်ရှိသည့် သင်ဖြူးဖျာစျေးကွက်တွင် ကြမ်းချော ၅ပေခွဲ× ၆ပေတစ်ချပ် လျင် ကျပ်၄၂၀၀၀မှ ကျပ်၄၃၀၀၀၊ အချော၅ပေခွဲ× ၆ပေတစ်ချပ်လျင် ကျပ်၄၃၀၀၀ မှ ကျပ်၄၅၀၀၀၊ ကြမ်းချော ၅ပေ×၆ပေ တစ်ချပ်လျင် ကျပ်၂၉၀၀၀မှကျပ်၃၁၀၀၀၊ အချော ၅ပေ×၆ပေ တစ်ချပ်လျင် ကျပ်၃၂၀၀၀မှ ကျပ်၃၅၀၀၀၊ ကြမ်းချော ၄ပေခွဲ ×၆ပေတစ်ချပ်လျင် ကျပ်၁၉၀၀၀မှ ကျပ်၂၁၀၀၀၊ အချော ၄ပေခွဲ ×၆ပေတစ်ချပ်လျင် ကျပ်၂၂၀၀၀မှကျပ်၂၅၀၀၀၊ ကြမ်းချော ၄ပေ×၆ပေတစ်ချပ်လျင် ကျပ်၁၈၀၀၀မှကျပ်၂၀၀၀၀၊ အချော ၄ပေ×၆ပေတစ်ချပ် လျင် ကျပ်၂၀၀၀၀မှ ကျပ်၂၃၀၀၀၊ ကြမ်းချော ၃ပေခွဲ×၆ပေတစ်ချပ်လျင် ကျပ်၁၂၀၀၀ မှ ကျပ်၁၄၀၀၀၊ အချော ၃ပေခွဲ×၆ပေတစ်ချပ်လျင် ကျပ်၁၄၀၀၀ မှ ကျပ်၁၆၀၀၀၊ တရားထိုင် သင်ဖြူး ဆိုဒ်ကြီးတစ်ချပ်လျင် ကျပ်၆၀၀၀၊ ဆိုဒ်သေး ကျပ်၄၅၀၀နှုန်းဖြစ်ပြီး ရက်လုပ်ထား သော သင်ဖြူးဖျာအကြီးအသေးပေါ်မူတည်ပြီး ရောင်းချရသောကြောင့် စျေးနှုန်းကွာဟမှုများ လည်းရှိသည်။ ၎င်းစျေးနှုန်းများသည် အနားကွပ်ပါပြီးစျေးနှုန်းများဖြစ်သည်။

             အိမ်တွင်းမှုလုပ်ငန်းဖြစ်သည့် မြန်မာသင်ဖြူးဖျာရက်လုပ်ခြင်းကို စျေးကွက်အနေဖြင့် မိမိမြို့နယ်မှ ရန်ကုန်၊ မန္တလေး၊ နေပြည်တော်၊ ကလေးမြို့၊ မုံရွာမြို့၊ မြစ်ကြီးနားမြို့နယ်များအထိ တင်ပို့၍ လက်လီ၊ လက်ကားပေးပို့ရောင်းချလျက်ရှိကြောင်း သိရှိရသည်။

DOCA(စစ်ကိုင်း)

                လွိုင်ကော်မြို့၊ မတ်လ တတိယပတ်တွင် ဈေးကွက်အတွင်း ရောင်းချလျက်ရှိသော ခရမ်းချဉ်သီးများမှာ ပြည်နယ်အတွင်း လင်ဖုံလေးဒေသမှ ထွက်ရှိသော ခရမ်းချဉ်သီးများဖြစ်ပြီး၊ ယခင်က မိထ္တီလာ၊ အင်းလေး၊ ပင်လောင်းဘက်မှ ဝင်လာသော ခရမ်းချဉ်သီးများကို မှာယူရောင်းချကြသော်လည်း ယခုအခါတွင် သယ်ယူစရိတ်များ များသောကြောင့် ဈေးကွက်အတွင်း ဒေသမှထွက်သော ခရမ်းချဉ်သီးများကို အလုံး အကြီးအသေးပေါ် မူတည်၍ တစ်ပိဿာလျှင် ကျပ်(၅၀၀၊ ၆၀၀)ဈေးနှုန်းဖြင့် ရောင်းချကြပြီး ဈေးနှုန်းတည်ငြိမ်လျက် ရှိကြောင်း သီရိမင်္ဂလာဈေးအတွင်း ခရမ်းချဉ်သီး ရောင်းချသူများထံမှ သိရှိရပါသည်။

စားသုံးသူရေးရာဦးစီးဌာန

ကယားပြည်နယ်

            ရန်ကုန်တိုင်း‌ဒေသကြီး၊စားသုံးသူရေးရာဦးစီးဌာန၊ မြောက်ပိုင်းခရိုင်အတွင်း လှိုင်သာယာမြို့နယ်ရှိ စက်သုံးဆီ ဆိုင်များမှ နေ့စဉ်စက်သုံးဆီဈေးနှုန်းများကို ကောက်ယူလျက်ရှိရာ နံနက်(၁၀:၃၀) အချိန်တွင် ပုံမှန်ဈေးဖြင့် ရောင်းချလျက်ရှိသော REGENCY(လှိုင်သာယာ) စက်သုံးဆီဆိုင်သို့ ကွင်းဆင်းလေ့လာခြင်းလုပ်ငန်းများကို ဆောင်ရွက်ခဲ့ပါတယ်။

  ထိုသို့ဆောင်ရွက်ရာတွင် လှိုင်သာယာမြို့နယ်သို့ ဈေးနှုန်းစာရင်း ကောက်ယူနေသော ဝန်ထမ်းသည်(၂၄.၃.၂၀၂၂) နံနက်(၁၀:၃၀)အချိန်တွင် ပုံမှန်ဈေးနှုန်းဖြင့် ရောင်းချလျက်ရှိသော REGENCY(လှိုင်သာယာ) စက်သုံးဆီဆိုင်သို့ကွင်းဆင်းလေ့လာခဲ့ရာတွင် 92 ကို (၁)လီတာ (၂၀၄၅) ကျပ်နှုန်းဖြင့်လည်းကောင်း၊ ဒီဇယ်ကို (၁)လီတာ (၂၁၆၀) ကျပ်နှုန်းဖြင့်လည်းကောင်း၊ ပရီမီယမ်ကို (၁)လီတာ (၂၁၇၅) ကျပ်နှုန်းဖြင့်လည်းကောင်း အသီးသီးရောင်းချလျက်ရှိပါကြောင်း၊ ဝယ်ယူသည့် လီတာများမှန်ကန်မှုနှင့် ဆိုင်ဝန်ထမ်းများမှလည်း ဝန်ဆောင်မှုအပြည့်အဝပေးသောကြောင့် ဝယ်ယူသူများမှလည်း စိတ်ကျေနပ်မှုရှိပါသောကြောင့် ဆိုင်မှာပုံမှန်အတိုင်းရောင်းရပါကြောင်း၊ မိမိတို့ ဌာနကိုလည်း လီတာနှင့်ဈေးနှုန်းစာရင်းများကို နေ့စဉ်ချိတ်ဆက်ပေးပို့လျက်ရှိပါကြောင်း မြေပြင်သို့ ကွင်းဆင်းလေ့လာချက်များအရ သိရှိခဲ့ရပါတယ်။

DOCA(ရန်ကုန်)

   ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ ရန်ကုန်အ‌ရှေ့ပိုင်းခရိုင်ဦးစီးမှူးရုံးမှ ဝန်ထမ်းများသည် ပြည်ပမှ US ဒေါ်လာဖြင့် တင်သွင်းဖြန့်ဖြူးရောင်းချသည့် ပြည်တွင်းစက်သုံးဆီအရောင်းဆိုင်များတွင် သတ်မှတ်ဈေးနှုန်းဖြင့် ရောင်းချမှုရှိစေရေး၊ အချိန်အတွယ်နှင့် အရည်အသွေးပြည့်ဝမှန်ကန်မှုရှိစေရေးတို့ကို ဈေးကွက်စောင့်ကြည့်ကြပ်မတ်ဆောင်ရွက်ကြရာတွင် ၂၀၂၂ ခုနှစ်၊ ဇန်နဝါရီလအထိ စက်သုံးဆီဆိုင် (၃၉) ဆိုင်ရှိခဲ့ရာမှ ဖေဖော်ဝါရီလတွင် ထပ်တိုးဆီဆိုင် (၂) ဆိုင်ရှိခဲ့ရာ ၂၀.၃.၂၀၂၂ ထိ စုစုပေါင်း (၄၁) ဆိုင်ရှိကြောင်း သိရပါသည်။

       အဆိုပါစက်သုံးဆီဆိုင်၏ ဓါတ်ဆီ၊ ဒီဇယ်ဆီဈေးနှုန်းများ နေ့စဉ်ပုံမှန်ဈေးအထူးရောင်းဈေးများဖြင့် ပြောင်းလဲမှုများရှိခဲ့ရာမှ ၈.၃.၂၀၂၂ မှ ၁၅.၃.၂၀၂၂ ထိ ရိုးရိုးဒီဇယ်နှင့် ပရီမီယံဒီဇယ်တို့မှာ ပုံမှန်ဈေး နှုန်းဖြင့်သာ ရက်သတ္တပတ်ခန့်သာရောင်းချခဲ့ပြီး 16.3.2022 ရက်မှစ၍ အထူးဈေးနှုန်းများဖြင့် ပြန်လည်ရောင်းချခဲ့ရာတွင် 21.3.2022 ရက်နေ့ အထူးဈေးနှုန်း ရိုးရိုးဒီဇယ် တစ်လီတာ (1790) ကျပ်၊ ပရီမီယံဒီဇယ်တစ်လီတာ(1844)ကျပ်ဖြင့် ရောင်းချလျက်ရှိကြောင်း၊ ပုံမှန်ဈေးနှုန်း ရိုးရိုးဒီဇယ်တစ်လီတာ (2040) ကျပ်၊ ပရီမီယံဒီဇယ်တစ်လီတာ(2055)ကျပ်နှင့် ဓါတ်ဆီ 95 တစ်လီတာ (2045) ကျပ်၊ ဓါတ်ဆီ 92 တစ်လီတာ (1965) ကျပ်ဖြင့်ရောင်းချလျက်ရှိ‌ကြောင်း၊ ၂၀၂၂ ဖေဖော်ဝါရီလ၏ စတုတ္ထပတ်နှင့် မတ်လ၏ စတုတ္ထပတ်ဈေးနှုန်းများ နှိုင်းယှဉ်ကြည့်ရာတွင် ရိုးရိုးဒီဇယ်တစ်လီတာ (320) ကျပ်၊ ပရီမီယံဒီဇယ်တစ်လီတာ(325)ကျပ်နှင့် ဓါတ်ဆီ 95 တစ်လီတာ (305) ကျပ်၊ ဓါတ်ဆီ 92 တစ်လီတာ (225) ကျပ်ထိ ဈေးနှုန်းကွာခြားမှုရှိကြောင်း သိရှိရပါသည်။

DOCA(ရန်ကုန်)