ပြည်တွင်းကုန်သွယ်မှုသတင်း

         စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် စားသုံးသူအကာအကွယ်ပေးရေးလုပ်ငန်းများအပြင် ပြည်တွင်းကုန်သွယ်ရေးဖွံ့ဖြိုးမှုလုပ်ငန်းများကို ဆောင်ရွက်လျှက်ရှိရာ စစ်ကိုင်းတိုင်းဒေသကြီး၊ ရွှေဘိုခရိုင်၊ ဝက်လက်မြို့နယ်၊ စိုင်နိုင်ကြီးကျေးရွာရှိ ပေါက်ပေါက်ပွင့်လုပ်ငန်းလုပ်ကိုင်သည့်လုပ်ငန်းရှင်နှင့် တွေ့ဆုံဆွေးနွေးခဲ့ပါသည်။ 

ကုန်ကြမ်းရရှိမှုအခြေအနေ

          စိုင်နိုင်ကြီးကျေးရွာတွင် မိရိုးဖလာလုပ်ငန်းဖြစ်သည့် လယ်ယာစိုက်ပျိုးခြင်းလုပ်ငန်းကို အဓိကထားလုပ်ကိုင်ကြပြီး ပေါက်ပေါက်ပွင့်လုပ်ငန်းကိုမှု မိသားစု တစ်နိုင်တစ်ပိုင်လုပ်ငန်းအဖြစ် လုပ်ကိုင်ကြကြောင်းနှင့် ဝက်လက်မြို့နယ်အနေဖြင့် ပေါက်ပေါက်ပွင့်လုပ်ငန်းကို  စိုင်နိုင်ကြီး ကျေးရွာတစ်ရွာတည်းတွင်သာ လုပ်ကိုင်ကြကြောင်းသိရသည်။ ပေါက်ပေါက်ပွင့်ပြုလုပ်ရာတွင် ကုန်ကြမ်းအဖြစ် ကောက်ညှင်းစပါးကိုအသုံးပြုရပြီး ၎င်းစပါးသည် နတ်တော်လ၊ ပြာသိုလနှင့် တပို့ တွဲလများတွင် လှိုင်လှိုင်ပေါ်ပြီး ဝက်လက်မြိုနယ် ဟံလင်းကျေးရွာ၊ ငပိအိုးကျေးရွာ စသည့်ရွာ များတွင် သွားရောက်၍ ဝယ်ယူထားရသည့်အပြင် ရှားပါးသည့်အချိန်တွင် ကသာခရိုင်၊ ကောလင်းမြို့နယ်တွင်လည်း ဝယ်ယူရရှိပါသည်။ ကောက်ညှင်းစပါး၏ အရည်အသွေးပေါ်မူတည်၍ ကောက်ညှင်းစပါး(၁၆)ပြည်(၁)တင်းလျှင် (၈၀၀ဝိ/-)မှ (၁၂၀၀ဝိ/-)ထိပေးဝယ်ရကြောင်း၊ ထိုင်းကောက်ညှင်းနှင့် ကောလိပ်ဂျင် (ခေါ်) အထွက်တိုး ကောက်ညှင်းဟူ၍ (၂)မျိုးရှိရာ ထိုင်း ကောက်ညှင်းသည် အပွင့်လှပြီး အထွက်နှုန်းလှ၍ ထိုင်းကောက်ညှင်းကို ပိုပြီးအသုံးများကြောင်း သိရပါသည်။

ပေါက်ပေါက်ပွင့်ပြုလုပ်ပုံအဆင့်ဆင့်

          ပေါက်ပေါက်ပွင့်ရရှိရန်အတွက် ဖွဲမီးဖိုကိုအသုံးပြု၍ သံဒယ်အိုးဖြင့်လှော်ရကြောင်း၊  သံဒယ် အိုးထဲသို့ သဲထည့်၍သဲပူလာသောအခါ ကောက်ညှင်းစပါးထည့်ကာ အသားယောင်းမနှင့် လှော်ပြီး ကော်စရာသံဂေါ်နှင့်ဆယ်ရပါသည်။ ဖွဲမီးများလျှင် မီးဖိုကို အုတ်ခဲဆင့်ပေးရပြီး ဖွဲမီးနည်းလျှင် မီးဖိုကို အောက်သို့နှိမ့်၍ပေးရသည်။ လှော်သည့်မီးဖို၏ ဖိုဦးထိပ်တွင် ရေနွေးအိုးတည်၊ ထမင်းချက်နိုင်ရန် အတွက်  လေပေါက်တခုထား၍ရသဖြင့် အချိန်ကုန်သက်သာပြီး ထင်းကုန်သက်သာကြောင်း၊ ဖွဲမီး ဖို၏အပေါ်ဘက်အမြင့်တွင် ဖွဲတိုက်ထားရှိပြီး အသုံးပြုကြောင်းသိရသည်။ ပေါက်ပေါက်ပွင့် လှော်ရာ တွင် မီးရှိန်ပူသဖြင့် မနက်စောစောတွင်ထ၍ လှော်ရပြီး စပါး(၁)တင်းလျှင် (၁)နာရီကြာအောင် လှော် ရကြောင်း သိရှိရပါသည်။ ပေါက်ပေါက်လှော်ရာတွင် မီးအချိန်အဆသည် အရေးကြီးလှကြောင်း၊ မီးများလျှင် အပွင့်မလှဘဲ ပေါက်ပေါက်သည်လုံးသွား၍  မီးပုံမှန်ချိန်တတ်မှ ပေါက်ပေါက်သည် အပွင့် ကားပြီး မန္တလေးဈေးကွက်တွင်အဝင်လှကြောင်း၊ ပေါက်ပေါက်၏ သဘောသဘာ၀သည် ယနေ့တွင် မိုးရွာပြီး မနက်ဖြန်တွင်ကောက်ညှင်းစပါးကိုလှော်ပါက အပွင့်သည်ပိုကား၍ ဖွေးပြီးလှကြောင်းနှင့် ပေါက်ပေါက်လှော်ပြီး မိုးရွာပါက အပွင့်သည် ငုံသွားပြီး အထွက်နှုန်းလည်းလျော့သွားကြောင်း သိရပါသည်။ စပါးကောင်းလျှင် စပါး(၁)တင်းကို ပေါက်ပေါက်ပွင့်(၃) တင်းမှ (၄)တင်းခွဲထိရကြောင်း သိရပါသည်။

          မီးဖိုတဖိုတွင် အမျိုးသမီး(၁)ယောက်ကလှော်ရပြီး တစ်ယောက်က လှော်ပြီးသား ပေါက်ပေါက်ပွင့်နှင့်အခွံစသည့်တို့ကို ပြာတီး၍ သန့်စင်ရကြောင်း၊  သန့်စင်ပြီးသားစပါးခွံများကို လောင်စာ အဖြစ်ပြန်လည်အသုံးပြု၍ရပြီး ဖွဲပြာများကိုလည်း လယ်ထဲတွင်မြေဩဇာအဖြစ်ပြန်၍အသုံးပြု ကြောင်း သိရပါသည်။ လှော်၍မပွင့်သည့် ပေါက်ပေါက်ဖြုန်းဆန်ကို ဘဲစာ၊ ဝက်စာအဖြစ် ရောင်းချ၍ အလေအလွင့်မရှိကြောင်း သိရှိရပါသည်။ လှော်ပြီးသားပေါက်ပေါက်ပွင့်များကို အအေးခံပြီး ဇကာနှင့်အပြောင်အစင်ချ၍ ထန်းခေါက်တောင်းကြီးများနှင့် ထည့်ထားရပါသည်။ အပွင့်သန့်စင်ပြီး သား ပေါက်ပေါက်များကို (၁၃)တင်းဝင် ပီနံအိတ်ကြီးနှင့် လုံအောင်ပိတ်ပြီး ချုပ်၍မှာယူသည့်ဒေသများသို့ ပို့ရပါသည်။

ရောင်းချသည့်ဈေးနှုန်းနှင့်ဈေးကွက်အခြေအနေ

        ယခုပေါက်ပေါက်ပွင့်ဈေးမှာ (၁)တင်းလက်ကားရောင်းဈေး ၃၈၀ဝိ/-နှင့် လက်လီ ရောင်းဈေးမှာ ၄၀၀ဝိ/-ရှိကြောင်း၊ ကောက်ညှင်းစပါးကောင်းလျှင်  ပေါက်ပေါက်ပွင့် အထွက်များသဖြင့် အကျိုးအမြတ်များပြီး စပါးညံ့လျှင် အကျိုးအမြတ်နည်းကြောင်း သိရှိရပါသည်။ ပေါက်ပေါက်ကို အပွင့် သာမကဘဲ အမှုန့်ကြိတ်၍လည်းရောင်းချကြောင်း၊  ပေါက်ပေါက်ပွင့် (၁)တင်းအမှုန့်ကြိတ်ရာတွင် အပွင့်လှသည့်ပေါ်တွင် မူတည်၍ (၁)ပိဿာနှင့် (၂)ပိဿာကျော် ထိရကြောင်း၊ အမှုန့်(၁)ပိဿာ ရောင်းဈေးမှာ ၄၀၀ဝိ/-ရကြောင်း၊ ပေါက်ပေါက်ကို (၂)ယောက်တွဲ လှော်ရပြီး စပါး(၁)တင်းကို လှော်ခ ၁၀၀ဝိ/-နှင့် အပွင့်သန့်စင်ခ ၁၀၀ဝိ/-ပေးရကြောင်း သိရှိရပါသည်။ ပေါက်ပေါက်ပွင့်များကို စစ်ကိုင်း၊ မန္တလေး၊ မုံရွာ၊ ရွှေဘိုမြို့များသို့ပို့ရပြီး၊ ထန်းလျက်ထွက်သောဒေသများသို့လည်း ပို့ရ  ပါသည်။ တပို့တွဲလ၊ တပေါင်းလများတွင် ပေါက်ပေါက်ပွင့်များကို ကျော်ဇေယျာ၊ ကျားမင်းကြီး၊ တံတားဦးရွာများသို့ အများဆုံးပို့ရပြီး မြန်မာနိုင်ငံအနှံ့အပြားများကိုလည်း ပို့ရပါသည်။ ကြိတ်ပြီး သားပေါက်ပေါက်မှုန့်များကို မြို့ထောင့်စေတီပွဲ၊ ကျောက်မြောင်းပွဲ၊ တောင်ပြုန်းပွဲ၊ ရတနာ့ဂူနတ်ပွဲ၊ စဉ်ကူးပွဲ၊ ကောင်းမှုတော်ပွဲစသည့် ပွဲတော်များရှိရာသို့ ပို့ရပါသည်။

ပေါက်ပေါက်ပွင့်အသုံးပြုပုံ

ပေါက်ပေါက်ပွင့်များဖြင့် မလိုင်ကရေကရာ၊ ဘောလုံး(ခေါ်)သကြားဆုပ်စသည့် ကရေကရာ မုန့်အမျိုးမျိုးပြုလုပ်၍ ပွဲတော်များတွင် ဆိုင်တန်းရှည်ကြီးများ နှင့်အပြိုင်အဆိုင် ရောင်းချနေသည်ကို တွေ့မြင်နိုင်ပါသည်။ မြန်မာများ၏ ချစ်စရာဓလေ့ဖြစ်သည့် ပွဲတော်ပြန်လက်ဆောင်ပေးရန် မုန့်များ ကိုဝယ်ယူကြကြောင်း၊ ပေါက်ပေါက်သည် မြန်မာ့ရိုးရာအစားအစာများထဲတွင် ထူးခြားလှသော အစားအစာတစ်မျိုးအဖြစ် ပါဝင်သည်။ ပေါက်ပေါက်ကို ထန်းလျက်ရည်၊ တင်းလဲရည်တို့နှင့် နယ် ဖတ်၍ ပေါက်ပေါက်ဆုပ်နှင့် ပေါက်ပေါက်နှပ်များကိုလည်းပြုလုပ်ကြပါသည်။ အခြားမြို့နယ် များတွင် အလှူပွဲများ၌ အချိုပွဲအဖြစ် ပေါက်ပေါက်ပွင့်ကို သကြား၊ ထောပတ်၊ အုန်းသီးတို့ဖြင့် ရောနယ်ပြီး ပေါက်ပေါက်နှပ်အဖြစ် တည့်ခင်းဧည့်ခံ၍ ကျွေးမွေးကြောင်း၊ အညာဒေသ ထန်းလျက် ပေါ်ချိန်များတွင်လည်း ထန်းလျက်နှင့်ရောနှော၍ ပေါက်ပေါက်ဆုပ်များ ပြုလုပ်ရောင်းချကြောင်း သိ ရပါသည်။

          ပေါက်ပေါက်သည် စားစရာတွင်သာမက မြန်မာတို့၏ ရိုးရာအခမ်းအနားများတွင် ပေါက် ပေါက်ကြဲခြင်းတို့ ပြုလုပ်လေ့ရှိကြကြောင်း တွေ့နိုင်သည်။ ဘုရားအနေကဇာတင်ခြင်း၊ အလှူရှင် လောင်းလှည့်ခြင်း၊ ရဟန်းခံခြင်းစသည့်ပွဲတို့တွင် ပေါက်ပေါက်ပန်းများကြဲလေ့ရှိကြပြီး ယတြာချေ ခြင်း၊ ငါးစာကျွေးခြင်းစသည့် နိဗ္ဗာန်ကုန်လုပ်ငန်းအဖြစ် အသုံးဝင်ကြောင်း သိရှိရသည်။ ပွဲတော် ဖြစ်သည့်ရက်များတွင် ပေါက်ပေါက်လုပ်ငန်းကို တွင်ကျယ်စွာလုပ်ကိုင်ရပြီး ယခုCovid-19 ဖြစ်သည့်ကာလတွင် အလုပ်ပါးကြောင်း၊ နေ့စဉ်ဝင်ငွေရပြီး တစ်နိုင်တစ်ပိုင်လုပ်ငန်းဖြစ်သည် အတွက် တွက်ချေကိုက်ပြီး အိမ်၏ မီးဖိုဆောင်ကိုလည်း ထိန်းသည့်အပြင် အလုပ်သမားများလည်း အလုပ်အကိုင်အခွင့်အလမ်းရရှိ၍ စားဝတ်နေရေး အဆင်ပြေကြောင်းသိရှိရပါသည်။

ပေါက်ပေါက်ပွင့်ဖြင့်ပြုလုပ်သောမုန့်များကို ယခုထက်မက ပိုမိုကျယ်ပြန့်စွာတင်ပို့ရောင်းချ နိုင်ပါက နိုင်ငံ၏စီးပွားရေးကိုတစ်ဖက်တစ်လမ်းမှ အထောက်အကူပြုနိုင်သကဲ့သို့ ကုန်ကြမ်းနှင့် ကုန် ချောထုတ်လုပ်သည့်ဒေသရှိ ပြည်သူများအနေဖြင့်လည်း အလုပ်အကိုင်အခွင့်အလမ်းများ ရရှိနိုင်မည် ဖြစ်ကြောင်း အကြံပြုတင်ပြလိုက်ရပါသည်။

DOCA(စစ်ကိုင်း)

        မြန်မာနိုင်ငံတွင် နှစ်ရှည်သီးပင်စားပင်စိုက်ပျိုးသီးနှံများအနက် တစ်ခုဖြစ်သော သရက်ခြံ စိုက်ခင်းများကို ပဲခူးတိုင်းဒေသကြီး၌ စိုက်ဧကအများဆုံးစိုက်ပျိုး၍ ဒုတိယစိုက်ဧကအများဆုံးမှာ ဧရာဝတီတိုင်းဒေသကြီးဖြစ်ပြီး မန္တလေးတိုင်းဒေသကြီးအနေဖြင့် တတိယစိုက်ဧကအများဆုံး စိုက်ပျိုးသည့်နေရာဒေသအဖြစ် နှစ်စဉ်စိုက်ပျိုးလျှက်ရှိပါသည်။ အခြားပြည်နယ်နှင့် တိုင်းဒေသကြီးများတွင်လည်း နှစ်ရှည်ပင်သရက်ကို တစ်နိုင်တစ်ပိုင်မှ စီးပွားဖြစ်သရက်ခြံများအထိ စိုက်ပျိုးလာကြောင်း လေ့လာတွေ့ရှိရပါသည်။

           အပူပိုင်းဒေသ၏ သစ်သီးဝလံစိုက်ပျိုးပင်များတွင် ငှက်ပျောစိုက်ပျိုးခြင်းသည် ပထမအများဆုံးဖြစ်ပြီး သရက်ပင်သည် ဒုတိယအများဆုံး သစ်သီးဝလံစိုက်ပျိုးသီးနှံစာရင်းတွင် ပါဝင်သည်။ သရက်ပင်သည် အပူဒဏ်၊ ရေငတ်ဒဏ်ကိုခံနိုင်၍ မြန်မာနိုင်ငံ၏အလယ်ပိုင်း မိုးနည်းရပ်ဝန်းဒေသများတွင် ဖြစ်ထွန်းလွယ်ကြောင်း၊ တောင်ပေါ်၊ မြေပြန့် မည်သည့်နေရာဒေသတွင်မဆို စိုက်ပျိုးနိုင်ကြောင်းသိရသည်။ သရက်မျိုးစိတ်ပေါင်း(၂၀၀)ကျော်ရှိပြီး မြန်မာနိုင်ငံ၌ လတ်တလောအချိန်တွင် ရင်ကွဲသရက်အမျိုးအစားကို အများဆုံးစိုက်ပျိုးကြသည်။ အခြားစိုက်ပျိုးသည့် မျိုးကွဲများမှာ စိမ်းစားသရက်၊ စိန်တစ်လုံး၊ မချစ်စု၊ ရွှေဟင်္သာ၊ ပတ္တမြားငမောက်၊ ထောပတ်၊ သုံးလုံးတစ်တောင်၊ သံချိတ်သီးစသည်ဖြင့်အမျိုးမျိုးရှိရာ စိန်တလုံးသရက်ကို လူကြိုက်များလှသည်။

      သရက်စိုက်ပျိုးခြင်းကို ရှေးယခင်က မိမိတို့နေထိုင်ရာ အိမ်အဝန်းအဝိုင်းခြံစည်းရိုးများတွင် သမရိုးကျစိုက်ပျိုးကြသော်လည်း ယခုအခါ ခေတ်မှီထွန်ယက်စိုက်ပျိုးနည်းစနစ်များကိုအသုံးပြု၍ မြေဩဇာကျွေးခြင်း၊ပိုးသတ်ဆေးနှင့်ပေါင်းသတ်ဆေးများဖြန်းခြင်း၊အခြားသီးနှံများကဲ့သို့ ရေလောင်း ပေါင်းသင်ခြင်းများပြုလုပ်ကာ စီးပွားဖြစ်စိုက်ပျိုးလားကြောင်းသိရသည်။ နှစ်ရှည်ပင်အမျိုးအစားတွင် ပါဝင်သော သရက်ပင်သည် စိုက်ပျိုးရလွယ်ကူ၍ စိုက်ပျိုးစရိတ်သက်သာကာ ရေရှည်အကျိုး ဖြစ်ထွန်းသောအပင်မျိုးဖြစ်သည်။ သရက်ပျိူးပင်များကို မြေချစိုက်ပျိုးရန် အကောင်းဆုံးအချိန်မှာ တန်းခူးလမှ နယုန်လအတွင်းဖြစ်ပြီး ပျိုးပင်မြေချသည်ရက်မှ ၄ နှစ်မှ ၅ နှစ်အတွင်း အပွင့်အကင်းများ ဆင်၍ အသီးသီးသော နှစ်ရှည်သီးပင်စားပင်ဖြစ်သည်။ သရက်တစ်ပင်နှင့် တစ်ပင်အတွက် စိုက်ပျိုးရန် သင့်လျော်သော အကွာအဝေးမှာ ၁၂ပေခန့်ဖြစ်ကြောင်း၊ သို့မှသာ လေဝင်လေထွက်ကောင်းမွန်စေပြီး ရာသီဥတုနှင့် ရောဂါပိုးမွှားဒဏ်ခံနိုင်ကာ အပင်မှအသီးတင်၍ အထွက်နှုန်းတိုးစေကြောင်း၊ တစ်ဧကလျှင် ပျိုးပင်ရေ ၉၀ မှ ၁၀၀ အထိ စိုက်ပျိုးနိုင်ကြောင်း လေ့လာသိရှိရပါသည်။

          ဆောင်းအကုန် နွေအကူး တပေါင်း၊တန်ခူးရာသီတွင် သရက်ပင်မှ သရက်ပွင့်များ ဝတ်မှုန့်ကူး၍စတင်ပွင့်ဖူးကြသည်။ သရက်ပင်မှပွင့်ကင်းဆင်၍ သရက်သီးကင်းများတင်စေရန် ပိုးသတ်ဆေးများဖြန်းခြင်း ၊မိရိုးဖလာမီးကြက်ခိုးတိုက်ခြင်း၊ ပေါင်းပင်များရှင်းလင်းခြင်းနှင့် အာဟာရဓာတ် မြေဩဇာကျွေးခြင်းများ ပြုလုပ်ရသည်။ အသီးကင်းများဈေးကွက်ဝင်ရောင်းတန်းရစေရန်နှင့် ပျားပုတုန်း၊ ဝတ်ရည်စုပ်ပိုးများရန်မှကာကွယ်ရန် အိတ်စွပ်ခြင်း၊ သေးညှက်သောအလုံးငယ်များအား ခူးဆွတ်ခြင်းတို့ပြုလုပ်ပေးရသည်။ သရက်တစ်ပင်တွင် သရက်သီးအလုံးရေ (၁၅၀)မှ ၁၇၀ အထိသာ သီးခွင့်ပေးသင့်ကြောင်း၊ သို့မှသာ အပင်အာဟာရလုံလောက်ပြီး ရောဂါပိုးနှင့်ရာသီဥတုဒဏ်ခံနိုင်ခြင်း၊ ရောင်းတန်းဝင်အသီးများရရှိခြင်းနှင့် နောက်နှစ်အတွက်အပင်အားအင်ကုန်ခန်းခြင်းမှ လျော့နည်းကာ အသီးများ ဆက်လက် သီးပွင့်မည်ဖြစ်ကြောင်း လေ့လာသိရှိရပါသည်။

          “ အသီးမှာသရက် အသားမှာဝက် ” ဆိုသည် မြန်မာစကားပုံအတိုင်းပြောရပါလျှင် မိမိတို့ လူမျိုးများသည် အနံ့၊အရသာနှင့်ပြည်စုံ၍အသားထူသောသရက်သီးကို နှစ်ခြိုက်စွာစားသုံးကြသောသူများဖြစ်သည်။ ထိုသို့လျှင် အသားထဲတွင် ဝက်သားကိုစားရခြင်းသည် ကောင်းမွန်သောအရသာ ရရှိခြင်းကို သရက်သီးစားရသော အရသာနှင့် ယှဉ်တွဲဖော်ပြထားသည်မှာ သရက်သီး၏အကျိုးကျေးဇူးဖြစ်သည်။ သရက်သီး၌ အကျိုးကျေးဇူးများစွာရှိသော်လည်း လွန်ကဲစွာစားသုံးမိလျှင် ဝမ်းပျက်၊ ဝမ်းလျှောဖြစ်စေကြောင်း ဘေးထွက်ဆိုးကျိုးအဖြစ် မှတ်သားသိရှိရပါသည်။

          “အရာတော်မြို့နယ် ရွှေဟင်္သာသရက်စိုက်တောင်သူ ကိုမောင်မောင်ထံ၏ပြောပြချက်အရ” ၎င်းခြံရှိ သရက်တစ်ပင်မှ တစ်နှစ်လျှင် ပျမ်းမျှငွေ (၃၅၀၀၀) ကျပ်မှ (၄၀၀၀၀) ကျပ်အထိရရှိနိုင်ပြီး သရက်စိုက်ပျိုးတစ်ဧကအနေဖြင့် (၅၀၀၀၀၀) ကျပ်မှ (၆၀၀၀၀၀) ကျပ်အထိ ရရှိနေကြောင်း၊ ယခုနှစ်တွင် သရက်သီးထွက်ရှိမှုလျော့နည်းသွားခြင်းမှာ သရက်စိုက်ဧကလျော့နည်းသွားခြင်း၊ သွင်းအားစုဓာတ်မြေဩဇာများဈေးနှုန်းများမြင့်တက်လာခြင်း၊ အလုပ်သမားရှားပါးလာခြင်း၊ မိမိတို့ လုံခြုံရေးအရ မုံရွာ၊ မန္တလေးနှင့် အခြားမြို့ကြီးများသို့ သွားရောက်ရောင်းချနိုင်မှုခက်ခဲခြင်း၊ မြို့ပေါ် အဝယ်ဒိုင်များမှ နယ်ဆင်းဝယ်မှုနည်းပါးခြင်းတို့ကြောင့် လတ်တလော သရက်ဈေးကွက်အဝယ် အေးနေသော်လည်း ရေရှည်စီးပွားဖြစ်ပြီး ကုန်ကျစရိတ်သက်သာခြင်းတို့ကြောင့် နှစ်ရှည်ပင် သရက်ကိုတိုးချဲ့စိုက်ပျိုးသင့်ပါကြောင်း၊ ထို့ကြောင့် နှစ်ရှည်ပင်လည်းဖြစ်၊ စိုက်ပျိုးစရိတ်သက်သာ၊ ပြည်တွင်းစားသုံးမှုနှင့် ဝယ်လိုအားရှိနေသောသရက်ကို တစ်နိုင်တစ်ပိုင်မှ စီးပွားဖြစ်သရက်ခြံ စိုက်ခင်းများဖြင့် တိုးချဲ့စိုက်ပျိူးသင့်ပါကြောင်း တိုက်တွန်းရေးသားလိုက်ရပါသည်။

DOCA(စစ်ကိုင်း)

          စစ်ကိုင်းတိုင်းဒေသကြီး၊ မုံရွာမြို့တွင် အိမ်ဆောက်ပစ္စည်းအရောင်းဈေးကွက်၌ မေလဒုတိယအပတ်တွင် သံချောင်းလုံး ဈေးနှုန်းနှင့် ဘိလပ်မြေဈေးနှုန်းများ အတက်အကျရှိကြောင်း သိရှိရသည်။ မေလ ဒုတိယပတ်တွင် သံချောင်းလုံး ၃ မူး တစ်တန် ကျပ် ၁၁၇၀၀၀၀၊ ၅ မူးတစ်တန် ကျပ် ၁၀၈၀၀၀၀ ၊ ၆ မူး တစ်တန် ကျပ် ၁၁၇၀၀၀၀ ဈေးဖြင့် အရောင်းအဝယ်ဖြစ်ခဲ့ကြောင်း၊ ဘိလပ်မြေဈေးကွက်၌ ကြံ့နှစ်ကောင် တစ်အိတ် ကျပ် ၇၅၀၀၊ အပါချီတစ်အိတ် ကျပ် ၇၃၀၀၊ Crown တစ်အိတ် ကျပ် ၇၇၀၀ဈေးနှုန်းဖြင့် အရောင်းအဝယ်ဖြစ်နေကြောင်းကို မုံရွာမြို့ရှိ အိမ်ဆောက်ပစ္စည်းရောင်းဝယ်ရေးဆိုင်များမှ စုံစမ်းသိရှိရသည်။

          မုံရွာမြို့ရှိ ဓာတ်မြေဩဇာဈေးကွက်မှာမူ အရောင်းအဝယ်ပါးကြောင်းသိရှိရပါသည်။ မေလဒုတိယပတ် တွင် အာမို (၁၅:၁၅:၁၅)၅၀kg ပါ တစ်အိတ်လျှင် ကျပ် ၉၇၀၀၀၊ နိုက်ထရိုဖော်စကာ(ဩဘာ) ၅၀kg ပါ တစ်အိတ်လျှင် ကျပ် ၉၇၀၀၀ နှင့် ပန်းဖူး(ရွှေပျား)၅၀kgပါ တစ်အိတ်လျှင် ကျပ် ၉၇၅၀၀ ဈေးနှုန်းများဖြင့် အရောင်းအဝယ်ဖြစ်နေကြောင်း သိရပါသည်။ ယခင် အပတ်ထက် သံချောင်းလုံးတစ်တန် ကျပ် ၂၀၀၀၀ကျပ်ဈေးနှင့် ဓာတ်မြေဩဇာ ဈေးနှုန်းမှာ တစ်အိတ် လျှင် ကျပ် ၅၀၀၀ ဈေးမြင့်တက်ခဲ့ပြီး၊ ဘိလပ်မြေတစ်အိတ် လျှင် ကျပ် ၃၀၀ ဈေးကျခဲ့ကြောင်း အိမ်ဆောက်ပစ္စည်းရောင်းဝယ်ရေးဆိုင်နှင့် စိုက်ပျိုးရေးဆေးဆိုင်များမှ သိရှိရပါသည်။

DOCA(စစ်ကိုင်း)

         ဂွမြို့နယ်သည် ရခိုင်ပြည်နယ် တောင်ဘက်အစွန်ဆုံးတွင် ကျရောက်သောမြို့တစ်မြို့ဖြစ်ပြီး သံတွဲခရိုင်အတွင်းတည်ရှိပါသည်။ ဧရာဝတီတိုင်းနှင့် နယ်မြေချင်းထိစပ်နေသော ပင်လယ်ကမ်းရိုးတန်းမြို့ဖြစ်ပြီး  အလွန်သာယာလှပသော ကမ်းသာယာကမ်းခြေနှင့် ဂွမြို့နယ်၏ ထူးခြားလှပသော နာမည်ကျော် ဂွကျွန်းအလှကိုလည်း ရင်သပ်ရှုမောဖွယ်တွေ့မြင်ရမည် ဖြစ်ပါသည်။  လူဦးရေ (၆)သောင်းကျော်ခန့်နေထိုင်ပြီး ရေလုပ်ငန်းနှင့် စိုက်ပျိုးရေးနှင့်မွေးမြူရေးလုပ်ငန်းကို လုပ်ကိုင်ကြသည်။ ဂွမြို့နယ်မှ သစ်၊ ဝါး၊  မျှင်ငပိ၊ ငါးခြောက်များထွက်ရှိသည်။

          စီးပွားရေးမြို့တော်တစ်ခုဖြစ်သည့် ရန်ကုန်မြို့နှင့် (၁၄၆)မိုင်ခန့်သာ ကွာဝေးသောကြောင့် ပြည်မနှင့်လည်း လမ်းပန်းဆက်သွယ်ရေးကောင်းမွန်သော မြို့တစ်မြို့ဖြစ်ပါသည်။  ဂွ-မကျည်းငူ တံတားအား ဆောက်လုပ်နေပြီး တံတားပြီးစီးပါက ဂွမြို့နယ်မှတဆင့် ဧရာဝတီတိုင်းအတွင်းရှိ ချောင်းသာကမ်းခြေနှင့် ငွေဆောင်ကမ်းခြေများသို့ လွယ်ကူလျင်မြန်စွာ အချိန်တိုအတွင်း သွားလာနိုင်တော့မည်ဖြစ်ပါသည်။ ၎င်းအပြင် ရခိုင်ပြည်နယ်နှင့် ဧရာဝတီတိုင်းကို ဆက်သွယ်ပေးမည့် ငရုတ်ကောင်း-ဂွကမ်းခြေပတ်လမ်းစီမံကိန်းကို အကောင်အထည်‌ဖော်ဆောင်ရွက်နေပြီဖြစ်သည့်အတွက် စီမံကိန်းပြီးစီးပါက ဂွမြို့ ကမ်းခြေခရီးသွားလုပ်ငန်းများဖွံ့ဖြိုးတိုးတက်လာနိုင်ပြီး ဒေသခံ ပြည်သူများမှာလည်း အလုပ်အကိုင် အခွင့်အလမ်းများရရှိလာနိုင်ပါသည်။

          သို့ဖြစ်ပါ၍ လမ်းပန်းဆက်သွယ်ရေး‌ကောင်းမွန်လာသည်နှင့်အမျှ နောင်တစ်ချိန်တွင် ဂွမြို့နယ်၏ လူမှုစီးပွားဘဝမှာလည်း များစွာဖွံဖြိုးတိုးတက်လာမည့်မြို့တစ်မြို့ ဖြစ်လာနိုင်ပါကြောင်း ရေးသားတင်ပြလိုက်ပါသည်။

DOCA(ရခိုင်)

                ရန်ကုန်တိုင်းဒေသကြီး၊ လှိုင်မြို့နယ် ၊သီရိမင်္ဂလာဈေးတွင် မေလ (၃) ရက်နေ့မှ မေလ (၁၀) ရက်နေ့ အထိဖြစ်ပေါ်ခဲ့သော သစ်သီးဝလံဈေးနှုန်းများမှာ ရေးမြို့မှ ဒူးရင်းသီး အလုံးကြီး ၁လုံးလျှင် ကျပ် ၁၁၀၀၀ မှ ၇၀၀၀၊ အလုံးလတ် ၁လုံးလျှင် ကျပ် ၆၀၀၀ မှ ၅၀၀၀ ၊ အလုံးသေး ၁လုံးလျှင် ကျပ် ၄၀၀၀ မှ ၃၀၀၀၊ ဖျာပုံမှ နှင်းသီး အလုံး ၁၇၀ ပါ ၁ခြင်းလျှင် ကျပ် ၇၀၀၀၊ ကျိုက်ကော် မှ နာနတ်သီး အလုံးကြီး ၁လုံးလျှင် ကျပ် ၁၀၀၀ မှ ၈၀၀၊ အလုံးလတ် ၁လုံးလျှင် ကျပ် ၆၀၀ မှ ၅၀၀ ၊ အလုံးသေး ၁လုံးလျှင် ကျပ် ၄၀၀၊ ဝမ်းတွင်း မှ ဖရဲသီး (855) အလုံးကြီး ၁လုံးလျှင် ကျပ် ၈၀၀၀၊ အလုံးလတ် ၁လုံးလျှင် ကျပ် ၆၅၀၀၊ အလုံးသေး ၁လုံးလျှင် ကျပ် ၅၀၀၀ ၊ ဝမ်းတွင်း မှ ဖရဲသီး (211) အလုံးကြီး ၁လုံးလျှင် ကျပ် ၃၅၀၀၊ အလုံးလတ် ၁လုံးလျှင် ကျပ် ၃၀၀၀၊ အလုံးသေး ၁လုံးလျှင် ကျပ် ၂၀၀၀ ၊  မှော်ဘီ၊ တိုက်ကြီးမှ မာလကာသီး အလုံးကြီး ၁လုံးလျှင် ကျပ် ၅၀၀၊ အလုံးလတ် ၁လုံးလျှင် ကျပ် ၃၀၀၊ အလုံးသေး ၁လုံးလျှင် ကျပ် ၂၀၀၊ ဟင်္သတ မှ သရက်သီး (စိန်တလုံး) အလုံးကြီး ၃၆ လုံး ပါ တစ်ခြင်းလျှင် ကျပ် ၂၂၀၀၀၊ အလုံး လတ် ၄၅ လုံး ပါ တစ်ခြင်းလျှင် ကျပ် ၁၆၀၀၀၊ အလုံးသေး ၅၀ လုံး ပါ တစ်ခြင်းလျှင် ကျပ် ၁၂၀၀၀ ၊ တွံတေးမှ သရက်သီး (ရင်ကွဲ) အလုံးကြီး ၈၅ လုံးပါ တစ်ခြင်းလျှင် ကျပ် ၁၀၀၀၀၊ အလုံးလတ် ၁၂၀ လုံးပါ တစ်ခြင်းလျှင် ကျပ် ၇၀၀၀၊ ပြင်ဦးလွင်မှ စတော်ဘယ်ရီ ၅ ပိဿာ တစ်ခြင်းလျှင် ကျပ် ၃၅၀၀၀၊ အလုံးလတ် တစ်ခြင်းလျှင် ကျပ် ၃၀၀၀၀၊ (၁၀) ကျပ်သားဗူး ၁ဗူးလျှင် ကျပ် ၇၀၀ ဈေး အသီးသီးရှိကြောင်း သီရိမင်္ဂလာဈေးရှိ မြန်မာနိုင်ငံသစ်သီးဝလံ ပန်းမန်ဟင်းသီးဟင်းရွက်စိုက်ပျိုး ထုတ်လုပ်တင်ပို့ရောင်းချသူများအသင်း (MFVP) မှ သိရှိရပါသည်။

DOCA(ရန်ကုန်)