HighLight News

           ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ ပြည်ခရိုင်၊ ပန်းတောင်းမြို့နယ်တာဝန်ခံနှင့်အဖွဲ့သည် ပန်းတောင်းမြို့နယ်၊ တောင်ဘွေအုပ်စု၊ ပဲကြီးအင်းကျေးရွာသို့ (၂၈.၄.၂၀၂၂)ရက်နေ့ နံနက် (၉:၃၀) အချိန်တွင် မျိုးနေကြာစိုက်ပျိုးထုတ်လုပ်နေမှုအား ကွင်းဆင်းလေ့လာခဲ့ပါသည်။

        ပြည်တွင်းစားသုံးဆီဖူလှုံရေးအတွက် ပြည်ခရိုင်အနေဖြင့် ဆီထွက်သီးနှံဖြစ်သော နေကြာကို တိုးချဲ့စိုက်ပျိုးထုတ်လုပ်နိုင်ရေး လျာထားချက်များအတိုင်း တိုးချဲ့စိုက်ပျိုးထုတ်လုပ်နိုင်ရေး ဆောင်ရွက်လျှက်ရှိရာ ၂၀၂၂-၂၀၂၃ ခုနှစ်တွင် နေကြာစိုက်ပျိုးသည့် လျာထားဧကမှာ (၁၁၇၄၉)ရှိပြီး ပန်းတောင်း မြို့နယ်အနေဖြင့် ဧက (၁၀၀၀)ခန့်လျာထားပြီး ဖြစ်ပါသည်။ စားသုံးသူရေးရာဦးစီးဌာန၊ ပန်းတောင်းမြို့နယ်တာဝန်ခံနှင့်အဖွဲ့သည် ပန်းတောင်းမြို့နယ် တောင်ဘွေအုပ်စုရှိ၊ ပဲကြီးအင်းကျေးရွာသို့ သွားရောက်၍ ၂၀၂၂-၂၀၂၃ ခုနှစ် မျိုးနေကြာစိုက်ပျိုးထုတ်လုပ်သူ တောင်သူဦးမြင့်နိုင်ထွေး (အပါ) တောင်သူ (၁၆)ဦးနှင့် တွေ့ဆုံ၍ မေးမြန်းရာ မျိုးနေကြာစိုက်ပျိုးဧက (၂၁.၅၀) ဧကကို (၁၁.၄.၂၀၂၂)ရက်နေ့တွင် စတင်စိုက်ပျိုးထားပြီးဖြစ်ပါသည်။  နေကြာသက်တမ်းမှာ ရက်(၉၀)ခန့်သာရှိ၍ လာမည့် ဇူလိုင်လဆန်းတွင် စတင်ထွက်ပေါ်မည်ဖြစ်ကြောင်း၊ မျိုးနေကြာများထွက်ရှိလျှင် နေကြာစိုက်ပျိုးသူတောင်သူများအား ရောင်းချမည့်အပြင် နေကြာအစုအဖွဲ့များ ဖွဲ့စည်းပြီး ဆီစက်လုပ်ငန်းရှင်များကုန်သည်များထံသို့ ဒေသပေါက်ဈေးဖြင့် ရောင်းချမည်ဖြစ်ကြောင်း သိရပါသည်။

        နေကြာကို သီးထပ်/သီးညှပ်အဖြစ် စိုက်ပျိုးနိုင်ပြီး၊ စိုက်ပျိုးထုတ်လုပ်မှု ကုန်ကျစရိတ် နည်းပါးခြင်း၊ အပျက်အဆီးနည်းခြင်း၊ အထွက်နှုန်းကောင်းမွန်ခြင်းနှင့် ဆီထွက်နှုန်းကောင်းခြင်းတို့ကြောင့် ပြည်တွင်းစားသုံးဆီဖူလှုံရေးအတွက် အထောက်အကူပြုသောသီးနှံဖြစ်ပါသည်။ နေကြာ စိုက်ပျိုးသူများအနေဖြင့် ရာသီဥတု၊ ရေမြေသဘာဝနှင့် အထူးသင့်လျှော်ပြီး စိုက်ပျိုးရန် လွယ်ကူသည့် နေကြာသီးနှံကို တိုးချဲ့စိုက်ပျိုးခြင်းဖြင့် ပြည်တွင်းစားသုံးဆီဖူလှုံမှုကို အထောက်အကူပြုသည့်အပြင် ကျန်းမာရေးအတွက်လည်း ညီညွတ်သည့် စားသုံးဆီများရရှိနိုင်ရေးအတွက် နေကြာသီးနှံကို တိုးချဲ့စိုက်ပျိုးနိုင်ပါရန် တင်ပြအပ်ပါသည်။

DOCA(ပဲခူး)

           ပဲခူးတိုင်းဒေသကြီး၊ ပြည်ခရိုင်၊ ပြည်မြို့၊ မှော်ဇာကျေးရွာရှိ  ပျူမြို့ဟောင်း မှော်ဇာပြတိုက်တွင် ယခင်က ကမ္ဘာလှည့်ခရီးသွားများနှင့် ပြည်တွင်းခရီးသွားများဖြင့် စည်ကားလျှက်ရှိရာ  COVID-19 ရောဂါများဖြစ်ပွားချိန်တွင် ခရီးသွားဧည့်သည်များမရှိ၍ ယာယီပိတ်ထားလျှက်ရှိရာ ယခုအချိန်တွင် ရောဂါဖြစ်ပွားမှုများ လျော့ကျသွားသဖြင့် ခရီးသွားများလာရောက်လည်ပတ်သွားလာသဖြင့် ပျူမြို့ဟောင်း ပြတိုက်အား ၂၀၂၂ ခုနှစ် ဇန်နဝါရီလမှစ၍ ဖွင့်လှစ်လျှက်ရှိပါသည်။

          ပျူမြို့ဟောင်းပြတိုက်တွင် လေ့လာစရာများစုံလင်စွာရှိပြီး ပျူခေတ်လူတို့ အသုံးအဆောင်များ၊ မြေအိုး၊ မြေခွက်များ၊ ပျူမြို့ရိုးများဖြင့် ခင်းကျင်းပြသထားပြီး ပြည်တွင်းခရီးသွားများဖြင့် စည်ကားလျှက်ရှိပါသည်။ ပြတိုက်အား ဝင်ကြေးအနေဖြင့် ပြည်တွင်းခရီးသွားများအား အခမဲ့ ဝင်ရောက်လေ့လာကြည့်ရှုနိုင်ပြီး ၊ နိုင်ငံခြားခရီးသွားများအား တစ်ဦးလျှင် မြန်မာငွေ ၅၀၀၀ကျပ်ဖြင့် သတ်မှတ်ကောက်ခံပါသည်။ ပြတိုက်ဖွင့်လှစ်ချိန်မှာ နံနက် (၉:၀၀)နာရီမှ ညနေ(၄:၃၀) အထိဖြစ်ပြီး အပတ်စဉ် တနင်္လာနေ့နှင့် ပြန်တမ်းဝင်ရုံးပိတ်ရက်များမှအပ ကျန်ရက်များတွင် နေ့စဉ်သတ်မှတ်ချိန်အတွင်း ဖွင့်လှစ်ထားကြောင်း သိရှိရပါသည်။

DOCA(ပဲခူး)

            ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ဟင်္သာတခရိုင်တာဝန်ခံသည် မြန်အောင်မြို့နယ်၊ အမှတ်(၃)ရပ်ကွက်၊ နေခြည်ဈေးအတွင်းရှိ ဆေးဆိုင်များတွင် (၁၂.၅.၂၀၂၂) ရက်နေ့ နံနက်(၉:၀၀) နာရီအချိန်တွင် မြို့နယ်တိုင်းရင်းဆေးဦးစီးဌာန၊ မြို့နယ်စည်ပင်ဦးစီးဌာနတို့နှင့် ပူးပေါင်း၍  မြို့ပေါ်ဆေးဆိုင်များအား ဈေးကွက်စောင့်ကြည့်စစ်ဆေးခြင်းကို ကွင်းဆင်းဆောင်ရွက်ခဲ့ပါသည်။

           Online ပေါ်တွင် အကိုက်အခဲရောဂါပေါင်းစုံ ပျောက်သည်ဟုဆိုကာ ရောင်းချနေသောဆေးများရှိသဖြင့် စားသုံးသူပြည်သူများ ဘေးဥပါဒ်အန္တရာယ်ကင်းရှင်းစေရေးတို့အတွက် မြန်မာနိုင်ငံတွင်လည်း တရားဝင်ဆေးဝါးမှတ်ပုံတင်ထားခြင်းမရှိသော ဆေးပစ္စည်းများ တင်သွင်းရောင်းချနေခြင်း ရှိ/မရှိ စစ်ဆေးခဲ့ကြပြီး တင်းသွင်းခြင်း၊ ဖြန့်ဖြူးခြင်း၊ ရောင်းချခြင်းမပြုရန် အသိပညာပေး ဆွေးနွေးမှုများ ပြုလုပ်ခဲ့ကြောင်း သိရှိရပါသည်။

DOCA(ဧရာဝတီ)

           ပဲခူးတိုင်းဒေသကြီး၊စားသုံးသူရေးရာဦးစီးဌာန၊ ပြည်ခရိုင်ဦးစီးမှူးရုံးအနေဖြင့် ပြည်ခရိုင်အတွင်းရှိ အများပြည်သူတို့ စားသုံးသူရေးရာကိစ္စရပ်များအား ကျယ်ကျယ်ပြန့်ပြန့်သိရှိနားလည်နိုင်စေရေး ရည်ရွယ်၍ ပန်းတောင်းမြို့နယ်အတွင်း မေ (၁၁)ရက်၊ နံနက်ပိုင်း၌ ဆင်တဲအုပ်စု၊ တမာကုန်းရွာ၊ နေ့လည်ပိုင်း၌ ဆင်တဲအုပ်စု၊ စွယ်တော်ရွာ၊ ပေါက်ခေါင်းမြို့နယ်အတွင်း မေ (၅)ရက်၌ သဖန်းချို အုပ်စု၊ သဖန်းချိုရွာ၊ မေ (၉)ရက်၌ ဘန့်ပြင်အုပ်စု၊ ကြို့ကြာရွာစသည်တို့တွင် သက်ဆိုင်ရာမြို့နယ်တာဝန်ခံတို့မှ မြို့နယ်ဌာနဆိုင်ရာ အဖွဲ့အစည်းများနှင့် ပူးပေါင်းကာ စားသုံးသူအသိပညာပေး ဟောပြောဆွေးနွေးခြင်း ဆောင်ရွက်ခဲ့ကြပါသည်။

          အဆိုပါ ဟောပြောပွဲတွင် သက်ဆိုင်ရာမြို့နယ်တာဝန်ခံမှ စားသုံးသူကာကွယ်ရေး ဉပဒေပါ စားသုံးသူတို့၏ အခွင့်အရေးများ၊ လိုက်နာရမည့် တာဝန်များနှင့် ကုန်အညွှန်းအမှတ်အသား ရေးသားဖေါ်ပြခြင်းဆိုင်ရာ အကြောင်းအရာများ၊ နစ်နာဆုံးရှုံးမှုများ ဖြစ်ပေါ်လာပါက တိုင်ကြားနိုင်မည့် ဖုန်းနံပါတ်နှင့် လိပ်စာများအား အသိပညာပေး ပြောကြားခဲ့ပြီး စားသုံးသူကာကွယ်ရေး အသိပညာပေးလက်ကမ်းစာစောင်များ ဖြန့်ဝေပေးခဲ့ကြောင်း သတင်းရရှိပါသည်။

DOCA(ပဲခူး)

          စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်ဦးစီးမှူးရုံးအနေဖြင့် စားသုံးသူပြည်သူများမှ ကုန်အညွှန်းအမှတ်အသားများ ပြည့်စုံမှန်ကန်စွာ ဖေါ်ပြမှုရှိသည့် ကုန်စည်များကို ရွေးချယ်ဝယ်ယူသုံးစွဲနိုင်ရေး၊ ကုန်စည်/ဝန်ဆောင်မှုနှင့်စပ်လျဉ်း၍ အခြေခံလိုအပ်ချက်များပေါ်တွင် စိတ်ကျေနပ်မှုရရှိစေရေးတို့အတွက် စားသုံးသူကာကွယ်ရေးဆိုင်ရာ အသိပညာဗဟုသုတများ ကျယ်ကျယ်ပြန့်ပြန့် သိရှိနိုင်စေရန်ရည်ရွယ်၍ ပြည်ခရိုင်၊ ရွှေတောင်မြို့နယ်တွင် မေ (၆)ရက်နေ့၌ သာစည်ကုန်းအုပ်စု၊ ဖုန်းဆိုးရွာ၊ မေ (၉)ရက်နေ့၌ ဝါးတောအုပ်စု၊ ဖါးအိုင့်ရွာ၊ ပေါင်းတည်မြို့နယ် အတွင်း မေ (၆)ရက်နေ့၌ ရွာသစ်ကြီးအုပ်စု၊ ရှမ်းစပ်ရွာ၊ မေ (၉)ရက်နေ့၌ မန်ကျီးကုန်းအုပ်စု၊ မန်ကျီးကုန်းရွာ၊ မေ (၁၁)ရက်နေ့၌ ညောင်ဖြူအုပ်စု၊ ညောင်ဖြူရွာစသည်တို့တွင် သက်ဆိုင်ရာ မြို့နယ်တာဝန်ခံတို့မှ မြို့နယ်ဌာနဆိုင်ရာ အဖွဲ့အစည်းများနှင့် ပူးပေါင်းကာ စားသုံးသူကာကွယ်ရေး အသိပညာပေးဟောပြောဆွေးနွေးခြင်းများ ဆောင်ရွက်ခဲ့ပါသည်။

          အဆိုပါ ဟောပြောပွဲတွင် သက်ဆိုင်ရာမြို့နယ်တာဝန်ခံမှ စားသုံးသူကာကွယ်ရေးဉပဒေပါ စားသုံးသူများ၏ အခွင့်အရေးနှင့်တာဝန်များ၊ စီးပွားရေးလုပ်ငန်းရှင်များ လိုက်နာရမည့် တာဝန်နှင့် တားမြစ်ချက်များ၊ ကုန်စည်ထုတ်လုပ်ရာတွင် သိသာထင်ရှားစွာဖေါ်ပြရမည့် ကုန်အညွှန်း အမှတ်အသားဖေါ်ပြခြင်းဆိုင်ရာအချက်များ၊ စားသုံးသူများ နစ်နာဆုံးရှုံးမှုရှိပါက တိုင်ကြားနိုင်သည့် ပုဂ္ဂိုလ်များ၊ နည်းလမ်းများ၊ ဖုန်းနံပါတ်နှင့်လိပ်စာ၊ ဉပဒေအရချမှတ်နိုင်သည့် ပြစ်မှုပြစ်ဒဏ်များ စသည့်အကြောင်းအရာတို့အား အသိပညာပေးပြောကြားခဲ့ပြီး စားသုံးသူကာကွယ်ရေး အသိပညာပေး လက်ကမ်းစာစောင်များလည်း ဖြန့်ဝေပေးခဲ့ကြောင်း သတင်းရရှိပါသည်။

DOCA(ပဲခူး)