HighLight News

            ဧရာဝတီတိုင်းဒေသကြီး၊ ဓနုဖြူမြို့နယ်အတွင်း ဒေသခံပြည်သူများ စားသောက်ကုန်ပစ္စည်းများ ဝယ်ယူစားသုံးရာတွင် အစားအစာဘေးကင်းလုံခြုံစေရန်နှင့် FDA မှ စားသုံးရန်မသင့်သည့် တားမြစ်ထားသော စားသောက်ကုန်ပစ္စည်းများ ရောင်းချမှုမရှိစေရေးအတွက် (၇-၈-၂၀၂၅)ရက်နေ့ နံနက် (၀၉း၃၀) နာရီအချိန်တွင် မြို့နယ်စီမံအုပ်ချုပ်ရေး အဖွဲ့၏ကြီးကြပ်မှုဖြင့် ဌာနဆိုင်ရာပူးပေါင်းစစ်ဆေးရေးအဖွဲ့က မြို့နယ်စည်ပင်သာယာဈေးရှိ စားသောက်ကုန်ပစ္စည်းအရောင်းဆိုင်များကို ကွင်းဆင်းစစ်ဆေးခဲ့ကြကြောင်း သိရသည်။

           ထိုသို့ကွင်းဆင်းစစ်ဆေးရာတွင် မြို့နယ်စီမံအုပ်ချုပ်ရေးအဖွဲ့၏ဦးဆောင်မှုဖြင့် မြို့နယ်စည်ပင်သာယာရေးအဖွဲ့၊ မြို့နယ်စားသုံးသူရေးရာဦးစီးဌာနမှ ဦးခိုင်လွမ်းမိုး။ ဈေးကော်မတီဝင်များနှင့် ဈေးဝန်ထမ်းများ ပူးပေါင်းစစ်ဆေးရေးအဖွဲ့က ပန်းနံသာဈေး၌ ဖွင့်လှစ်ရောင်းချလျက်ရှိသည့် စားသောက်ကုန်ပစ္စည်းအရောင်းဆိုင်များသို့ သွားရောက်ကာ လုပ်ငန်းရှင်များနှင့်တွေ့ဆုံ၍ စားသောက်ကုန်ပစ္စည်းများရောင်းချရာ၌ FDA မှ စားသုံးရန်မသင့်သည့် တားမြစ်ထားသော စားသောက်ကုန်ပစ္စည်းများ ရောင်းချခြင်းမပြုရန်နှင့် ကျန်းမာရေးထိခိုက်စေနိုင်သည့် သက်တမ်းလွန်နေသော စားသောက်ကုန်ပစ္စည်းများ ရောင်းချခြင်းမပြုရန်တို့ကို အသိပညာပေး ဆွေးနွေးပြောကြားပါသည်။

           ထို့နောက် မြို့နယ်စားသုံးသူရေးရာဦးစီးဌာနက ဦးခိုင်လွမ်းမိုးက မြို့နယ်အတွင်းရှိ ဒေသခံပြည်သူများ အစားအစာ ဘေးကင်းလုံခြုံစေရေးအတွက် ကုန်စုံဆိုင်များတွင် စားသုံးရန်မသင့်သော စားသောက်ကုန်ပစ္စည်းနှင့် သက်တမ်းလွန်နေသော စားသောက်ကုန်ပစ္စည်းများ ဖြန့်ဖြူးရောင်းချခြင်းရှိ/ မရှိနှင့် ကုန်အညွှန်းအမှတ်အသား ပါဝင်မှုရှိ/မရှိကို လိုက်လံကြည့်ရှု စစ်ဆေးခဲ့ကြောင်း သိရှိရပါသည်။ 

DOCA(ဧရာဝတီ)

           ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ်အတွင်းရှိ စိုက်ပျိုးရေးသုံးပစ္စည်းနှင့် လယ်ယာသုံးစက်ပစ္စည်း အရောင်းဆိုင်များတွင် ဈေးနှုန်းအခြေအနေနှင့် ကုန်အညွှန်းအမှတ်အသား စစ်ဆေးခြင်း၊ မီးဘေးလုံခြုံရေးအတွက် အသိပညာပေး စစ်ဆေးဆောင်ရွက်ခြင်းကို (၇-၈-၂၀၂၅)ရက်နေ့ နံနက်ပိုင်းက ကွင်းဆင်းဆောင်ရွက်ခဲ့ကြောင်း သိရသည်။

           ထိုသို့ဆောင်ရွက်ရာတွင် မြို့နယ်ဦးစီးမှူး ဦးအောင်လွင်က စိုက်ပျိုးရေးသုံး ပစ္စည်းများတွင် ကုန်အညွှန်းအမှတ်အသားစစ်ဆေးခြင်း၊ စျေးကွက်အတွင်း ပိုးသတ်ဆေးအတုအပများနှင့် လိုင်စင်မဲ့အရောင်းဆိုင်များ မရှိစေရေး၊ တရားမဝင်ရောင်းချသော ပိုးသတ်ဆေးများမရှိစေရေး၊ ဒေသခံတောင်သူများ အရည်အသွေးမှန်၊ စျေးနှုန်းမှန်သုံးစွဲမှု မှန်ကန်စေရေးအတွက် ပိုးသတ်ဆေးနှင့် ဓာတ်မြေသြဇာ မျိုးစေ့အရောင်းဆိုင်များအား လစဉ်စစ်ဆေးလျက်ရှိကြောင်း သိရသည်။ မြို့နယ်မီးသတ်ဦးစီးဌာန၊ ဦးစီးအရာရှိ ဦးမျိုးမင်းသူဦးဆောင်၍ မီးသတ်တပ်ဖွဲ့ဝင်များက မြို့နယ်အတွင်းရှိ အမိုနီယမ်နိုက်ထရိတ်ပါဝင်သည့် ဓာတ်မြေဩဇာများရောင်းချသည့် စိုက်ပျိုးရေးသုံးပစ္စည်းနှင့်လယ်ယာသုံးစက်ပစ္စည်းအရောင်းဆိုင်များတွင် မီးဘေးအန္တရာယ်နှင့် လျှပ်စစ်မီးကြိုးအန္တရာယ် ကြိုတင်ကာကွယ်ရေးအတွက် ဆောင်ရွက်ထားရှိမှုများကို ကြည့်ရှုစစ်‌ဆေး၍ မီးဘေးအန္တရာယ်ကြိုတင်ကာကွယ်ရေးအတွက် မီးငြှိမ်းသတ်ခြင်းဆိုင်ရာ အသိပညာပေး အကြောင်းအရာများကို အသိပညာပေးပြောကြားခဲ့ကြောင်း သိရှိရပါသည်။

DOCA(ဧရာဝတီ)

           ဧရာဝတီတိုင်းဒေသကြီး၊ မအူပင်ခရိုင်၊ မအူပင်မြို့နယ်တွင် ခရိုင်စားသုံးသူရေးရာဦးစီးဌာနနှင့် မြို့နယ်စည်ပင်သာယာရေးအဖွဲ့တို့ပူးပေါင်း၍ မြို့နယ်အတွင်းရောင်းချလျက်ရှိသော အိမ်ဆောက် ပစ္စည်း အရောင်းဆိုင်များတွင် ရောင်းချလျက်ရှိသော ဆောက်လုပ်ရေးလုပ်ငန်းသုံးပစ္စည်းများ အရည်အသွေးပြည်ဝပြီး စျေးနှုန်းမှန်ကန်စေရေး လိုက်လံစစ်ဆေးခြင်းကို (၇.၈.၂၀၂၅)ရက်နေ့ နံနက် (၁၀း၀၀)နာရီအချိန်က မအူပင်မြို့နယ်အတွင်းလိုက်လံစစ်ဆေးကြောင်းသိရသည်။

              အဆိုပါ ဆောက်လုပ်ရေးလုပ်ငန်းသုံးပစ္စည်းများ အရည်အသွေးပြည်ဝပြီး စျေးနှုန်းမှန်ကန်စေရေး လိုက်လံစစ်ဆေးရာတွင် မအူပင်ခရိုင်၊ စားသုံးသူရေးရာဦးစီးဌာန ခရိုင်ဦးစီးမှူးဦးမင်းဇော်နှင့် ဝန်ထမ်းများ၊ မြို့နယ်စည်ပင်သာယာရေးအဖွဲ့မှ အင်ဂျင်နီယာများနှင့်တာဝန်ရှိသူများသည် မြို့နယ်အတွင်း ရောင်းချလျက်ရှိကြသော အိမ်ဆောက်ပစ္စည်းအရောင်းဆိုင်များတွင် ရောင်းချလျက်ရှိကြသော ဆောက်လုပ်ရေးလုပ်ငန်းသုံးပစ္စည်းသံချောင်းလုံးများဖြစ်သော HRB-500၊ HRB - 400 အမျိုးအစားများနှင့် လုပ်ငန်းသုံး သံမဏိများဖြစ်သည့် H -Beam၊ l- Beam နှင့် Hollow အမျိုးအစားများအား၊ ပြည်ပနိုင်ငံများမှ တင်သွင်း၍လည်းကောင်း၊ ပြည်တွင်းထုတ်လုပ်၍လည်းကောင်း စျေးကွက်အတွင်း အရည်အသွေးပြည့်ဝပြီး စျေးနှုန်းမှန်ကန်စေ ရေးလိုက်လံစစ်ဆေးခြင်းကို ဆောင်ရွက်ခဲ့ကြကြောင်း သိရှိရပါသည်။

DOCA(ဧရာဝတီ)

             ပုသိမ်ခရိုင်၊ သာပေါင်းမြို့နယ်၊ (၅.၈.၂၀၂၅) ရက်နေ့၊ စားသုံးသူရေးရာဦးစီးဌာနမှ မြို့နယ်ဦးစီးမှူးသည် မြန်မာ့လယ်ယာဖွံ့ဖြိုးရေးဘဏ်၌ တောင်သူ (၁၅၇) ဦးအား ဆန်/ စပါး သိုလှောင်ရုံများ မှတ်ပုံတင်ဆောင်ရွက်ရမည့်အချက်များ၊ မှတ်ပုံတင်ရာတွင် လိုအပ်သော စာရွက်စာတမ်းများ၊ သိုလှောင်ရုံအရွယ်အစားအလိုက် မှတ်ပုံတင်ကြေးကောက်ခံမှု၊ ဆန်တန်ချိန် (၂၅၀၀) အထက် သိုလှောင်ရုံများဖြစ်ရန်လိုအပ်ကြောင်း၊ မိမိပိုင် ဆန်/ စပါး သိုလှောင်ရုံများ မှတ်ပုံတင်ခြင်းအားဖြင့် ရရှိလာနိုင်သည့် အကျိုးရလဒ်များအကြောင်း အသိပညာပေးဟောပြောခဲ့ကြောင်း သိရှိရပါသည်။

DOCA (ဧရာဝတီ)

                    ကျုံပျော်မြို့နယ်၊ စားသုံးသူရေးရာဦးစီးဌာနမှ မြို့နယ်တာဝန်ခံသည် (၅.၈.၂၀၂၅) ရက်နေ့ နံနက်(၁၀:၀၀) နာရီအချိန်တွင် မြန်မာ့လယ်ယာဖွံ့ဖြိုးရေးဘဏ်ရုံးသို့ စိုက်စရိတ်ချေးငွေ လာရောက်ထုတ်ယူသည့် ကျေးရွာအုပ်စုအလိုက်ပြည်သူ (၁၅၀)ဦးခန့်သို့ စားအုန်းဆီ ထုတ်ယူခွင့် စာအုပ်ဖြင့် (၁၀)ရက်လျှင်တစ်ကြိမ် ဝယ်ယူရရှိမှု ရှိ၊ မရှိ ဝယ်ရစျေးနှုန်း၊ အလေးချိန် ပြည့်ဝစွာရရှိမှုရှိ၊ မရှိ အခြေအနေများ မေးမြန်းဆွေးနွေးပြီး စာအုပ်ပြုလုပ်ရန် ကျန်ရှိသော ပြည်သူများမှ ဆက်လက်တင်ပြဆောင်ရွက်သွားရန်၊ စားအုန်းဆီရောင်းချဖြန့်ဖြူးနေမှုနှင့် နယ်အရောက် ရောင်းချရန်စျေးနှုန်း သတ်မှတ်ပေးထားပြီး သတ်မှတ်စျေးနှုန်းဖြင့် (၁၀)ရက် တစ်ကြိမ် ဝယ်ယူရရှိစေရေး ရှင်းလင်း ဆွေးနွေးပြီး စားသုံးသူအခွင့်အရေး နစ်နာမှုရှိပါက ဌာနနှင့် ဆက်သွယ်ဆောင်ရွက်နိုင်ပါရန် အသိပညာပေး ဟောပြောဆောင်ရွက်ခဲ့ကြောင်း သိရှိရပါသည်။

DOCA(ဧရာဝတီ)