ပြည်ပကုန်သွယ်မှုသတင်းများ

ကမ္ဘာလုံးဆိုင်ရာ စိန်ခေါ်မှုများနှင့် စားနပ်ရိက္ခာအကျပ်အတည်းကို ကြိုတင်ခန့်မှန်းနိုင်ရေးအတွက် အင်ဒိုနီးရှား စိုက်ပျိုးရေးဝန်ကြီးဌာနသည် အမျိုးသားရဲတပ်ဖွဲ့၏ စားနပ်ရိက္ခာလုပ်ငန်းအဖွဲ့နှင့် ပူးပေါင်း၍ နိုင်ငံတစ်ဝန်းရှိ ဆန်စက်များနှင့် ဆန်စပါးဖြည့်တင်းမှု (ထောက်ပံ့ရေး) ဆိုင်ရာ အချက်အလက်များကို စုဆောင်းကောက်ခံသွားမည်ဖြစ်ကြောင်း သိရပါသည်။

အယ်နီညိုရာသီဥတုနှင့်  အခြားသောအကျပ်အတည်းများကို  ရင်ဆိုင်နေရသည့်အတွက် အမျိုးသား ရဲတပ်ဖွဲ့နှင့် ပူးပေါင်းဆောင်ရွက်မှုများ အားကောင်းစေရန် ဝန်ကြီးဌာနရှိ ဝန်ထမ်းအဆင့်အားလုံးကို တိုက်တွန်းလိုပါကြောင်း စိုက်ပျိုးရေးဝန်ကြီး Syahrul Yasin Limpo က ၂၉-၈-၂၀၂၃ ရက်၊ အင်္ဂါနေ့တွင် ပြောကြားခဲ့သည်။

၂၀၂၀ ခုနှစ်တွင် ဆန်စက်ပေါင်း ၁၆၉,၇၈၈ ခုရှိပြီး  အသေးစားဆန်စက် အရေအတွက် ၁၆၁၄၀၀ ခု၊ အလတ်စားဆန်စက် ၇၃၃၂ ခု နှင့် အကြီးစားဆန်စက် ၁၀၅၆ ခု ပါဝင်ကြောင်း အင်ဒိုနီးရှားနိုင်ငံ၏ အခြေခံစစ်တမ်းကောက်ယူမှု စာရင်းအင်းများအရ သိရှိရပါသည်။

အယ်နီညို ရာသီဥတုနှင့် စက်တင်ဘာလအထိ ကြာမြင့်နိုင်မည်ဟု မျှော်လင့်ရသည့် ခြောက်သွေ့ ရာသီတို့ကို ရင်ဆိုင်နိုင်ရန် နိုင်ငံတစ်ဝန်းရှိ ဒေသသုံးခုတွင် မတူညီသော ဇုန်သုံးခုကို  ဖွဲ့စည်းထားကြောင်း၊ အနီရောင်ဇုန်သည် ရေပေးဝေမှု မလုံလောက်သော ဒေသများဖြစ်ကြောင်း၊ အဝါရောင်ဇုန်သည် ရေလုံလောက်စွာ ပေးဝေနိုင်သည်ဟု ယူဆရသော နယ်မြေဖြစ်ကြောင်းနှင့် အစိမ်းရောင်ဇုန်သည် ရေပေါများသောဒေသဖြစ်သည်ဟု သတ်မှတ်ထားကြောင်း သိရပါသည်။

ပြည်နယ် ၃၈ ခု ရှိရာ ပါပူဝါ၊ ဘာလီနှင့် ဘန်တန်တို့သည် အနီရောင်ဖြစ်ပြီး၊ အများစုမှာ အဝါရောင်နှင့် အချို့မှာ အစိမ်းရောင်ဒေသဖြစ်ကြောင်းနှင့် ခိုင်မာအားကောင်းရန်လိုအပ်ကြောင်း စိုက်ပျိုးရေးဝန်ကြီး Limpo က ပြောကြားခဲ့ပါသည်။

Source: Antara News, 29 Aug 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

ပြည်ပသို့ ပေါင်းဆန်တင်ပို့မှုအပေါ် ၁၅-၁၀-၂၀၂၃ ရက်နေ့အထိ အခွန် ၂၀% ကောက်ခံမည် ဖြစ်ကြောင်း အိန္ဒိယအစိုးရ၏ အမိန့်ထုတ်ပြန်ခဲ့မှုသည် ဝယ်ယူသူနှင့် ရောင်းချသူတို့အနေဖြင့် အခွန်ပေးဆောင်ရမှုမှ ရှောင်ကြဉ်ရန်အတွက် သင်္ဘောတင်ပို့ရန်ရှိသော ပေါင်းဆန်တန်ချိန် ၅ သိန်းခန့်အား အဆိုပါနေ့ရက် ကျော်လွန်မည့်အချိန်အထိ ဆိုင်းငံ့ခြင်းကို ဖြစ်ပေါ်စေသည်ဟု ဩဂုတ်လ ၂၉ ရက်နေ့တွင် ဆန်တင်ပို့သည့် အိန္ဒိယပို့ကုန်လုပ်ငန်းကြီး ၃ ခုမှ ရိုက်တာသတင်းဌာနသို့ ပြောဆိုခဲ့ပါသည်။

အိန္ဒိယမှဆန်များ သင်္ဘောတင်ပို့ရန် ကြန့်ကြာမှုသည် ဘီနင်၊ ဂါနာ၊ အိုင်ဗရီကို့နှင့် လိုင်ဘေးရီးယား တို့ကဲ့သို့သော ဆန်ဝယ်ယူတင်သွင်းသည့် နိုင်ငံများတွင် ဆန်လက်ကျန်ပမာဏကို နည်းပါးစေပြီး မြင့်တက်လျက်ရှိသော ဆန်ဈေးနှုန်းများကို ထပ်မံကြီးမြင့်စေဖွယ်ရှိသည်။

အိန္ဒိယ ဆန်ရောင်းဝယ်ရေးကုမ္ပဏီတစ်ခုဖြစ်သော Satyam Balajee မှ အမှုဆောင် ဒါရိုက် တာ Himanshu Agarwal က ပြည်ပဝယ်လက်များသည် သင်္ဘောတင်ပို့မည့် အစီအစဉ်များကို ရွှေ့ဆိုင်းလျက်ရှိကြောင်း၊ မည်သူကမျှ အခွန်ပေးဆောင်လိုမှု မရှိကြောင်း ပြောဆိုပါသည်။ အိန္ဒိယ ဆန်တင်ပို့သူများအသင်း၏ ဥက္ကဋ္ဌ BV Krishna Rao ကလည်း ဆန်တန်ချိန် ၅ သိန်းခန့်မှာ တင်ပို့မှုမပြုပဲ ဆိုင်းငံ့ထားကြောင်း၊ အိန္ဒိယအစိုးရ၏ ပို့ကုန်အခွန်ကောက်ခံမှု မစတင်မီကပင် ဆန်ဈေးနှုန်းများမြင့်တက်နေခြင်းကြောင့် ဝယ်ယူတင်သွင်းသူများအနေဖြင့် စိတ်မသက်သာမှု ဖြစ်ပေါ်ခဲ့ကြကြောင်း၊ အာဖရိကနိုင်ငံများရှိ ဝယ်ယူသူများသည် လက်ရှိဖြစ်ပေါ်နေသော ဆန်ဈေးနှုန်းအဆင့်၌ ပင် ဝယ်ယူနိုင်စွမ်း ကင်းမဲ့လျက်ရှိကြောင်း၊ အောက်တိုဘာလမှစတင်၍ စပါးအသစ်များ ပြည်တွင်းဈေးကွက်သို့ ဝင်ရောက်ပြီး ရောင်းလိုအား တိုးတက်လာချိန်၌ ပြည်ပတင်ပို့သည့် ဆန်ဈေးနှုန်းများသည်လည်း တဖြည်းဖြည်း ကျဆင်းလာမည်ဖြစ်ကြောင်း ပြောကြားခဲ့သည်။

နယူးဒေလီမြို့အခြေစိုက် ဆန်ကုန်သည်တစ်ဦးကလည်း လွန်ခဲ့သော သီတင်းပတ်များအတွင်း ထိုင်း၊ ဗီယက်နမ်နှင့် ပါကစ္စတန် တို့သည် ဆန်ဈေးနှုန်းများကို မြှင့်တင်ခဲ့ကြရာ ဆန်တင်သွင်းသည့် နိုင်ငံများအတွက် ရွေးချယ်ရန် အခွင့်အလမ်းနည်းပါးလျက်ရှိကြောင်း၊ အာဖရိကမှ ဝယ်လက်များသည် သင်္ဘောတင်ပို့မှုကို ဆိုင်းငံ့လျက် ဈေးနှုန်းများ ကျဆင်းလာမည်ကို စောင့်ဆိုင်းခြင်းကသာ အကောင်းဆုံးဖြစ်သည်ဟု မှတ်ယူ ဆောင်ရွက်လာကြကြောင်းဖြင့် ပြောကြားပါသည်။

ယခင်ရက်သတ္တပတ်၌ ဆန်ကွဲ ၅% ပါဝင်သော ပေါင်းဆန်များကို ၁ တန်လျှင် ဒေါ်လာ ၄၅၀ - ၄၅၅ ဝန်းကျင်ခန့်ဖြင့် ရောင်းချရန် အိန္ဒိယကုန်သည်များက ဈေးနှုန်းကမ်းလှမ်းခဲ့ရာမှ ယခု ၁ တန်လျှင် ဒေါ်လာ ၅၂၀ - ၅၄၀ ခန့်ဖြင့် စံချိန်တင်မြင့်တက်ခဲ့ကြောင်း၊ ၂၀၂၂ ခုနှစ်တွင် အိန္ဒိယမှ ဆန်တန်ချိန် ၂၂.၂ သန်း တင်ပို့ခဲ့ရာ၌ ပေါင်းဆန် တန်ချိန် ၇.၄ သန်းပါဝင်ခဲ့ကြောင်း၊ အာရှနှင့် အာဖရိကဒေသတို့ရှိ ဝင်ငွေနည်းပါးသော စားသုံးသူများသည် ၁ တန်လျှင် ၃၂၅ ဒေါ်လာခန့်သာ ဈေးနှုန်းရှိသည့် ၁၀၀ ရာခိုင်နှုန်းပြည့်ဆန်ကွဲများကို ပိုမိုအလေးပေး ဝယ်ယူလာကြကြောင်း သိရှိရသည်။

Source: The Daily Star, 30 Aug 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

စင်္ကာပူစားနပ်ရိက္ခာအဖွဲ့အစည်း (SFA) သည် (ဘာစမာတီမဟုတ်သော) ဆန်ဖြူ တင်ပို့မှုအပေါ် တားမြစ်ခြင်းမှ ကင်းလွတ်ခွင့်ပြုရေးအတွက် အိန္ဒိယအာဏာပိုင်များနှင့် ချိတ်ဆက် ဆောင်ရွက်နေကြောင်း သိရှိရပါသည်။ SFA မှ မီဒီယာများသို့ ပြောကြားရာတွင် အဖွဲ့ အစည်းအနေဖြင့် ဆန်စပါးသိုလှောင်မှုအစီအစဉ်ကို ဆောင်ရွက်သွားမည်ဖြစ်ပြီး လက်ရှိကာလတွင် ဆန်အရောင်း တည်ငြိမ်လျက်ရှိကာ ပြည်တွင်းစားသုံးသူများအားလုံး လိုအပ်သမျှ ဝယ်ယူနိုင်မည့် လုံလောက်သော ပမာဏရှိကြောင်းနှင့် ဆန်စပါးသိုလှောင်မှုအစီအစဉ်အရ ဆန်တင်သွင်းသူများသည် ၄င်းတို့လစဉ်တင်သွင်းမှု ဆန်ပမာဏ၏ နှစ်ဆရှိသော ကုန်လက်ကျန်များကို လက်ဝယ်ထားရှိရန် လိုအပ်ကြောင်း ပြောကြားခဲ့ပါသည်။

အိန္ဒိယနိုင်ငံသည် စင်္ကာပူနိုင်ငံ၏ ဆန်တင်သွင်းမှု၏ ၄ဝ ရာခိုင်နှုန်းကို ရရှိထားပြီး ဘာစမာတီမဟုတ်သော (ဆန်) တင်သွင်းမှုကိုသာ ပိတ်ပင်ထားခြင်းဖြစ်ကြောင်း သိရှိရပါသည်။ ဘာစမာတီမဟုတ်သောဆန်များ၏ တင်ပို့မှုမှာ စုစုပေါင်းဆန်တင်သွင်းမှု၏ ၁၇ ရာခိုင်နှုန်းရှိကြောင်း သိရှိရပါသည်။

စင်ကာပူနိုင်ငံတွင် ဆန်ရောင်းလိုအား ထိခိုက်မှုဖြစ်ပေါ်လာနိုင်ပြီး စင်ကာပူနိုင်ငံအစိုးရ သည် အကျိုးသက်ရောက်မှုအနည်းဆုံးဖြစ်စေရန် ကြိုးပမ်းသွားမည်ဖြစ်ကြောင်း၊ စားသုံးသူများအနေဖြင့် အခြားဆန်အမျိုးအစားများနှင့် ကာဗိုဟိုက်ဒရိတ်များမှရရှိသည့်အမျိုးအစားများကို စားသုံးခြင်းဖြင့် ဆန်စပါးဈေးကွက်ရောင်းလိုအား မတည်မငြိမ်ဖြစ်မှုကို လိုက်လျောညီထွေဖြစ်စွာ နေထိုင်နိုင်မည်ဖြစ်ကြောင်း SFA က ပြောကြားခဲ့ပါသည်။

စင်ကာပူနိုင်ငံသည် နိုင်ငံပေါင်း (၃ဝ) ကျော်မှ ဆန်တင်သွင်းလျက်ရှိပြီး နိုင်ငံ၏ဆန် ရောင်းလိုအား တည်ငြိမ်စေရန် စီစဉ်ဆောင်ရွက်လျက်ရှိပါသည်။ အိန္ဒိယနိုင်ငံသည် ၂ဝ၂၃ ခုနှစ် ဇူလိုင်လ ၂ဝ ရက်နေ့တွင် ဆန်ဖြူတင်ပို့မှုကို တားမြစ်ပိတ်ပင်ခဲ့ပြီး ကမ္ဘာ့ဆန်ဈေးကွက်တွင် ဆန်တစ်တန်လျှင် ဒေါ်လာ ၆ဝဝ ကျော်မြင့်တက်ခဲ့ပါသည်။ အိန္ဒိယနိုင်ငံ၏ ပြုတ်ဆန်နှင့် ထိုင်းနိုင်ငံ၏ ဆန်ကွဲ (၂၅%) တို့မှာ တစ်တန်လျှင် ဒေါ်လာ ၆ဝဝ အောက် ရောက်ရှိခဲ့ပါသည်။

အိန္ဒိယနိုင်ငံအစိုးရသည် ပါလီမန်ရွေးကောက်ပွဲကာလ ၂ဝ၂၄ ခုနှစ်မတိုင်မီ အရေးကြီးသည့် ၂ဝ၂၃ ခုနှစ်အတွင်း ဆန်ဈေးနှုန်းများ မြင့်တက်မှုကို ထိန်းချုပ်နိုင်ရန် ဆန်ဖြူတင်ပို့မှုကို တားမြစ်ပိတ်ပင်ခဲ့ပါကြောင်း၊ ယင်းကဲ့သို့ တားမြစ်ပိတ်ပင်ခဲ့မှုမှာ အိန္ဒိယနိုင်ငံအတွင်းရှိ Karnataka ၊ West Bengal ၊ Chhattisgarh ၊ Tamil Nadu နှင့် Andhra Pradesh ဒေသများတွင် မိုးရွာသွန်းမှု လျော့နည်းခဲ့သဖြင့် စပါးရိတ်သိမ်းမှုအပေါ် ထိခိုက်စေခဲ့မှုအပြင် Punjab နှင့် Haryana ဒေသများတွင် မိုးရွာသွန်းမှုကြောင့် စပါးသီးနှံများ ပျက်စီးခဲ့ခြင်းကြောင့် စပါးရောင်းလိုအား ပြတ်လပ်မှုအရေးကိစ္စကို ဖြေရှင်းဆောင်ရွက်နိုင်ရန်အတွက်ဖြစ်ကြောင်း သိရှိရပါသည်။

Source: The Hindu Business Line, 21 Aug 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

အယ်လ်နီညိုရာသီဥတုကြောင့် အင်ဒိုနီးရှားနိုင်ငံ၏ ဆန်ထွက်ရှိမှုကို အဟန့်အတားဖြစ်လာစေနိုင်သည့်အတွက် အင်ဒိုနီးရှားနိုင်ငံ၏ နိုင်ငံပိုင်စားနပ်ရိက္ခာဝယ်ယူရေးကုမ္ပဏီ Bulog သည် ကမ္ဘောဒီးယားနိုင်ငံနှင့် မြန်မာနိုင်ငံတို့မှ ဆန်တင်သွင်းသွားမည်ဖြစ်ပါသည်။ Bulog သည် ၂ဝ၂၃ ခုနှစ်အတွင်း ထိုင်း၊ ဗီယက်နမ်၊ အိန္ဒိယနှင့် ပါကစ္စတန်နိုင်ငံတို့မှ ဆန်တန်ချိန် ၁.၆ သန်း တင်သွင်း ခဲ့ပြီး ပြည်တွင်းစားသုံးရန်အတွက် ဆန်တန်ချိန် ၇၈၆,၆၉၇ တန် ဝယ်ယူပြီးဖြစ်ကြောင်း သိရှိရပါသည်။ ယခုအခါ အယ်လ်နီညို၏ ဆိုးရွားသောအကျိုးသက်ရောက်မှုကြောင့် ကုမ္ပဏီအနေဖြင့် အရေးပေါ်အစီအစဉ်အရ ကမ္ဘောဒီးယားနှင့်မြန်မာနိုင်ငံတို့မှ ဆန်တင်သွင်းသွားမည်ဖြစ်ကြောင်း သိရှိရပါသည်။

အင်ဒိုနီးရှားသည် ခြောက်သွေ့သောရာသီဥတုပုံစံကြောင့် အချို့သောကျွန်းစုနေရာများတွင် မိုးခေါင်ရေရှားမှုများ ဖြစ်ပေါ်လာနိုင်သည့်အတွက် ၂၀၂၂ ခုနှစ်မှ လက်ကျန်ဆန်တန်ချိန် ခွဲတမ်း ၃ဝဝ,ဝဝဝ တန်နှင့်အတူ ၂၀၂၃ ခုနှစ်အတွက် ဆန်တန်ချိန် ၂ သန်း ကိုတင်သွင်းရန် ခွဲတမ်းအဖြစ် ထုတ်ပြန်ခဲ့ပြီး ထိုသို့ဆောင်ရွက်ခြင်းသည် ပြည်တွင်းစားသုံးမှုလိုအပ်ချက်များ ပြည့်မီစေရေးနှင့် ဈေးနှုန်းတည်ငြိမ်စေရေးတို့အတွက်ဖြစ်ကြောင်း သိရှိရပါသည်။

Bulog သည် ကမ္ဘောဒီးယားနှင့် မြန်မာနိုင်ငံတို့မှ ဆန်တင်သွင်းသည့် စာချုပ်များကို အပြီး သတ်ချုပ်ဆိုခြင်း မပြုလုပ်ရသေးသော်လည်း မကြာမီအချိန်ကာလတွင် ချုပ်ဆိုဆောင်ရွက်သွားမည်ဖြစ်ပါကြောင်း၊ အင်ဒိုနီးရှားနိုင်ငံအစိုးရ၏ ကိန်းဂဏန်းအချက်အလက်များအရ အင်ဒိုနီးရှား နိုင်ငံ၏ နှစ်စဉ်ဆန်ထွက်ရှိမှုသည် တန်ချိန် ၃၁.၅၆ သန်းရှိပြီး စားသုံးမှုမှာ တန်ချိန် ၃၀.၈၄ သန်းရှိမည်ဟု ခန့်မှန်းထားကြောင်း သိရှိရပါသည်။

အင်ဒိုနီးရှားနိုင်ငံတွင် ဆန်တင်သွင်းမှုတိုးမြင့်လာရခြင်းသည် ဈေးနှုန်းအပေါ် ကျရောက်နေသည့် ဖိအားအချို့လျော့ပါးစေရန် မျှော်လင့်ကြောင်းနှင့် လက်ရှိကာလတွင် အင်ဒိုနီးရှားနိုင်ငံရှိ အလယ်အလတ်တန်းဆန် တစ်ကီလိုလျှင် ပျမ်းမျှ ၁၃, ၆ဝဝ ရူပီး (ဒေါ်လာ ဝ.၈၈၇၁) ရှိပြီး ယခင်နှစ်နှင့် နှိုင်းယှဉ်ပါက ၁၄.၇၇ ရာခိုင်နှုန်း မြင့်တက်လာခဲ့သည်။ ဆန်ဈေးနှုန်းများ မြင့်တက်လာရ ခြင်း၏ အဓိကအကြောင်းရင်းမှာ လက်ရှိဖြစ်ပေါ်နေသော အယ်လ်နီညိုဖြစ်စဉ်အတွင်း စပါးအထွက်နှုန်း ကျဆင်းလာသဖြင့် ဆန်ထုတ်လုပ်မှုများ လျော့နည်းလာခြင်းကြောင့်ဖြစ်ကြောင်း သိရှိရပါသည်။

အင်ဒိုနီးရှားဆန်စက်များအသင်း၏ဥက္ကဋ္ဌဖြစ်သူ Nellys Soekidi က စပါးအထွက်နှုန်း လျော့နည်းကျဆင်းမှုကြောင့် ၂ဝ၂၃ ခုနှစ် ဇူလိုင်လတွင် ဒေသခံတောင်သူများမှ နိုင်ငံ၏အဓိက အချက်အချာကျသောဆန်ဈေးကွက်သို့ နေ့စဉ်ပျှမ်းမျှဆန်ရောင်းချမှုမှာ ၂ဝ ရာခိုင်နှုန်းခန့် လျော့နည်းသွားကြောင်းနှင့် ယင်းကဲ့သို့ ဆန်ထုတ်လုပ်မှုလျော့နည်းကျဆင်းမှုကြောင့် စပါးခွံမပါသော ဆန်များအတွက် ဈေးကွက်တွင် ယှဉ်ပြိုင်မှုများ များပြားလာစေခဲ့ပြီး ဈေးကွက်မတည်ငြိမ်မှုများ ကို ဖြစ်ပေါ်စေခဲ့ပါသည်။

ကမ္ဘာ့ထိပ်တန်းဆန်တင်ပို့သည့်နိုင်ငံဖြစ်သော အိန္ဒိယနိုင်ငံမှ ဆန်တင်ပို့မှုအပေါ် တားမြစ်ပိတ်ပင်ခဲ့ပြီးနောက် နိုင်ငံတကာဆန်ဈေးနှုန်းများမှာ သိသာစွာ အတက်အကျများပြားလာမှုနှင့်အတူ ကမ္ဘာ့ဆန်ရောင်းလိုအားအပေါ် စိုးရိမ်ပူပန်မှုများ ဖြစ်ပေါ်လျက်ရှိကြပါသည်။ ထိုကဲ့သို့ တားမြစ်ပိတ်ပင်မှုများကြောင့် ဗီယက်နမ်နိုင်ငံမှ ဆန်တင်ပို့သူများသည် ဆန်ရောင်းချရန်အတွက် မသေချာမရေရာမှုများဖြစ်ပေါ်နေသဖြင့် ဆန်တန်ချိန် ၅ဝဝ,ဝဝဝ ကို မြင့်မားသော ဈေးနှုန်းများဖြင့် ပြန်လည်ညှိနှိုင်းဆွေးနွေးသွားရန် စီစဉ်ဆောင်ရွက်လျက်ရှိကြပါသည်။ ကမ္ဘာ့နိုင်ငံများသည် နိုင်ငံတကာဆန်ရောင်းလိုအားကို စောင့်ကြည့်လျက်ရှိကြပြီး အင်ဒိုနီးရှားနိုင်ငံသည် အစားအသောက်ဖူလုံမှုအတွက် ရာသီဥတုနှင့်ဆက်နွယ်သည့် စိန်ခေါ်မှုများ လျော့နည်းသက်သာစေရန် ကြိုတင်စီမံဆောင်ရွက်လျက်ရှိပါသည်။

Source: Khmer Times, 22 Aug 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

မလေးရှားနိုင်ငံသည် စက်တင်ဘာလအတွက် စားအုန်းဆီကြမ်း (CPO) ၏ ပို့ကုန်အခွန်ကို ၈% ဖြင့် ဆက်လက်ထိန်းသိမ်းလျက် စားအုန်းဆီကြမ်း ရည်ညွှန်းစျေးနှုန်းကို တိုးမြှင့်ခဲ့ကြောင်း မလေးရှားစားအုန်းဆီဘုတ်အဖွဲ့၏ ဝက်ဘ်ဆိုက်တွင် ဩဂုတ်လ ၂၂ ရက်၊ အင်္ဂါနေ့၌ ဖော်ပြခဲ့သည်။

ကမ္ဘာ့ဒုတိယအကြီးဆုံး စားအုန်းဆီတင်ပို့သူဖြစ်သည့် မလေးရှားအနေဖြင့် သြဂုတ်လ အတွက် စားအုန်းဆီကြမ်း ရည်ညွှန်းစျေးနှုန်းကို မက်ထရစ်တစ်တန်လျှင် ၃၆၁၄.၂၈ ရင်းဂစ်ငွေ သတ်မှတ်ထားရာမှ စက်တင်ဘာလအတွက် ရည်ညွှန်းဈေးနှုန်းကို တစ်တန်လျှင် ၃၇၅၅.၁၃ ရင်းဂစ် (အမေရိကန်ဒေါ်လာ ၈၀၈.၀၈) သို့ တိုးမြှင့်ခဲ့သည်။

စားအုန်းဆီကြမ်းအတွက် ပို့ကုန်အခွန်ကို တစ်တန်လျှင် ရင်းဂစ်ငွေ ၂၂၅၀ မှ ၂၄၀၀ အတွင်း ၃% ဖြင့် စတင် ကောက်ခံခဲ့သော်လည်း ဈေးနှုန်းများမှာ တစ်တန်လျှင် ရင်းဂစ်ငွေ ၃၄၅၀ ထက် ကျော်လွန်သွားသည့်အချိန်တွင် ပို့ကုန်အခွန်အား ၈% ဖြင့် အမြင့်ဆုံးနှုန်းထားအဖြစ် သတ်မှတ်ထားခဲ့ကြောင်း သိရသည်။

Source: The Edge Malaysia, 22 Aug 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)