တောင်ငူခရိုင်၊ ဖြူးမြို့နယ်ရှိ တောင်သူဦးကြီးများသည် အဓိကအားဖြင့် စပါးနှင့်မတ်ပဲကို အဓိကစိုက်ပျိုးလျက်ရှိပါသည်။ ဖြူးမြို့နယ်တွင် မတ်ပဲစိုက်ဧကပေါင်း ၉၈၂၁၉ဧကစိုက်ပျိုးခဲ့ပြီး ဧကအားလုံးရိတ်သိမ်းပြီးစီးသွားပြီဖြစ်ပါသည်။ ပဲတီစိမ်းစိုက်ဧကအနေဖြင့်လည်း ၁၃၅၂၇ ဧကစိုက်ပျိုးခဲ့ပြီး ရိတ်သိမ်းပြီးစီးသွားပြီဖြစ်ပါသည်။
ဖြူးမြို့နယ်တွင် မိုးစပါးစိုက်ပျိုးပြီးလျှင် ယခင်က မတ်ပဲကိုသာ အဓိကထားစိုက်ပျိုးသော်လည်း ဖြူးချောင်းရေလှောင်တမံမှ တာဝန်ရှိလူကြီးများသည် ရေနုတ်မြောင်းများဖော်ဆောင်၍ စီမံကိန်းအလိုက် ရေပေးဝေကာ တောင်သူဦးကြီးများအား နွေစပါးစိုက်ပျိုးနိုင်အောင် လုပ်ဆောင်ပေးလျက်ရှိကြောင်း၊ ဖြူးမြို့နယ်ရှိ ချောင်းများနှင့်နီးသော အချို့ကျေးရွာများတွင်မူ ရေစုပ်စက်များဖြင့် မိမိလယ်ကွက်အတွင်းသို့ရေတင်ကာ နွေစပါးစိုက်ပျိုးကြကြောင်းနှင့် ဖြူးချောင်းရေလှောင်တမံမှပေးဝေသော ရေနှုတ်မြောင်းများနှင့် အနီးစပ်ဆုံးရှိကျေးရွာများမှလည်း နွေစပါးကိုစိုက်ပျိုးကြပါသည်။
စပါးဈေးနှုန်းဈေးကောင်းရရှိနေသာ ယခုကာလတွင် နွေစပါးစိုက်ပျိုးလိုသောတောင်သူဦးကြီးများ များပြားလျက်ရှိပါသည်။ ဖြူးချောင်းရေလှောင်တမံမှ တာဝန်ရှိလူကြီးများအနေဖြင့် ဖြူးတစ်မြို့နယ်လုံးရေပေးဝေနိုင်ရေး ကြိုးစားဆောင်ရွက်လျက်ရှိကြောင်းလည်း လေ့လာသိရှိခဲ့ရမှုအား တင်ပြလိုက်ရပါသည်။
DOCA(ပဲခူး)