မွန်ပြည်နယ်၊ စားသုံးသူရေးရာဦးစီးဌာန၊ ကျိုက်မရောမြို့နယ်တာဝန်ခံသည် ၃.၁.၂၀၂၃ ရက်နေ့တွင် မိတ်ဖက်ဌာနဖြစ်သော အထွေထွေအုပ်ချုပ်ရေးဦးစီးဌာန၊ စိုက်ပျိုးရေးဦးစီးဌာနတို့နှင့် ပူးပေါင်း၍ ကျိုက်မရောမြို့ ဓာတ်မြေဩဇာရောင်းချသည့် အရောင်းဆိုင်များအား ဈေးကွက် စောင့်ကြည့်စစ်ဆေးခြင်း ဆောင်ရွက်ခဲ့ပါသည်။
ထိုသို့ ဈေးကွက်စောင့်ကြည့်စစ်ဆေးရာတွင် ဈေးနှုန်းသက်သာသော အရည်အသွေးနိမ့် ဓာတ်မြေဩဇာများကို ထိုင်းနိုင်ငံထုတ် အိုင်ပီစီမြင်းပျံဓာတ်မြေဩဇာအတုများ ပြုလုပ်ရောင်းချနေမှု ရှိ/မရှိ စစ်ဆေးခဲ့ရာ ထိုင်းနိုင်ငံထုတ် အိုင်ပီစီမြင်းပျံဓာတ်မြေဩဇာများ တုပရောင်းချခြင်းမရှိကြောင်း သိရှိရပါသည်။
ထို့နောက် ဆိုင်ရှင်များအား စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များ၊ ကုန်အညွှန်းအမှတ်အသားဖော်ပြချက်နှင့်ပတ်သက်၍ အသိပညာပေးခြင်း၊ ကုန်အညွှန်း အမှတ်အသားဖော်ပြချက်များနှင့် စပ်လျဉ်း၍ အသေးစိတ်ဖော်ပြ ပါရှိသော လက်ကမ်းစာစောင်များအား ဖြန့်ဝေပေးခြင်းများ ဆောင်ရွက်ခဲ့ပြီး စိုက်ပျိုးရေးဦးစီးဌာနမှလည်း ဓာတ်မြေဩဇာနှင့်ပတ်သက်သည့် အမိန့်၊ ညွှန်ကြားချက်များအား ရှင်းလင်းဆွေးနွေးခဲ့ကြောင်း သတင်းရရှိပါသည်။
DOCA(မွန်)