စားသုံးသူရေးရာဦးစီးဌာန၊ ပဲခူးခရိုင်ဦးစီးမှူးနှင့် ဝန်ထမ်းများသည် ၂၃-၁၂-၂၀၂၂ ရက်နေ့တွင် ပဲခူးမြို့အတွင်းရှိ ဓာတ်မြေသြဇာရောင်းချသော လုပ်ငန်းရှင်များနှင့်တွေ့ဆုံ၍ ဓာတ်မြေသြဇာများ ဖြန့်ဖြူးရောင်းချခြင်းတွင် စားသုံးသူကာကွယ်ရေးဥပဒေတွင် ပြဋ္ဌာန်းထားသော ပြဋ္ဌာန်းချက်များနှင့်အညီ ဆောင်ရွက်ကြရန်နှင့် စီးပွားရေးလုပ်ငန်းရှင်များလိုက်နာရမည့် စားသုံးသူကာကွယ်ရေးဥပဒေပါ တာဝန်နှင့်ဝတ္တရားများအကြောင်းကို ရှင်းလင်းဆွေးနွေးခဲ့ပါသည်။
အဆိုပါဓာတ်မြေသြဇာရောင်းချသော လုပ်ငန်းရှင်များအား စီးပွားရေးလုပ်ငန်းများဆောင်ရွက်ရာတွင် စားသုံးသူကာကွယ်ရေးဥပဒေပါ ပြဋ္ဌာန်းချက်များကို လိုက်နာဆောင်ရွက်ရန်လိုအပ်ကြောင်း၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းဆိုင်ရာ ပြဋ္ဌာန်းချက်နှင့်ပတ်သက်၍ လုပ်ငန်းရှင်များလိုက်နာဆောင်ရွက်နိုင်ရန် မြန်မာနိုင်ငံ စားသုံးသူကာကွယ်ရေးကော်မရှင်က ညွှန်ကြားချက်အမှတ် ၂/၂၀၁၉ နှင့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ညွှန်ကြားချက်အမှတ် ၁/၂၀၂၁ တို့ကို ထုတ်ပြန်ထားပြီးဖြစ်ကြောင်း လုပ်ငန်းရှင်များသိရှိစေရန်နှင့် ကုန်အညွှန်းအမှတ်အသားနှင့်စပ်လျဉ်း၍ ထုတ်လုပ်သည့်လုပ်ငန်းရှင်များသာမက ရောင်းချသည့်လုပ်ငန်းရှင်များတွင်လည်း တာဝန်ရှိ၍ ကုန်အညွှန်းအမှတ်အသား ပြည့်စုံခြင်းမရှိသည့်ကုန်ပစ္စည်းများကို ရောင်းချခြင်းမပြုကြရန် ရှင်းလင်းဆွေးနွေးခဲ့ကြောင်း သိရှိရပါသည်။
DOCA(ပဲခူး)