ထိုင်းနိုင်ငံ၏ သကြားထွက်ရှိမှုသည် လာမည့်ရာသီတွင် ၁၂.၅ ရာခိုင်နှုန်းအထိ ကျဆင်းနိုင်

      ကမ္ဘာ့ဒုတိယအကြီးဆုံး သကြားတင်ပို့သည့်နိုင်ငံဖြစ်သော ဘရာဇီးနိုင်ငံ၏နောက်၌ ရပ်တည် နေသည့် ထိုင်းနိုင်ငံ၏ သကြားထုတ်လုပ်မှုသည် ၂၀၂၆-၂၀၂၇ ရာသီတွင် တန်ချိန် ၁၀.၅ သန်းသို့ ၁၂.၅ ရာခိုင်နှုန်းကျဆင်းမည်ဟု ကြံလုပ်ငန်းမှ အရာရှိတစ်ဦးက ပြောကြားခဲ့သည်။ အဆိုပါခန့်မှန်း ချက်အရ သကြားထွက်ရှိမှုကျဆင်းခြင်းသည် မိုးခေါင်ရေရှားမှု၊ ကုန်ကျစရိတ်များ မြင့်တက်လာမှုနှင့် ထိုင်းတောင်သူများမှ ပီလောပီနံသီးနှံသို့ ပြောင်းလဲစိုက်ပျိုးလာမှုတို့၏ ရလဒ်ဖြစ်သည်ဟု ကြံနှင့် သကြားဘုတ်အဖွဲ့၏ မဟာဗျူဟာနှင့် စီမံကိန်းညွှန်ကြားရေးမှူး Thawat Hamarn က ပြောကြား ခဲ့သည်။

      ကြံထွက်ရှိမှုသည် ယခင်ရာသီက တန်ချိန် ၁၀၅ သန်းမှ ၉.၅ ရာခိုင်နှုန်းကျဆင်း၍ တန်ချိန် ၉၅ သန်းခန့်သို့ ရောက်ရှိမည်ဟု ခန့်မှန်းရကြောင်း၊ အဆိုပါခန့်မှန်းချက်သည် ဒီဇင်ဘာလမှ ဧပြီလ အထိ လည်ပတ်မည်ဟု မျှော်လင့်ရသော ၂၀၂၆-၂၀၂၇ ကြံရိတ်သိမ်းရာသီကို Mr Thawat က ရည်ညွှန်းပြောဆိုခြင်းဖြစ်သည်။

       တောင်သူများသည် ဓာတ်မြေသြဇာ ကုန်ကျစရိတ်များ မြင့်တက်လာမှုကို ရင်ဆိုင်ခဲ့ရပြီး ကြံဈေးနှုန်းများမှာ လုံလောက်စွာဆွဲဆောင်မှု မရှိသည့်အတွက် အချို့သော ကြံစိုက်ပျိုးသူများသည် ပိုမိုအမြတ်အစွန်းရှိသော သီးနှံများသို့ ပြောင်းလဲစိုက်ပျိုးလာကြောင်း၊ ထိုင်းနိုင်ငံ၊ အိန္ဒိယနိုင်ငံနှင့် ဘရာဇီးနိုင်ငံတို့တွင် မိုးခေါင်ရေရှားမှုကြောင့် ကြံထုတ်လုပ်မှုကျဆင်းနိုင်သည်ဟု မျှော်လင့်ချက်များ ကြားတွင် ကမ္ဘာ့သကြားဈေးနှုန်းများ မြင့်တက်လာခဲ့ကြောင်း ထိုင်းကြံစိုက်ပျိုးသူများ အဖွဲ့ချုပ်၏ မန်နေဂျာ Naradhip Anantasuk က ပြောကြားခဲ့သည်။

       သို့သော် တောင်သူများအနေဖြင့် ၎င်းတို့၏ ကုန်ကျစရိတ်များ ကာမိနိုင်ရန်အတွက် ဈေးနှုန်းများသည် တစ်ပေါင်လျှင် ၂၁ ဆင့်မှ ၂၂ ဆင့်ခန့်အထိ ရောက်ရှိရန် လိုအပ်မည်ဖြစ်ကြောင်း Mr Naradhip က ပြောကြားခဲ့ပြီး လက်ရှိဈေးနှုန်းများမှာ တစ်ပေါင်လျှင် ၁၈ဆင့်မှ ၁၉ ဆင့်ခန့် ရှိသည်။

       ခွန်ကန်ပြည်နယ်တွင် ကြံထုတ်လုပ်မှုသည် ယခင်ရာသီက တန်ချိန် ၅.၈၆ သန်းရှိခဲ့ရာမှ တန်ချိန် ၁.၈ သန်းအထိ ကျဆင်းနိုင်သည်ဟု ဒေသခံအရာရှိတစ်ဦးက ပြောကြားခဲ့သည်။ မိုးရွာ သွန်းမှု မညီမျှခြင်း၊ တောင်သူများ၏ အကြွေးဝန်ထုပ်ဝန်ပိုးများနှင့် ရောဂါဖြစ်ပွားမှုများသည် ကြံ ထုတ်လုပ်မှုကို ကျဆင်းစေနိုင်ကြောင်း ပြည်နယ်အတွင်းရှိ ကြံစိုက်ပျိုးသူများအသင်း၏ အရာရှိ တစ်ဦးဖြစ်သော Chairat Kittivarapol က ပြောကြားခဲ့သည်။

Source: Bangkok Post, September 14 , 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)