အင်ဒိုနီးရှားနိုင်ငံသည် ကမ္ဘာ့ဈေးကွက်တွင်မရှိမဖြစ်အဆီများ (essential oils) ဝယ်လိုအားမြင့်တက်လာမှုကို အခွင့်အလမ်းအဖြစ်အသုံးချ၍ Patchouli ဆီထုတ်လုပ်မှုကို ပိုမို နက်ရှိုင်းစွာဆောင်ရွက်ပြီး ပို့ကုန်တိုးမြှင့်ရန်ကြိုးပမ်းလျက်ရှိကြောင်း သိရပါသည်။ စက်မှုဝန်ကြီး Agus Gumiwang Kartasasmita က ဩဂုတ် ၂၀ ရက်တွင် ဂျကာတာမြို့၌ ထုတ်ပြန်သည့် ကြေညာချက်တွင် အင်ဒိုနီးရှားနိုင်ငံ၏ essential oils ပို့ကုန်အလားအလာသည် ပိုမိုကောင်းမွန်လာနေကြောင်း ပြောကြားခဲ့ပါသည်။ ကုန်သွယ်မှုဆိုင်ရာအချက်အလက်များအရ အင်ဒိုနီးရှား နိုင်ငံ၏ HS Code 3301 အောက်ရှိ essential oils ပို့ကုန်တန်ဖိုးသည် ၂၀၂၅ ခုနှစ်တွင် အမေရိကန်ဒေါ်လာ ၃၄၈.၇ သန်း ရှိခဲ့ပြီး ၂၀၂၄ ခုနှစ်က အမေရိကန်ဒေါ်လာ ၂၅၉.၅ သန်းမှ ၃၄.၄ ရာခိုင်နှုန်း တိုးတက်ခဲ့ကြောင်း သိရပါသည်။ ထို့အတူ အင်ဒိုနီးရှားနိုင်ငံ၏ Patchouli ဆီ ပို့ကုန်တန်ဖိုးသည် ၂၀၂၅ ခုနှစ်တွင် အမေရိကန်ဒေါ်လာ ၁၇၃.၄ သန်း ရှိခဲ့ပြီး ယခင်နှစ်က အမေရိကန်ဒေါ်လာ ၁၄၁.၃ သန်းမှ ၂၂.၇ ရာခိုင်နှုန်း မြင့်တက်ခဲ့ကြောင်း သိရပါသည်။ ထိုပို့ကုန် တိုးတက်မှုက အင်ဒိုနီးရှားနိုင်ငံထုတ် essential oils များမှာ ကမ္ဘာ့ဈေးကွက်တွင် ယှဉ်ပြိုင်နိုင်စွမ်းရှိပြီး ဝယ်လိုအားကောင်းနေသည်ကို ပြသနေကြောင်း ဝန်ကြီးကပြောကြားပြီး ပြည်တွင်းတန်ဖိုး မြှင့်ထုတ်လုပ်မှုနှင့် စက်မှုလုပ်ငန်းဖွံ့ဖြိုးတိုးတက်ရေးကို ပိုမိုခိုင်မာစေရန် တိုက်တွန်းခဲ့ကြောင်း သိရပါသည်။ အင်ဒိုနီးရှားသည် ၂၀၂၅ ခုနှစ်တွင် အိန္ဒိယ၊ အမေရိကန်၊ ပြင်သစ်နှင့် ဘရာဇီး နိုင်ငံတို့နောက် ကမ္ဘာ့ပဉ္စမအကြီးဆုံး essential oils ပို့ကုန်နိုင်ငံ ဖြစ်လာခဲ့ကြောင်း သိရပါသည်။ ကမ္ဘာ့ essential oils ကုန်သွယ်မှုတန်ဖိုးမှာလည်း ၂၀၂၄ ခုနှစ်က အမေရိကန်ဒေါ်လာ ၆ ဒသမ ၂၉ ဘီလီယံမှ ၂၀၂၅ ခုနှစ်တွင် အမေရိကန်ဒေါ်လာ ၆.၄၉ ဘီလီယံအထိ မြင့်တက်ခဲ့ကြောင်း သိရ ပါသည်။ သို့သော် စီးပွားရေးတန်ဖိုးပိုမိုမြင့်မားသည့် ဆင့်ပွားထုတ်ကုန်များ ထုတ်လုပ်ဖွံ့ဖြိုးရေး တွင် စိန်ခေါ်မှုများရှိနေဆဲဖြစ်ကြောင်း Agus က ပြောကြားခဲ့ပါသည်။ အင်ဒိုနီးရှားနိုင်ငံတွင် Patchouli ဆီ ထုတ်လုပ်မှုအခြေခံကောင်းမွန်ပြီး ပို့ကုန်ဈေးကွက်များလည်း ခိုင်မာစွာ တည်ရှိနေသဖြင့် ယင်းလုပ်ငန်းကဏ္ဍတွင် ဖွံ့ဖြိုးတိုးတက်ရန် အလားအလာများစွာရှိကြောင်း ဝန်ကြီးက ဆိုပါသည်။ အင်ဒိုနီးရှားနိုင်ငံသည် Patchouli ဆီ များကို အိန္ဒိယ၊ စင်ကာပူ၊ ပြင်သစ်၊ စပိန်၊ အမေရိကန်၊ တရုတ်၊ ဆွစ်ဇာလန်၊ ဘယ်လ်ဂျီယမ်၊ နယ်သာလန်၊ ဂျာမနီ၊ ဗြိတိန်နှင့် တူရကီနိုင်ငံတို့သို့ တင်ပို့လျက်ရှိကြောင်း သိရပါသည်။ စက်မှုဝန်ကြီးဌာန၏ စိုက်ပျိုးရေး အခြေပြုစက်မှုလုပ်ငန်း ညွှန်ကြားရေးမှူးချုပ်အဖြစ် ယာယီတာဝန်ယူထားသူ Putu Juli Ardika က Patchouli ဆီကို သန့်စင်ခြင်းနှင့် အစိတ်အပိုင်းခွဲထုတ်ခြင်း (refining and fractionation) တို့ဖြင့် အဆင့်မြှင့်ထုတ်လုပ်ပါက စီးပွားရေးတန်ဖိုးပိုမိုမြင့်မားသည့် ထုတ်ကုန်များ ထုတ်လုပ်နိုင်မည်ဖြစ်ကြောင်း ပြောကြားခဲ့ပါသည်။ တန်ဖိုးမြှင့်ထုတ်ကုန်များအဖြစ် အရည်အသွေးမြင့် Patchouli ဆီ၊ အမွှေးနံ့သာများ၊ ပိုးသတ်ဆေးများ၊ ဆေးဝါးပါဝင်သည့် အဆီများနှင့် အနံ့ကုထုံး (aromatherapy) ထုတ်ကုန်များထုတ်လုပ်နိုင်ကြောင်း Ardika က ဆိုပါသည်။ Patchouli ဆီကို ပြည်တွင်း၌ပိုမိုအဆင့်မြှင့် ထုတ်လုပ်နိုင်ပါက ကုန်ကြမ်းအဖြစ်အသုံးပြုမှုအပြင် ရေမွှေး၊ အလှကုန်၊ ကိုယ်ရေးကိုယ်တာသုံးပစ္စည်းများ၊ ဆေးဝါး၊ ပိုးသတ်ဆေးနှင့် အနံ့ကုထုံးလုပ်ငန်းများအထိ အသုံးပြုနိုင်သည့်ဈေးကွက်များကို ပိုမိုချဲ့ထွင်နိုင်မည်ဖြစ်ကြောင်း Ardika က ပြောကြားခဲ့ကြောင်း သိရှိရပါသည်။
Antara News
DOCA (ရန်ကုန်)