ကုန်ကျစရိတ်များ မြင့်တက်နေသော်လည်း ထိုင်းနိုင်ငံ၏ ဒူးရင်းသီး တင်ပို့မှုသည် ၂၀၂၅ ခုနှစ် ထက် ကျော်လွန်

   ထုတ်လုပ်မှုနှင့် သယ်ယူပို့ဆောင်ရေးကုန်ကျစရိတ်များ မြင့်တက်လာခြင်း၊ ပြိုင်ဆိုင်မှု ပြင်းထန်လာခြင်းတို့ရှိသော်လည်း ယခုနှစ်အတွင်း ထိုင်းနိုင်ငံသည် ဒူးရင်းသီး တန်ချိန် ၁.၁၁ သန်း ကျော် တင်ပို့နိုင်ခဲ့ပြီး ယခင်နှစ် တင်ပို့မှု၏စုစုပေါင်းကို ကျော်လွန်၍ တင်ပို့မှုမြှင့်တင်နိုင်ခဲ့ သည်။

   ထိုင်းနိုင်ငံ ဒုတိယဝန်ကြီးချုပ်နှင့် စီးပွားရေးနှင့်ကူးသန်းရောင်းဝယ်ရေးဝန်ကြီး Suphajee Suthumpun က ထိုင်းနိုင်ငံသည် ဇန်နဝါရီလ ၁ ရက်မှ ဩဂုတ်လ ၄ ရက်အတွင်း ဒူးရင်းသီး တန်ချိန် ၁,၁၁၀,၆၅၅.၉၂ တန်၊ ကွန်တိန်နာ ၆၈,၀၄၄ လုံးကို တင်ပို့နိုင်ခဲ့ပြီး ဘတ်ငွေ ၁၂၇ ဘီလီယံကျော် ဝင်ငွေရရှိခဲ့ကြောင်း ပြောကြားခဲ့သည်။

   ၂၀၂၅ ခုနှစ်တွင် ထိုင်းနိုင်ငံသည် အမေရိကန်ဒေါ်လာ ၄.၃၆ ဘီလီယံ (ဘတ်ငွေ ၁၂၅ ဘီလီယံ ခန့်) တန်ဖိုးရှိသည့် ဒူးရင်းသီးတန်ချိန် ၉၇၉,၀၄၅ တင်ပို့ခဲ့သည်။ ထိုင်းစီးပွားရေးနှင့် ကူးသန်း ရောင်းဝယ်ရေးဝန်ကြီးဌာနက ယခုနှစ်တွင် ဒူးရင်းသီးထွက်ရှိမှုသည် ယခင်နှစ်ထက် ၃၃ ရာခိုင်နှုန်း တိုးလာပြီး တန်ချိန် ၂ သန်းခန့် ရှိလာနိုင်ကြောင်း ခန့်မှန်းထားသည်။

    Ms Suphajee က ဒူးရင်းသီး ရောင်းလိုအား တိုးလာခြင်း၊ နိုင်ငံတကာ ပဋိပက္ခများကြောင့် ပို့ဆောင်ခကုန်ကျစရိတ်များ မြင့်တက်လာခြင်းနှင့် အိမ်နီးချင်းနိုင်ငံများမှ ပြိုင်ဆိုင်မှု ပိုမိုပြင်းထန် လာခြင်းတို့ ရှိသော်လည်း ထိုင်းနိုင်ငံအနေဖြင့် ၎င်း၏ တင်ပို့မှုအရှိန်အဟုန်ကို ဆက်လက် ထိန်း သိမ်းနိုင်ခဲ့ကြောင်း ပြောကြားခဲ့သည်။

     Ms Suphajee က ဒူးရင်းသီးတင်ပို့မှု တိုးတက်လာခြင်းမှာ အကောက်ခွန်လုပ်ထုံးလုပ် နည်းများကို ချောမွေ့စေရန် ဆောင်ရွက်မှုများနှင့် သယ်ယူပို့ဆောင်ရေးကို မြှင့်တင်ဆောင်ရွက်မှု များကြောင့် တစိတ်တပိုင်း ဖြစ်ကြောင်း၊ ရထားဝန်ဆောင်မှုများနှင့် နောင်ခိုင်ခရိုင် နယ်စပ်ဖြတ် ကျော်လမ်းကြောင်းကို ပိုမိုအသုံးပြုခြင်းသည် ထောက်ပံ့ပို့ဆောင်ရေးဆိုင်ရာ ရွေးချယ်စရာများ ပေါ်ပေါက်လာစေပြီး ကြိုတင်၍ ဈေးကွက်စီမံချက်ရေးဆွဲခြင်းသည် ရောင်းလိုအားနှင့် ဝယ်လို အားကို မျှတစေရန် အထောက်အကူပြုကြောင်း ပြောကြားခဲ့သည်။

    ပြည်တွင်းနှင့် ပြည်ပဝယ်လိုအားထက် ရောင်းလိုအား ပိုလျှံလာပါက စျေးနှုန်းများအပေါ် ဖိအားကျရောက်မှုကို သက်သာစေရန် ဝန်ကြီးဌာနသည် ဒူးရင်းသီး ပြုပြင်ထုတ်လုပ်ခြင်းကိုလည်း အားပေးမြှင့်တင်နေကြောင်း၊ အတည်ပြုထားသော ဈေးကွက်မရှိဘဲ ကုန်ပစ္စည်းများ ထုတ်လုပ် ခြင်းထက် ဈေးကွက်ဝယ်လိုအားအပေါ် အခြေခံ၍ ပြုပြင်ထားသော ထုတ်ကုန်များကို ထုတ်လုပ် ရန် ထုတ်လုပ်သူများကို တိုက်တွန်းအားပေးလျက်ရှိကြောင်း၊ စွန့်ပစ်ပစ္စည်း လျှော့ချရေးအတွက် ကြိုးပမ်းမှု၏ တစ်စိတ်တစ်ပိုင်းအဖြစ် ဒူးရင်းခွံများကိုလည်း အော်ဂဲနစ်မြေဩဇာအဖြစ် ပြောင်း လဲသုံးစွဲလျက်ရှိကြောင်း သိရှိရသည်။

     Ms Suphajee က ထိုင်းတောင်ပိုင်းဒူးရင်းသီး ၇၀ ရာခိုင်နှုန်းမှ ၈၀ ရာခိုင်နှုန်းခန့်သည် ယခုအခါ ဈေးကွက်ထဲသို့ ဝင်ရောက်လာပြီဖြစ်ကြောင်း၊ ရာသီကုန်အထိ ပြည်တွင်းရောင်းချမှုနှင့် ပြည်ပတင်ပို့မှုကို အထောက်အကူပြုရန်နှင့် ထိုင်းတောင်ပိုင်းဒူးရင်းသီး တန်ချိန် ၃၀၀,၀၀၀ ခန့်ကို ဈေးကွက်သို့ တင်ပို့ရန် ဝန်ကြီးဌာနက ရည်မှန်းထားကြောင်း၊ ဒူးရင်းတန်ချိန် ၂၀၀,၀၀၀ ကျော်ကို စီမံဆောင်ရွက်ပြီးဖြစ်ကာ စျေးနှုန်းတည်ငြိမ်ရေးကို အထောက်အကူပြုနိုင်ခဲ့ကြောင်း၊ ရေ ရှည်တွင် ဈေးကွက်ဦးဆောင်သော ထုတ်လုပ်မှု၊ သီးနှံပြက္ခဒိန်၊ ပြုပြင်ထုတ်လုပ်ခြင်းနှင့် ပိုလျှံနေသော ထုတ်ကုန်များကို ပိုမိုကောင်းမွန်စွာ အသုံးချခြင်းတို့မှတစ်ဆင့် စနစ်ကို အားကောင်းစေရန် လိုအပ် ကြောင်း ပြောကြားခဲ့သည်။

Source: Bangkok Post, 10 August 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)