အာဆီယံ+၃ မက်ခရိုစီးပွားရေး သုတေသနရုံး (AMRO) က ဇူလိုင်လ ၂၇ ရက်နေ့တွင် ထုတ်ပြန်ခဲ့သည့် နောက်ဆုံးအစီရင်ခံစာအရ ကမ္ဘောဒီးယားနိုင်ငံ၏ စီးပွားရေးတိုးတက်မှုသည် လွန်ခဲ့သည့်နှစ်က ၅.၃ ရာခိုင်နှုန်း ရှိခဲ့ရာမှ ၂၀၂၆ ခုနှစ်တွင် ၄.၂ ရာခိုင်နှုန်းသို့ လျော့နည်းသွားမည်ဟု ခန့်မှန်းထားကြောင်း သိရသည်။
သို့သော်လည်း အဆိုပါ အရှေ့တောင်အာရှနိုင်ငံ၏ စီးပွားရေးတိုးတက်မှုသည် ၂၀၂၇ ခုနှစ် တွင် ၄.၉ ရာခိုင်နှုန်းသို့ ပြန်လည်မြင့်တက်လာမည်ဟု ခန့်မှန်းထားသည်။ ကမ္ဘာ့ရေနံစျေးနှုန်းများ မြင့်တက်လာမှုကြောင့် စားသုံးသူကုန်ဈေးနှုန်း ငွေကြေးဖောင်းပွမှုသည် လွန်ခဲ့သည့်နှစ်က ၂.၅ ရာခိုင်နှုန်းရှိခဲ့ရာမှ ယခုနှစ်တွင် ၅.၁ ရာခိုင်နှုန်းအထိ မြင့်တက်သွားနိုင်ပြီး ၂၀၂၇ ခုနှစ်တွင် ၂.၈ ရာခိုင်နှုန်းသို့ ပြန်လည်ကျဆင်းသွားမည်ဟု အစီရင်ခံစာကဆိုသည်။
အရှေ့အလယ်ပိုင်းဒေသတွင် ပဋိပက္ခများ တစ်ကျော့ပြန် အရှိန်မြင့်တက်လာပါက စွမ်းအင်၊ ရေကြောင်းပို့ဆောင်ရေးနှင့် အစားအသောက်စရိတ်များကို မြင့်တက်စေနိုင်ကြောင်း AMRO က အဓိက ကျဆင်းနိုင်ခြေရှိသော ဘေးထွက်ဆိုးကျိုးများအဖြစ် ထောက်ပြထားသည်။
ကမ္ဘောဒီးယား နည်းပညာနှင့် သိပ္ပံတက္ကသိုလ်၊ တရုတ်-အာဆီယံ လေ့လာရေးစင်တာ၏ ဒုတိယညွှန်ကြားရေးမှူး Thong Mengdavid က ကမ္ဘောဒီးယား၏ စီးပွားရေးသည် ကြံ့ကြံ့ ခံနိုင်စွမ်းရှိနေဆဲဖြစ်သော်လည်း အရှေ့အလယ်ပိုင်းပဋိပက္ခနှင့် ကမ္ဘောဒီးယား-ထိုင်း နယ်စပ် အငြင်းပွားမှုကဲ့သို့သော ပြင်ပနှင့် ပြည်တွင်း စိန်ခေါ်မှုနှစ်မျိုးလုံးနှင့် ရင်ဆိုင်နေရသည်ဟု ပြောကြားခဲ့သည်။ ဤပြဿနာများသည် စွမ်းအင်စျေးနှုန်းများကို အတက်အကျဖြစ်စေပြီး နယ်စပ်ကုန်သွယ်ရေးနှင့် ရင်းနှီးမြှုပ်နှံသူများ၏ ယုံကြည်မှုကို ထိခိုက်စေကြောင်း သူက Xinhua သတင်းဌာနသို့ ပြောကြားခဲ့သည်။
အဆိုပါပြဿနာများကို ဖြေရှင်းရန်အတွက် အစိုးရအနေဖြင့် ပြည်တွင်းဝယ်လိုအားကို မြှင့်တင်ရန်၊ ရင်းနှီးမြှုပ်နှံမှုဝန်းကျင်ကို တိုးမြှင့်ကောင်းမွန်စေရန်နှင့် ပြင်ပအတက်အကျများကို လျှော့ချကာ ဒေသတွင်း ကြံ့ကြံ့ခံနိုင်စွမ်းကို ခိုင်မာစေရန်အတွက် ဒေသတွင်းစီးပွားရေးပူးပေါင်း ဆောင်ရွက်မှုကို ပိုမိုနက်ရှိုင်းစွာ ဆောင်ရွက်သင့်သည်။
တစ်ချိန်တည်းမှာပင် အစိုးရအနေဖြင့် အွန်လိုင်းလိမ်လည်မှုများကို နှိမ်နင်းရန် ကြိုးပမ်းမှုများကို အရှိန်မြှင့်တင်သင့်ပြီး ငြိမ်းချမ်းသော တွေ့ဆုံဆွေးနွေးမှုများမှတစ်ဆင့် နယ်စပ်တည်ငြိမ်ရေးကို အာမခံသင့်ကြောင်း Mengdavid က ပြောကြားခဲ့သည်။
ကမ္ဘောဒီးယားနိုင်ငံအနေဖြင့် ပိုမိုမြင့်မားသော တန်ဖိုးရှိသည့် စီးပွားရေးတိုးတက်မှုနှင့် ပိုမိုအားကောင်းသော ကြံ့ကြံ့ခံနိုင်စွမ်းတို့ကို ရရှိစေရန်အတွက် စက်မှုလုပ်ငန်း ပြိုင်ဆိုင်ဆိုင်မှု စွမ်းရည်၊ ပြည်သူ့ဝန်ဆောင်မှုများ၊ သယ်ယူပို့ဆောင်ရေးနှင့် လုပ်သားစွမ်းရည်များကို မြှင့်တင်ရန် AI ကို အသုံးချသင့်ကြောင်းလည်း Thong Mengdavid က ဆက်လက်ပြောကြားခဲ့ကြောင်း သိရှိရပါသည်။
Source : Xinhua
DOCA (ရန်ကုန်)