အိန္ဒိယနိုင်ငံတွင် မုတ်သုံမိုးရွာသွန်းမှု နှောင့်နှေးခြင်းနှင့် နိုင်ငံ၏ နေရာဒေသအများအပြား၌ မိုးရေချိန် လျော့နည်းရရှိခြင်းတို့ကြောင့် စိုက်ပျိုးရေးလုပ်ကိုင်မှုများကို အကန့်အသတ်ဖြစ်စေပြီး ယခုနှစ် မိုးရာသီကာလတွင် သီးနှံစိုက်ပျိုးပြီးစီးမှု ဧရိယာမှာ လျော့နည်းလျက်ရှိသည်။ စိုက်ပျိုးရေး ဝန်ကြီးဌာန၏ အချက်အလက်များအရ ဇူလိုင် ၃ ရက်နေ့အထိ မိုးသီးနှံများ စိုက်ပျိုးပြီးစီးမှု ဧရိယာ သည် ဟက်တာပေါင်း ၃၅.၀၉ သန်းရှိပြီး ယခင်နှစ် ကာလတူ၌ စိုက်ပျိုးခဲ့မှုအောက် ၂၁ ရာခိုင်နှုန်း လျော့နည်းနေကြောင်း၊ ၎င်းပမာဏသည် ငါးနှစ်တာကာလအတွက် ပျမ်းမျှပုံမှန်စိုက်ပျိုးပြီးစီးလေ့ ရှိသည့် ဟက်တာ ၃၇.၃၃ သန်းအောက် ဆက်လက်နိမ့်ကျနေဆဲဖြစ်ကြောင်း Informist သတင်း မီဒီယာက ဖော်ပြထားသည်။
ယခုနှစ် စိုက်ပျိုးပြီးစီးမှုနည်းပါးသည့် မိုးသီးနှံများအနက် ပဲစင်းငုံသည် စိုက်ဧကအနည်းဆုံး ဖြစ်ပြီး ၎င်း၏နောက်တွင် ပဲပုပ်နှင့် မြေပဲတို့တည်ရှိနေသည်။ ဇူလိုင် ၃ ရက်နေ့အထိ ပဲစင်းငုံဧရိယာ ဟက်တာ ၁.၂၄ သန်း စိုက်ပျိုးပြီးဖြစ်ရာ ယခင်နှစ် ကာလတူ စိုက်ပျိုးနိုင်မှုအောက် ၄၁ ရာခိုင်နှုန်း အထိ လျော့ကျနေဆဲဖြစ်သည်။ အိန္ဒိယပြည်တွင်း၌ ပဲစင်းငုံစိုက်ပျိုးသည့် ထိပ်တန်း ပြည်နယ်များ ဖြစ်သော မဟာရဋ္ဌနှင့် ကာနာတကာတို့တွင် မိုးရွာသွန်းမှုမှာ ပုံမှန်ထက် များစွာနည်းပါးလျက်ရှိပြီး စိုက်ဧက တိုးတက်မှုကို နှေးကွေးစေလျက်ရှိသည်။ ၂၀၂၅ ခုနှစ်၌ သီးနှံစိုက်ပျိုးမှု ဆောလျင်စွာ စတင်ဆောင်ရွက်ခဲ့ခြင်းသည် ယခင်နှစ်နှင့် နှိုင်းယှဉ်ပါက ယခုနှစ် ပဲစင်းငုံစိုက်ပျိုးပြီးစီးမှု နည်းပါး နေပြီး ကွာဟချက် ကြီးမားနေရသည့် အကြောင်းအရင်းတစ်ခု ဖြစ်ဖွယ်ရှိကြောင်း ပဲဈေးကွက်၌ ပါဝင်လုပ်ကိုင်နေကြသူများက ပြောဆိုကြသည်။ ယခင်နှစ်တွင် အနောက်တောင်မုတ်သုံလေသည် ပုံမှန်စော၍ အိန္ဒိယနိုင်ငံ၏ နေရာဒေသ အများအပြားသို့ ဝင်ရောက်ခဲ့ရာ မိုးသီးနှံများ စိုက်ပျိုးမှုကို စော၍ လုပ်ဆောင်နိုင်ခဲ့ပြီး စိုက်ဧကများ တိုးတက်စေခဲ့ခြင်းဖြစ်သည်။
မတ်ပဲစိုက်ပျိုးပြီးစီးမှုသည်လည်း ယခင်နှစ်ကာလတူ၌ ဟက်တာ ၄၆၃၀၀၀ ရှိခဲ့ရာမှ ယခု နှစ်တွင် ဟက်တာ ၃၀၁၀၀၀ သို့ ကျဆင်းနေခဲ့သည်။ အလားတူ ပဲတီစိမ်းစိုက်ပျိုးထားရှိမှုမှာ ယခင် နှစ်၌ ဟက်တာ ၁.၇၂ သန်းရှိရာမှာ ယခုနှစ်တွင် ဇူလိုင် ၃ ရက်နေ့အထိ ဟက်တာ ၁.၆၈ သန်းသာ စိုက်ပျိုးပြီးစီးထားသည်။ ယခုနှစ် မိုးသီးနှံ ပဲမျိုးစုံ စုစုပေါင်း စိုက်ပျိုးပြီးစီးမှုမှာ ဟက်တာ ၃.၇၂ သန်း ရှိပြီး ယခင်နှစ် ကာလတူ၌ စိုက်ပျိုးနိုင်ခဲ့သည့် ဧရိယာအောက် ၂၂ ရာခိုင်နှုန်းခန့် လျော့နည်းလျက် ရှိသည်။
ဆီထွက်သီးနှံများအနက် နေကြာစိုက်ပျိုးမှုမှာ ယခင်နှစ်ကထက် ၇၂ ရာခိုင်နှုန်း တိုးတက်ပြီး ဧရိယာ ဟက်တာ ၇၉၀၀၀ ရှိသော်လည်း ပဲပုပ်စိုက်ဧကသည် ၄၀ ရာခိုင်နှုန်း လျော့ကျလျက် ဟက်တာ ၄.၇၈ သန်းနှင့် မြေပဲစိုက်ဧကသည်လည်း ၄၀ ရာခိုင်နှုန်းလျော့ကျလျက် ဟက်တာ ၁.၆၉ သန်းသာ စိုက်ပျိုးပြီးစီးထားသည်။ ဆီထွက်သီးနှံ စုစုပေါင်းစိုက်ပျိုးပြီးစီးမှုမှာ ဟက်တာ ၆.၆၃ သန်း ရှိပြီး ယခင် နှစ်ကာလတူ၌ စိုက်ပျိုးနိုင်ခဲ့သည့် ဧရိယာအောက် ၃၉ ရာခိုင်နှုန်းကျော် လျော့ကျနေဆဲဖြစ်သည်။
ထို့အတူ ဇူလိုင် ၃ ရက်အထိ စပါးစိုက်ပျိုးပြီးစီးမှုမှာ ဧရိယာဟက်တာ ၆.၀၂ သန်းဖြစ်ပြီး ယခင်နှစ် ကာလတူ၌ ဟက်တာ ၆.၉၃ သန်း စိုက်ပျိုးနိုင်ခဲ့မှု၏ အောက်၌သာရှိနေသည်။ အစိုးရက 'Shri Anna' ဟု အမည်ခေါ်ဆိုသည့် အခြားနှံစားသီးနှံများ စိုက်ပျိုးမှုမြှင့်တင်ခြင်းကို ဆောင်ရွက်ခဲ့ သော်လည်း စုစုပေါင်း စိုက်ပျိုးပြီးစီးမှုမှာ ဟက်တာ ၆.၀၁ သန်းဖြင့် ယခင်နှစ် စိုက်ပျိုးနိုင်မှုအောက် ၁ ရာခိုင်နှုန်း လျော့နည်းနေဆဲဖြစ်သည်။ နှံစားသီးနှံများအနက် ပြောင်းသီးနှံ စိုက်ပျိုးမှုသည် ၂၀၂၅ ခုနှစ်တွင် ဟက်တာ ၃.၅၀ သန်းရှိခဲ့ရာမှ ယခုနှစ်၌ ဟက်တာ ၃.၂၉ သန်းသို့ လျော့ကျခဲ့သည်။
စက်မှုကုန်ကြမ်း သီးနှံအုပ်စုတွင် ကြံစိုက်ပျိုးမှုသည် ယခင်နှစ်၌ ဟက်တာ ၅.၆၇ သန်းရှိရာမှ ယခုနှစ်တွင် ဟက်တာ ၅.၇၆ သန်းသို့လည်းကောင်း၊ ဂုံလျှော်စိုက်ပျိုးမှုသည် ယခင်နှစ်၌ ဟက်တာ ၆၁၆၀၀၀ ရှိရာမှ ယခုနှစ်တွင် ဟက်တာ ၆၂၈၀၀၀ သို့လည်းကောင်း အသီးသီး တိုးတက်လာခဲ့သည်။
အိန္ဒိယ မိုးလေဝသဌာန၏ အချက်အလက်များအရ ယခုနှစ် ဇွန်လ ၁ ရက်နေ့မှ ဇူလိုင်လ ၆ ရက်နေ့အတွင်း တစ်နိုင်ငံလုံး အတိုင်းအတာဖြင့် မိုးရေချိန်ရရှိမှုသည် ၁၇၀.၇ မီလီမီတာရှိပြီး အဆိုပါ ကာလအတွက် ပုံမှန်ပမာဏဖြစ်သော ၂၁၃.၃ မီလီမီတာ၏အောက်သို့ ၂၀ ရာခိုင်နှုန်းခန့် လျော့နည်း ရရှိခဲ့ကြောင်း သိရသည်။
Source: Infomist Media, 07 July 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)