မြိတ်မြို့နှင့် အနီးပတ်ဝန်းကျင်ရွာများသည် မိုးရေချိန်ပေါများခြင်း၊ မြေဆီလွှာကောင်းမွန်ခြင်းနှင့် အပူပိုင်းရာသီဥတုသင့်လျော်ခြင်းတို့ကြောင့် ငှက်ပျောသီးအပါအဝင် အပူပိုင်းသစ်သီးများ စိုက်ပျိုးရန်အလွန်သင့်တော်သည့် ဒေသများဖြစ်သည်။ မြိတ်ဒေသမှထွက်ရှိသော ငှက်ပျောသီးများသည် လတ်ဆတ်မှု၊ အရသာချိုမြိန်မှုနှင့် အရည်အသွေးကောင်းမွန်မှုတို့ကြောင့် ဒေသတွင်းစျေးကွက်တွင် လူကြိုက်များလျက်ရှိသည်။ မြိတ်ဒေသတွင် ငှက်ပျောသီးကို တောင်သူများက စိုက်ပျိုးရေးဝင်ငွေတိုးမြှင့်ရန် အရေးပါသောသီးနှံတစ်မျိုးအဖြစ် စိုက်ပျိုးကြသည်။ ရိတ်သိမ်းပြီးသော ငှက်ပျောသီးများကို ဒေသတွင်းစျေးကွက်များသာမက အခြားမြို့များသို့လည်း တင်ပို့ရောင်းချလျက်ရှိပြီး ဒေသခံများ၏စီး ပွားရေးအတွက် အရေးပါသောအခန်းကဏ္ဍမှ ပါဝင်လျက်ရှိသည်။ ငှက်ပျောသီးသည် ပိုတက်ဆီယမ် ကြွယ်ဝသောသစ်သီးတစ်မျိုးဖြစ်ပြီး အစာချေစနစ်ကို အထောက်အကူပြုခြင်းနှင့် နှလုံးကျန်းမာရေးကို ထိန်းသိမ်းပေးခြင်းတို့အတွက် အကျိုးပြုသောသီးနှံတစ်မျိုးဖြစ်ကြောင်း သိရပါသည်။
လတ်ဆတ်သောငှက်ပျောသီးကို တိုက်ရိုက်ရောင်းချနိုင်သည့်အပြင် ငှက်ပျောကြော်၊ ငှက်ပျောပေါင်း၊ မုန့်အမျိုးမျိုး၊ ဖျော်ရည်နှင့် Smoothie များအဖြစ်လည်း ပြုလုပ်ရောင်းချကြပါသည်။ မြိတ်ဒေသထွက်ငှက်ပျောသီးသည် သဘာဝအရသာ၊ လတ်ဆတ်မှုနှင့် အာဟာရမြင့်မားမှုတို့ကို ပေါင်းစပ်ထားသည့် ဒေသထွက်သီးနှံတစ်မျိုးဖြစ်ပြီး ဒေသခံတောင်သူများ၏ ဝင်ငွေတိုးတက်စေရန်နှင့် မြန်မာ့စိုက်ပျိုးရေးကဏ္ဍ ဖွံ့ဖြိုးတိုးတက်ရေးအတွက်လည်း အရေးပါသောသီးနှံတစ်မျိုးအဖြစ် ဆက်လက်ရပ်တည်လျက်ရှိသည်။
မြိတ်ဒေသရှိစျေးများပေါ်တွင် ငှက်ပျောသီး(၁)ဖီး လက်ကားစျေးမှာ (၁၅၀၀)မှ(၃၅၀၀) ကျပ်၊ လက်လီစျေး(၁)ဖီးကို (၂၀၀၀)မှ(၄၅၀၀) ကျပ်၊ တစ်လုံးစျေး (၂၀၀)မှ(၅၀၀)ကျပ်ဖြင့် ရောင်းချလျက်ရှိကြောင်း ဒေသခံတောင်သူများထံမှ သိရှိရပါသည်။
DOCA(တနင်္သာရီ)