ကမ္ဘောဒီးယားနိုင်ငံ၏ ပြည်ပပို့ကုန်တင်ပို့မှုသည် ၂၀၂၆ ခုနှစ်၏ ပထမ ၅ လတာကာလအတွင်း အမေရိကန်ဒေါ်လာ ၁၄ ဘီလီယံအထိရှိခဲ့ပြီး ယခင်နှစ် အလားတူကာလနှင့် နှိုင်းယှဉ်ပါက ၁၉ ရာခိုင်နှုန်း မြင့်တက်လာကြောင်း အကောက်ခွန်နှင့် ယစ်မျိုးဆိုင်ရာ အထွေထွေဦးစီးဌာနက ဇွန်လ ၁၀ ရက်နေ့ ထုတ်ပြန်သည့် အစီရင်ခံစာအရ သိရသည်။
အရှေ့တောင်အာရှနိုင်ငံတစ်ခုဖြစ်သော ကမ္ဘောဒီးယားနိုင်ငံ၏ ထိပ်တန်းပို့ကုန်တင်ပို့ရာ နိုင်ငံ ၅ နိုင်ငံမှာ အမေရိကန်၊ ဗီယက်နမ်၊ တရုတ်၊ ဂျပန်နှင့် ကနေဒါနိုင်ငံတို့ဖြစ်ကြောင်း အစီရင်ခံစာတွင် ဖော်ပြထားသည်။ တစ်ချိန်တည်းမှာပင် ယခုနှစ် ဇန်နဝါရီလမှ မေလအထိ ကာလအတွင်း နိုင်ငံ၏ သွင်းကုန်တင်သွင်းမှုသည်လည်း ယခင်နှစ် အလားတူကာလထက် ၁၈.၉ ရာခိုင်နှုန်း မြင့်တက်ခဲ့ပြီး ဒေါ်လာ ၁၆ ဘီလီယံအထိရှိခဲ့ကြောင်း အစီရင်ခံစာက ဆက်လက်ဖော်ပြသည်။
ကမ္ဘာ့ဘဏ်က ဇွန်လ ၉ ရက်နေ့တွင် ထုတ်ပြန်သည့် ကမ္ဘောဒီးယားနိုင်ငံစီးပွားရေး နောက်ဆုံးအခြေအနေ အစီရင်ခံစာ၌ ရွှေမပါဝင်ဘဲ ကမ္ဘောဒီးယားနိုင်ငံ၏ ကုန်ပစ္စည်းတင်ပို့မှုမှာ ဂဏန်းနှစ်လုံးအထိ တိုးတက်မှုနှုန်းဖြင့် အားကောင်းနေဆဲဖြစ်ကြောင်း ပြောကြားခဲ့သည်။
ကမ္ဘောဒီးယားနိုင်ငံ၏ ပြင်ပကုန်သွယ်ရေးကဏ္ဍသည် ကုန်ပစ္စည်းတင်ပို့မှုပိုင်းမှာ ခိုင်မာမှုရှိနေပြီး ခရီးသွားလုပ်ငန်း အားနည်းနေခြင်း၊ သွင်းကုန်ကုန်ကျစရိတ်များ မြင့်တက်လာခြင်း၊ ဈေးကွက်အနည်းငယ်အပေါ် စုပြုံအားထားနေရခြင်းကြောင့် ထိခိုက်လွယ်သော အားနည်းချက်များနှင့် ရင်ဆိုင်နေရကြောင်း ကမ္ဘာ့ဘဏ်၏ အစီရင်ခံစာတွင် ဖော်ပြထားသည်။ သို့သော် အထည်ချုပ်၊ ခရီးဆောင်အိတ်နှင့် ဖိနပ် (GTF) ကဏ္ဍ၏ ပါဝင်ပံ့ပိုးမှုများသည် လျော့နည်းသွားကြောင်း တွေ့ရသည်ဟု ဆက်လက်ပြောကြားခဲ့သည်။
စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၏ နိုင်ငံတော်အတွင်းရေးမှူးနှင့် ပြောရေးဆိုခွင့်ရှိသူ Penn Sovicheat က နိုင်ငံ၏ ပို့ကုန်တိုးတက်လာရခြင်းမှာ ဒေသတွင်း ဘက်စုံစီးပွားရေး ပူးပေါင်းဆောင်ရွက်မှု (RCEP) နှင့် ကမ္ဘောဒီးယားနိုင်ငံက တရုတ်၊ တောင်ကိုရီးယား၊ အာရပ်စော်ဘွားများပြည်ထောင်စုတို့နှင့် ချုပ်ဆိုထားသော နှစ်နိုင်ငံ လွတ်လပ်စွာကုန်သွယ်မှု သဘောတူညီချက်များ (FTAs) ကြောင့်ဖြစ်ပြီး အဆိုပါ ကုန်သွယ်ရေးသဘော တူညီချက်များက ပြည်တွင်းဖြစ် ထုတ်ကုန်များအပေါ် အခွင့်ထူးခံအခွန်နှုန်းထားများ ပေးဆောင်ထားခြင်းကြောင့် ဖြစ်ကြောင်း ပြောကြားခဲ့သည်ဟု သိရှိရပါသည်။
Source : Xinhua
DOCA (ရန်ကုန်)