ဗီယက်နမ်နိုင်ငံ၏ အမျိုးသားစာရင်းအင်းရုံး၏ ထုတ်ပြန်ချက်ကို ကိုးကား၍ ဗီယက်နမ် သတင်းအေဂျင်စီက ဇွန်လ ၈ ရက်နေ့တွင် ဖော်ပြချက်အရ ဇန်နဝါရီလမှ မေလအထိ ငါးလတာ ကာလအတွင်း ဗီယက်နမ်၏ စက်မှုကုန်ထုတ်လုပ်မှုသည် လွန်ခဲ့သော ၄ နှစ်တာကာလအတွင်း အားအကောင်းဆုံး တိုးတက်မှုကို မှတ်တမ်းတင်နိုင်ခဲ့ကြောင်း သိရသည်။
အဆိုပါ အစီရင်ခံစာအရ ယခု ငါးလတာကာလအတွင်း စက်မှုကုန်ထုတ်လုပ်မှုညွှန်းကိန်း (Index of Industrial Production) သည် ယခင်နှစ် အလားတူကာလနှင့် နှိုင်းယှဉ်ပါက ၉.၁ ရာခိုင်နှုန်း မြင့်တက်လာခဲ့ကြောင်း သိရသည်။
စက်မှုကဏ္ဍတိုးတက်မှု၏ အဓိကမောင်းနှင်အားဖြစ်သော ကုန်ထုတ်လုပ်မှုနှင့် ပြုပြင်မွမ်းမံမှုကဏ္ဍ (Manufacturing and Processing sector) သည် ၉.၅ ရာခိုင်နှုန်းအထိ မြင့်တက်ခဲ့ပြီး စုစုပေါင်းတိုးတက်မှုနှုန်း၏ ၇.၄ ရာခိုင်နှုန်းအထိ ပါဝင်ပံ့ပိုးပေးနိုင်ခဲ့သည်။ ထို့အပြင် သတ္တုတွင်း တူးဖော်ရေးကဏ္ဍသည် ၅.၅ ရာခိုင်နှုန်း ပြန်လည်ဦးမော့လာခဲ့ပြီး လျှပ်စစ်ဓာတ်အားထုတ်လုပ်ခြင်းနှင့် ဖြန့်ဖြူးခြင်းကဏ္ဍသည်လည်း ၇.၆ ရာခိုင်နှုန်း တိုးတက်လာခဲ့ကြောင်း သိရသည်။
အဓိက စက်မှုလုပ်ငန်းကြီး အချို့တွင်လည်း ဂဏန်းနှစ်လုံးရှိသော တိုးတက်မှုနှုန်းများ (Double-digit gains) ရရှိခဲ့ပြီး ၎င်းတို့ထဲတွင် သတ္တုထုတ်လုပ်မှု၊ မော်တော်ယာဉ်ထုတ်လုပ်မှုနှင့် ဓာတုဗေဒထုတ်ကုန်လုပ်ငန်းများ ပါဝင်သည်။ ထို့ပြင် မော်တော်ဆိုင်ကယ်ထုတ်လုပ်မှုမှာ ၃၆ ရာခိုင်နှုန်းအထိ သိသိသာသာ မြင့်တက်ခဲ့ပြီး မော်တော်ကားထုတ်လုပ်မှုမှာလည်း ၂၆.၇ ရာခိုင်နှုန်း အထိ ခုန်တက်သွားခဲ့ကြောင်း သိရသည်။
ဗီယက်နမ်နိုင်ငံတစ်ဝှမ်းရှိ ပြည်နယ်နှင့် မြို့ကြီး ၃၄ ခုလုံးတွင် စက်မှုကဏ္ဍတိုးတက်မှုများ ရရှိခဲ့ကြောင်း သိရှိရပါသည်။
Source : Xinhua
DOCA (ရန်ကုန်)