မေလတွင် ဗင်နီဇွဲလား၏ ရေနံတင်ပို့မှု တစ်ရက်လျှင် ဘာရယ် ၁.၂၅ သန်းအထိ မြင့်တက်လာ

          ဗင်နီဇွဲလားနိုင်ငံ၏ ရေနံတင်ပို့မှုသည် အမေရိကန်၊ အိန္ဒိယနှင့် ဥရောပနိုင်ငံများသို့ ကုန်စည်တင်ပို့မှု ပိုမိုများပြားလာခြင်းကြောင့် မေလတွင် တစ်ရက်လျှင် ရေနံဘာရယ် ၁.၂၅ သန်းအထိ အနည်းငယ် မြင့်တက်လာခဲ့ပြီး သုံးလဆက်တိုက် တိုးတက်မှုအဖြစ်ရှိနေကြောင်း ဇွန်လ ၁ ရက်နေ့တွင် ထွက်ပေါ်လာသည့် သင်္ဘောတင်ပို့မှုဆိုင်ရာ အချက်အလက်များအရ သိရပါသည်။

          အမေရိကန်က ထောက်ခံထားသည့် ယာယီသမ္မတ ဒဲလ်ဆီ ရိုဒရီဂွက်ဇ် (Delcy Rodriguez) ၏ အစိုးရလက်အောက်တွင် ဝါရှင်တန်က ပိတ်ဆို့အရေးယူမှုများကို ဖြေလျှော့ပေးခဲ့ပြီး နိုင်ငံခြားကုမ္ပဏီများက ဤ OPEC အဖွဲ့ဝင်နိုင်ငံရှိ ရေနံနှင့် သဘာဝဓာတ်ငွေ့ စီမံကိန်းများကို တိုးချဲ့လုပ်ကိုင်လာကြသဖြင့် ယခုနှစ်အတွင်း ဗင်နီဇွဲလား၏ ရေနံစိမ်းထုတ်လုပ်မှုနှင့် တင်ပို့မှုများ ပြန်လည်ဦးမော့လာခဲ့ကြောင်း သိရပါသည်။

        ရေနံဝန်ကြီးဌာနက ယခုနှစ်ကုန်တွင် အစိမ်းလိုက်ရေနံ ထုတ်လုပ်မှုပမာဏ တစ်ရက်လျှင် ဘာရယ် ၁.၃၇ သန်းအထိ ရှိလာမည်ဟု ခန့်မှန်းထားပြီး ယင်းသည် ၂၀၂၅ ခုနှစ်နှောင်းပိုင်းက ထွက်ရှိခဲ့သည့် တစ်ရက်လျှင် ဘာရယ် ၁.၁၂ သန်းထက် ၂၂ ရာခိုင်နှုန်း တိုးတက်လာမည် ဖြစ်ကြောင်း သိရပါသည်။

          အဆိုပါတိုးတက်လာခြင်းကြောင့် ဗင်နီဇွဲလားနိုင်ငံအနေဖြင့် နှစ်ပေါင်းများစွာ ရေနံမရောင်းချနိုင်ခဲ့သည့် နိုင်ငံများထံသို့ တင်ပို့မှုများကိုလည်း ပြန်လည်စတင်နိုင်ခဲ့ကြောင်း သိရပါသည်။ ရေနံတင်သင်္ဘောများ လှုပ်ရှားမှုနှင့် နိုင်ငံပိုင် PDVSA ကုမ္ပဏီ၏ မှတ်တမ်းများအပေါ် အခြေခံထားသည့် အချက်အလက်များအရ အမေရိကတောင်ပိုင်းနိုင်ငံဖြစ်သော ဗင်နီဇွဲလားမှ မေလအတွင်း တင်ပို့ခဲ့သည့် ရေနံစိမ်းနှင့် သန့်စင်ပြီး ရေနံထွက်ပစ္စည်း ပမာဏသည် ဧပြီလထက် ၀.၇ ရာခိုင်နှုန်း ပိုမိုမြင့်မားခဲ့ပြီး ယခင်နှစ် အလားတူလ၏ တင်ပို့မှုထက် ၆၁ ရာခိုင်နှုန်း ပိုမိုမြင့်မားခဲ့ကြောင်းနှင့် စုစုပေါင်း ကုန်စည်တင်ပို့မှု ၆၇ ကြိမ် ပြုလုပ်ခဲ့ကြောင်း သိရပါသည်။

          အချက်အလက်များနှင့် စာရွက်စာတမ်းများအရ အမေရိကန်သည် တစ်ရက်လျှင် ဘာရယ် ၅၅၈,၀၀၀ ခန့်ဖြင့် ဗင်နီဇွဲလားရေနံ၏ အဓိကပန်းတိုင်အဖြစ် ဆက်လက်ရှိနေပြီး ၎င်းနောက်တွင် အိန္ဒိယက တစ်ရက်လျှင် ဘာရယ် ၄၂၇,၀၀၀ ဖြင့်လည်းကောင်း၊ ဥရောပက တစ်ရက်လျှင် ဘာရယ် ၁၆၉,၀၀၀ ဖြင့်လည်းကောင်း အသီးသီး ရပ်တည်နေကြောင်း သိရပါသည်။

          ကာရစ်ဘီယံရှိ သိုလှောင်ရုံဆိပ်ကမ်းများသို့ တင်ပို့မှုမှာမူ ယခင်လက တစ်ရက်လျှင် ဘာရယ် ၁၈၇,၀၀၀ ရှိခဲ့ရာမှ ၅၈,၀၀၀ ခန့်သို့ ကျဆင်းသွားခဲ့ပြီး ယင်းသည် ဗင်နီဇွဲလား၏ ရေနံစိမ်းများနှင့် ရေနံချက်ကျန်လောင်စာဆီများအပေါ် ရေနံချက်စက်ရုံများ၏ ဝယ်လိုအား ပိုမိုကြီးမားလာခြင်းကို ပြသသည့် လက္ခဏာဖြစ်ကြောင်း သိရပါသည်။

            PDVSA ၏ အဓိက ဖက်စပ်လုပ်ငန်းလုပ်ကိုင်သူဖြစ်သည့် အမေရိကန်ရေနံကုမ္ပဏီ Chevron မှ အစိမ်းလိုက်ရေနံတင်ပို့မှုသည် ဧပြီလတွင် တစ်ရက်လျှင် ဘာရယ် ၃၀၈,၀၀၀ ရှိခဲ့ရာမှ မေလတွင် ၂၆၉,၀၀၀ ခန့်သို့ ကျဆင်းသွားခဲ့ကြောင်း သိရပါသည်။ တစ်ဖက်တွင်မူ Vitol နှင့် Trafigura အပါအဝင် ကမ္ဘာလုံးဆိုင်ရာ ကုန်သွယ်ရေးကုမ္ပဏီကြီးများ၏ အဆိုပါနိုင်ငံမှ ရေနံတင်ပို့မှုမှာမူ ယခင်လက တစ်ရက်လျှင် ဘာရယ် ၆၉၁,၀၀၀ ရှိခဲ့ရာမှ ၇၈၇,၀၀၀ သို့ မြင့်တက်လာခဲ့ကြောင်း သိရပါသည်။

        မကြာသေးမီလများအတွင်း ဗင်နီဇွဲလားအစိမ်းလိုက်ရေနံ၏ အကြီးဆုံးဝယ်ယူသူ သုံးဦးအနက် တစ်ဦးအဖြစ် ပေါ်ထွက်လာခဲ့သည့် အိန္ဒိယနိုင်ငံ၏ Reliance Industries ကုမ္ပဏီသည် ပြီးခဲ့သည့်လက PDVSA ထံမှလည်းကောင်း၊ ရောင်းချပေးသူများဖြစ်သည့် Chevron၊ Vitol နှင့် Trafigura တို့ထံမှလည်းကောင်း ကုန်စည်များကို တိုက်ရိုက်ဝယ်ယူခဲ့ကြောင်း သိရပါသည်။

     ဗင်နီဇွဲလားနိုင်ငံသည် အလှည့်ကျ ဓာတုဗေဒပစ္စည်းများနှင့် ရေနံဘေးထွက်ပစ္စည်း မက်ထရစ်တန် ၂၈၈,၀၀၀ ခန့်ကိုလည်း တင်ပို့ခဲ့သော်လည်း ယခင်လက တင်ပို့ခဲ့သည့် တန်ချိန် ၃၅၉,၀၀၀ ထက်မူ လျော့နည်းသွားခဲ့ကြောင်း သိရပါသည်။

Source: Reuters                                                                        

DOCA (ရန်ကုန်)