အင်ဒိုနီးရှားနိုင်ငံ ဒုတိယကုန်သွယ်ရေးဝန်ကြီး Dyah Roro Esti က ရုရှားနိုင်ငံနှင့် အထူးသဖြင့် ကုန်သွယ်ရေးနှင့် စီးပွားရေးကဏ္ဍများတွင် မဟာဗျူဟာမြောက် ပူးပေါင်းဆောင်ရွက်မှုများကို ပိုမိုခိုင်မာစေရန် အင်ဒိုနီးရှားအနေဖြင့် ကတိပြုထားကြောင်း ပြောကြားခဲ့ပါသည်။ မေလ ၁၅ ရက်နေ့ထုတ်ပြန်ချက်အရ Esti က နှစ်နိုင်ငံအကြား ကုန်သွယ်ရေးဆက်ဆံမှုများသည် အလားအလာကောင်းသော တိုးတက်မှုလမ်းကြောင်းပေါ်တွင် ဆက်လက်တည်ရှိနေကြောင်း ပြောကြားခဲ့ပါသည်။ ထိုတိုးတက်မှုအရှိန်အဟုန်ကို နှစ်ဖက်စလုံးအကျိုးရှိစေမည့် ကုန်သွယ်မှုတိုးမြှင့်ရေးနှင့် ပိုမိုကျယ်ပြန့်သော ရင်းနှီးမြှုပ်နှံမှု ပူးပေါင်းဆောင်ရွက်မှုများမှတစ်ဆင့် ဆက်လက်မြှင့်တင်နိုင်ရန် ၎င်းတို့အလိုရှိကြောင်း ရုရှားနိုင်ငံကာဇန်မြို့တွင် ရုရှားစီးပွားရေးဖွံ့ဖြိုးတိုးတက်ရေး ဒုတိယဝန်ကြီး Vladimir Iltichev နှင့် တွေ့ဆုံစဉ် Esti က ပြောကြားခဲ့ပါသည်။ မေ ၁၂ ရက်နေ့က ကျင်းပခဲ့သော အဆိုပါ နှစ်ဖက်ဆွေးနွေးပွဲသည် အင်ဒိုနီးရှားနှင့် ရုရှားအကြား ကုန်သွယ်ရေးနှင့် စီးပွားရေးပူးပေါင်းဆောင်ရွက်မှုကို ပိုမိုအားကောင်းစေရန် ရည်ရွယ်ထားကြောင်း သိရပါသည်။ Esti ၏ အဆိုအရ ၂၀၂၅ ခုနှစ်အတွင်း နှစ်နိုင်ငံ ကုန်သွယ်မှုတန်ဖိုးမှာ အမေရိကန်ဒေါ်လာ ၄.၈ ဘီလီယံအထိ ရောက်ရှိခဲ့ပြီး ယခင်နှစ်နှင့် နှိုင်းယှဉ်ပါက ၂၁.၇ ရာခိုင်နှုန်း တိုးတက်လာခဲ့ကြောင်း သိရပါသည်။ ရုရှားသည် Eurasian Economic Union (EAEU) အတွင်း အင်ဒိုနီးရှား၏ အဓိက မိတ်ဖက်နိုင်ငံဖြစ်ပြီး ဒေသတွင်း အင်ဒိုနီးရှား၏ စုစုပေါင်း ကုန်သွယ်မှု၏ ၉၀.၆ ရာခိုင်နှုန်းကို ပံ့ပိုးပေးထားကြောင်းလည်း Esti က ပြောကြားခဲ့ပါသည်။ ထို့ပြင် အင်ဒိုနီးရှားနှင့် ရုရှားတို့သည် အပြန်အလှန်ဖြည့်ဆည်းပေးနိုင်သော ကုန်သွယ်ရေးဆက်ဆံမှုရှိကြောင်း သိရပါသည်။ ရုရှားသည် အင်ဒိုနီးရှားအတွက် ကျောက်မီးသွေး၊ ဓာတ်မြေဩဇာနှင့် သံမဏိထုတ်ကုန်များကဲ့သို့ မဟာဗျူဟာမြောက် ကုန်ပစ္စည်းများ၏ အဓိကပံ့ပိုးသူဖြစ်ပြီး အင်ဒိုနီးရှားကလည်း စားအုန်းဆီ၊ ကော်ဖီ၊ အုန်းသီးထုတ်ကုန်များနှင့် ကိုကိုး စသည့်အရည်အသွေးမြင့် ထုတ်ကုန်များကို ရုရှားသို့ တင်ပို့နေကြောင်း သိရပါသည်။ Esti က ၂၀၂၅ ခုနှစ် ဒီဇင်ဘာလတွင် ရုရှားနိုင်ငံ စိန့်ပီတာစဘတ်မြို့၌ လက်မှတ်ရေးထိုးခဲ့သည့် Indonesia-EAEU လွတ်လပ်သောကုန်သွယ်ရေးသဘောတူညီချက် (FTA) အတည်ပြုရေးတိုးတက်မှုကိုလည်း အလေးပေးပြောကြားခဲ့ကြောင်း သိရပါသည်။ အင်ဒိုနီးရှားအစိုးရသည် ထိုသဘောတူညီချက်ကို ၂၀၂၆ ခုနှစ် တတိယ သို့မဟုတ် စတုတ္ထ သုံးလပတ်အတွင်း စတင်အသက်ဝင်စေရန် ရည်မှန်းထားပြီး ပြည်တွင်းအတည်ပြုရေး လုပ်ငန်းစဉ်ကို အရှိန်မြှင့်ဆောင်ရွက်နေကြောင်း သိရပါသည်။ သဘောတူညီချက်ကို ထိရောက်စွာ အကောင်အထည်ဖော်နိုင်ရန် အင်ဒိုနီးရှားက Indonesian Chamber of Commerce and Industry (Kadin) နှင့် ပူးပေါင်း၍ Indonesia-EAEU Business Council (IEBC) ဖွဲ့စည်းရန် အဆိုပြုထားကြောင်းလည်း Esti က ပြောကြားခဲ့ပါသည်။ Esti က Indonesia-EAEU Business Council ဖွဲ့စည်းမှုသည် စီးပွားရေးလုပ်ငန်းရှင်များအကြား ဆက်ဆံရေးပိုမိုခိုင်မာလာစေရန်၊ ရင်းနှီးမြှုပ်နှံမှု အခွင့်အလမ်းများတိုးချဲ့ရန်နှင့် နှစ်နိုင်ငံကုန်သွယ်မှု တိုးတက်လာစေရန် အထောက်အကူဖြစ်မည်ဟုလို့ မျှော်လင့်ကြောင်း ပြောကြားခဲ့ပါသည်။ ထို့အပြင် အင်ဒိုနီးရှားသည် သတင်းအချက် အလက်နည်းပညာ၊ ဆောက်လုပ်ရေး၊ ဟိုတယ်နှင့် ခရီးသွားဝန်ဆောင်မှု၊ ဒစ်ဂျစ်တယ်နည်းပညာ စသည့် ကဏ္ဍများတွင် ကျွမ်းကျင်လုပ်သားအင်အားများ ပံ့ပိုးပေးခြင်းအားဖြင့် ရုရှားစက်မှုလုပ်ငန်း လိုအပ်ချက်များကို အထောက်အကူပြုနိုင်မည့် ဝန်ဆောင်မှုကဏ္ဍ ပူးပေါင်းဆောင်ရွက်ရေး အခွင့်အလမ်းများကိုလည်း ဖွင့်လှစ်ထားကြောင်း သိရပါသည်။ Esti က ရုရှားစီးပွားရေးလုပ်ငန်းရှင်များအား ၂၀၂၆ ခုနှစ် အောက်တိုဘာ ၁၄ ရက်မှ ၁၈ ရက်အထိ ဘန်တန်တွင် ကျင်းပမည့် Trade Expo Indonesia (TEI) 2026 သို့ တက်ရောက်ရန် ဖိတ်ကြားခဲ့ကြောင်း သိရပါသည်။ Esti က Trade Expo Indonesia သည် နှစ်နိုင်ငံစီးပွားရေးလုပ်ငန်းရှင်များကို တွေ့ဆုံစေပြီး ကုန်သွယ်ရေးနှင့် ရင်းနှီးမြှုပ်နှံမှု ပူးပေါင်းဆောင်ရွက်မှု အခွင့်အလမ်းသစ်များ ဖွင့်လှစ်ပေးမည့် အရေးပါသော အခမ်းအနားတစ်ခုဖြစ်ကြောင်း ရှင်းပြခဲ့ပါသည်။ အဆိုပါ အခမ်းအနားတွင် Esti က သမ္မတ Prabowo Subianto ဦးဆောင်သည့် အစိုးရ၏ ဦးစားပေး မူဝါဒများအတွင်း စက်မှုလုပ်ငန်း အဆင့်မြှင့်တင်ရေး၊ ထုတ်ကုန်တန်ဖိုးမြှင့်တင်ရေးနှင့် ရေရှည်တည်တံ့သော စီးပွားရေးတိုးတက်မှု ဖော်ဆောင်ရေးတို့ ပါဝင်ကြောင်းလည်း အလေးပေးပြောကြားခဲ့ကြောင်း သိရှိရပါသည်။
Antara News
DOCA (ရန်ကုန်)