ဗီယက်နမ် အမျိုးသား ဓာတုပစ္စည်း အုပ်စု (Vinachem) ၏ အထွေထွေဒါရိုက်တာ Nguyen Huu Tu ဦးဆောင်သည့် ကိုယ်စားလှယ်အဖွဲ့သည် ဓာတုပစ္စည်းနှင့် မြေသြဇာ ကဏ္ဍများတွင် ပူးပေါင်းဆောင်ရွက်မှု မြှင့်တင်ရန်အတွက် အီဂျစ်နိုင်ငံသို့ အလုပ်သဘော ခရီးစဉ်တစ်ရပ် သွားရောက်ခဲ့ကြောင်း သိရပါသည်။ ဧပြီ ၁၄ ရက်တွင် Vinachem သည် အီဂျစ်နိုင်ငံရှိ apatite သတ္တုတူးဖော်ခြင်းနှင့် တင်ပို့မှုဈေးကွက်၏ ခန့်မှန်း ၄၀ ရာခိုင်နှုန်းခန့် ပိုင်ဆိုင်ထားသည့် Kayan for International Trade ကုမ္ပဏီနှင့် မဟာဗျူဟာပူးပေါင်းဆောင်ရွက်ရေး နားလည်မှုစာချွန်လွှာ (MoU) တစ်ရပ် လက်မှတ်ရေးထိုးခဲ့ကြောင်း သိရပါသည်။ သဘောတူညီချက်အရ Kayan သည် ထောက်ပံ့နိုင်စွမ်းနှင့် ထောက်ပံ့ပို့ဆောင်ရေး ကုန်ကျစရိတ် အားသာချက်များကို အသုံးချ၍ Vinachem ၏ မြေသြဇာစက်ရုံများအတွက် လိုအပ်သည့်ကုန်ကြမ်းများကို လာမည့်ကာလအတွင်း ပံ့ပိုးပေးသွားမည်ဖြစ်ကြောင်း သိရပါသည်။ ကုန်ကြမ်းထောက်ပံ့ရေးအပြင် နှစ်ဖက်သည် Vinachem ၏ အဓိကထုတ်ကုန်များဖြစ်သည့် မြေသြဇာများ၊ ဓာတုပစ္စည်းများ၊ ဘက်ထရီများ၊ accumulator များနှင့် စားသုံးသူအသုံးအဆောင်ပစ္စည်းများအတွက် ဈေးကွက်တိုးချဲ့ရေးကိုလည်း ရည်မှန်းထားကြောင်း သိရပါသည်။ Kayan သည် ဗီယက်နမ် ထုတ်ကုန်များကို အီဂျစ် ဈေးကွက်အပြင် အရှေ့အလယ်ပိုင်းနှင့် မြောက်အာဖရိကဒေသများသို့ ဝင်ရောက်နိုင်ရေးအတွက် ပေါင်းကူးတံတားအဖြစ် ဆောင်ရွက်ပေးမည်ဖြစ်ကြောင်း သိရပါသည်။ နှစ်ဖက်အနေဖြင့် ယခု MoU သည် apatite သတ္တုရိုင်း ထောက်ပံ့ရေးနှင့် ဓာတုပစ္စည်း၊ မြေသြဇာ ဈေးကွက် ဖွံ့ဖြိုး တိုးတက်ရေးတို့အတွက် ရေရှည်ပူးပေါင်းဆောင်ရွက်မှု အခြေခံဖွဲ့စည်းပုံတစ်ရပ် ဖြစ်လာမည်ဟု မျှော်လင့်ထားပြီး ထိုမှတစ်ဆင့် နှစ်နိုင်ငံအကြား ကုန်သွယ်ရေး ဆက်ဆံမှုကို ပိုမိုခိုင်မာစေမည်ဖြစ်သည်။ အဆိုပါနေ့တွင် Vinachem ကိုယ်စားလှယ်အဖွဲ့သည် အီဂျစ်နိုင်ငံရှိ ဗီယက်နမ် သံရုံးနှင့် လည်း သွားရောက်တွေ့ဆုံဆွေးနွေးခဲ့ကြောင်း သိရပါသည်။ တွေ့ဆုံပွဲတွင် သံအမတ်ကြီး Nguyen Nam Duong က ဈေးကွက်တိုးချဲ့ရေး ကြိုးပမ်းမှုများအပေါ် ချီးကျူးခဲ့ပြီး အီဂျစ် ဈေးကွက်ရှာဖွေရေး၊ မိတ်ဖက်များချိတ်ဆက်ရေးနှင့် ပူးပေါင်းဆောင်ရွက်မှုများ အကောင်အထည် ဖော်ရေးတို့တွင် Vinachem နှင့် ဗီယက်နမ်လုပ်ငန်းများအား ဆက်လက်ပံ့ပိုးသွားမည်ဟု ပြောကြားခဲ့ပါသည်။ Vinachem ၏ အထွေထွေဒါရိုက်တာ Tu ကလည်း သံရုံး၏ ပံ့ပိုးမှုအတွက် ကျေးဇူးတင်ရှိကြောင်း ပြောကြားပြီး လာမည့်ကာလတွင် အီဂျစ်နိုင်ငံရှိ လုပ်ငန်းဆောင်ရွက်မှုများအတွက် ဆက်လက် အထောက်အကူပြု ပံ့ပိုးပေးရန် မျှော်လင့်ကြောင်း ပြောကြားခဲ့ပါသည်။ ၂၀၂၅ ခုနှစ်တွင် Vinachem သည် အီဂျစ်နိုင်ငံမှ စုစုပေါင်း အမေရိကန် ဒေါ်လာ ၄၀ သန်းခန့် တန်ဖိုးရှိသောapatite သတ္တုရိုင်း တန်ချိန် ၄၁၅,၀၀၀ ခန့် တင်သွင်းခဲ့ကြောင်း သိရပါသည်။ အသစ် လက်မှတ်ရေးထိုးခဲ့သည့် သဘောတူညီချက်အရ အုပ်စုသည် ယင်း မဟာဗျူဟာ ကုန်ကြမ်းတင်သွင်းမှုကို ထပ်မံတိုးချဲ့သွားရန် မျှော်လင့်ထားပြီး နှစ်စဉ် လိုအပ်ချက် တန်ချိန် ၁ သန်းမှ ၁.၅ သန်းအထိ ရှိလာမည်ဟု ခန့်မှန်းထားကြောင်း သိရှိရပါသည်။
Vietnam Plus
DOCA (ရန်ကုန်)