ဗီယက်နမ်မှ လတ်ဆတ်သောသစ်သီးနှင့် ဟင်းသီးဟင်းရွက် တန် ၁၀၀ နီးပါးကို ယူအေအီးသို့ လေကြောင်းဖြင့် ပို့ဆောင်ခဲ့ပြီး အရှေ့အလယ်ပိုင်းဈေးကွက်တွင် ဗီယက်နမ် စိုက်ပျိုးရေးထုတ်ကုန်များ၏ တည်ရှိမှုကိုတိုးချဲ့ရန် နောက်ထပ်ခြေလှမ်းတစ်ရပ်ဖြစ်ခဲ့ကြောင်း သိရပါသည်။ Lulu Group International သည် ဧပြီလ ၁၈ ရက်နေ့တွင် လေယာဉ်တစ်စင်းကို အထူးငှားရမ်း၍ ဗီယက်နမ် တောင်ပိုင်းမှ သံပရာသီး၊ နဂါးမောက်သီး၊ ကျွဲကောသီးနှင့် ပိန္နဲသီးတို့ပါဝင်သည့်အရည်အသွေးမြင့် သစ်သီးနှင့် ဟင်းသီးဟင်းရွက် ၉၈ တန်ကျော်ကို ပို့ဆောင်ခဲ့ကြောင်း သိရပါသည်။ အရှေ့အလယ်ပိုင်းဒေသတွင် ထောက်ပံ့ပို့ဆောင်ရေး အခက်အခဲများ ဆက်လက်ဖြစ်ပေါ်နေသည့်အချိန်တွင် ဗီယက်နမ်မှ စိုက်ပျိုးရေးထုတ်ကုန်များကို လေကြောင်းဖြင့် တင်ပို့ရန် Lulu Group က ပထမဆုံး ရွေးချယ်ခြင်းဖြစ်ကြောင်း သိရပါသည်။ ယူအေအီးသို့ ရောက်ရှိပြီးနောက် ၎င်းထုတ်ကုန်များကို Lulu ၏ စူပါမားကတ်ကွန်ယက်မှတဆင့် ယူအေအီးနှင့် အနီးအနားဒေသများသို့ ဖြန့်ဖြူးမည်ဖြစ်ကြောင်း သိရပါသည်။ ယူအေအီးရှိ ဗီယက်နမ် ကုန်သွယ်ရေးရုံး၏ တာဝန်ခံ အတွင်းရေးမှူး (၁) Truong Xuan Trung က လေကြောင်းပို့ဆောင်မှုကို Lulu ဥက္ကဋ္ဌ M.A. Yusuff Ali မှ တိုက်ရိုက် ဆုံးဖြတ်ခဲ့ကြောင်း ပြောကြားခဲ့ပါသည်။ ဒေသတွင်း မတည်ငြိမ်မှုများကြောင့် ရေကြောင်းပို့ဆောင်မှု အခက်အခဲများ ဖြစ်ပေါ်နေချိန်တွင် အဖွဲ့၏ ပြောင်းလွယ်ပြင်လွယ်မှုကို ထင်ဟပ်ကြောင်း သိရပါသည်။ ကုန်ကျစရိတ် ပိုမိုမြင့်မားသော်လည်း ထောက်ပံ့မှု တည်ငြိမ်စေရန်နှင့် အရှေ့အလယ်ပိုင်းသို့ ဗီယက်နမ် စိုက်ပျိုးရေးထုတ်ကုန် တင်ပို့မှုကို ဆက်လက်ပံ့ပိုးမည်ဆိုသည့် ကတိကဝတ်ကို ပြန်လည်အတည်ပြုရန် ရည်ရွယ်ကြောင်း သိရပါသည်။ Lulu ကိုယ်စားလှယ်တစ်ဦးက ဗီယက်နမ်မှ လတ်ဆတ်သောသစ်သီးနှင့် ပြုပြင်ထုတ်လုပ်ထားသော အစားအစာများသည် အရည်အသွေး ကောင်းမွန်မှုကြောင့် အရှေ့အလယ်ပိုင်း သုံးစွဲသူများအကြား ပိုမိုအသိအမှတ်ပြုခံလာရကြောင်း ပြောကြားခဲ့ပါသည်။ သီဟိုဠ်စေ့၊ ကော်ဖီနှင့် ဟင်းခတ်အမွှေးအကြိုင်များသည်လည်း လူကြိုက်များလာကြောင်း သိရပါသည်။ ၂၀၂၅ ခုနှစ်တွင် ယူအေအီးသို့ ဗီယက်နမ် စိုက်ပျိုးရေးထုတ်ကုန် တင်ပို့မှုတန်ဖိုးမှာ အမေရိကန်ဒေါ်လာ ၄၄၅ သန်းကျော်ရှိပြီး ယခင်နှစ်ထက် ၂၄ ရာခိုင်နှုန်းနီးပါး မြင့်တက်ခဲ့ကြောင်း သိရပါသည်။ Trung က ထုတ်ကုန် အရည်အသွေးသည် သိသိသာသာ တိုးတက်လာကြောင်း ထပ်လောင်း ပြောကြားခဲ့ပါသည်။ ၂၀၂၄ ခုနှစ်တွင် အစေ့မပါ သံပုရာသီး တစ်သုတ်တွင် ပိုးသတ်ဆေး အကျန်ရှိမှု ပြဿနာဖြစ်ပွားခဲ့ပြီးနောက် ထပ်မံတိုင်ကြားမှုမရှိတော့ကြောင်း သိရပါသည်။ အဘူဒါဘီတွင် အခြေစိုက်ထားသည့် Lulu Group International သည် အရှေ့အလယ်ပိုင်း၊ အာရှနှင့် ဥရောပတို့ရှိ နိုင်ငံ ၂၃ ကျော်တွင် လက်လီရောင်းချမှု ကွန်ယက်များကို လည်ပတ်နေပြီး နှစ်စဉ်ဝင်ငွေ အမေရိကန်ဒေါ်လာ ၈ ဘီလီယံကျော် ရရှိနေကြောင်း သိရပါသည်။ ထို့အပြင် ဗီယက်နမ် ကုန်ပစ္စည်းများကို ကမ္ဘာတစ်ဝှမ်း ဝယ်ယူဖြန့်ဖြူးရန် Ho Chi Minh မြို့တွင် ကိုယ်စားလှယ်ရုံးတစ်ခုကိုလည်း တည်ထောင်ထားကြောင်း သိရှိရပါသည်။
Vietnam Plus
DOCA (ရန်ကုန်)