ဂေါ်ဖီထုပ်သည် ကရူစီဖာရီး မျိုးရင်းတွင်ပါဝင်သော မျိုးစိတ်တစ်ခုဖြစ်သည်။ ဂေါ်ဖီထုပ်ကို မုန်လာထုပ်ဟူ၍လည်းခေါ်သည်။ ဂေါ်ဖီထုပ်သည် ရေအလွယ်တကူမဝင်ရောက်နိုင်သောမြေနုမြေပွများတွင်ကောင်းစွာဖြစ်ထွန်းသည်။ ဂေါ်ဖီထုပ်ကိုစိုက်ပျိုးမည်ဆိုပါက ပျိုးထောင်ပြီးမှ စိုက်ခင်းသို့ ရွှေ့ကာ စိုက်ပျိုးရသည်။ မျိုးစေ့များမချမီပျိုးခင်းတွင် ဘောင်နိမ့်နိမ့်ပြုလုပ်ကာ ပျိုးထောင်ရသည်။ ထိုနောက်ဘောင်ပေါ်တွင် ၄လက်မ၊ ၅လက်မစီခွာ၍မျိုးပင်များကိုအတန်း လိုက် ပါးပါးချပေးရသည်။ ထိုမျိုးစေ့များပေါ်တွင် မြေစာမှုန့်တို့ကိုခပ်ပါးပါးဖုံးအုပ်ပေးပြီးနောက် ရေပန်းဖြင့်ရေလောင်းပေးရသည်။ ပျိုးပင်များကို နေပူမှ ကာကွယ်ရန်ဘောင်ပေါ်တွင် ငှက်ပျော ရွက်၊ ထန်းရွက်များဖြင့်ဖုံးအုပ်ပေးရသည်။ ပျိုးပင်များသည် ၄လက်မခန့်ကြီးမြင့်လာပြီးအရွက် ၃ ရွက်မှ ၆ရွက်အထိရှိလာသောအခါ ရွှေ့ပြောင်း စိုက်ပျိုးရမည်ဖြစ်ပါသည်။
ဂေါ်ဖီထုပ်ပင်များသည် ၃၊၄လကြာမှကြီးရင့်လာကြသည်။ ဂေါ်ဖီထုပ်တွင် အာဟာရဓာတ်များ စွာပါရှိသောကြောင့် အနောက်နိုင်ငံများတွင် ဂေါ်ဖီပင်များကို မျိုးကွဲများဖြစ်ထွန်းအောင် ပြုပြင်၍ စိုက်ပျိုးခဲ့ကြသည်။ ယခုအခါဂေါ်ဖီထုပ်မျိုးပေါင်း ၁၀၀ကျော် မျှပင်ရှိပြီဖြစ်သည်။သိပ္ပံပညာရှင်များ သည် ဂေါ်ဖီထုပ်တွင်အခြားအပင်များထက်လတ်ဆတ်သောအစာပို၍ ပါရှိသည်ဟု ဆိုကြသည်။ ဂေါ်ဖီထုပ်စိုက်ပျိုးနည်းအား လေ့လာကိုးကားချက်ပြု၍ တင်ပြလိုက်ရပါသည်။
DOCA(ရှမ်း)