ယခု ၂၀၂၅-၂၀၂၆ ဘဏ္ဍာနှစ်အတွင်း လက်ရှိအချိန်အထိ မြန်မာနိုင်ငံသည် ရော်ဘာတန်ချိန် ၂၈၀,၀၀၀ တန်ခန့်တင်ပို့မှုမှ အမေရိကန်ဒေါ်လာ သန်း ၄၀၀ ခန့် ဝင်ငွေရရှိထားကြောင်း သိရပါသည်။ မြန်မာနိုင်ငံ ရော်ဘာစိုက်ပျိုးထုတ်လုပ်သူများအသင်း (MRPPA) အနေဖြင့် ယခုဘဏ္ဍာနှစ်အတွင်း ရော်ဘာတန်ချိန် ၃၀၀,၀၀၀ ကျော်ခန့် တင်ပို့နိုင်ရန် ရည်မှန်းထားကြောင်း သိရပါသည်။ "မြန်မာနိုင်ငံဟာ ဒေါ်လာသန်း ၄၀၀ တန်ဖိုးရှိတဲ့ ရော်ဘာတန်ချိန် ၂၈၀,၀၀၀ ခန့် တင်ပို့နိုင်ခဲ့ပါတယ်။ ရော်ဘာပို့ကုန်ဟာ ပို့ကုန်ရည်မှန်းချက်ကို ပြည့်မီနိုင်ခြေရှိပါတယ်။ ရော်ဘာအစေးခြစ်ရာသီကတော့ အောက်တိုဘာလကနေ ဇန်နဝါရီလအထိ ဖြစ်ပါတယ်။ ရော်ဘာအထွက်နှုန်းဟာ ရာသီဥတုအခြေအနေအပေါ် အများကြီးမူတည်ပါတယ်။ ပြီးခဲ့တဲ့နှစ် အောက်တိုဘာလနဲ့ နိုဝင်ဘာလတွေမှာ မိုးဆက်တိုက်ရွာခဲ့တာကြောင့် ရော်ဘာထုတ်လုပ်မှုကို ထိခိုက်ခဲ့ပါတယ်။ မိုးရွာတာကြောင့် အစေးခြစ်ရာသီကို အနှောင့်အယှက်ဖြစ်စေခဲ့ပြီး နှောင့်နှေးမှုတွေ ဖြစ်ပေါ်ခဲ့တာပါ" ဟု MRPPA တာဝန်ရှိသူတစ်ဦးက ပြောကြားခဲ့ကြောင်း သိရပါသည်။ နိုင်ငံတကာစျေးကွက်တွင် ရော်ဘာတစ်တန်လျှင် အမေရိကန်ဒေါ်လာ ၂,၁၅၀ ခန့် စျေးရရှိသော်လည်း မြန်မာ့ရော်ဘာမှာ အရည်အသွေးမပြည့်မီမှုကြောင့် တစ်တန်လျှင် ဒေါ်လာ ၁,၇၀၀ မှ ၁,၉၀၀ ဝန်းကျင်သာ စျေးရရှိခဲ့သည်။ ရော်ဘာကို မွန်ပြည်နယ်၊ ကရင်ပြည်နယ်နှင့် တနင်္သာရီတိုင်းဒေသကြီးတို့တွင် အဓိကစိုက်ပျိုးကြပြီး အခြားတိုင်းဒေသကြီးနှင့် ပြည်နယ်များတွင်လည်း စိုက်ပျိုးကြကြောင်း သိရပါသည်။ တရုတ်နိုင်ငံသည် မြန်မာနိုင်ငံမှ ရော်ဘာများကို အဓိကဝယ်ယူသည့်နိုင်ငံဖြစ်ပြီး စင်ကာပူ၊ မလေးရှား၊ အင်ဒိုနီးရှား၊ တောင်ကိုရီးယားနှင့် ဂျပန်နိုင်ငံများသို့လည်း တင်ပို့လျက်ရှိကြောင်း သိရှိရပါသည်။
Source: The Global Newlight of Myanmar
DOCA (ရန်ကုန်)