ပြည်ဈေးကွက်သို့ ယခုမတ်လဆန်းတွင် ကြက်သွန်နီများ ဝင်ရောက်မှုများနေပြီး မကွေးတိုင်း ဆိပ်ဖြူ၊ တောင်တွင်း၊ ရေနံချောင်း၊ သဖန်းကုန်းရွာ၊ သဘွတ်အိုင်ရွာတို့မှ နေ့စဉ်ပိဿာချိန် (၁၂၀၀၀ - ၁၅၀၀၀) ခန့် အဝင်ရှိနေသည်။ ကြက်သွန်နီလှိုင်လှိုင်ပေါ်ချိန်ဖြစ်၍ ပြည်ဈေးကွက်သို့ ဝင်ရောက်မှု များသလို အရောင်းအဝယ်မှာလည်း အဝင်ရှိသလောက် အရောင်းအဝယ်ဖြစ်နေကြောင်း သိရသည်။ အိတ်ဆွဲဝယ်ရောင်းသမားများနှင့် ပုံမှန်ဒေသတွင်း ဝယ်လက်များအပြင် ဧရာဝတီတိုင်း ကြံခင်း၊ မြန်အောင်နှင့် သာယာဝတီခရိုင် မင်းလှ၊ ကြို့ပင်ကောက်၊ မိုးညို၊ လက်ပံတန်းမြို့နယ်များသို့ နယ်ကျော်စီးဆင်းမှုများဖြင့် အရောင်းသွက်လျက်ရှိနေသည်။ ဈေးနှုန်းမှာ ဆိပ်ဖြူ၊ ရေနံချောင်းဘက် မှ ကြက်သွန်နီများသည် အရည်အသွေးကောင်းသဖြင့် ဈေးကောင်းလျက်ရှိပြီး ကျန်အမျိုးအစားများ မှာ ဈေးနှုန်းသင့်တင့်သည့်အတွက် အရောင်းပိုသွက်လျက်ရှိကာ ပွဲရုံလက်ကားဈေးတစ်ပိဿာလျှင် ကြီး/ လတ်/ သေး ကျပ် (၂၁၀၀ - ၂၂၀၀/ ၁၆၀၀ - ၁၉၀၀/ ၁၃၀၀ - ၁၄၀၀) နှုန်းများနှင့် လက်လီ ဈေးများတွင် (၂၃၀၀ - ၂၅၀၀/ ၁၉၀၀ - ၂၁၀၀/ ၁၅၀၀ - ၁၇၀၀) နှုန်းတို့ဖြင့် အသီးသီးရောင်းဝယ် လျက်ရှိနေသည့်အတွက် ယခင်လဈေးနှုန်းများနှင့် နှိုင်းယှဉ်ပါက တစ်ပိဿာလျှင် ပျမ်းမျှ ကျပ် (၇၀၀) ခန့် ကျဆင်းသွားသဖြင့် အရောင်းသွက်လျက်ရှိနေကြောင်း သိရသည်။
DOCA(ပဲခူး)