၂၀၂၅-၂၀၂၆ ဘဏ္ဍာနှစ်အတွင်း မတ်လ ၁၀ ရက်နေ့အထိ ဆန်တန်ချိန် စုစုပေါင်း ၂,၅၀၆,၀၅၀ တန်ခန့်တင်ပို့နိုင်ခဲ့ကြောင်း မြန်မာနိုင်ငံ ဆန်စပါးအသင်းချုပ် (MRF) က ထုတ်ပြန်ကြေညာခဲ့ပါသည်။ ဆန်စပါးတင်ပို့မှုဆိုင်ရာ ညှိနှိုင်းအစည်းအဝေးမှ သိရှိရသည့် အဆိုပါကိန်းဂဏန်းမှာ ယခင်ဘဏ္ဍာနှစ် ကာလတူနှင့် နှိုင်းယှဉ်ပါက ပိုမိုတိုးတက်လာသည့် ပမာဏဖြစ်ကြောင်း သိရပါသည်။ မတ်လ ၁၀ ရက်နေ့တွင် ရန်ကုန်မြို့ရှိ Park Royal ဟိုတယ်၌ MRF ၏ ပို့ကုန်မြှင့်တင်ရေး လုပ်ငန်းကော်မတီနှင့် အသင်းဝင် ဆန်တင်ပို့သည့် ကုမ္ပဏီများအကြား ညှိနှိုင်းအစည်းအဝေးတစ်ရပ် ကျင်းပခဲ့ကြောင်း သိရပါသည်။ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ လမ်းညွှန်မှုအောက်တွင် ယခုမတ်လကုန်၌ ကုန်ဆုံးမည့် လက်ရှိဘဏ္ဍာနှစ် မကုန်ဆုံးမီ ပို့ကုန်ပမာဏကို အတတ်နိုင်ဆုံး တိုးမြှင့်နိုင်ရန် အထူးဦးစားပေး ဆောင်ရွက်လျက်ရှိကြောင်း သိရပါသည်။ အဆိုပါ အစည်းအဝေးသို့တက်ရောက်လာသူများက လာမည့် ၂၀၂၆-၂၀၂၇ ဘဏ္ဍာနှစ်အတွက် ပို့ကုန်ခန့်မှန်းချက်များနှင့် ပို့ကုန်မြှင့်တင်ရေးဆိုင်ရာ မဟာဗျူဟာမြောက် လုပ်ငန်းစဉ်များကို ဆွေးနွေးခဲ့ကြကြောင်း သိရပါသည်။ အစည်းအဝေးတွင် ဆန်တင်ပို့မှုလုပ်ငန်းစဉ်အတွင်း ရင်ဆိုင်နေရသော လက်ရှိစိန်ခေါ်မှုများနှင့် အခက်အခဲများကိုလည်း ထည့်သွင်းဆွေးနွေးခဲ့ကြောင်း သိရပါသည်။ ထို့အပြင် ဆန်စပါးအထူးတင်ပို့မှုဇုန်များ တည်ထောင်အကောင်အထည်ဖော်ရေးနှင့် ပတ်သက်၍လည်း ဆွေးနွေးမှုများ ပြုလုပ်ခဲ့ကြကြောင်း သိရပါသည်။ အစည်းအဝေးအတွင်း MRF ဥက္ကဋ္ဌနှင့် တာဝန်ရှိသူများက နောင်လုပ်ငန်းစဉ်များ ချောမွေ့စေရေးအတွက် တက်ရောက်လာသူများ၏ အကြံပြုချက်များနှင့် မေးမြန်းချက်များကို ပြန်လည်ဖြေရှင်း ဆွေးနွေးခဲ့ကြကြောင်း သိရှိရပါသည်။
Source: Global Newlight of Myanmar
DOCA (ရန်ကုန်)