အင်ဒိုနီးရှားနိုင်ငံသည် ဆော်ဒီအာရေးဗီးယားသို့ ဆန်တန်ချိန် ၂၂၈၀ ကို စတင်တင်ပို့ လိုက်ပြီဖြစ်ပြီး ဟဂျ်ဘုရားဖူးခရီးစဉ်သို့ သွားရောက်မည့် အင်ဒိုနီးရှားနိုင်ငံသားများအတွက် ပြည်တွင်းထုတ်ဆန်ကို ပထမဆုံးအကြိမ်အသုံးပြုထောက်ပံ့ခြင်းဖြစ်ကြောင်း သိရပါသည်။ စိုက်ပျိုးမွေးမြူရေးဝန်ကြီးဖြစ်သည့်အပြင် အမျိုးသားစားနပ်ရိက္ခာအေဂျင်စီ (Bapanas) အကြီးအကဲလည်းဖြစ်သူ Andi Amran Sulaiman က ထိုအောင်မြင်မှုသည် အစိုးရပိုင် ထောက်ပံ့ပို့ဆောင်ရေး ကုမ္ပဏီ Bulog နှင့် တစ်နိုင်ငံလုံးရှိစိုက်ပျိုးရေးသမားများ၏ ပူးပေါင်းကြိုးပမ်းမှုကြောင့် ဖြစ်ကြောင်း ပြောကြားခဲ့ပါသည်။ Bulog ကုမ္ပဏီ၏ ဥက္ကဋ္ဌ Ahmad Rizal Ramdhani ကလည်း ယခု အစီအစဉ်သည် ကုန်သွယ်ရေးအောင်မြင်မှုတစ်ခုသာမက နိုင်ငံအတွက် ဂုဏ်သိက္ခာနှင့် ဂုဏ်ယူစရာအမှတ်အသားတစ်ခုလည်းဖြစ်ကြောင်း ပြောကြားခဲ့ပါသည်။ ၎င်း၏ ပြောကြားချက်အရ ဆန်များကို အဆင့်လိုက် အသုတ်အသီးသီးဖြင့် တင်ပို့နေပြီး ပြည်တွင်းစိုက်ပျိုးရေးသမားများထံမှ ဝယ်ယူကာ အရည်အသွေးမြင့် ဆန်စက်များတွင် ပြုပြင်ထုတ်လုပ်ထားကြောင်း သိရပါသည်။ ထို့ပြင် အရည်အသွေးစံချိန်စံညွှန်းများကို ပြည့်မီစေရန် broken grain အချိုးအစားကို အများဆုံး ၅ ရာခိုင်နှုန်းသာရှိစေရန် ထိန်းသိမ်းထားသည်ဟု သိရပါသည်။ တင်ပို့သည့် ဆန်များအားလုံးသည် ဓာတ်ခွဲခန်းစမ်းသပ်မှုများကို အောင်မြင်စွာကျော်ဖြတ်ထားပြီး နိုင်ငံတကာ ပို့ကုန်စံချိန်စံညွှန်းများနှင့် ကိုက်ညီသည့်အပြင် ဟာလာအသိအမှတ်ပြုလက်မှတ်လည်း ရရှိထားကြောင်း သိရပါသည်။ ဟဂျ်နှင့် Umrah ဝန်ကြီးဌာနကလည်း မက္ကာနှင့် မဒီနာမြို့များရှိ အင်ဒိုနီးရှား ဟဂျ်ဘုရား ဖူးခရီးသည်များအတွက် အစားအသောက်ပြုလုပ်ပေးသည့် မီးဖိုချောင်များတွင် Bulog ဆန်ကိုသာ အသုံးပြုရန် သတ်မှတ်ထားကြောင်း သိရသည်။ ယင်းက အစားအသောက်ထောက်ပံ့မှုအပေါ် ယုံကြည်မှုနှင့် တည်ငြိမ်မှုရှိစေရန် ရည်ရွယ်ခြင်းဖြစ်ကြောင်း သိရပါသည်။ အာဏာပိုင်များက ယခုအစီအစဉ်သည် ပြည်တွင်းဆန်လုံလောက်မှုအပေါ် သက်ရောက်မှုမရှိကြောင်း အတည်ပြုထားပြီး လက်ရှိတွင် နိုင်ငံ၏ဆန်သိုလှောင်ပမာဏမှာ လုံလောက်စွာရှိနေကြောင်း ပြောကြားခဲ့ပါသည်။ အစိုးရအနေဖြင့် ယခုဆန်တင်ပို့မှုကို အစားအသောက်ဖူလုံရေးမူဝါဒ၏ အဆင့်အသစ်တစ်ခုအဖြစ် သတ်မှတ်ထားပြီး သံတမန်ရေး၊ ကိုယ်ပိုင်ထောက်ပံ့နိုင်မှုနှင့် နိုင်ငံခြားရှိ ပြည်သူများအား ထောက်ပံ့ကူညီရေးတို့ကို ပေါင်းစပ်ထားသည့် အစီအစဉ်တစ်ခုအဖြစ် ရှုမြင်နေကြောင်း သိရှိရပါသည်။
Antara News
DOCA (ရန်ကုန်)