ဘရာဇီးနှင့် လယ်ယာထွက်ကုန် ကုန်သွယ်မှုတိုးမြှင့်ရန် အိန္ဒိယ ဆွေးနွေး

      အိန္ဒိယနိုင်ငံ အနေဖြင့် ၎င်း၏ သလဲသီး၊ ကြက်သွန်ဖြူ၊ စပျစ်သီးနှင့် စပျစ်သီးခြောက်များကို ဘရာဇီးဈေးကွက်သို့ ပိုမိုကျယ်ပြန့်စွာ ဝင်ရောက်ခွင့်ရရှိနိုင်ရေးအတွက် တောင်းဆိုခဲ့သည်ဟု ဖေဖော်ဝါရီ ၂၀ ရက်နေ့၌ ဘရာဇီး စိုက်ပျိုးရေးဝန်ကြီး Luiz Paulo Teixeira Ferreira နှင့် တွေ့ဆုံ ဆွေးနွေးပွဲအပြီးတွင် အိန္ဒိယ စိုက်ပျိုးရေးဝန်ကြီး Shivraj Singh Chouhan က ပြောဆိုခဲ့သည်။

      အိန္ဒိယ၏ အဆိုပါ စိုက်ပျိုးရေးထွက်ကုန်များ တင်ပို့မှုနှင့် စပ်လျဉ်း၍ ဘရာဇီးနိုင်ငံတွင် ဆွေးနွေးမှုများ ဆက်လက်လုပ်ဆောင်လျက်ရှိကြောင်း၊ ဈေးကွက်ဝင်ရောက်ခွင့်နှင့် ကုန်သွယ်မှု လွယ်ကူချောမွေ့စေရေးဆိုင်ရာ ကိစ္စရပ်များစွာကို ညှိနှိုင်းဆွေးနွေးခဲ့ပြီးဖြစ်ကြောင်း၊ အိန္ဒိယ စိုက်ပျိုးရေး သုတေသနကောင်စီ (ICAR) နှင့် ဘရာဇီး Embrapa စိုက်ပျိုးရေးသိပ္ပံအဖွဲ့အစည်းတို့ သည် လယ်ယာစိုက်ပျိုးရေးနှင့် အခြားဆက်စပ်သည့် ကဏ္ဍအများအပြား၌ အပြန်အလှန် ပူးပေါင်း ဆောင်ရွက်မှုဆိုင်ရာ နားလည်မှုစာချွန်လွှာကို လက်မှတ်ရေးထိုးနိုင်ရေး ဆွေးနွေးလျက်ရှိကြောင်း ဝန်ကြီး Chouhan က ပြောကြားခဲ့ခြင်းဖြစ်သည်။

      ဘရာဇီးနိုင်ငံအနေဖြင့် လက်ရှိကာလ၌ လက်ဖက်၊ ပဲစင်းငုံနှင့် အခြားလယ်ယာထွက်ကုန် များ တင်ပို့နိုင်ရေး အိန္ဒိယအရာရှိများနှင့် ဆွေးနွေးလျက်ရှိပြီး အိန္ဒိယနိုင်ငံတွင် Centre of Excellence ခေါ် အထူးပြုသိပ္ပံဌာနတစ်ခုကို ထူထောင်ရန် သဘောတူညီထားသည်။ ထို့အပြင် ပဲမျိုးစုံ စိုက်ပျိုးထုတ်လုပ်မှု မြှင့်တင်ခြင်းနှင့် ဘက်စုံစုပေါင်းလယ်ယာ စိုက်ပျိုးမှုစနစ်တို့တွင် ပူးပေါင်းဆောင်ရွက်ရန်လည်း သဘောတူညီထားသည်။

      ပြန်လည်ရှင်သန်ကြီးထွားသည့် စိုက်ပျိုးရေးစနစ်ကို မြှင့်တင်ရန် အိန္ဒိယစိုက်ပျိုးရေးဝန်ကြီး ဌာနက တိုးမြှင့်လုပ်ဆောင်လျက်ရှိသော သဘာဝနှင့်အော်ဂဲနစ် လယ်ယာစိုက်ပျိုးမှုစနစ်မှ အကျိုး ကျေးဇူးရရှိရန် ဘရာဇီးနိုင်ငံဘက်မှ မျှော်မှန်းလျက်ရှိသည်။ ဘရာဇီး စိုက်ပျိုးရေးဝန်ကြီး Ferreira သည် ဖေဖော်ဝါရီ ၁၉ ရက်နေ့၌ ဥတ္တာပရာဒေ့ရှ်ပြည်နယ်ရှိ ICAR ၏ လက်အောက်ခံ အိန္ဒိယ လယ်ယာစိုက်ပျိုးမှုစနစ် သုတေသနဌာနသို့ သွားရောက်ပြီး အိန္ဒိယ၏ သဘာဝအခြေခံ စိုက်ပျိုး ရေးရာ အဖြေရှာဆောင်ရွက်မှု အတွေ့အကြုံများကို လေ့လာခဲ့သည်။

    သွင်းကုန်အတွက် နိုင်ငံအနည်းငယ်အပေါ်၌သာ အမှီပြုနေရခြင်းမှ ဖြန့်ကျက်ဆောင်ရွက် နိုင်ရေးအတွက် အိန္ဒိယနိုင်ငံသည် လွန်ခဲ့သော ၂ နှစ်ကျော်ကာလမှစတင်၍ ဘရာဇီးထံမှ မတ်ပဲနှင့် ပဲပုပ်ဆိများကို ဝယ်ယူတင်သွင်းခဲ့သည်။ ထိုသို့ အစပြုလုပ်ဆောင်မှုသည် အိန္ဒိယပြည်တွင်း၌ သီးနှံ ထောက်ပံ့မှုပြတ်လပ်ခြင်းကို ဖြည့်ဆည်းပေးရန် ပေါင်းကူးပေးမည်ဟု မျှော်လင့်ခြင်းနှင့်အတူ ဘရာဇီး၏ Embrapa စိုက်ပျိုးရေးအဖွဲ့အစည်းမှတစ်ဆင့် ပဲမျိုးစုံ ထုတ်လုပ်မှုကို တိုးမြှင့်နိုင်မည့် နည်းပညာများ ရရှိမည်ဟု မျှော်မှန်းလျက်ရှိသည်။

    သတင်းအရင်းအမြစ်များ၏ အဆိုအရ ဘရာဇီး၏ ပဲစင်းငုံတင်ပို့လိုကြောင်း ကမ်းလှမ်းချက် သည် အဆိုပါ သီးနှံဝယ်ယူတင်သွင်းရန် မြန်မာ၊ တန်ဇန်နီးယားနှင့် မာလာဝီတို့ကဲ့သို့သော နိုင်ငံ များအပေါ် သိသာစွာ မှီခိုနေရသည့် အိန္ဒိယနိုင်ငံအတွက် လက်ခံစဉ်းစားဖွယ်ဖြစ်ကြောင်း သိရှိ ရသည်။

Source: Financial Express, 20 Feb 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)