၂၀၂၅ ခုနှစ်တွင် ဖိလစ်ပိုင်နိုင်ငံသည် ကမ္ဘာ့ဒုတိယအကြီးဆုံး နာနတ်သီးတင်ပို့သည့် နိုင်ငံအဖြစ် သုံးနှစ်ဆက်တိုက် ဆက်လက်ရပ်တည်နိုင်ခဲ့ကြောင်း သိရပါသည်။ ကုလသမဂ္ဂ စားနပ်ရိက္ခာနှင့်စိုက်ပျိုးရေးအဖွဲ့ (FAO) ၏ ထုတ်ပြန်ချက်အရ ဖိလစ်ပိုင်နိုင်ငံသည် ၂၀၂၃ ခုနှစ်မှစတင်ကာ ကိုစတာရီကာ (Costa Rica) နိုင်ငံပြီးနောက် ကမ္ဘာ့အဆင့်တွင် ဒုတိယနေရာ၌ နေရာယူထားနိုင်ခဲ့ပြီး အာရှဒေသတွင် ထိပ်တန်းတင်ပို့သည့်နိုင်ငံအဖြစ်လည်း ရပ်တည်နိုင်ခဲ့ကြောင်း သိရပါသည်။
၂၀၂၅ခုနှစ် စက်တင်ဘာလအထိ ရရှိထားသော ကနဦးအချက်အလက်များအရ ဖိလစ်ပိုင်နိုင်ငံ၏ နာနတ်သီးတင်ပို့မှုသည် ၁၄ ရာခိုင်နှုန်းခန့် မြင့်တက်လာပြီး တန်ချိန် ၇၇၅,၀၂၈ မက်ထရစ်တန်အထိ တင်ပို့မှုများရှိခဲ့ကြောင်း FAO ၏ထုတ်ပြန်ချက်များအရ သိရပါသည်။
ဖိလစ်ပိုင်နိုင်ငံထွက် နာနတ်သီးများကို အများဆုံးတင်သွင်းသော ဈေးကွက်ဖြစ်သည့် တရုတ်နိုင်ငံသို့ တင်ပို့မှုမှာ ၁၉ ရာခိုင်နှုန်းခန့် မြင့်တက်ခဲ့ပါသည်။ ဖိလစ်ပိုင်မှ တင်ပို့မှုမြင့်တက်လာစေသည့် အဓိကအကြောင်းအရင်းသည် တရုတ်နိုင်ငံတွင်း ရာသီဥတုဖောက်ပြန်မှုကြောင့် ပြည်တွင်းစိုက်ပျိုးထုတ်လုပ်မှုကျဆင်းကာ အထွက်နှုန်းနှင့်အရည် အသွေးနိမ့်ကျခဲ့ခြင်းတို့ကြောင့်ဖြစ်ကြောင်း သိရပါသည်။
ထို့အပြင်ဖိလစ်ပိုင်၏ အဓိကဈေးကွက်များဖြစ်သော ဂျပန်နှင့် တောင်ကိုရီးယားနိုင်ငံတို့သည် စုစုပေါင်း နာနတ်သီးတင်ပို့မှု၏ ၃၆ ရာခိုင်နှုန်းနှင့် ၁၃ ရာခိုင်နှုန်းကို အသီးသီး ဝယ်ယူတင်သွင်းခဲ့ကြကြောင်း သိရပါသည်။
ကမ္ဘာ့ဈေးကွက်ဝေစု ၆၀ ရာခိုင်နှုန်းကို ပိုင်ဆိုင်ထားသော ကိုစတာရီကာနိုင်ငံတွင် မိုးရွာသွန်းမှု လွန်ကဲခြင်းနှင့် အပူချိန်မြင့်မားခြင်းတို့ကြောင့် စိုက်ပျိုးရေးလုပ်ငန်းများ နှောင့်နှေးခဲ့ရကြောင်း FAO ၏ သုံးသပ်ချက်အရ သိရပါသည်။ ထို့အပြင် ရာသီဥတုဒဏ်ကြောင့် အပင်များထိခိုက်ပျက်စီးခြင်းနှင့် ပိုးမွှားကျရောက်မှု မြင့်မားခြင်းတို့လည်း ကြုံတွေ့ခဲ့ရကြောင်း သိရပါသည်။ တစ်ကမ္ဘာလုံးအတိုင်းအတာဖြင့် နာနတ်သီးတင်သွင်းမှု ပမာဏမှာ၂၀၂၅ ခုနှစ်က တန်ချိန်ပေါင်း ၃.၂ သန်းခန့်ရှိခဲ့ပြီး အပြောင်းအလဲ အနည်းငယ်သာရှိခဲ့ကြောင်း သိရပါသည်။
၂၀၂၅ ခုနှစ် ပထမ (၉) လတာကာလအတွင်း အမေရိကန်နှင့် ဥရောပသမဂ္ဂတို့တွင် ဝယ်လိုအား ခိုင်မာအားကောင်းနေသော်လည်း ကမ္ဘာ့အဓိကတင်ပို့သူ ကိုစတာရီကာ နိုင်ငံဘက်မှ ထောက်ပံ့မှုလျော့နည်းခြင်းကြောင့် တိုးတက်မှုအကန့်အသတ်ဖြစ်ခဲ့ရကြောင်းနှင့် အခြားတင်ပို့သူများထံမှ ဝယ်ယူမှုတိုးမြှင့်ကာ အစားထိုးနိုင်ခဲ့သော်လည်း အနည်းငယ်သာ အထောက်အကူပြုနိုင်ခဲ့ကြောင်း FAO ဖော်ပြထားသော အစီရင်ခံစာအရ သိရှိရပါသည်။
Source: Inquirer net
DOCA (ရန်ကုန်)