မိတ္ထီလာမြို့ရှိသီးနှံစုံပွဲရုံများတွင် ဒီဇင်ဘာလကုန်ပိုင်းမှစ၍ ထောပတ်ပဲများ ဝင်ရောက်လာကြောင်း သိရသည်။ ဒေသတွင်းတောင်သူများအနေဖြင့် ပဲမျိုးစုံသီးနှံများတွင် ပဲစင်းငုံကို အများဆုံး စိုက်ပျိုးသော်လည်း ထောပတ်ပဲကို လည်းနှစ်စဉ်စိုက်ပျိုးလေ့ရှိပါသည်။ ထောပတ်ပဲကို မိုး/ ဆောင်း နှစ်သီးစိုက်ပျိုးနိုင်ရာ မိတ္ထီလာခရိုင်အတွင်း မလှိုင်မြို့နယ်တွင် အများဆုံးစိုက်ပျိုးကာ မိတ္ထီလာမြို့နယ်တွင်လည်း အနည်းငယ်စိုက်ပျိုးမှုရှိပါသည်။ သီးနှံပေါ်ချိန်တွင် ဈေးကွက်၌ဝယ်လိုအားရှိသည့်အပြင် ပဲအစိုအနေဖြင့်လည်း ဒေသတွင်းစားသုံးရန် ဝယ်လိုအားရှိခြင်းတို့ကြောင့် နှစ်စဉ်စိုက်ပျိုးခြင်း ဖြစ်ပါသည်။
ဈေးနှုန်းအနေဖြင့် ပဲအစိုအနေဖြင့်ရောင်းချရာ၌ နိုဝင်ဘာ/ ဒီဇင်ဘာလများတွင် တစ်ပိဿာ ၆၀၀၀/၆၅၀၀ ကျပ်ရရှိခဲ့ပြီး ရင့်မှဲ့ခြောက်သွေ့သည့်အချိန် ဇန်နဝါရီလများ၌ တစ်တင်းလျင် ၇၁၀၀၀/ ၇၂၀၀၀/ကျပ်ထိရောင်းချရကြောင်း တောင်သူများထံမှ သိရသည်။
ထောပတ်ပဲဈေးမှာ ယခင်နှစ်ကတစ်တင်းလျင် တောင်သူရောင်းချရသည့်ဈေးမှာ ၈၂၀၀၀/ ၈၃၀၀၀/ကျပ်ဈေးရှိခဲ့သဖြင့် ယခင်နှစ်လောက်ဈေးကောင်းမရသော်လည်း ပဲအစိုအနေဖြင့် လက်လီရောင်းချနိုင်ခြင်း၊ မိသားစုစားသုံးနိုင်ခြင်းတို့ကြောင့် နှစ်စဉ်စိုက်ပျိုးကြကြောင်း ဈေးကွက်မှ သိရှိရပါသည်။
DOCA(မန္တလေး)