မန္တလေးတိုင်းဒေသကြီး ၊ ကျောက်ဆည်ခရိုင်သည် ဆည်ရေသောက်ဒေသတစ်ခု ဖြစ်သော ကြောင့်စပါး၊ပဲ၊ပြောင်း၊နှမ်းသီးနှံမျိုးစုံ အောင်မြင်ဖြစ်ထွန်းလျက်ရှိရာ ၄င်းသီးနှံများအနက် ဆီထွက် သီးနှံတစ်မျိုးဖြစ်သော နေကြာသီးနှံကိုလည်း တောင်သူများမှ သီးထပ်သီးညှပ် စိုက်ပျိုးသည့်အပြင် သီးသန့်ဧကအလိုက် စိုက်ပျိုးလျက်ရှိပါသည် ။ ကျောက်ဆည်ခရိုင်အတွင်းတွင် နေကြာဆောင်း စိုက်ပျိုးမှုအနေဖြင့် ၂၀၂၅-၂၀၂၆ ဘဏ္ဍာနှစ်တွင် ကျောက်ဆည်မြို့နယ်တွင်(၅၁၆၆)ဧက ၊ စဉ့်ကိုင် မြို့နယ်တွင်(၂၅၄၆)ဧက ၊ မြစ်သားမြို့နယ်တွင် (၁၈၈၈)ဧက ၊ စုစုပေါင်း(၉၆၀၀)ဧက စိုက်ပျိုးထား ရှိကြောင်း သက်ဆိုင်ရာဌာန၏ စာရင်းများအရသိရှိရပါသည် ။ စိုက်ပျိုးမှုအနေဖြင့် မျိုး(၄-၅)ပြည် စိုက်ပျိုးရကြောင်း ၊ စိုက်ပျိုးသောမျိုးများမှာ ဆင်းရွှေကြာမျိုး-၁ ၊ ဆင်းရွှေကြာမျိုး-၂ မျိုးများကို အများဆုံး စိုက်ပျိုးကြကြောင်း ၊ စိုက်ပျိုးနည်းမှာ ဘောင်ကြောင်းပေးစနစ်နှင့် ပတ်ကြဲစိုက်ပျိုးစနစ် ဟူ၍ (၂)မျိုး စိုက်ပျိုးကြကြောင်း ၊ စိုက်ပျိုးမှု ကုန်ကျစရိတ်အနေဖြင့် မျိုး ၊ သွင်းအားစု ၊ လုပ်သားခ အပါအဝင်(၄၅၀၀၀၀/-)ကျပ်ခန့် ကုန်ကျကြောင်း ၊ ယခင်နှစ် နေကြာထွက်ပေါ်ချိန်တွင် အထွက်နှုန်း အနေဖြင့်(၂၀-၂၅)တင်းခန့် ထွက်ရှိကြောင်း၊ နေကြာစျေးနှုန်း အနေဖြင့်တစ်တင်းလျှင်(၅၅၀၀၀/-) ကျပ်စျေးနှုန်းများဖြင့် အရောင်းအဝယ်ဖြစ်ခဲ့ပြီး ၊ စိုက်ပျိုးစရိတ်နှုတ်ပြီး အကျိုးအမြတ်အနေဖြင့် (၇၀၀၀၀၀/-)ကျပ် မြတ်ခဲ့ကြောင်း ၊ ယခုလက်ရှိပေါက်စျေးအနေဖြင့် နေကြာတစ်တင်းလျှင် (၆၄၀၀၀/-)ကျပ် ဈေးနှုန်းများဖြင့် အရောင်းအဝယ်ဖြစ်နေကြောင်း ၊ နေကြာထွက်ပေါ်ချိန်တွင် အထွက်နှုန်းနှုန်းနှင့် ဈေးနှုန်းကောင်းမွန်ပါက အကျိုးအမြတ် ပိုမိုရရှိနိုင်မည်ဖြစ်ကြောင်း ၊ နေကြာ ထွက်ပေါ်ချိန်တွင် တောင်သူများမှာ မြို့ပေါ်ပွဲရုံများသို့ ကိုယ်တိုင်ရောင်းချကြကြောင်း၊ ပွဲရုံများမှ တဆင့် မန္တလေး ၊ ရန်ကုန်မြို့များသို့ တင်ပို့ရောင်းချလျက်ရှိကြောင်း ၊ စိုက်ပျိုးစရိတ်သက်သာပြီး မိသားစု စားသုံးဆီဖူလုံရုံသာမက စီးပွားဖြစ်ဝင်ငွေတိုးသောကြောင့် နေကြာသီးနှံသည်လည်း တိုးချဲ့စိုက်ပျိုးသင့်သော သီးနှံဖြစ်ကြောင်း နေကြာစိုက်ပျိုးသော တောင်သူတစ်ဦး၏ပြောကြားချက် အရသိရှိရပါသည်။
DOCA(မန္တလေး)