Main menu

ထားဝယ်မြို့ပေါ်ရှိ ဆေးဆိုင်များအား စားသုံးသူရေးရာဦးစီးဌာနနှင့် မိတ်ဖက်ဌာနဆိုင်ရာများ ပူးပေါင်း၍ ကွင်းဆင်းစစ်ဆေး

Powered by Drupal

         ၂၀၂၀ ပြည့်နှစ်၊ ဇန်နဝါရီလ ၁၅ ရက်နေ့တွင် တနင်္သာရီတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံးမှ ဝန်ထမ်းများသည် အစားအသောက်နှင့် ဆေးဝါးကွပ်ကဲရေးဦးစီးဌာနတို့နှင့် ပူးပေါင်း၍ ထားဝယ်မြို့ပေါ်ရှိ ဆေးဆိုင် (၆) ဆိုင်အား ဘေးဥပါဒ်အန္တရာယ် ဖြစ်စေနိုင်သော ဆေးဝါးများ၊ သုံးစွဲရန် မသင့်ကြေညာထားသော တရားမဝင်၊ လိုင်စင်မဲ့၊ သက်တမ်းလွန်ဆေးဝါးများ ရောင်းချမှု ရှိ/မရှိ၊ ကောင်းမွန်သော ဆေးဝါးရောင်းချမှုကျင့်စဉ်နှင့်အညီ ဆေးဝါးများရောင်းချမှု ရှိ/မရှိကို ရှောင်တခင် ကွင်းဆင်းစစ်ဆေးခဲ့ပါသည်။

          ထို့သို့ ကွင်းဆင်းစစ်ဆေးခဲ့ရာတွင် ဆေးဆိုင်(၄)ဆိုင်မှ သက်တမ်းလွန် ဆေးဝါးများ၊ လိုင်စင်မဲ့ဆေးဝါးများ တွေ့ရှိရသဖြင့် သိမ်းဆည်းခဲ့ပါသည်။ ဆေးဆိုင်ပိုင်ရှင်အား အဆိုပါ ဆေးဝါးများကို အများပြည်သူသုံးစွဲမိပါက ဘေးဥပါဒ်အန္တရာယ်ဖြစ်စေနိုင်ကြောင်းနှင့် သက်တမ်းလွန် ဆေးဝါးများအား သက်ဆိုင်ရာ အစားအသောက်နှင့် ဆေးဝါးကွပ်ကဲရေးဦးစီးဌာနသို့ အပ်နှံရန် အသိပညာပေးဆွေးနွေးခဲ့ပြီး သက်တမ်းလွန်ဆေးဝါးများနှင့် လိုင်စင်မဲ့ဆေးဝါးများအား နောက်နောင် ရောင်းချခြင်းမပြုရန် အစားအသောက်နှင့်ဆေးဝါးကြီးကြပ်ကွပ်ကဲရေးကော်မတီဝင်များ၏ ရှေ့မှောက်တွင် ဝန်ခံကတိလက်မှတ်ရေးထိုးစေခဲ့ကြောင်း သတင်းရရှိပါသည်။

ရွှေဝယ်သား