ကမ္ဘောဒီးယား ပို့ကုန်လုပ်ငန်းရှင်များက တောင်ကိုရီးယားသည် ၎င်းတို့၏ ထုတ်ကုန်များအတွက် ဈေးကွက်များ ပိုမိုဖွင့်လှစ်လာမည်ဟု မျှော်လင့်ထား

              ကမ္ဘောဒီးယားနိုင်ငံမှ ပို့ကုန်လုပ်ငန်းရှင်များက တောင်ကိုရီးယားသမ္မတနိုင်ငံသည် ကမ္ဘောဒီးယားထုတ်ကုန်များအတွက် ဈေးကွက်အခွင့်အလမ်းများ ပိုမိုဖွင့်လှစ်ပေးလိမ့်မည်ဟု မျှော်လင့်ကြောင်း ဖော်ပြခဲ့ကြပြီး၊ နှစ်နိုင်ငံအကြား အပြန်အလှန်ကုန်သွယ်မှုသည် ၂၀၂၅ ခုနှစ် ပထမ (၁၀) လအတွင်း အမေရိကန်ဒေါ်လာ ၇၄၇ သန်းခန့် ရောက်ရှိခဲ့ပြီး ၂၀၂၄ ခုနှစ်မှ ၇.၆၆ ရာခိုင်နှုန်း မြင့်တက်လာခဲ့သည်။ ၂၀၂၅ ခုနှစ်၊ နိုဝင်ဘာလ ၁၃ ရက်မှ ၁၆ ရက်အထိ ကိုရီးယားသမ္မတနိုင်ငံတွင် ကျင်းပပြုလုပ်ခဲ့သော အာဆီယံ-ကိုရီးယားစင်တာမှ စီစဉ်သည့် အာဆီယံကုန်စည်ပြပွဲသို့ တက်ရောက်စဉ် ကမ္ဘောဒီးယားနိုင်ငံအခြေစိုက် ကုမ္ပဏီဖြစ်သည့် Confirel ၏ ကုန်သွယ်မှုစျေးကွက်ရှာဖွေရေး မန်နေဂျာ Ear Chhayheng က ကုမ္ပဏီသည် ကိုရီးယားဈေးကွက်သို့ ထုတ်ကုန်များ ထပ်မံတင်ပို့ရန် အလားအလာကို လေ့လာနေကြောင်း ပြောကြားခဲ့သည်။ ကမ္ဘောဒီးယားထုတ်ကုန် ၃၀ ခန့်ကို တောင်ကိုရီးယားသမ္မတနိုင်ငံတွင် ရရှိနိုင်ပြီဖြစ်သော်လည်း မိမိတို့တင်ပို့ရန် မျှော်လင့်ထားသည့် ထုတ်ကုန်များ ပိုမိုရှိနေသေး ကြောင်း ထပ်လောင်းပြောကြားခဲ့သည်။ အလားတူပင်၊ ကမ္ဘောဒီးယား ငရုတ်ကောင်းနှင့် ဟင်းခတ်အမွှေးအကြိုင်များအသင်း (CPSF) ၏ ဥက္ကဋ္ဌ Mak Ny ကလည်း တောင်ကိုရီးယားသည် ကမ္ဘောဒီးယား ငရုတ်ကောင်း တင်သွင်းမှုကို တိုးမြှင့်မှုအတွက် အကောင်းမြင်ကြောင်း ပြောကြားခဲ့သည်။ လက်ရှိတွင် ကမ္ဘောဒီးယား ငရုတ်ကောင်း၏ ၈၀ ရာခိုင်နှုန်းခန့်ကို ဗီယက်နမ်သို့ တင်ပို့နေကြောင်းနှင့် ပြပွဲတွင် ပါဝင်ခြင်းသည် ကိုရီးယားသို့ ဈေးကွက်ဝင်ရောက်မှုကို တိုးချဲ့ရန် ရည်ရွယ်ကြောင်း ထပ်လောင်းပြောကြားခဲ့သည်။ ၂၀၂၅ ခုနှစ်၏ ပထမဆယ်လအတွင်း ကမ္ဘောဒီးယား၏ တောင်ကိုရီးယားသို့ တင်ပို့မှုသည် အမေရိကန်ဒေါ်လာ ၂၆၂.၄၇ သန်းရှိပြီး ကိုရီးယားမှ တင်သွင်းမှုမှာ ၁၂.၂၂ ရာခိုင်နှုန်း မြင့်တက် လာကာ အမေရိကန်ဒေါ်လာ ၄၈၄.၂၂ သန်း ရှိခဲ့သည်။

DOCA(ရန်ကုန်)