တရုတ်နိုင်ငံ၌ နှစ်လအတွင်း ပြောင်းဈေးနှုန်းများ မြင့်တက်လာ

      တရုတ်နိုင်ငံတွင် မိုးသည်းထန်စွာ ရွာသွန်းမှုများကြောင့် သီးနှံများ၏ တစ်စိတ်တစ်‌ဒေသမှာ ထိခိုက်ပျက်စီးမှု ဖြစ်ပေါ်ခဲ့အပြီး ဝယ်လက်များအနေဖြင့် အရည်အသွေးကောင်းမွန်သည့် ကုန်စည် များ ဝယ်ယူရရှိရေး အလျင်စလို လုပ်ဆောင်ခဲ့ကြသဖြင့် ပြောင်းဈေးနှုန်းများသည် နှစ်လကျော် ကာလအတွင်း အမြင့်ဆုံးနှုန်းထားသို့ မြင့်တက်ရောက်ရှိလာကြောင်း သိရှိရသည်။ မွေးမြူရေးအစာ ထုတ်လုပ်သူများနှင့် တိရစ္ဆာန်မွေးမြူရေးလုပ်ငန်းများထံမှ ဝယ်လိုအား ခိုင်မာခြင်းကလည်း ပြည် တွင်း ပြောင်းဈေးနှုန်းများ အသစ်တစ်ဖန် မြင့်တက်မှုကို တွန်းအားပေးလျက်ရှိသည်။

      Dalian ကြိုတင်အရောင်းဈေးကွက်တွင် ပြောင်းသီးနှံဈေးနှုန်းများသည် ၁ ရာခိုင်နှုန်းကျော် မြင့်တက်ခဲ့ပြီး စက်တင်ဘာလနောက်ပိုင်း၌ အမြင့်ဆုံးအဖြစ်ရောက်ရှိခဲ့သည်။ Guolian Futures ကုမ္ပဏီ၏အဆိုအရ နိုင်ငံမြောက်ပိုင်းတွင် မိုးအလွန်အကျွံရွာသွန်းမှုကြောင့် သီးနှံများထိခိုက်ပျက်စီး ခဲ့ပြီးနောက် မွေးမြူရေးအစာစက်ရုံများနှင့် ဝက်မွေးမြူရေးလုပ်ငန်းများသည် တရုတ်ပြည်တွင်း၌ ပြောင်း ထိပ်တန်းထုတ်လုပ်ရာဒေသဖြစ်သော အရှေ့မြောက်ဘက်ဒေသ ပြည်နယ်များမှ အသစ် ရိတ်သိမ်းထွက်ပေါ်လာမည့် သီးနှံကို ဝယ်ယူရရှိနိုင်ရေး ကြိုးပမ်းလာကြကြောင်း သိရှိရသည်။

      တရုတ်နိုင်ငံ၏ အဓိကအရေးပါသော သီးနှံသုံးမျိုးအနက် ပြောင်းသည် တစ်ခုအပါအဝင် ဖြစ် ပြီး မကြာသေးမီကာလများ၌ ယခုနှစ် သီးနှံရာသီတွင် ပြောင်းစံချိန်တင်ထွက်ရှိမည်ဟု အာဏာပိုင် များက ခန့်မှန်းထားခဲ့ကြသည်။ သို့သော် မကြာခင်က ဖြစ်ပေါ်ခဲ့သော ပြင်းထန်သည့် ရာသီဥတုက မသေချာမရေရာမှုများကို ဖြစ်ပေါ်စေခဲ့သည်။ ပြောင်းထုတ်လုပ်မှု စုစုပေါင်းအနက် ၃၀ ရာခိုင်နှုန်း ပါဝင်လျက်ရှိသော မြောက်ပိုင်းဒေသ ပြည်နယ်များတွင် မိုးများ ပြင်းထန်စွာရွာသွန်းခဲ့ခြင်းက သီးနှံ ရိတ်သိမ်းခြင်းလုပ်ငန်းများကို အနှောင့်အယှက်ဖြစ်စေခဲ့သည်။

     ပြောင်းစိုက်ပျိုးသည့် တောင်သူများ အနေဖြင့် ဈေးနှုန်းများ ထပ်မံမြင့်တက်လာနိုင်ခြေကို မျှော်မှန်းပြီး ဈေးကွက်သို့ ရောင်းချရန် နှောင့်နှေးနေဖွယ်ရှိသည်ဟု လေ့လာဆန်းစစ်သူများက ပြော ဆိုလျက်ရှိသည်။ ထို့အပြင် ရထားပို့ဆောင်ရေးလုပ်ငန်းများ နှောင့်နှေးကြန့်ကြာမှုရှိပြီး ပြောင်းသီးနှံ ထုတ်လုပ်သော မြောက်ပိုင်းဇုန်နယ်မြေမှ သုံးစွဲမှုပြုသည့် တောင်ပိုင်းဇုန်နယ်မြေများသို့ သယ်ယူပို့ ဆောင်မှုကို အဟန့်အတားပြုလျက်ရှိရာ ဈေးနှုန်းထပ်မံမြင့်တက်မည့် ဖိအားများရှိနေသည်ဟု Guangda Futures ကုမ္ပဏီက အစီရင်ခံ တင်ပြထားသည်။

     Dalian ကုန်စည်စတော့အိတ်ချိန်း၌ ဈေးကွက်ပိတ်ချိန်တွင် ပြောင်းသီးနှံ ကြိုတင်အရောင်း ဈေးနှုန်းသည် တစ်တန်လျှင် ယွမ်ငွေ ၂၂၂၀ (၃၁၂ ဒေါ်လာ) နှုန်းသို့ ရောက်ရှိခဲ့ပြီး ဈေးကွက်အတွင်း အတက်ဘက်သို့ ဦးတည်နေခြင်းကို ပိုမိုတွန်းအားပေးခဲ့ကြောင်း UkrAgroConsult သတင်းဝက်ဘ် ဆိုက်က နိုဝင်ဘာ ၂၄ ရက်နေ့၌ ဖော်ပြခဲ့သည်။

 Source: UkrAgroConsult, 24 November 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)