“ခဝဲသီးများဈေးကောင်းရ၍စိုက်ပျိုးမှုများလာ”

          မန္တလေးတိုင်းဒေသကြီး၊ကျောက်ဆည်ခရိုင်သည်ဆည်ရေသောက်ဒေသတစ်ခုဖြစ်သောကြောင့် သီးနှံမျိုးစုံ စိုက်ပျိုးလျက်ရှိရာ တစ်နှစ်ပတ်လုံး စိုက်ပျိုး၍ရသော စပါး၊ ပဲ၊ ပြောင်း သီးနှံများအပြင် စားဖိုဆောင် သီးနှံများဖြစ်သော ငရုတ်၊ ကြက်သွန်သီးနှံများကိုလည်း စိုက်ပျိုးလျက်ရှိပါသည်။ ၎င်းသီးနှံများအနက် ခဝဲသီးသီးနှံကိုလည်း တောင်သူများမှ တစ်နိုင်တစ်ပိုင်မှ စီးပွားဖြစ်စိုက်ပျိုး လာကြပါသည်။ ခဝဲသီးစိုက်ပျိုးရာတွင် မျိုးအနေဖြင့် ခဝဲပုမျိုးနှင့် ခဝဲရှည်မျိုးဟူ၍ (၂)မျိုးရှိကြောင်း၊ ခဝဲပုမျိုးသည် ဗမာမျိုးဖြစ်ပြီး ခဝဲရှည်မျိုးသည် ထိုင်ဝမ်မျိုးဖြစ်ကြောင်း၊ အများဆုံးစိုက်ပျိုးသော မျိုးမှာ ခဝဲရှည်မျိုးဖြစ်ပြီး စိုက်ပျိုးရာတွင် စင်ခံ၍ စိုက်ပျိုးရကြောင်း၊ အများဆုံးစိုက်ပျိုးသော ရွာများမှာ ပင်တလယ်၊ ကျောက်ခုံရွာများတွင် အများဆုံးစိုက်ပျိုးကြကြောင်း၊  တစ်ဧကမျိုးအသုံးပြုမှုအနေဖြင့် (၅)ထုပ်မှ (၆)ထုပ်ကုန်ကျကြောင်း၊ မျိုးတစ်ထုပ် ဈေးနှုန်းအနေဖြင့် (၅၅၀၀-၆၅၀၀)ကျပ်အထိ ဝယ်ယူစိုက်ပျိုးရပြီး မျိုး၊ သွင်းအားစု၊ တိုင်ထောင်ဝါးများအပါအဝင် စုစုပေါင်း ကုန်ကျစရိတ်မှာ (၁၅၀၀၀၀၀/-)ကျပ်ခန့် ကုန်ကျကြောင်း၊ စိုက်ပျိုးပြီး တစ်လခွဲခန့်တွင် ရောင်းတန်းဝင် အသီးများ ရရှိကြောင်း၊ တစ်ဧက ပိဿာ(၂၀၀၀)ခန့် ထွက်ရှိကြောင်း၊ ခဝဲစိုက်ပျိုးချိန်အကောင်းဆုံးမှာ မိုးတွင်းကာလဖြစ်သော ဇွန်၊ ဇူလိုင်လများတွင် စိုက်ပျိုးလျှင် ပိုမိုဖြစ်ထွန်းကြောင်း၊ ခဝဲသီးဈေးနှုန်း အနေဖြင့် တစ်ပိဿာလျှင် လက်ကားဖောက်သည်ဈေး (၁၈၀၀/-)ကျပ်ဖြင့် ရောင်းချပေးပြီး လက်လီတစ်ပိဿာလျှင် (၂၀၀၀-၂၅၀၀)ကျပ်အထိ ရောင်းချလျက်ရှိကြောင်း၊ ခဝဲသီးကို လူတိုင်း ကြိုက်နှစ်သက်ကြပြီး ခဝဲဟင်းချို၊ ခဝဲသီးနှင့် ကြာဇံကြော်၊ အတို့အမြှုပ်အဖြစ်လည်း စားသုံးကြ ကြောင်း၊ ခဝဲသီးစားသုံးခြင်းဖြင့် ကိုယ်အလေးချိန်ထိန်းညှိပေးခြင်း၊ အရိုးပွရောဂါကို ကာကွယ်ပေး ခြင်းနှင့် နှလုံးကို ကျန်းမာစေကြောင်း လေ့လာသိရှိရပါသည်။ ခဝဲစိုက်ပျိုးခြင်းဖြင့် ကုန်ကျစရိတ် သက်သာပြီး စီးပွားဖြစ်ဝင်ငွေတိုးကြောင်း တစ်ဧကကုန်ကျစရိတ်နှုတ်ပြီး (၁၅၆၀၀၀၀/- )ကျပ်ခန့် မြတ်ကြောင်း ခဝဲဈေးကောင်းမွန်သောကြောင့် တောင်သူများအကျိုးအမြတ်ဖြစ်ထွန်းကြောင်း ခဝဲစိုက်ပျိုးသော တောင်သူတစ်ဦး၏ ပြောကြားချက်အရသိရှိရပါသည်။

DOCA(မန္တလေး)