“ ကွမ်းခြံကုန်းမြို့နယ် ဆေးဆိုင်များတွင် စံမညီဆေးဝါးရောင်းချမှုရှိ/ မရှိကွင်းဆင်းစိစစ်ခြင်း ”

         ရန်ကုန်တိုင်းဒေသကြီး၊ တွံတေးခရိုင်၊ ကွမ်းခြံကုန်းမြို့နယ်၊ ပြည်သူ့ကျန်းမာရေးမှ ဦးဆောင်ပြုလုပ်သော စံမညီဆေးဝါး (Fluximed Hard Gelatin Capsule)အမှတ်တံဆိပ်ဆေးဝါးများရောင်းချနေမှုရှိ/ မရှိ ကွင်းဆင်းစစ်ဆေးခြင်းအား စက်တင်ဘာလ(၁၁)ရက်နေ့၊ နံနက် (၀၉:၃၀)နာရီအချိန်တွင် ပူးပေါင်းအဖွဲ့ဖြင့် ဆေးဆိုင်များသို့ ကွင်းဆင်းစိစစ်ခဲ့ကြောင်း သိရှိရသည်။

          ထိုသို့ ကွင်းဆင်းစိစစ်မှုများ ဆောင်ရွက်ရာတွင် ကွမ်းခြံကုန်းမြို့နယ် ပြည်သူ့ကျန်းမာရေး ဦးစီးဌာန၊ အမျိုးသမီးကျန်းမာရေး ဆရာမဒေါ်သန်းသန်းစိုး၊ မြို့နယ်စည်ပင်သာယာရေးအဖွဲ့ စာရင်းကိုင်-၃အဆင့် ဒေါ်ခိုင်သဇင်၊ မြို့နယ်စားသုံးသူရေးရာဦးစီးဌာန မြို့နယ်တာဝန်ခံ ဒေါ်နွယ်နွယ်အေးနှင့် ဝန်ထမ်းများတို့သည် ကွမ်းခြံကုန်းမြို့နယ် ဈေးပိုင်းရပ်ကွက်အတွင်း ရောင်းချသော ဦးထွန်းဝေဆေးဆိုင်၊ ရာပြည့်ဆေးဆိုင်၊ အေးမေတ္တာဆေးဆိုင်၊ ကောင်းမြတ်ချမ်းသာဆေးဆိုင်၊ ကံကြီးမကျီးရပ်ကွက်တွင် ရောင်းချသော ထွန်းဝေဆေးဆိုင်၊ ဦးစံရွှေ+ ဒေါ်တင်အိ ဆေးဆိုင်တို့တွင် အိန္ဒိယနိုင်ငံထုတ် Medice Remedies Ltd Indiaမှ ထုတ်လုပ်သော Fluximed Hard Gelatin Capsule အမှတ်တံဆိပ် စံမညီဆေးဝါး ရောင်းချမှုရှိ/ မရှိ စစ်ဆေးခဲ့ကြောင်း သိရသည်။

         အဆိုပါ ကွင်းဆင်းစစ်ဆေးရာတွင် ပြည်သူ့ကျန်းမာရေးဦးစီးဌာန ကျန်းမာရေးဆရာမ ဒေါ်သန်းသန်းစိုးက ဖော်ပြပါဆေးဝါးသည် အစားအသောက်နှင့်ဆေးဝါးကွပ်ကဲရေးဦးစီးဌာန (FDA)မှ စံမညီဆေးဝါးအပြင် သတ်မှတ်ထုတ်ပြန်ထားခြင်းဖြစ်ရာ ယခုစစ်ဆေးချိန်တွင် မတွေ့ရှိသော်လည်း နောင်တွင်လည်း ဝယ်ယူတင်သွင်းရောင်းချခြင်းမပြုလုပ်ကြရန် စားသုံးသူရေးရာဦးစီးဌာန မြို့နယ်တာဝန်ခံ ဒေါ်နွယ်နွယ်အေးက ဆေးဝါးများ ပြတ်လပ်မှုမရှိစေရေး၊ ဈေးနှုန်းမြှင့် တင်ရောင်းချမှုမရှိစေရေး၊ ဈေးကစားရန်ရည်ရွယ်ချက်၍ သိုလှောင်ထားခြင်းများမပြုလုပ်ကြရန် လုပ်ငန်းရှင်များနှင့် တွေ့ဆုံဆွေးနွေး ကွင်းဆင်းစိစစ်ခဲ့ကြောင်း သိရှိရပါသည်။

DOCA(ရန်ကုန်)